Yohanis 9

Yesus kasi bae laki-laki satu yang su buta dari lahir

9:1-12

1Satu kali bagini, waktu Yesus ada bajalang, Antua lia laki-laki satu yang su buta dari lahir. 2Tarus, Antua pung murid-murid tanya Antua kata, “Tuang Guru e! Kira-kira sapa pung dosa sampe dari lahir lai dia su buta? Dia pung dosa sandiri ka dia pung orang tatua pung dosa?”

3La Yesus jawab dong, “Dia buta bukang tagal dia ka dia pung orang tatua yang bardosa. Mar, dia buta biar orang-orang bisa lia Allah pung kuasa karja dalang dia pung hidop. 4Waktu masi siang tarang, katong musti biking Antua yang utus Beta tu pung karja. Katong musti biking akang sakarang, tagal sadiki lai su mau galap la seng satu orang jua yang bisa karja. 5Waktu Beta masi ada dalang dunya ni, Beta ni tarang yang manyala kasi tarang manusia pung hati.”#Matius 5:14; Yohanis 8:12

6Abis Antua bilang bagitu, Antua luda ka tana la Antua dudu kore-kore akang sampe akang tacampor deng tana macang deng peci. Abis itu, Antua goso akang di orang buta tu pung mata, 7la Antua bilang par dia kata, “Pi cuci ale pung muka di kolang aer Siloam.” (Dalang bahasa Ibrani, kata siloam tu pung arti ‘yang dapa utus’.) Jadi dia pi cuci dia pung muka di sana. Waktu dia bale, dia su bisa dapa lia.

8Orang-orang yang tinggal di dia pung pinggir-pinggir ruma deng orang-orang yang dolo jaga lia dia minta-minta kepeng bilang kata, “Eh! Dia ni yang biasa dudu minta-minta kepeng tu to?”

9Saparu orang bilang, “Batul! Itu dia tu suda!” Mar ada lai yang bilang kata, “Ao seng! Itu tu bukang dia. Itu tu orang laeng yang pung muka parsis deng dia.”

Mar dia bilang par dong, “Batul! Beta ni suda.”

10La dong tanya dia kata, “Kalo bagitu, bagemana kong ale bisa dapa lia sakarang?”

11Dia bilang, “Ada satu orang yang nama Yesus yang kasi bae beta. Antua luda ka tana la Antua dudu kore-kore akang sampe akang tacampor deng tana macang deng peci, la Antua goso akang di beta pung mata. Abis itu, Antua suru beta par pi cuci muka di kolang aer Siloam. Jadi beta pi, la waktu beta abis cuci muka, skrek bagini beta bisa dapa lia.”

12Dong tanya dia kata, “La mana Antua tu?”

Dia jawab, “Beta seng tau.”

Orang Farisi seng suka Yesus kasi bae orang pas hari Barenti Karja

9:13-34

13-14Waktu Yesus campor Antua pung luda deng tana la kasi bae laki-laki yang buta tu pung mata, itu pas orang Yahudi pung hari Barenti Karja. Tagal itu, laki-laki yang dolo buta tu dapa bawa ka babarapa orang dari kalompok Farisi. 15La orang-orang Farisi tu jua tanya dia kata, “Bagemana sampe ale bisa dapa lia?”

Dia bilang, “Ada Satu Orang yang campor Antua pung luda deng tana sampe akang tacampor macang deng peci la goso akang di beta pung mata. Waktu beta cuci beta pung muka di kolang aer Siloam, beta langsung bisa dapa lia.”

16Tagal itu, babarapa orang Farisi tu bilang kata, “Dia tu bukang Allah pung utusang, tagal Dia biking apa yang orang seng bole biking pas hari Barenti Karja.”

Mar yang laeng bilang, “Ao seng kapa? Masa orang bardosa bisa biking tanda herang macang bagitu lai?” La dong mulai tapica tagal dong baku malawang seng abis-abis.

17Jadi dong bilang kombali par laki-laki yang dolo buta tu kata, “Ale bilang tadi kata ada Satu Orang yang su kasi bae ale to? No kalo iko ale sandiri, Dia tu sapa?”

La laki-laki tu bilang, “Bapa-bapa! Kalo iko beta sandiri, Antua tu Allah pung juru bicara.”

18Mar, orang Yahudi pung pamimping-pamimping tu masi seng parcaya kalo dia tu dolo buta mar sakarang su bisa dapa lia. Tagal itu, dong suru orang panggel dia pung orang tatua. 19Tarus, dong tanya dia pung orang tatua kata, “Ini ni ale dong pung ana yang kata dari lahir lai su buta ka? Bagemana kong dia bisa dapa lia sakarang?”

20Dia pung orang tatua jawab kata, “Bapa-bapa e! Dia tu memang katong pung ana laki-laki. Dari lahir lai dia memang su buta. 21Mar katong seng tau bagemana sampe dia bisa dapa lia sakarang. Katong jua seng tau kata sapa yang su kasi bae dia pung mata. Coba bapa-bapa dong tanya dia sandiri jua! Dia su basar, jadi dia bisa bicara sandiri.”

22Dia pung orang tatua bilang bagitu tagal dong taku orang Yahudi pung pamimping-pamimping tu. Barang, dong su tau kalo orang Yahudi pung pamimping-pamimping tu su baku akor kata sapa yang mangaku kalo Yesus tu Orang yang Allah su Angka par Kasi Salamat Manusia, dia seng bole inja dong pung tampa sombayang#9:22 Tampa sombayang: Yang dong maksud tu, orang Yahudi pung tampa sombayang ka sinagoge. lai. 23Tagal itu, dong bilang tadi kata dia su basar jadi tanya dia sandiri jua.

24Jadi, orang Yahudi pung pamimping-pamimping tu panggel laki-laki yang dolo buta tu satu kali lai la bilang par dia kata, “Coba se sumpa deng nama Allah do, kalo yang se mau bilang ni batul! Tagal, katong tau kalo Orang yang kasi bae se pung mata tu orang bardosa.”

25Dia bilang, “Bapa-bapa! Beta seng tau kata Antua tu orang bardosa ka seng. Satu hal yang beta tau parsis tu, dolo beta ni buta mar sakarang beta su bisa dapa lia.”

26Dong tanya dia kombali kata, “Dia biking bagemana kong se bisa dapa lia?”

27Dia jawab dong, “He? Beta su bilang dari tadi, mar bapa-bapa dong seng mau dengar beta. Mangapa kong sakarang bapa-bapa dong mau beta carita akang ulang lai? Jang sampe bapa-bapa dong mau jadi Antua pung murid-murid kapa?”

28Pas dia bilang bagitu, deng dong kata dia, “Hoe! Se tu yang jadi Dia pung murid. Katong seng! Katong ni Musa pung murid-murid. 29Katong tau parsis kalo Allah su bicara par Musa. Mar Dia tu, katong seng tau kata Dia datang dari mana. Dari Allah ka dari manusia.”

30La dia bilang par dong lai kata, “Beta herang paskali. Antua su kasi bae beta pung mata, mar bapa-bapa dong bilang kalo bapa-bapa dong seng tau kata Antua tu dari mana. 31Katong samua tau kalo Allah seng dengar orang-orang bardosa pung sombayang. Antua cuma dengar orang-orang yang dengar-dengarang Antua deng yang bajalang iko Antua pung mau pung sombayang. 32Dari dunya ni ada sampe oras ni, katong balong parna dengar carita kata ada orang yang bisa kasi bae orang yang su buta dari lahir. 33Kalo Antua tu seng datang dari Allah, Antua pasti seng bisa biking apapa to?”

34Pas dia bilang bagitu, deng dong manyao dia lai, “Hoe! Dari waktu se lahir lai se su bardosa banya. Se tu sapa kong barani kasi balajar katong?” Mulai dari oras tu, dong larang dia par seng bole inja orang Yahudi pung tampa sombayang.

Orang yang seng kanal Allah tu sama deng orang yang buta

9:35-41

35Yesus dengar kalo orang Yahudi pung pamimping-pamimping su larang laki-laki yang dari lahir lai su buta tu par jang inja orang Yahudi pung tampa sombayang. Jadi Antua langsung pi cari dia la bilang kata, “Ale parcaya Ana Manusia tu ka seng?”

36Dia bilang, “Bapa! Antua tu sapa? Tolong bilang par beta jua, biar beta bisa parcaya Antua.”

37Yesus bilang par dia kata, “Ale su lia Antua. Antua tu, Beta yang ada bicara deng ale sakarang ni.”

38La dia bilang, “Sio Tuhan, beta parcaya!” Abis itu, dia tikang lutu somba Antua.

39La Antua bilang, “Beta datang ka dunya ni par nilai sapa yang batul deng sapa yang sala. Beta kasi unju jalang par orang-orang yang seng kanal Allah biar dong bisa kanal Antua. Itu sama deng Beta biking orang yang buta bisa dapa lia. Mar par orang-orang yang pikir kata dong su kanal Allah, Beta nanti kasi unju kalo dong tu seng tau apapa. Itu sama deng orang yang pikir kata dia bisa dapa lia, mar sapa tau bagini dia tu buta.”

40Babarapa orang Farisi yang ada di situ dengar apa yang Yesus bilang tu la dong tanya Antua kata, “E Bu! Ale pung maksud tu katong ni buta ka?”

41Antua jawab dong, “Kalo kamong mangaku kamong tu buta, kamong seng bardosa. Mar tagal kamong bilang kata kamong tu bisa dapa lia, kamong tu masi pikol kamong pung dosa-dosa.”

Currently Selected:

Yohanis 9: ABMA

Highlight

Copy