Luc 10
10
Jesus usindiga esindiyi magumidusambuali na badukitsi babeji uyenalonsanga
1Mbana Fumu amasola magumidusambuali mababaala na babaala babeji basusu. Amabasindiga babeʼ babeji o gusu andi o misiengi miotsu no mbura tsiotsu atsi mbe jaʼ beni olingula. 2Amabatsingula rie: Digumba divu dineni tumba basalitsi bagatsi udigumbiyila. Kabogu wivulanu basalitsi basusu ombu Fumu agudila digumba dieni. 3Wendanu! Nyidusindiyi nderi duvu bindombu va gari baminsi. 4Duyalinga na mbongu vo komi vo bapondu na duyaba na bitsiku mu nsila. 5Mu ndagu tsiotsu atsi duikoti bagabilianu miula. 6Pa mutu oyitsani vana esingi mula enu ka tsananu tumba pa atsibusa, mubusianu wandi. 7Tsananu o ndagu eni; jianu na nuanu abi boduvega mu mbari musalitsi awelimina na futa andi. Duyaleba. 8Mu misiengi miotsu ami bodudila jianu abi boduvega 9na belusanu bibedu biogu na batsingulianu rie: Durumu duNsambi duka bebeli. 10Tumba mu misiengi ami bagodudila, palanu va dulombili nowansa muansu rie: 11Tugomueruga va dimbu dienu tumba jabanu yiri Durumu duNsambi duka bebeli. 12Nyidutsinguli rie: Mu yilumbu yimufundu bisi musiengi eni bokilusu uviolila bisi Sodome.
Misiengi amimabusa ugulu
(Matt 11.20-24)
13Ka muna maguga ma jenu bisi Chorazin dulaba! Ka muna maguga ma jenu bisi Bethsaida dulaba! Mbe bimaga abimavagu ombu genu bimavagu ombu bisi Tyr na bisi Sidon jogu mbe bamakalula diela nesi udiiara siela nogolana dibufu. 14La dibandu mu yilumbu yimufundu jenu dukilusu uviolila bisi Tyr na bisi Sidon. 15Jenu bisi Capernaum, dukematisa te no julu? Dusundusu, diwendi rie: dubuagu te na o mbura jiabafu.
16Amavosa na badukitsi bandi rie: Jandi oyidugulu ekulu na jandi oyidubusi embusi; oyimbusi ebusi jandi omansindiga.
Magumidusambuali na babeji ugabuga begabuyi
17Magumidusambuali na babaala beni babeji bamagabuga na nsangu jineni. Jogu rie: Fumu ne binyunyi bibi bitsitudedila ava tutsibirumina mu diina diagu.
18Jesus amabatsingula rie: Nyimalaba Satan ava ebonduyili nana dusiemu. 19Guluanu, nyimaduvega mangolu utsiarila banyoga na bakuru nesi ubetsa muvinitsi; vagaa diambu adiurungula udulasa maguga. 20Tumba duyalaba nsangu mu mbari binyunyi bibi bitsidudedila, labanu nsangu mu mbari miina menu mamasonugu o julu.
Jesus usangila esangili
(Matt 11.25-27; 13.16-17)
21Diweru dieni Jesus amagaangu na nsangu jineni ajimaruyila ombu Yinyunyi yiNsambi. Amavosa rie: Nyiguyitsi Tata, Fumu julu na butamba! Nyigabusili diboti mu mbari gumalasa mambu memama ombu bifufu na gumamasuega bango diela.
22Nyiina, Tata ami amapega musuga uotsu. Ne mutu mosi agejabi nana Muana avu yika Tata na mutu agejabi nana Tata avu yika Muana na jogu aba jaʼ beni omujabisa.
23Jesutf amageluga ombu badukitsi bandi na amavosa fundu nogu rie: Ka muna ubueji gu jenu aduilabi mambu memama duilabi! 24Nyidutsinguli yiri babiyitsi bapuela na bakaga bamaronda ulaba ama jenu duilabi tumba basamamalaba; bamaronda ugulu ama jenu duigulu tumba basamamagulu.
Nongu jimuisi Samarie
25Mulonsi umosi umigaga amaronda uweliga Jesus kabogu amavosa rie: Mulonsi, yi nyuvaga udila monyu umutubu? 26Jesus amamuwivula rie: Diambu yi dimasonugu mu migaga? Yi guigulu ava guirangili?
27Amagabusila rie: Ronda Fumu Nsambi agu na murima agu uotsu na matasa magu motsu na mangolu magu motsu na ronda mutu nagu nana guikerondila.
28Jesus amamutsingula rie: Gutsiwagula buranga, vaga nana na gudila monyu.
29Tumba jandi amaronda ukevega ndunga kabogu amawivula Jesus rie: Mutu nami la nyi?
30Jesus amawagula rie: Mutu amarambuyila o Jerusalem uwenda o Jericho. Amagaangu na bikongu abamamuvula tsanda: bamamunemisa mapura; bamayenawenda na bamamusila afu. 31Muvagulitsi upagu amavioga mu nsila eni, anomulaba amavioga kuasa. 32Muisi Levi amatola va mbura eni anomugengila, jaʼ wandi amavioga kuasa. 33Muisi Samarie amalinga mu nsila eni wandi, anomurasuna vana amagaangu na yingeba. 34Amasusa mapura mandi na matsi na malamu na amamatunga. Mbana amamunangiga va julu yibulu yiandi; amamubega o ndagu benyi na amayemukelisa buranga. 35Ava kedi amavega fumu ndagu benyi mbongu na amavosa rie: Mukelisi buranga na atsi gufuta va julu nyugufutila ava nyuruyila.
36Jesus amamuwivula rie: Va gari jogu botsu barieru anyi amamulasa yiri aji mutu nandi?
37Mulonsi umigaga amawagula rie: Jandi omamuwamusa.
Jesus amamutsingula rie: Wendanga, vaga munongu mosi.
Jesus ombu Marthe na Marie
38Jesus na badukitsi bandi bamamuelinga. Ava bamapalila va dimbu dimosi, mugetu, diina diandi Marthe amabadila o ndagu andi. 39Muana nguji andi Marie amatsananga yika utsana va gusu Fumu ugulungu mambu mandi. 40Marthe amalaba uvura mu mbari amaba na bisalu bipuela. Amawenda ombu Jesus novosa rie: Fumu, divu diwelimina yiri muana nguji ami ansili na bisalu biotsu? Mutsinguli akwamusi.
41Fumu amamugabusila rie: Marthe, Marthe, guitsirisi murima na guiketsoyisa puela 42tumba diambu dimosi buandi divu diwelimina. Marie amasola dikabu diwelimina adigomupatulu.
Currently Selected:
Luc 10: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
