Lukas 1

Mangapa sampe Lukas tulis surat ni

1:1-4

1-3Bapa Teofilus yang beta hormat!

Banya orang su lia deng mata kapala sandiri samua yang Yesus biking deng ajar, mulai dari yang partama waktu Antua masi ada deng katong. Dong kasi balajar Yesus pung ajarang tu dari mulu ka mulu sampe oras tadi ni. Banya orang su coba tulis samua yang Yesus su biking deng ajar tu. Beta jua su pariksa samua tu bae-bae dari yang partama. Jadi, beta rasa labe bae kalo beta ator akang samua bae-bae la tulis akang par bapa, 4biar bapa bisa tau kalo samua yang orang su kasi balajar par bapa soal Yesus tu batul.

Malekat kasi tau Sakaria kalo Yohanis Tukang Baptis mau lahir

1:5-25

5Waktu Herodes jadi raja di propinsi Yudea, ada orang Yahudi pung imam satu nama Sakaria. Dia ni imam dari Abia pung kalompok.#1 Orang Israel pung Sejara 24:10 Dia pung bini nama Elisabet. Elisabet ni jua imam Harun pung turunang. 6Dong dua hidop iko Tuhan pung mau deng biking Antua pung hati sanang. Dong dua salalu iko Tuhan pung parenta deng atorang. 7Mar kasiang, dong dua seng pung ana tagal Elisabet seng bisa pung ana. Dong dua jua su tua lai.

8Satu kali bagini, imam-imam dari Abia pung kalompok dapa bagiang karja di Tampa Sombayang Pusat. La Sakaria dapa bagiang par biking dia pung tugas imam di muka Allah. 9Barang, waktu imam-imam cabu undi iko dong pung biasa, Sakaria pung nama yang kaluar. Jadi, dia yang musti bakar kamanyaang di Tuhan pung Tampa Sombayang Pusat. 10Waktu dia ada bakar kamanyaang dalang Ruang Kudus tu, orang banya ada sombayang di kintal.

11Skrek bagini, Tuhan pung malekat satu unju rupa par Sakaria. Malekat tu badiri di sabala kanang meja tampa bakar kamanyaang. 12Pas Sakaria dapa lia malekat tu, dia tacigi deng takotang paskali. 13Mar malekat tu bilang kata, “Sakaria e! Jang ale taku! Tuhan su dengar ale pung sombayang. Ale pung bini nanti ada deng badang la kasi lahir ana laki-laki satu par ale. Ale musti kasi nama dia Yohanis. 14Ale pung hati nanti paleng sanang tagal ana tu. Labe-labe lai, orang banya pung hati paleng sanang waktu ana tu lahir. 15Barang, Tuhan anggap dia tu orang panting. Dia seng bole minong anggor deng minomang karas laeng lai.#Orang Israel di Padang Gurun 6:3 Allah pung Roh nanti kasi kuasa par dia mulai dari dia masi ada dalang poro lai. 16Dia nanti biking banya dari orang Israel bale kombali par Tuhan, Allah yang orang Israel somba. 17Dia pung tabiat hidop deng kuasa yang ada dalang dia tu sama deng Allah pung juru bicara Elia dolo-dolo. La dia nanti datang kamuka Tuhan par biking bapa-bapa bale sayang dong pung anana kombali. La orang-orang yang kapala batu, dia nanti biking dong jadi pung pikirang tajang, macang deng orang yang salalu iko Tuhan pung mau. Dia biking bagitu biar orang-orang siap par tarima Tuhan.”#Malaki 4:5-6

18Tarus Sakaria tanya malekat kata, “Bagemana beta bisa parcaya kalo apa yang ale bilang tu batul? Barang, beta ni su tua deng beta pung bini jua su tua lai, jadi katong seng bisa pung ana.”

19Mar malekat tu bale bilang par dia kata, “Beta ni Gabriel.#Danyel 8:16, 9:21 Beta salalu badiri di muka Allah deng salalu siap bawa Antua pung pasáng. Antua sandiri yang suru beta kasi tau kabar bae ni par ale. 20Samua yang beta su bilang tu nanti jadi pas akang pung waktu. Mar ale seng parcaya apa yang beta bilang, jadi ale nanti mou-mou sampe apa yang beta bilang tu jadi.”

21Waktu itu, orang banya ada tunggu-tunggu Sakaria. Dong samua herang mangapa sampe dia lama paskali di dalang Tampa Sombayang Pusat tu. 22Waktu Sakaria kaluar, dia su seng bisa bicara apapa lai par dong. Jadi, dia cuma kasi kode sa tagal dia su mou-mou. Waktu orang-orang lia dia bagitu, dong tau kalo Tuhan su kasi unju apapa satu par dia dalang Tampa Sombayang Pusat. 23Waktu Sakaria pung hari-hari karja tu su abis, dia pulang.

24Seng lama bagini, dia pung bini Elisabet ada deng badang. Tagal itu, Elisabet seng kaluar-kaluar ruma sampe lima bulang, tinggal bakurung sa. Dia bilang kata, 25“Tuhan paleng sayang beta deng biking yang bae par beta. Antua su angka beta pung muka, jadi beta su seng malu di muka orang lai.”

Malekat kasi tau Maria kalo Yesus mau lahir

1:26-38

26-27Waktu Elisabet su deng badang anam bulang, Allah suru malekat Gabriel pi par parampuang parawang satu di kampong Nasaret, di propinsi Galilea. Dia tu nama Maria. Dia su batunangang deng Yusuf, Raja Daud pung turunang.#Matius 1:18 28Malekat tu bilang par Maria kata, “Salam Maria! Ale dapa berkat basar dari Tuhan. Antua ada deng ale!”

29Waktu Maria dengar malekat bilang bagitu, dia tacigi la bilang dalang hati kata, “Salam ni, akang pung arti apa e?”

30Tarus malekat tu bilang kata, “Jang taku Maria, barang ale dapa berkat basar dari Allah. 31Ale nanti ada deng badang la kasi lahir Ana laki-laki satu. Ale musti kasi nama Dia Yesus.#1:31 Nama Yesus dalang bahasa Ibrani tu, Yehosua, yang pung arti, ‘Tuhan Allah kasi salamat manusia’. Kalo dalang bahasa Yunani tu, Iesous. Lia Matius 1:21. 32Dia nanti jadi orang basar, deng orang nanti panggel Dia par Allah yang Paleng Tinggi pung Ana. Tuhan Allah nanti angka Dia par pegang kuasa ganti Dia pung moyang Raja Daud. 33Dia jua nanti pegang parenta jadi Raja par samua anana cucu bangsa Israel#1:33 Bangsa Israel: Teks bahasa Yunani bilang, “Yakub pung ruma”. Akang pung arti, ‘Yakub pung anana cucu’. Dong tu bangsa Israel. tarus-tarus. Dia pung karajaang seng abis-abis.”#2 Samuel 7:12, 13, 16; Yesaya 9:6

34Mar Maria bilang kata, “Beta balong parna tidor deng laki-laki, jadi bagemana kong bisa jadi bagitu?”

35Malekat bilang kata, “Allah pung Roh nanti datang par ale la Allah yang Paleng Tinggi pung kuasa nanti ada deng ale. Jadi, Ana yang nanti lahir tu kudus. Orang nanti panggel Dia par Allah pung Ana. 36La dengar! Ale pung sudara Elisabet yang su tua, yang orang bilang seng bisa pung ana tu, sakarang ni dia ada deng badang su anam bulang, 37tagal Allah bisa biking apa sa.”#Carita Mula-Mula 18:14

38Tarus Maria bilang kata, “Beta ni Tuhan pung orang suru-suru. Jadi, biar apa yang bapa bilang tu jadi par beta.” La malekat tu pi kasi tinggal Maria.

Maria pi ka Elisabet

1:39-45

39Abis malekat kasi tinggal Maria, seng lama lai, Maria paparipi pi ka kota satu di propinsi Yudea. Kota tu ada di daera gunung-gunung. 40Sampe di situ, Maria maso di Sakaria pung ruma la kasi suara dia pung sudara Elisabet. 41Parsis Elisabet dengar Maria pung suara, ana yang ada dalang Elisabet pung poro tu bagara, la Allah pung Roh kasi kuasa par Elisabet. 42Tarus, Elisabet bataria kata, “Tuhan su kasi berkat par ale labe dari samua parampuang. Bagitu jua deng ale pung Ana yang ada dalang poro tu! 43La beta ni sapa la, kong beta pung Tuhan pung mama datang par beta? 44Beta tau ale tu beta pung Tuhan pung mama. Barang, pas beta dengar ale pung suara, ana yang ada dalang beta pung poro ni, dia bagara tagal dia pung hati paleng sanang. 45Ale paleng baruntung tagal ale su parcaya kalo samua yang Tuhan bilang par ale tu, akang mau jadi.”

Maria puji Tuhan

1:46-56

46Tarus, Maria bilang kata,

“Beta puji-puji Tuhan!

47Beta pung hati paleng sanang deng Allah, yang kasi salamat beta.

48Barang, Antua su inga beta, Antua pung orang suru-suru yang seng pung arti apapa ni.

Dari oras ini jua, samua orang di dunya nanti bilang kata beta ni parampuang yang paleng baruntung,

49tagal Allah yang pung Kuasa Paleng Basar tu su biking hal-hal yang luar biasa par beta.

Antua tu kudus! Seng ada yang macang deng Antua.

50Dari turunang abis turunang, Tuhan kasi unju Antua pung hati bae tarus

par orang yang taru hormat par Antua.

51Apa yang Tuhan su biking tu, akang kasi unju Antua pung kuasa.

Antua biking orang-orang yang suka angka diri tu talamburang.

52Tuhan su kasi turung raja-raja yang ada pegang kuasa,

la angka orang-orang yang seng pung arti apapa.

53Tuhan su kasi makang orang lapar deng makanang sadap-sadap sampe dong kanyang.

Mar Antua suru orang kaya pulang deng tangang kosong.

54Tuhan jua su tolong katong orang Israel, Antua pung orang suru-suru.

Barang, Antua seng parna lupa kasi unju Antua pung hati bae 55par katong pung moyang Abraham deng dia pung anana cucu samua, sama deng apa yang Antua su janji par dong.”#Carita Mula-Mula 17:7

56Maria tinggal deng Elisabet kurang labe tiga bulang. Tarus, dia pulang ka ruma di kampong Nasaret.

Yohanis Tukang Baptis lahir

1:57-66

57Pas waktu Elisabet pung ana mau lahir, dia kasi lahir ana laki-laki satu. 58Bagitu Elisabet pung orang pinggir-pinggir ruma deng basudara dengar kata Tuhan su kasi unju Antua pung hati bae yang luar biasa par Elisabet, dong pung hati paleng sanang sama-sama deng Elisabet lai.

59Pas ana kacil tu umur dalapang hari la musti dapa sunat,#Imam-Imam pung Atorang 12:3 dong samua datang. Dong mau kasi nama dia Sakaria macang dia pung papa pung nama. 60Mar Elisabet bilang kata, “Seng bole. Dia musti nama Yohanis.”

61Mar dong bilang kata, “Mangapa kong mau kasi dia nama Yohanis? Seng ada ale pung basudara yang pung nama bagitu.” 62La dong kasi kode par tanya Sakaria kata ana tu mau kasi nama sapa. 63Sakaria kasi kode par minta batu tulis la dia tulis bagini, “Dia nama Yohanis.” Dong samua taherang-herang. 64Oras itu jua, Sakaria bisa bicara kombali la puji-puji Allah.

65Samua orang yang tinggal dekat-dekat situ tu takotang paskali. Orang carita kajadiang tu dari mulu ka mulu di samua tampa di gunung-gunung di propinsi Yudea. 66Samua orang yang dengar akang mulai bapikir la bilang kata, “Kalo ana ni su basar, dia nanti jadi apa e?” Barang, dong lia Tuhan pung kuasa ada sama-sama deng dia.

Sakaria puji Tuhan

1:67-80

67Yohanis pung bapa Sakaria dapa kuasa dari Allah pung Roh la dia kasi tau pasáng yang dia dapa dari Antua. Dia bilang kata,

68“Puji Tuhan, Allah yang katong orang Israel somba!

Barang, Antua su datang par kasi bebas Antua pung orang-orang.

69Antua jua su kasi satu Orang yang pung kuasa basar par datang kasi salamat katong.

Orang tu Allah pung jongos Daud pung turunang satu.

70Akang sama deng apa yang Antua su janji dolo-dolo lewat Antua pung juru-juru bicara yang Antua su pili tu.

71Antua bilang kalo Antua mau kasi salamat katong dari katong pung musu-musu

deng dari orang-orang yang binci katong tu pung kuasa.

72Antua biking bagitu par kasi unju Antua pung hati bae par katong pung tete-nene moyang,

deng inga janji kudus yang Antua sandiri ika deng dong.

73Janji tu, Antua ika akang deng sumpa

par kasi kuat akang deng katong pung moyang Abraham.

74Antua janji kalo Antua nanti kasi lapas katong dari katong pung musu-musu,

biar katong pi somba Antua, seng taku-taku dong lai.

75La katong jadi Antua pung orang-orang yang seng bardosa

deng yang iko Antua pung mau sampe mati.”

76Abis itu, Sakaria bilang par Yohanis,

“Ana e, orang nanti bilang kata,

‘Ale tu Allah yang Paleng Tinggi pung juru bicara.’

Barang, ale yang nanti datang kamuka par kasi siap jalang par Tuhan.

77Ale nanti kasi tau par Antua pung orang-orang

kalo dong bisa dapa kasi ampong dari dong pung dosa-dosa, la deng bagitu dong nanti salamat.

78Allah yang katong somba kasi salamat katong tagal Antua pung hati bae par katong deng tagal Antua jua sayang katong lai.

Jadi, Orang yang Allah su Angka par Kasi Salamat Manusia nanti datang dari sorga macang deng matahari nai pagi-pagi par kasi tarang dunya.#Malaki 4:2

79Antua datang par kasi tarang samua orang yang hidop dalang galap deng yang taku mati.#Yesaya 9:1

Antua nanti bawa katong par baku bae deng Allah deng orang laeng.”

80Yohanis labe hari labe tamba basar deng dia pung parcaya par Allah tamba kuat. Dia tinggal di padang gurun sampe hari waktu dia mulai kasi tau Allah pung pasáng par orang Israel.

Currently Selected:

Lukas 1: ABMA

Highlight

Copy