Yohanis 10
10
Ande-ande soal orang yang jaga domba deng domba yang dia jaga
10:1-21
1Abis bicara deng orang-orang Farisi, Yesus bilang ande-ande satu par dong kata, “Dengar bae-bae tagal apa yang Beta bilang ni batul! Sapa yang maso ka dalang kandang domba seng langgar pintu mar nai pagar, dia tu pasti pancuri yang mau maso ambe domba-domba deng paksa. 2Mar orang yang maso langgar pintu pagar, dia tu pasti orang yang jaga domba. 3Orang yang jaga pintu tu buka pintu par dia. La waktu dia panggel domba-domba tu iko akang pung nama satu-satu, akang kanal dia pung suara. Abis itu, dia hentar akang dari dalang kandang. 4Waktu domba-domba tu samua su kaluar, dia bajalang di muka la domba-domba tu iko dia dari balakang, tagal akang kanal dia pung suara. 5Domba-domba tu seng parna iko orang yang akang seng kanal. Mala akang lari kasi tinggal dia tagal akang seng kanal dia pung suara.”
6Yesus bilang ande-ande tu par dong, mar dong seng mangarti Antua pung maksud apa. 7Tagal itu, Antua bilang par dong lai kata, “E, dengar bae-bae tagal apa yang Beta bilang ni batul! Beta ni pintu par domba-domba tu maso-kaluar. 8Samua orang yang datang kamuka Beta, dong tu pancuri yang mau maso ambe domba-domba deng paksa. Dong panggel-panggel domba-domba tu, mar akang seng dengar dong. 9Beta ni pintu. Sapa sa yang datang par Allah lewat Beta, dia nanti salamat. Dia sama deng domba-domba yang maso-kaluar langgar pintu kandang la dapa tana lapang yang pono deng rumpu-rumpu par akang pung makanang. 10Kalo pancuri, dia datang cuma par pancuri, par bunu, deng par biking rusak. Mar kalo Beta, Beta datang par kasi hidop yang paleng bae par orang-orang yang dengar Beta pung suara. Mar bukang cuma hidop sa, mar par kasi samua-samua yang dong parlu par jaga dong pung parcaya par Allah.”
11La Yesus bilang lai kata, “Beta ni orang yang jaga domba, yang kalesang domba-domba tu bae-bae. Beta kasi Beta pung nyawa par kasi salamat domba-domba tu. 12Mar orang yang dapa bayar par jaga domba tu, dia seng sama deng orang yang pung domba-domba tu, yang jaga deng kalesang akang bae-bae. Waktu dia lia anjing utang datang, dia lari pi kasi tinggal domba-domba tu sampe ada yang dapa tangkap, la yang sisa lari talamburang kasana-kamari. 13Dia lari pi kasi tinggal domba-domba tu, tagal dia tu cuma orang karja yang dapa bayar par jaga domba-domba tu sa. Jadi, dia seng pastiu deng apa yang mau jadi deng akang.
14-15Beta ni orang yang jaga domba, yang kalesang domba-domba tu bae-bae. Beta kasi Beta pung nyawa par kasi salamat Beta pung domba-domba. Beta kanal Beta pung domba-domba la domba-domba tu jua kanal Beta. Bagitu lai Beta deng Beta pung Bapa. Beta pung Bapa kanal Beta la Beta jua kanal Antua.#Matius 11:27; Lukas 10:22 16Beta ada pung domba-domba yang laeng lai, mar akang balong takumpul sama-sama deng domba-domba yang ada dalang kandang ni. Jadi Beta jua musti bawa akang biar akang takumpul sama-sama. Akang nanti dengar Beta pung suara la akang kanal Beta. Akang nanti bakumpul sama-sama deng domba-domba yang su ada dalang kandang ni. Beta sandiri yang nanti jadi Orang jaga yang kalesang domba-domba tu samua.
17Beta pung Bapa sayang Beta, tagal Beta kasi Beta pung nyawa par kasi salamat Beta pung domba-domba. Beta kasi Beta pung nyawa biar Beta bisa hidop kombali. 18Seng satu orang lai yang bisa bunu Beta kalo Beta seng kasi Beta pung diri par dong bunu. Beta pung kuasa par kasi Beta pung diri biar orang bunu Beta. Beta jua pung kuasa par kasi hidop Beta pung diri sandiri. Ini ni parenta yang Beta pung Bapa kasi par Beta biking.”
19Waktu orang-orang Yahudi dengar Yesus bilang bagitu, dong baku malawang lai. 20Banya dari dong yang bilang, “Hoe! Mangapa kong kamong dengar Dia? Dia tu takanal. Dia tu gila.” 21Mar yang laeng bilang kata, “Ao seng jua. Orang yang takanal seng bisa bicara macang bagitu. Masa Orang yang takanal bisa kasi bae orang yang buta lai?”
Orang-orang Yahudi seng parcaya kalo Yesus tu Allah pung Ana
10:22-39
22Babarapa waktu abis Yesus bicara deng orang-orang Farisi tu, Antua ada di kota Yerusalem pas orang Yahudi pung hari basar par inga waktu dong tahbis Tampa Sombayang Pusat di kota Yerusalem.#10:22 Orang Yahudi bilang akang par hari basar Hanukah. Dalang orang Yahudi pung almanak, akang jatu bulang Kislew, kira-kira tenga-tenga Nopember sampe tenga-tenga Desember. Waktu itu musing dinging. 23La Yesus ada bajalang-bajalang di Tampa Sombayang Pusat pung teras satu yang orang kasi nama akang par Teras Salomo. 24Tarus, orang-orang Yahudi datang ron Antua kong bilang par Antua kata, “E Bu! Sampe apa tempo Ale mau biking katong tinggal kong rai-rai tarus? Kalo batul Ale tu Orang yang Allah su Angka par Kasi Salamat Manusia, coba bilang tarang-tarang par katong kamari.”
25La Yesus bilang par dong kata, “Beta su bilang par kamong mar kamong seng parcaya. Beta bisa biking tanda-tanda herang samua yang Beta su biking tu, tagal Beta pung Bapa su kasi kuasa par Beta par biking akang samua. Samua yang Beta biking tu su kasi unju kalo Beta ni sapa. 26Mar kamong seng parcaya Beta, tagal kamong tu bukang Beta pung domba-domba.#10:26 Domba-domba yang Yesus maksud tu, orang-orang yang parcaya Antua. 27Beta pung domba-domba kanal Beta pung suara la dong iko Beta. Beta jua kanal dong. 28Beta nanti kasi hidop par dong biar dong nanti seng mati tarus, mar hidop tarus-tarus. Seng ada satu orang lai yang bisa rampas dong dari Beta. 29Beta pung Bapa yang su kasi dong par Beta, Antua labe basar dari sapa sa. Jadi seng ada satu orang lai yang bisa rampas dong dari Antua. 30Beta deng Beta pung Bapa tu satu.”
31La orang-orang Yahudi tu ambe batu kombali par lempar Yesus sampe mati. 32Mar Yesus bilang par dong kata, “Hoe! Beta su biking tanda-tanda herang hebat banya par kamong, tagal Beta pung Bapa su kasi kuasa par Beta. Dari samua tanda herang yang Beta su biking tu, mana yang biking sampe kamong mau lempar Beta sampe mati?”
33Orang-orang Yahudi tu jawab Antua kata, “Katong mau lempar Se sampe mati bukang tagal Se su biking tanda-tanda herang tu, mar tagal Se su hojat Allah. Se ni cuma manusia biasa sa, mar biking diri macang deng Allah.”
34La Yesus jawab dong, “Dalang Allah pung Tulisang yang kamong iko tu, Allah su bilang kalo kamong tu allah to?#10:34 Ka, “Allah su bilang kalo kamong tu sama deng allah to?” Lia Lagu-Lagu 82:1, 6. 35Katong tau kalo samua yang tatulis dalang Allah pung Tulisang tu seng parna sala. Jadi kalo Allah panggel orang-orang yang tarima Antua pung ajarang tu par allah, 36mangapa kong kamong bilang Beta hojat Antua, tagal Beta bilang kalo Beta ni Allah pung Ana? Sapa tau bagini, Antua sandiri yang su pili deng yang su utus Beta datang ka dunya ni. 37Kalo Beta seng biking tanda-tanda herang yang Beta pung Bapa suru Beta biking, jang parcaya Beta. 38Mar, Beta biking tanda-tanda herang yang Beta pung Bapa suru Beta biking tu tarus. Jadi kalo kamong masi seng parcaya Beta, paleng kurang kamong musti parcaya apa yang Beta biking. Dari apa yang Beta biking tu kamong bisa tau deng labe mangarti kalo Beta deng Beta pung Bapa tu satu.”
39Waktu dong dengar Antua bilang bagitu, dong coba tangkap Antua satu kali lai. Mar Antua pi kasi tinggal dong.
Yesus di sabala aer Yordan
10:40-42
40Abis dari kota Yerusalem, Yesus bale kombali ka sabala aer Yordan#10:40 Sabala aer Yordan: Ini ni kampong Betania di propinsi Perea. Lia Yohanis 1:28. la tinggal di situ. Dolo Yohanis baptis orang di situ. 41Waktu Antua tinggal di situ, banya orang datang par Antua. La dong bilang kata, “Yohanis memang seng biking satu tanda herang lai, mar samua yang dia bilang soal Antua ni memang batul.” 42Tagal itu tu sampe banya orang yang ada di situ parcaya Yesus.
Currently Selected:
Yohanis 10: ABMA
Highlight
Share
Copy
Want to have your highlights saved across all your devices? Sign up or sign in
© 2022, Sinode Gereja Protestan Maluku
