Dibandu 33

Israel ubengusana ebengusini Esau

1Jacob amabuaga misu na amalabilila Esau uruga eruyi na kama jina tsibabaala Amatandiga batu bandi, diwendi rie: Lea, Rachel na baviga bogu babeji. 2Amaviosa baviga na baana va gusu mbana Lea na baana bandi bamabaduka mbana Rachel na Joseph bamaba va nsima. 3Jaʼ beni amaba va gusu ogu; amagudama va tsi yisambuali yikumbu te na amabambana na muana nguji andi. 4Tumba Esau amaweʼ mbangu uyemubengusana; amamubumba na amamuviunga mu kingu. Bamalila. 5Esau anobuaga misu amalabilila bagetu na baana, amawivula Jacob rie: Abana banyi? Jacob amawagula rie: Baana aba Nsambi amapega. 6Baviga bamakweka na baana bogu wandi, jogu wogu bamagudama; 7Lea na baana bandi bamakweka wandi, bamagudama; mbana Joseph na Rachel bamakweka na jogu wogu bamagudama. 8Esau amawivula rie: Yi guirondi uvaga na yinombu yieni yiotsu ayitsibenguna nami? Jacob amawagula rie: Yiulasulu yingeba yifumu ami. 9Esau amavosa rie: Muana nguji ami nyina bipuela; ndeʼ beni gukakelisa abiagu. 10Jacob amawagula rie: Nesi, kokolu tsiagu singa bima bieni biotsu; ngensa yibenguna yijetu nagu yivu nderi nyimabenguna na Nsambi sinsa viri nana gutsindilila na nsangu. 11Kokolu singa bibulu biami abi nyimagutindila mu mbari Nsambi amambasa na maboti na ngegambu na yima.

Amamugoma te na Esau amasinga. 12Esau amavosa rie: Tʼwendi, nyurela o gusu agu mu nsila.

13Jacob amamuwagula rie: Guijabi yiri baana basakaba na mangolu na nyina bindombu na bangombi abinuisi; pa tubatsoyisa na muendu mu yilumbu yimosi migamba miotsu miufu. 14Ndeʼ relanga, menu nyuyenadukanga va gegeyi, nyuduka dedi na muendu umugamba aguba va gusu ami na muendu ubaana te na nyutola ombu gagu o bulongu buSeir.

15Esau amavosa rie: Nyusila batu bami bamosi nagu. Jacob amawivula rie: Dibandu yi? Dimosi buandi nyimaronda udilu na nsangu nagu! 16Muna yilumbu yieni Esau amayenagabuga o Seir. 17Jacob amawenda o Soukot. Amarunga ndagu andi na amarunga bivanga bimigamba miandi. La dibandu bamaluyila mbura eni Soukot.

Israel utsana etsani o yiari yiSichem

18Ava Israel amarambuyila o Mesopotamie amatola na nsangu o musiengi uSichem o bulongu buCanaan na amavaga milaku miandi bebeli na musiengi. 19Amasumba yiasi yimusiru ayi amarangiyila ndagu andi jitsanda, amayisumba ombu bategula baHamor, taji Sichem, dufunu du-uonyi dumaba kama mbongu tsilora jivema. 20Avana amarungila yinyensulu yipagu ayi amaluga Nsambi Israel.

Currently Selected:

Dibandu 33: PUU1992

Highlight

Copy