Luc 14
14
Jesus ubelusa ebelusi yibedu
1Yilumbu yitsona Jesus amawenda ombu yivunda yimosi yimuJuif agumaba muPharisie uyeji. Botsu abamaba vana bamaba liyiyi ulaba adi Jesus ovaga. 2Mutu agumaba na buali burandanga amabegu ombu gandi. 3Jesus amawivula milonsi mimigaga na baPharisie rie: Mugaga etu uiveyi musuga ubelusa mutu yilumbu yitsona? 4Bamabusa uwagula ne dimosi kabogu Jesus anobemba mutu eni amamubelusa mbana amamuganina. 5Anomana udivaga amabawivula rie: Je pa muana agu obonduga o yiduna yilumbu yitsona gugomupalisa? Je pa ngombi agu jiubonduga o yiduna yilumbu yitsona gugojipalisa? 6Na jogu basamamuerungula uwagula.
Yisagumunu na ukesunsa
7Jesus anolaba nana abamanengulu bamasolila bitsiga biboti bibatu baneni amababuayila nongu ejiji rie: 8Ava mutu ogunengilila o mulambu udiwela guyasundila utsana va yitsiga yimutu muneni. Tanguji aguvu muneni uviolila ndeʼ amanengulu wandi. 9Mbana omagunengila oruga novosa nagu rie: Muveyi yitsiga yiagu. Mbana gulaba yisonyi uyetsana va yitsiga yimutu ugeyi. 10Kabogu ava gunengululu letsana va yitsiga yimutu ugeyi mbana otsigunengila ovosa nagu rie: Dibandu yi guitsanini vana? Vioga va yitsiga ayina. Adina diulasa duyitsu duagu ombu botsu abamanengulu. 11Mu mbari uotsu oyikematisa osundusu na uotsu oyikesundusa omatusu.
12Mbana Jesus amalonsa omamunengila rie: Ava guilambili mulambu umuangulu vo utsisiga, guyanengila bambatsi bagu vo baana banguji bagu ne taji agu na nguji ne bisina nagu. Jogu boba na mangolu ugunengila munongu mosi. 13Kabogu ava guilambili mulambu nengila bijaga na bibomfi na bitsondu na bidunga. 14Mbana Nsambi ogugabila miula mu mbari bagorungula ugunengila. Nsambi ogugabusila motsu ava durambugu duabafu.
Nongu jimulambu uneni
(Matt 22.1-10)
15Mutu umosi agumaba va tavula nandi anogulu dionyi amavosa na Jesus rie: Ka muna ubueji gu jogu bolaba aboji va mosi na Nsambi ava Durumu duandi dujabununu! 16Jesus amamugabusila rie: Vamaba mutu agumalamba mulambu uneni; amanengila puela batu. 17Ava diweru diuji, amasindiga musalitsi andi utsingula abamanengulu rie: Wagulanu, biotsu bimakunsama. 18Mutu mutu amavega kokolu tsiandi. Mutu utega amavosa na musalitsi rie: Nyimasumba nungi kabogu nyuwenda uyejilaba, kokolu ngaa na temu. 19Ususu amavosa rie: Nyimasumba digumi dibangombi kabogu nyirondi ulaba nana besalili, kokolu ngaa na temu. 20Ususu amavosa rie: Nyibanowela la dibandu ngorungula uruga. 21Musalitsi anogabuga amatolisa misamu miotsu ombu fumu andi. Mbana fumu ndagu amanyoga na amaruma musalitsi rie: Lensa noyenanengila ne bijaga ne bibomfi ne bidunga ne bitsondu, diwendi rie: botsu abavu o dulombili. 22Mua temu jinovioga musalitsi amaruga novosa rie: Fumu adi gutsiruma dimavagu tumba vaki mbura. 23Kabogu fumu amalonsa musalitsi rie: Wenda ne vala nogoma botsu aba gulaba uruga yiri ndagu ami jiubasa. 24Nyidutsinguli rie: Vagoba ne umosi va gari jogu abamanengulu aguji biguji biami.
Adi mutu vengu ovaga pa erondi uba mudukitsi uFumu
25Batu bapuela bamafubana nsila na Jesus, anobagengila amavosa nogu rie: 26Oyirondi uba mudukitsi ami alevina taji andi na nguji andi nesi mugatsi andi nesi baana bandi nesi baana banguji bandi na vengu okevina wandi. 27Uotsu ogenanguli kurusu andi unduka agorungula uba mudukitsi ami. 28Pa mutu ana ditasa urunga oleranga motsu mbana ojaba yeri ana mbongu tsiwelimina umanisila yisalu. 29Pa tsi nana obanda yisalu ayi agorungula umana mbana botsu bomureka 30novosa rie: Labatianu mutu egugu amabanda urunga tumba agaa na mbongu umanisila yisalu! 31Pa kaga ana digumi ditosini tsibatu agowenda ubengusana kaga aguvu na magumabeji matosini pa asakalewiji motsu ujaba yeri ana mangolu utoga na kaga eni. 32Pa elabi yiri mangolu magaa mawelimina ava kaga jisusu akivu o vala omutindila yilumbi umuwivula rie: Yi ngavaga uvotsa nguba? 33Jesus amabuesa rie: Munongu mosi mutu uotsu oyirondi uba mudukitsi ami alesila biotsu abivu nandi.
Musayi agugaa na tsongu
(Matt 5.13; Marc 9.50)
34Musayi la yima yiboti tumba pa musayi umasambuga mutu orungula ugugabusila dueyi? 35Uisaa na yisalu yisusu yika ubuaga. Jandi oyigulu alubuyi.
Currently Selected:
Luc 14: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
