Yohanis 8

1Mar waktu dong samua pulang ka dong pung ruma, Yesus pi ka gunung Saitun par tidor di sana.

Parampuang satu yang tidor deng orang yang bukang dia pung laki

8:2-11

2Pagi-pagi paskali, Yesus turung dari gunung Saitun la pi kombali ka orang Yahudi pung Tampa Sombayang Pusat pung kintal.#8:2 Orang Yahudi pung Tampa Sombayang Pusat pung kintal: Guru-guru Torat biasa dudu ajar dong pung murid-murid di kintal sabala luar yang ron orang Yahudi pung Tampa Sombayang Pusat tu. Yesus jua biking bagitu lai waktu kasi balajar orang banya tu. Orang banya datang bakumpul koliling Antua, jadi Antua dudu la kasi balajar dong. 3Waktu Antua ada dudu kasi balajar orang banya tu, orang Yahudi pung guru-guru Torat deng orang-orang dari kalompok Farisi bawa parampuang satu par Antua, la kasi badiri dia di tenga-tenga orang banya tu. Parampuang ni dapa tangkap waktu dia ada tidor deng orang yang bukang dia pung laki. 4Dong bilang par Antua kata, “Tuang Guru e! Parampuang ni dapa tangkap waktu dia ada tidor deng orang yang bukang dia pung laki. 5Dalang Tuhan pung Kitab Torat yang Musa su tulis, Musa parenta katong par lempar parampuang macang bagini deng batu sampe mati.#Imam-Imam pung Atorang 20:10; Carita Ulang 22:22 Jadi Tuang Guru pikir bagemana?”

6Dong bilang bagitu par coba Antua sa, biar kalo Antua jawab sala, dong ada pung alasang par kasi sala Antua. Mar Yesus seng jawab dong sadiki lai. Antua dudu ka bawa la tulis-tulis deng Antua pung jari di tana. 7Mar waktu dong tinggal kong tanya Antua ulang-paleu tarus-tarus, Antua badiri la bilang par dong kata, “Sapa yang rasa diri seng parna biking dosa, biar dia yang ambe batu kamuka la lempar parampuang ni.”

8Abis itu, Antua dudu ka bawa la tulis-tulis deng Antua pung jari di tana kombali. 9Mar waktu dong dengar Antua bilang bagitu, dong pi dari situ satu abis satu, mulai dari yang tua sampe yang muda. Laste-laste bagini, tinggal Yesus deng parampuang tu sandiri sa di tenga-tenga orang banya tu.#8:9 Ka, “Laste-laste bagini, tinggal Yesus deng parampuang tu sandiri sa di situ.” 10La Yesus badiri kombali la tanya parampuang tu kata, “Usi, dong samua su di mana? Seng ada yang hukum ale ka?”

11Parampuang tu bilang, “Sio Bapa e. Seng ada!”

La Yesus bale bilang par parampuang tu lai kata, “Beta jua seng hukum ale. Pulang jua, mar mulai dari oras ini ni, jang biking dosa lai!”]

Yesus tu tarang yang manyala kasi tarang manusia pung hati

8:12-20

12Yesus bicara lai par orang banya yang ada dudu bakumpul dengar Antua pung ajarang di orang Yahudi pung Tampa Sombayang Pusat pung kintal. Antua bilang kata, “Beta ni tarang yang manyala kasi tarang manusia di dunya ni pung hati. Sapa yang iko Beta, dia nanti seng bajalang dalang galap mar dalang tarang yang kasi unju bagemana dia bisa hidop tarus-tarus deng Allah.”

13Tarus, orang-orang Farisi bilang par Antua, “Ale bicara soal Ale pung diri sandiri. Jadi orang seng parcaya kalo apa yang Ale bilang tu batul!”

14Abis dong bicara bagitu, Yesus bale bilang par dong kata, “Bapa-bapa e! Biar kata Beta bicara soal Beta pung diri sandiri lai, apa yang Beta bilang tu batul. Barang, Beta tau Beta asal dari mana deng nanti pi ka mana. Mar, kamong seng tau Beta ni asal dari mana deng nanti bale ka mana. 15Kamong nilai orang iko manusia pung cara nilai orang, mar Beta seng nilai satu orang lai pake manusia pung cara nilai orang. 16Mar, kalo Beta nilai manusia di dunya ni, Beta nilai deng batul. Barang, Beta seng nilai dong sandiri, mar Beta nilai dong sama-sama deng Beta pung Bapa yang utus Beta. 17Dalang kamong pung Kitab Torat jua ada bilang kata, paleng kurang musti ada dua orang saksi yang bilang soal hal yang sama, baru kamong bisa bilang kalo apa yang dong bilang tu batul. 18Bagitu lai, yang jadi saksi soal Beta ada dua orang. Yang partama tu Beta sandiri la yang kadua tu Beta pung Bapa yang utus Beta.”

19La dong tanya Yesus kata, “Kalo bagitu, Ale pung Bapa di mana?”

Yesus jawab dong, “Kamong seng kanal Beta. Kamong jua seng kanal Beta pung Bapa. Kalo kamong kanal Beta, pasti kamong kanal Beta pung Bapa lai.”

20Yesus kasi balajar samua tu di orang Yahudi pung Tampa Sombayang Pusat pung kintal, dekat tampa par taru peti derma. Mar, seng ada satu orang lai yang tangkap Antua, tagal balong waktu par Antua dapa tangkap.

Sapa yang seng parcaya Yesus nanti mati deng dia pung dosa

8:21-47

21Yesus bilang par orang banya tu lai kata, “Beta mau pi ka tampa satu la kamong nanti cari Beta, mar kamong seng bisa pi ka tampa yang Beta mau pi tu. La waktu kamong mati nanti, kamong masi pikol kamong pung dosa.”

22Waktu Yesus bilang bagitu, orang Yahudi pung pamimping-pamimping agama dong laeng tanya laeng, “Jang sampe Dia mau pi bunu diri kapa? Tagal, tadi Dia bilang kata katong seng bisa pi ka tampa yang Dia mau pi tu.”

23Mar Yesus bale bilang par dong kata, “Kamong samua ni asal dari dunya ni, mar Beta seng. Beta asal dari sorga. 24Tagal itu, Beta tadi bilang par kamong kata waktu kamong mati nanti, kamong masi pikol kamong pung dosa-dosa. Barang, kalo kamong seng parcaya kalo Beta ni Antua,#8:24 Beta ni Antua: Waktu bilang bagini, Yesus mau bilang kalo Antua tu Tuhan. Lia Kaluar dari Mesir 3:14. sama deng apa yang Beta su bilang tu, waktu kamong mati nanti, kamong masi pikol kamong pung dosa-dosa.”

25La dong tanya Antua kata, “E! Ale ni sapa?”

Yesus jawab dong, “Beta su bilang dari kamuka-kamuka lai kata Beta ni sapa to?#8:25 Ka, “Mangapa kong Beta musti bicara deng kamong lai?” 26Masi banya lai yang Beta mau bilang par kasi unju sapa dari kamong yang batul deng sapa yang sala. Mar, Beta cuma mau bilang par manusia di dunya ni soal apa yang Beta dengar dari Antua yang utus Beta. Apa yang Antua bilang tu batul.”

27Dong seng mangarti kalo yang Antua maksud tu Antua pung Bapa di sorga. 28Jadi Antua bilang par dong, “Kamong nanti angka Ana Manusia tinggi-tinggi.#8:28 Yang Yesus maksud tu, dong nanti salib Antua. Lia Yohanis 3:14 deng 7:39. Dia tu, Beta ni. Waktu itu baru kamong tau batul-batul kata Beta ni sapa, sama deng apa yang Beta su bilang tu. Kamong jua nanti tau batul-batul kalo Beta seng biking apapa iko Beta pung mau sandiri, mar iko Beta pung Bapa pung mau. Apa yang Antua ajar par Beta, itu tu jua yang Beta ajar. 29Beta pung Bapa yang utus Beta, Antua ada sama-sama deng Beta tarus. Antua seng parna kasi tinggal Beta sandiri, tagal Beta salalu iko Antua pung mau.”

30Waktu Yesus bilang samua tu, banya orang parcaya Antua. 31Abis itu, Yesus bilang par orang-orang Yahudi yang su parcaya Antua tu kata, “Kalo kamong biking apa yang Beta bilang ni tarus, kamong batul-batul su jadi Beta pung murid-murid. 32Kamong jua nanti tau Allah pung ajarang yang batul, la Antua pung ajarang yang batul tu nanti biking kamong seng jadi jongos lai.”

33Mar dong bale bilang par Antua, “Bapa, katong ni moyang Abraham pung anana cucu. Katong seng parna jadi sapa-sapa pung jongos. Jadi, bagemana kong Bapa bisa bilang kalo katong nanti seng jadi jongos lai?”

34Yesus bilang par dong kata, “Dengar bae-bae tagal apa yang Beta bilang ni batul! Sapa yang biking dosa, dia jadi jongos dari dosa yang dia biking tu. 35Jongos seng bisa tinggal tarus-tarus di dia pung bos pung ruma. Cuma dia pung bos pung ana sa yang bisa tinggal tarus-tarus di ruma. 36Jadi, kalo Allah pung Ana ni su kasi bebas kamong dari kamong pung dosa-dosa, kamong batul-batul su bebas. 37Beta tau kalo kamong tu moyang Abraham pung anana cucu, mar kamong usaha par bunu Beta, tagal kamong seng mau tarima Beta pung ajarang. 38Apa yang Beta lia dari Beta pung Bapa, itu yang Beta bilang par kamong. Bagitu lai deng kamong. Kamong biking apa yang kamong pung bapa ajar par kamong.”

39La dong jawab Antua kata, “Hoe! Katong pung bapa par moyang Abraham!”

Mar Antua bilang par dong, “Kalo memang kamong ni moyang Abraham pung anana cucu, kamong pasti biking apa yang antua biking. 40Beta ni Orang yang bilang apa yang batul par kamong yang Beta dengar dari Allah. Mar kamong cari jalang tarus par bunu Beta. Abraham seng biking macang bagitu. 41Jadi, memang seng sala lai kalo kamong biking apa yang kamong pung bapa biking.”

Waktu dong dengar bagitu, dong bilang par Antua kata, “E bu! Katong bukang anana luar nika e! Katong pung Bapa cuma satu. Antua tu Tuhan Allah sandiri.”

42Yesus bilang par dong kata, “Kalo memang Tuhan Allah tu kamong pung Bapa, kamong pasti sayang Beta, tagal Beta datang dari Antua. Beta seng datang iko Beta pung mau sandiri, mar iko Antua yang utus Beta tu pung mau. 43Kamong tau, mangapa kong kamong seng mangarti apa yang Beta bilang? Itu tagal kamong seng mau tarima apa yang Beta ajar. 44Kamong pung bapa tu par Setang pung Raja, jadi kamong suka biking samua yang dia mau. Dari dolo-dolo lai dia tu tukang bunu orang. Dia seng parna suka deng apa yang batul, tagal di dalang dia seng ada apapa yang batul. Dia salalu bicara putar bale, tagal dia pung tabiat tu su par bagitu suda. Dia tu tukang parlente putar bale. Dia tu jua bapa par samua orang yang tukang parlente. 45Mar Beta ni, tagal Beta kasi balajar apa yang batul, kamong seng mau parcaya Beta. 46Sapa dari kamong samua di sini yang bisa kasi unju bukti kalo Beta biking dosa? No kalo Beta bicara apa yang batul, mangapa kong kamong seng parcaya Beta? 47Sapa yang jadi Allah pung anana, dia salalu dengar apa yang Antua bilang. Mar tagal kamong bukang Antua pung anana, jadi kamong seng dengar apa yang Antua bilang.”

Yesus su ada kamuka Abraham

8:48-59

48Orang-orang Yahudi yang ada di situ bilang par Antua lai kata, “E bu! Memang batul yang katong su bilang, kalo Ale ni orang Samaria yang su takanal.”

49Yesus jawab dong, “Beta seng takanal. Beta taru hormat par Beta pung Bapa, mar kamong seng taru hormat par Beta. 50Beta seng cari hormat par Beta pung diri. Mar ada Satu Orang yang mau biar Beta dapa hormat. Antua yang putus kalo apa yang Beta bilang ni batul ka seng. 51Dengar bae-bae tagal apa yang Beta bilang ni batul! Sapa yang dengar-dengarang apa yang Beta bilang, dia nanti seng parna mati.”

52La orang-orang Yahudi bilang par Antua kata, “Ha! Sakarang katong tau kalo Ale ni takanal. Moyang Abraham sandiri sa su mati. Bagitu lai deng Allah pung juru-juru bicara. Mar Ale bilang tadi kata sapa yang dengar-dengarang apa yang Ale bilang, dia nanti seng parna mati. 53Jang sampe Ale kira kata Ale ni labe hebat dari katong pung moyang Abraham kapa? Antua su mati. Bagitu lai deng Allah pung juru-juru bicara. Ale kira Ale ni sapa kong bicara macang bagitu?”

54Yesus jawab dong kata, “Kalo Beta puji-puji Beta pung diri sandiri, itu seng ada pung arti apapa par Beta. Beta pung Bapa yang kamong panggel par ‘Allah yang katong somba’ tu, Antua yang puji-puji Beta. 55Kamong seng kanal Antua mar Beta kanal Antua. Kalo Beta bilang kata Beta seng kanal Antua, itu sama sa deng Beta pung mulu parlente putar bale macang deng kamong lai. Mar Beta kanal Antua deng salalu biking Antua pung parenta. 56Kamong pung moyang Abraham pung hati paleng sanang, tagal antua su tau kalo antua nanti lia Beta datang ka dunya. Antua memang su lia akang, la tagal itu antua pung hati paleng sanang.”

57Tarus, orang-orang Yahudi tu bilang par Yesus kata, “E Bu! Ale sa balong kapala lima lai, kong Ale bilang Ale su lia moyang Abraham?”

58Abis itu Yesus bilang par dong, “Dengar bae-bae tagal apa yang Beta bilang ni batul! Waktu Abraham balong ada lai, Beta su ada.”

59Waktu dong dengar Yesus bilang bagitu, dong ambe batu par lempar Antua sampe mati, tagal dong pikir Antua biking diri sama deng Allah. Mar Yesus pi tado-tado la kasi tinggal orang Yahudi pung Tampa Sombayang Pusat tu.

Currently Selected:

Yohanis 8: ABMA

Highlight

Copy