Yohanis 11

Lasarus mati

11:1-27

1-2Ada laki-laki satu nama Lasarus. Dia tinggal di kampong Betania#11:1-2 Ini ni kampong Betania di propinsi Yudea, mangkali barang 3 kilometer dari kota Yerusalem. Lia Yohanis 11:1, 18. sama-sama deng dia pung sudara parampuang dua. Dong dua nama Maria deng Marta. Maria ni yang nanti sirang Tuhan Yesus pung kaki deng minya bobou sadap la seka akang deng dia pung rambu.#Yohanis 12:3

Satu kali bagini, Lasarus dapa saki. 3Jadi dia pung sudara parampuang dua tu kiring pasáng par Yesus kata, “Sio Bapa#11:3 Bapa: Teks bahasa Yunani pake kata kurie, yang bisa pung arti ‘Tuhan’, ‘tuang’, ‘bapa’, ka ‘guru’. e! Bapa pung tamang yang Bapa sayang tu ada saki.”

4Mar waktu Antua dengar pasáng tu, Antua bilang, “Panyaki tu seng biking dia mati. Mar, panyaki tu ada biar orang-orang bisa lia Allah pung kuasa yang paleng basar deng biar orang-orang bisa taru hormat par Antua pung Ana ni.”

5Yesus memang sayang Maria, Marta, deng Lasarus. 6Mar waktu Antua dengar kata Lasarus tu ada saki, Antua sangaja tinggal di situ#11:6 Di situ tu di kampong Betania di propinsi Perea, mangkali barang 30-48 kilometer dari kota Yerusalem. Lia Yohanis 10:40. dua hari sepe-sepe lai. 7Abis itu baru Antua bilang par Antua pung murid-murid kata, “Mari katong bale ka propinsi Yudea.”

8Waktu dong dengar bagitu, dong bilang kata, “Tuang Guru#11:8 Tuang guru: Teks bahasa Yunani pake kata Rabbi. Orang Yahudi pake kata ni par kasi unju kalo dong paleng taru hormat par dong pung ‘guru basar’ ka ‘bapa guru’ tu. e! Baru-baru ni sa orang-orang Yahudi di sana ada coba par lempar Tuang Guru deng batu sampe mati to? Masa Tuang Guru mau bale ka sana tu lai bagemana?”

9Mar Yesus jawab dong, “Sabang hari matahari manyala kasi tarang dunya sapulu dua jam to? Jadi sapa yang bajalang dalang siang tarang, dia seng bisa tasonto tagal dia dapa lia jalang.#11:9 Deng kata-kata tu, Yesus mau bilang kalo Antua tu tarang (Yohanis 8:12). Jadi sapa yang bajalang sama-sama deng Antua, dong tetap aman sa. 10Mar sapa yang bajalang dalang galap, dia nanti tasonto tagal dia seng dapa lia jalang.”

11Abis bilang bagitu, Yesus bilang lai kata, “Katong pung tamang Lasarus tu su dapa tidor, mar Beta mau pi ka sana par kasi bangong dia.”

12La Yesus pung murid-murid jawab kata, “Tuhan, kalo dia su dapa tidor, nanti dia bae la bangong sandiri to?”

13Yang Yesus maksud, Lasarus tu su mati. Mar dong pikir kata dia cuma tidor biasa-biasa sa. 14Tagal itu, Antua bilang tarang-tarang par dong kata, “Lasarus tu su mati. 15Mar par kamong pung bae, Beta sanang tagal Beta seng ada di sana kamareng dolo tu. Beta sanang tagal samua yang jadi ni bisa biking kamong labe parcaya Beta. Mari katong pi lia dia!”

16Mar Tomas yang orang biasa panggel par Didimus#11:16 Didimus tu nama dalang bahasa Yunani, mar dalang bahasa Ibrani tu Tomas. Akang pung arti, ‘ana bakambar’. tu, dia bilang par Yesus pung murid-murid yang laeng kata, “Kalo bagitu, mari katong pi mati sama-sama deng Antua lai.”

17Waktu Yesus dong sampe di Betania, Antua dapa tau kata Lasarus pung mayat su ampa hari dalang kubur.

18Kampong Betania ni seng jau dari kota Yerusalem. Mangkali barang tiga kilometer bagitu. 19Jadi, ada banya orang Yahudi yang datang dari sana par kasi kuat Maria deng Marta pung hati tagal dong dua pung sudara laki-laki yang su mati tu.

20Waktu Marta dengar kalo Yesus su dekat, dia langsung pi baku dapa Antua. Mar Maria tinggal dalang ruma sa. 21La Marta bilang par Yesus kata, “Sio Tuhan e! Kalo waktu itu Tuhan ada di sini, pasti beta pung sudara laki-laki tu seng mati. 22Mar beta jua tau batul-batul kalo apa sa yang Bapa minta dari Allah, Antua pasti kasi akang par Bapa sakarang-sakarang ni.”

23Yesus bilang par dia kata, “Marta e! Ale pung sudara laki-laki tu nanti hidop kombali.”

24La Marta bilang par Antua, “Beta tau kalo Lasarus nanti hidop kombali waktu orang-orang yang su mati tu hidop kombali waktu dunya su mau kiamat.”

25Mar Yesus bilang par dia kata, “Beta ni yang kasi hidop orang yang su mati deng yang biking dong hidop tarus-tarus.#Yohanis 5:21 Sapa yang parcaya Beta, dia pasti hidop biar kata dia su mati lai. 26Bagitu lai deng sapa sa yang hidop deng yang parcaya Beta, dia nanti seng mati tarus. Ale parcaya apa yang Beta bilang ni ka seng Marta?”

27La Marta jawab Antua, “Tuhan e, beta parcaya. Beta parcaya kalo Bapa ni Orang yang Allah su Angka par Kasi Salamat Manusia. Bapa ni Allah pung Ana yang Antua su janji par datang ka dunya ni.”

Yesus pung aer mata tumpa

11:28-37

28Abis Marta bicara deng Yesus, dia pi panggel dia pung sudara parampuang Maria tu la bisi-bisi par dia kata, “Maria! Maria e! Tuang Guru su ada. Antua ada panggel ale.” 29Pas Maria dengar bagitu, dia langsung bangong la paparipi pi baku dapa Yesus.

30Waktu itu, Yesus balong maso ka dalang kampong. Antua masi di tampa Antua baku dapa deng Marta. 31La orang-orang Yahudi yang datang par kasi kuat Maria pung hati tu, dong masi ada di dia pung ruma. Waktu dong lia dia bangong paparipi-paparipi la pi kaluar, dong pi iko dia tagal dong pikir jang sampe dia mau pi marata di Lasarus pung kubur.

32Waktu Maria sampe la lia Antua, dia tikang lutu di muka Antua la bilang kata, “Sio Tuhan e! Coba kalo waktu itu Tuhan ada, beta pung sudara laki-laki tu pasti seng mati.”

33Waktu Antua lia Maria deng orang-orang Yahudi yang sama-sama deng dia tu ada manangis marata, Antua pung hati ancor deng paleng susa paskali. 34La Antua tanya dong, “Kamong kubur dia di mana?”

Tarus, dong jawab Antua kata, “Tuhan e, mari datang la lia sandiri jua!”

35Pas dengar bagitu, Antua pung aer mata tumpa. 36La orang-orang Yahudi yang ada di situ bilang kata, “Coba lia! Antua paleng sayang Lasarus.”

37Mar yang laeng bilang, “Antua ni yang kasi bae orang buta tu to? Mangapa kong Antua kasi biar Lasarus mati?”

Yesus kasi hidop Lasarus

11:38-44

38Yesus pung hati ancor kombali la Antua pi ka goa yang orang pake par kubur Lasarus tu. Pintu kubur tu dong tutu deng batu basar satu. 39Sampe di sana, Antua bilang kata, “Kasi pinda batu dari mulu kubur tu.”

Mar Lasarus pung sudara yang nama Marta tu bilang, “Tuhan, Lasarus su mati ampa hari. Jadi pasti dia pung mayat tu su bobou.”

40La Yesus bilang par dia kata, “Marta, ale lupa apa yang Beta su bilang par ale tu kapa? Kalo ale parcaya Beta, ale nanti lia Allah pung kuasa yang paleng basar tu.”

41Abis orang-orang kasi pinda batu yang tutu mulu kubur tu, Antua tangada muka ka langit la bilang, “Bapa! Dangke banya-banya lai tagal Bapa su dengar Beta pung sombayang. 42Beta tau kalo Bapa salalu dengar Beta. Mar, Beta bilang bagini biar orang-orang yang ada di sini bisa parcaya kalo Bapa sandiri yang utus Beta ka dunya ni.”

43Abis bilang bagitu deng Antua bataria kuat-kuat kata, “Lasarus e! Kaluar kamari!”

44Skrek bagini Lasarus yang su mati tu langsung kaluar. Dia pung kaki deng tangang masi taika deng kaeng par bungkus mayat. Dia pung muka jua masi tatutu deng kaeng sapanggal lai. La Yesus suru orang-orang yang ada di situ kata, “Lapas kaeng-kaeng yang taika di dia pung badang tu biar dia bisa bajalang bae-bae.”

Rencana par bunu Yesus

11:45-57

(Matius 26:1-5; Markus 14:1-2; Lukas 22:1-2)

45Waktu orang-orang Yahudi yang datang par kasi kuat Maria pung hati tu lia samua yang Yesus biking, banya dari dong yang parcaya Antua. 46Mar, ada satu dua orang dari dong yang pi lapor apa yang Yesus su biking tu par orang-orang Farisi. 47La orang Yahudi pung imam-imam kapala deng orang-orang Farisi tu bakumpul sama-sama deng orang Yahudi pung Pamimping-pamimping Sidang yang laeng. Dong bilang, “Eh, katong musti biking apa Dia? Dia tinggal kong biking tanda-tanda herang tarus. 48Kalo katong kasi tinggal Dia biking macang bagitu tarus, samua orang nanti parcaya Dia. Laste-laste, tantara-tantara Roma nanti datang la kasi ancor katong pung Tampa Sombayang Pusat ni lapis deng katong pung bangsa.”#11:48 Orang Yahudi pung pamimping-pamimping taku jang sampe banya orang iko Yesus, la angka Antua par jadi dong pung pamimping, la biking kaco par malawang pemerinta Roma. Kalo bagitu, pemerinta Roma nanti kiring tantara par kasi ancor bangsa Yahudi tu.

49Satu dari dong yang ada bakumpul di situ tu nama Kayafas. Dia jadi orang Yahudi pung Imam Basar taong itu. Dia bilang par dong kata, “Hoe! Kamorang bodo bagitu paskali? 50Apa tempo kong kamorang mangarti kalo labe bae satu orang mati par banya orang? Mar jang sampe tagal satu orang, katong pung bangsa binasa abis.”

51Kayafas bilang bagitu bukang iko dia pung pikirang sandiri. Dia bilang bagitu tagal taong itu dia tu orang Yahudi pung Imam Basar. Mar, dia seng sadar kalo dia ada kasi tau Allah pung pasáng kalo Yesus nanti mati par orang-orang Yahudi. 52Yesus mati bukang cuma par orang-orang Yahudi sa. Mar, Antua jua mati par Allah pung anana#11:52 Allah pung anana tu orang-orang Yahudi deng orang-orang bukang Yahudi yang parcaya Yesus. Lia Yohanis 10:16. samua yang talamburang di mana-mana sa par kumpul dong samua jadi satu.

53Jadi mulai dari oras tu, orang Yahudi pung pamimping-pamimping tu mulai baku akor par bunu Yesus. 54Tagal itu, Yesus seng muncul tarang-tarang di orang-orang Yahudi pung muka lai. Antua kaluar dari kampong Betania tu la pi ka kota kacil satu dekat padang gurun la tinggal deng Antua pung murid-murid di situ. Kota tu nama Efraim.

55Waktu itu, orang Yahudi pung hari basar Paska su dekat. Jadi banya orang dari kampong-kampong datang ka Yerusalem. Dong datang babarapa hari kamuka par kasi barsi dong pung diri dari dosa iko orang Yahudi pung atorang agama, biar waktu hari basar tu, dong su siap. 56Dong yang bakumpul di orang Yahudi pung Tampa Sombayang Pusat pung kintal tu cari-cari Yesus. Dong laeng bilang par laeng kata, “Eh, ale pikir bagemana? Kira-kira Dia datang ka pesta Paska ni ka seng?” 57Dong bilang bagitu tagal orang Yahudi pung imam-imam kapala deng orang-orang Farisi su kasi kaluar parenta kalo sapa sa yang tau Yesus ada di mana, dia musti bilang akang par dong biar dong bisa pi tangkap Antua.

Currently Selected:

Yohanis 11: ABMA

Highlight

Copy