Luc 9
9
Jesus usindiga esindiyi digumi na badukitsi babeji uyenalonsanga
(Matt 10.5-15; Marc 6.7-13)
1Jesus amabengusana digumi na badukitsi bandi babeji va mbura mosi na amabagabila mangolu na musuga upalisa binyunyi bibi nobelusa bibedu. 2Amabasindiga yiari na yiari uyenasamuna Durumu duNsambi nobelusa bibedu. 3Amabalonsa rie: Ava duilingili duyabega yima: ne duvengu ne komi ne biguji ne bikutu bisusu. 4Mu mandagu ama dukota, tsananu muna na amuna durambuyila wandi. 5Pa batu bagedudili ka gusuganu mu musiengi eni na bagandilianu rie: Tugomueruga gunu; dionyi diubalubusa. 6Badukitsi bamasogama na bamayenawendanga o misiengi miotsu uyenasamunanga Musamu Uboti noyenabelusanga bibedu yiari nayiari.
Ukambuiu uHerode
(Matt 14.1-12; Marc 6.14-29)
7Herode murumitsi uGalilee amagulu motsu amamavagungu; amakambulu mu dionyi mu mbari batu bamavosa puela mambu. Bamavosa rie: Kabogu Jean Baptiste amarambuga o dufu.
8Tumba basusu bamawaka rie: Tsiri jandi, Elie amamuelabana.
Na basusu bamavosa rie: Mubiyitsi ukala amarambuga o dufu.
9Herode amavosa rie: Nyimatabusa Jean muru tumba dibaala diedidi adi nyigulu misamu miemimi anyi?
Kabogu amarombanga ulaba Jesus.
Jesus ulisila elisili tosini yiranu tsibabaala
(Matt 14.13-21; Marc 6.30-44; Jean 6.1-14)
10Bilumbi bamagabuga na bamatsingula Jesus motsu amamavagu. Bamawenda o yiari ayinengulu Bethsaida, mua vala na batu. 11Batu banodigulu bamabaduka. Jesus amabasayimina na amabalonsa mambu maDurumu duNsambi na amabelusa jogu abamabelanga. 12Ava tsisiga digumi na badukitsi babeji bamatsingula Jesus rie: Baganini yiri bayenawenda o mimbu nesi o masaku uyenaromba bilatsi mu mbari mbura ejiji jigaa na yisalu.
13Jesus amabawagula rie: Jenu beni baveyianu biguji.
Tumba bamamuwaka rie: Tuna yika mapa maranu na banyama bamamba babeji. Guirondi yiri tuwenda uyesumbila batu bebaba biguji? 14(Vamaba tosini yiranu tsibabaala.) Jesus amatsingula badukitsi bandi rie: Batsanisianu, diguki diguki magumara-maranu. 15Badukitsi bamamugululu kabogu bamabatsanisa. 16Mbana Jesus amabonga mapa maranu na banyama bamamba babeji; anobuaga misu o julu amagabusila Nsambi diboti mu diambu dibiguji. Mbana amabitabula na amabivega ombu badukitsi ubigabila batu. 17Botsu bamaji na bamagukuru. Bibuku abimasialulu bimabasa digumi na ponsi beji.
Pierre utubula etubuli yiri Jesus aji Christ
(Matt 16.13-19; Marc 8.27-29)
18Yilumbu yimosi ayi Jesus amasambila pinsa badukitsi bandi bamamurasuna. Amabawivula rie: Yi batu beposili?
19Bamawagula rie: Bamosi bevosi yiri guji Jean Baptiste. Basusu bevosi yiri guji Elie na basusu yiri guji mubiyitsi ukala agumarambuga o dufu.
20Amabawivula rie: Tumba jenu yi duitasi?
Pierre amamugabusila rie: Guji Christ agumaruyila ombu Nsambi.
Jesus ebalonsi nana ofuila na nana orambuyila
(Matt 16.20-28; Marc 8.30-38; 9.1)
21Jesus amabaruma rie: Duyaditsingula batu. 22Amabuela rie: Muana Mutu olaba maguga maneni; bivunda na bavagulitsi bapagu na milonsi mimigaga bomubusa. Va julu vana oboku na orambuga o dufu mu yilumbu yimurieru.
23Mbana amavosa ombu botsu rie: Pa mutu etondi alebusa mandi motsu nonangula kurusu andi yilumbu na yilumbu nondukanga. 24Mu mbari oyirondi ukegobula otsiemuga tumba oyikevega mu diambu diami ogobulu. 25Ne pa mutu odila bulongu buotsu tumba otsiemuga vo ubungana, ubueji uka? 26Pa mutu olaba yisonyi mu diambu diami, Muana Mutu wandi omulasa yisonyi ava oruyila ulasa bundumba buandi na buTata na bubiansa biNsambi. 27Dingensa nyidutsinguli rie: Bamosi abavu vava bagolefu te na Durumu duNsambi dujabunu.
Dunyuru duJesus duikaluyi
(Matt 17.1-8; Marc 9.2-8)
28Jesus anovosa mambu meni bamaletsana tsona mosi mbana bamawenda jogu botsu na Pierre na Jacques na Jean uyesambila o julu mukongu. 29Ava amasambilila yinsi yiandi yimakaluga na yiduaru yiandi yimavedama vedi vedi. 30Sundila vamalabana babaala babeji umoga bemoyi na Jesus; diwendi rie: Moise na Elie bamamurasuna na bundumba bumabalulila. 31Bamamoga na Jesus mu diambu didufu adu ofuila o Jerusalem. 32Pierre na bambatsi bandi mbe baki bilu tumba banorambuga bamalaba bundumba buJesus na bubabaala beni abamaba nandi. 33Yika babaala beni bewendi, Pierre amavosa na Jesus rie: Fumu diboti yiri tubianu vava. Turungianu mirorombi mirieru: umosi aguagu, umosi agu Moise na ususu agu Elie. (Asamajaba adi amavosa.) 34Ava amavosila nana dimungi dimasunda na dimabagumba, badukitsi bamagaangu na goma. 35O gari dimungi umagulunu diufi adimavosa rie: Agugu la Muana ami agu nyimasola. Mugululuanu! 36Diufi dieni dinovola bamalaba yika Jesus buandi. Mu temu eni badukitsi basamatsingula batu adi bamayelaba.
Jesus ubelusa ebelusi muana udibaala aguvu na yinyunyi yibi
(Matt 17.14-18; Marc 9.14-27)
37Kedi banovindama mukongu batu bapuela bapuela bamabengusana Jesus. 38Va gari ogu vamaba dibaala adimagamuga rie: Mulonsi, kokolu tsiagu, lasa muana ami yingeba mu mbari ngaa ususu. 39Sundila yinyunyi yibi yimugaangingi, yigamuyingi mbana yimututusingi te na epalisingi difuitsa; yimunemisingi na yigegarungu umudunda. 40Nsiwivula badukitsi bagu uyipalisa tumba bagaarungula. 41Jesus amawaka rie: Ka muna pagu ji! Duna mirima migala. Nyisakatsinga nenu? Nyurungula uwarila kulini tsienu? Bega muana.
42Ava muana aki mu nsila utola ombu Jesus yinyunyi yibi yimamuberusa na yimamututusa na mangolu. Jesus anosiemba yinyunyi yibi amayipalisa mbana amagabusa muana ombu taji andi. 43Mbana botsu bamakakisa buneni buNsambi nesi mangolu mandi.
Jesus ubuesa ebuesi uvosa diambu didufu na durambugu duandi
(Matt 17.22-23; Marc 9.30-32)
Botsu bamakambulu ulaba motsu ama Jesus amavaganga, kabogu Jesus anodigulu amavosa na badukitsi bandi rie: 44Guluanu adi nyudutsingula rie: Muana Mutu olasumaguga na batu. 45Tumba basamatsiyisa adi evosi; dimabasueyila yiri bagotsiyisa na bamalaba goma umuemuwivula bivu.
Anyi avu muneni?
(Matt 18.1-5; Marc 9.33-37)
46Badukitsi bamaba na musosi mu mbari bamagalana buneni. 47Jesus anodijaba amabalasa muana ugeyi novosa rie: 48Uotsu oyidili muana gugu ugeyi mu diina diami endili wandi; uotsu endili edili jandi omansindiga. Anyi avu muneni? Tsiri jandi aguvu ugeyi?
Agugaa na kueru nenu aji mutu enu
(Marc 9.38-40)
49Jean amavosa rie: Mulonsi, tutsilaba mutu aguipalisi binyunyi bibi na mangolu madiina diagu; tutsimugandisa mu mbari agaanetu.
50Tumba Jesus amamugabusila rie: Duyamuemugandisa mu mbari ogaa na kueru nenu aji mutu enu.
Bisi Samarie bebusi Jesus
51Jesus anojaba diweru adi omata o julu yika utola dikatola amagana kaka ulewenda o Jerusalem. 52Jesus amaretsa bilumbi uyemukunsila mbura o musiengi uSamarie. 53Tumba batu abamatsana vana bamabusa ubadila mu mbari bamajaba yiri o Jerusalem bewendi. 54Jacques na Jean banodigulu bamawivula rie: Fumu, guirondi yiri turuma muji ubonduga o julu nobasielasana?
55Jesus amageluga ombu gogu na amabasiemba. 56Kabogu bamawenda o musiengi ususu.
Batu mbe baronda uduka Jesus
(Matt 8.19-22)
57Ava bamabila mu nsila mutu amatsingula Jesus rie: Nyirondi uwenda nagu mbura tsiotsu atsi guwendanga.
58Jesus amamugabusila rie: Bandetsi bana bapuiti na batsoli bana muva tumba Muana Mutu agaa na mbura usilimina.
59Ombu ususu Jesus amavosa rie: Nduki.
Tumba mutu eni amawagula rie: Kokolu Mulonsi, nyirondi ulebuaga mfumbi,
60Jesus amamuwagula rie: Dunda, abamafu jogu botsiga bamfumbi bogu; Tumba ndeʼ, wenda nosamuna mambu maDurumu duNsambi.
61Ususu amavosa rie: Mulonsi, nyirondi uwenda nagu tumba nyileyeganina batu bami.
62Jesus amamugabusila rie: Jandi oyibandi yisalu na magebu agaa uwelimina ujaba Durumu duNsambi.
Currently Selected:
Luc 9: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
