Luc 15
15
Nongu jiyindombu ayimatsiemuga na yimamuelabana
(Matt 18.12-14)
1Babongitsi balepu bapuela na bango bikumbu bamawenda ombu Jesus uyegulu mambu mandi. 2BaJuif abamaba baPharisie na milonsi mimigaga bamanyinga rie: Mutu egugu edili bango bikumbu na eji nogu! 3Kabogu Jesus amababuayila nongu ejiji rie: 4Ava mutu avu na kama bindombu na yimosi yimatsiemuga yi ovaga? Oyesila magumidufu na yifu o yivanga na oromba te na olaba yindombu ayimatsiemuga. 5Ava eyilabili, eyinanguli na eyibeyi na nsangu o ndagu andi. 6Mbana enengili bambatsi bandi rie: Ruganu tusangilianu mu mbari nyimalaba yindombu yiami ayimatsiemuga. 7Divu munongu mosi o julu ava muvayitsi masumu umosi ekalulili diela: vavu nsangu ajiviolila nsangu ajimalabana ombu magumidufu na yifu abamagobulu kala.
Nongu jidoli adumatsiemuga na dumamuelabana
8Ava mugetu avu na digumi didoli na otsiemusa dumosi yi ovaga? Obangisa lambi, ogombula ndagu na ogengila yiari na yiari te na odulaba. 9Ava edulabili enengili bambatsi bandi rie: Ruganu tusangilianu mu mbari nyimalaba doli adu nyimatsiemusa. 10Nyidutsinguli rie: Munongu mosi biansa biNsambi bisangili mu diambu dimuvayitsi umasumu umosi aguikaluli diela.
Nongu jimuana agumatsiemuga na amamuelabana
11Jesus amabuela rie: Vamaba mutu agumabura baana bababaala babeji. 12Agu ngebi amavosa na taji andi rie: Tata, peyi dikabu dibusina buagu adiuba adiami. Kabogu taji amabagabila abiandi. 13Mua bilumbu binovioga muana agu ngebi amasumbisa abiandi; anodila mbongu amayenawenda. Anotola o bulongu buvala amagungisa mbongu tsiandi. 14Anonyambasana tsiotsu, dungosu duneni dunsala dumaba o bulongu bueni kabogu amalaba maguga. 15Jandi amawenda uyetsana na muisi bulongu agumamusindiga o musiru uyekelisa bangulu bandi. 16Jandi mbe aronda uji abimabuagulu bangulu tumba mutu asamamugarusu. 17Anobanda uranga maguga mandi amatasa rie: Labati basalitsi abesadi na tata bana biguji bipuela na yika ufu nyifu na nsala! 18Nyugabuga ombu tata na nyumutsingula rie: Tata nyimavaga dibi va gusu Nsambi na va gusu agu. 19Nyisaa nyiwelimina unengulu muana agu; payi nderi musalitsi agu. 20Kabogu amasogama ugabuga ombu taji andi.
Mbe aki vala taji andi amamulabilila na amagaangu na yingeba; amawenda mbangu umubumba na amamufifa. 21Muana amamutsingula rie: Tata, nyimavaga dibi va gusu agu. 22Tumba taji amavosa na basalitsi bandi rie: Lensanu nobega yilinga ayiviolila ubueji na muduisianu; muduisianu moru na bapondu wandi. 23Beganu muana ngombi uvonga na ubokianu. Tujianu na tulabianu ubueji! 24Mu mbari labanu muana ami mbe amafu tumba amarambuga mbe amatsiemuga tumba amalabana. Botsu bamabanda usangila.
25Yivunda anoruyila o musiru amabarasuna vana; usiga besiyi bisigu na uyina beyini. 26Amanengila musalitsi na amamuwivula rie: Diambu yi? 27Musalitsi eni amawagula rie: Muana nguji agu amagabuga, taji agu atsibokisa muana ngombi uvonga mu mbari muana nguji agu aji mbui. 28Yivunda amanyoga tindi unyoga na amabusa ukota o ndagu. Taji andi amapala na amamulenda rie: Kokolu, lekotati! 29Amawaka rie: Labati bilima biebibi biotsu nyimagusalila nderi muviga nyivu na nyisamaguwemina ne temu mosi. Yima yi gumapega? Gusamapega ne taba mosi yiri nyurungula usangila na bambatsi, mbe? 30Tumba labati muana agu agugu amabunga busina buagu buotsu na bipumbi na ava eruyili guimubokili muana ngombi uvonga! 31Taji amamuwagula rie: Aa muana ami, guji nami temu tsiotsu na biotsu abivu nami abiagu! 32Tumba divu diwelimina yiri tulamba mulambu nosangila mu mbari muana nguji agu mbe amafu na amarambuga mbe amatsiemuga tumba amamuelabana!
Currently Selected:
Luc 15: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
