Dibandu 34

Simeon na Levi ugabusa begabusi pila jiyibusi yiogu agumabivusu

1Yilumbu yimosi Dina, muana mugetu agu Lea amaburila Jacob, amawenda uyelaba bagetu nandi. 2Sichem muana dibaala uHamor, muana dibaala usefu bulongu bueni amamulabilila. Amamutsotsa ufubana yitsiga nandi, diwendi rie: amamubivisa. 3Amanyungila Dina muana Jacob; amamuronda tindi uronda na amaronda yiri bofubana mirima. 4Sichem amaruma taji andi Hamor rie: Kwelili muana mugetu egugu.

5Jacob amagulu yiri Sichem amabivisa muana andi Dina; va temu eni baana bandi bababaala bamaba o musiru ukelisa migamba miandi, kabogu Israel amaba sui te na bamaruga.

6Hamor, taji Sichem, amawenda ombu Jacob uyevosa nandi. 7Vana temu eni baana bababaala baJacob bamaruyila o musiru; banogulu yiri bamalensu bamanyoga kabu jineni mu mbari Sichem amavayila baIsrael nsoruru ava amafubinina yitsiga na muana mugetu uJacob, adina disamaba diwelimina nogu. 8Hamor amabatsingula rie: Sichem muana ami udibaala amafubana murima na muana enu umugetu; kokolu tsienu muwetsianu nandi. 9Tubianu na dinami; jenu dutuvega baana benu babagetu na jetu wetu tuduvega abetu. 10Jenu dutsananga netu, bulongu buba abuenu; tsananu muna na busalianu nodila busina muna.

11Sichem amatsingula taji na baana banguji baDina rie: Pa duinsingi na mawela nyuduvega biotsu abi dukwivula. 12Tubulilianu dufunu nesi durangu nesi na bikoka bineni, nyuvega biotsu abi duponda; tumba nsingianu na mawela.

13Baana babaala baJacob bamatabula diambu udunsa Sichem nalaji andi Hamor mu mbari Sichem amabivisa yibusi yiogu Dina. 14Bamabatsingula rie: Tugorungula uvega yi-busi yietu ombu dibaala adisarebu: adina divu nsoruru ombu getu; 15turungula usinga diambu diagu pa guisingi uba nana jetu, diwendi rie: jenu babaala durebu. 16Mbana turungula uduvega baana betu babagetu na jetu wetu turungula ubonga baana benu babagetu; tutsananga nenu, tubianu yika dilongu dimosi. 17Tumba pa dugesingi urebu tubonga muana etu umugetu noyenawenda.

18Posulu tsieni tsimalasa Hamor na muana andi Sichem ubueji. 19Mufudu eni asamatsikadana uvaga adi bamamutsingula mu mbari amarondanga muana mugetu uJacob. Sichem amayitsu uviolila botsu mu ndagu taji andi, 20kabogu jogu na taji andi Hamor bamawenda o dikotulu dimusiengi ogu na bamatsingula bisi musiengi rie: 21Batu bebaba bavu bawelimina utsana o bulongu buetu: batsaningi; basalingi netu, bulongu buvu buwelimina na jetu botsu. Jetu tuwela baana bogu babagetu, jogu wogu bowela baana betu babagetu. 22Tumba babaala beni bagogaru utsana netu noba dilongu dimosi netu pa babaala botsu basakarebu nana jogu beni bavu barebu. 23Migamba miogu na biogu biotsu na biruitsi biogu bigoba bietu? Tusingianu duiebu adu beturumi yiri botsana netu.

24Botsu abamarugao dikotulu dimusiengi bamagulu Hamor na muana andi Sichem, kabogu botsu bamasinga urebu, diwendi rie: babaala botsu bamusiengi. 25Mu yilumbu yimurieru ava babaala beni bamalabila maguga, baana bababaala babeji baJacob; Simeon na Levi, baana banguji baDina bamabonga majenga mogu bamayesutusu bisi musiengi abamatasa rie: Tuji sui; bamaboka babaala botsu. 26Bamaboka Hamor na muana andi Sichem wandi; mbana bamapalisa Dina o ndagu Sichem na bamayenawenda.

27Baana bababaala baJacob bamayevula bamfumbi na bamayekinda musiengi mu mbari yibusi yiogu yimabivusu. 28Bamabonga bindombu biogu na binsabi biogu na bangombi bogu na baburu bogu, diwendi rie: biotsu abimaba nogu nesi o misiengi nesi o musiru. 29Bamayenabega bima biotsu na baana bogu bageyi na bagatsi bogu na biotsu abimakindu bindagu.

30Mbana Jacob amatsingula Simeon na Levi rie: Dumatombisa diambu, bisi bulongu bonsama nesi bisi Canaan nesi bisi Pherezie. Pa bisi malongu meni bogungasana uyitoyisa bomboka nyina yika mua pesu babaala; nyubungu na bisi ndagu ami wandi.

31Jogu bamawivula rie: Yibusi yietu yiugengulungu nderi yimbembu?

Currently Selected:

Dibandu 34: PUU1992

Highlight

Copy