Lukas 2

Yesus lahir

2:1-7

(Matius 1:18-25)

1Waktu Raja Basar Agustus parenta karajaang Roma, dia kasi kaluar parenta par kasi maso samua orang yang ada dalang dia pung karajaang tu pung nama-nama. 2Ini ni sensus partama yang dong biking waktu Kirenius jadi gubernur di propinsi Siria. 3Tagal parenta tu, samua orang bale ka dong pung tampa asal par kasi maso dong pung nama-nama.

4Jadi, Yusuf pi dari kampong Nasaret di propinsi Galilea ka kota Betlehem di propinsi Yudea. Barang, dia tu turunang dari Raja Daud, yang asal dari kota Betlehem. 5Yusuf pi sama-sama deng dia pung tunangang Maria par daftar dong dua pung nama. Waktu itu, Maria ada deng poro basar.

6Waktu dong ada di Betlehem, su pas waktu par Maria pung Ana mau lahir. 7Mar dong seng dapa kamar sewa, jadi dong maso ka kandang. La Maria kasi lahir dia pung Ana di situ. Ana tu laki-laki, Ana yang tua. Maria bungkus Dia deng kaeng la kasi tidor Dia di dalang binatang piara pung tampa makang.

Malekat kasi tau par orang-orang jaga domba kalo Yesus su lahir

2:8-20

8Seng talalu jau dari tampa Yesus lahir, ada orang-orang yang jaga dong pung domba-domba malang-malang di tana lapang yang barumpu. 9Takajo bagini, Tuhan pung malekat satu datang par dong. Tarus, Tuhan pung sinar paleng tarang manyala koliling dong sampe dong takotang paskali. 10Mar malekat tu bilang par dong kata, “Jang taku! Barang, beta mau kasi tau kabar bae par kamong. Kabar bae tu bisa biking samua orang pung hati paleng sanang. 11Hari ini, Orang yang Kasi Salamat Manusia su lahir par kamong di kota Betlehem, Raja Daud pung kota asal. Dia tu Kristus, Orang yang Allah su Angka par Kasi Salamat Manusia, deng dia tu jua Tuhan. 12Ini ni tanda biar kamong bisa kanal Ana tu: Kamong nanti dapa Ana mera-mera tabungkus deng kaeng, baru Dia ada tidor dalang binatang piara pung tampa makang.”

13Takajo bagini, dong dapa lia malekat paleng banya dari sorga datang bagabung deng malekat yang tadi tu la puji-puji Allah kata:

14“Puji deng hormat par Allah di sorga!

La samua orang di dunya yang biking Antua pung hati sanang su bisa baku bae deng Antua.”

15Abis itu, malekat-malekat tu pi kasi tinggal dong samua la bale ka sorga. La orang-orang yang jaga domba tu laeng bilang par laeng kata, “Mari katong pi ka Betlehem par lia apa yang jadi, macang deng yang Tuhan su bilang par katong!”

16La dong samua paparipi par pi cari tampa tu. Pas dong sampe, dong dapa Maria, Yusuf, deng Ana mera-mera tu. Ana tu ada tidor di binatang piara pung tampa makang.

17Waktu dong lia Ana tu, dong carita apa yang malekat su bilang soal Dia par orang-orang. 18Samua orang yang dengar dong pung carita tu taherang-herang. 19Mar Maria simpang samua tu dalang hati la inga-inga akang tarus. 20Waktu orang-orang yang jaga domba tu bale kombali, dong puji-puji Allah iko jalang. Barang, samua yang dong dengar deng lia tu, akang sama deng apa yang malekat bilang par dong.

Maria deng Yusuf bawa Yesus ka Tampa Sombayang Pusat

2:21-38

21Waktu Ana tu umur dalapang hari, Yusuf deng Maria pi kasi sunat Dia. Dong kasi nama Dia Yesus, macang deng malekat pung pasáng par Maria waktu dia balong ada deng badang lai.#Imam-Imam pung Atorang 12:3; Lukas 1:31

22Pas ampa pulu hari abis Maria kasi lahir Yesus, dia deng Yusuf pi ka Yerusalem, biar Maria bisa iko upacara kasi barsi diri iko atorang dalang Kitab Torat yang Musa su tulis. Dong bawa Yesus pi sama-sama deng dong lai, tagal dong mau kasi Dia par Tuhan.#Imam-Imam pung Atorang 12:6-8 23Barang, dalang Tuhan pung Kitab Torat tu ada bilang kata, “Samua ana laki-laki yang tua tu Tuhan pung. Jadi, dong pung orang tatua musti kasi dong par Tuhan.”#Kaluar dari Mesir 13:2, 12 24Dong jua musti kasi korbang burung tekukur sapasang, ka seng ana burung pombo puti dua ekor, di Tampa Sombayang Pusat iko atorang dalang Tuhan pung Kitab Torat.

25Waktu itu di Yerusalem ada orang satu nama Simeon. Dia iko Tuhan pung mau deng dengar-dengarang Antua. Dia jua tunggu Allah pung janji kata Antua nanti kasi salamat dong orang Israel. Antua pung Roh salalu ada deng dia. 26Antua pung Roh sandiri su bilang par Simeon kata dia seng mati kalo dia balong lia Orang yang Tuhan su Angka par Kasi Salamat Manusia. 27La Tuhan pung Roh bawa Simeon ka Tampa Sombayang Pusat pung kintal. Pas hari itu, Yusuf deng Maria jua bawa Yesus ka situ par kasi Dia par Tuhan iko atorang dalang Kitab Torat. 28Tarus, Simeon ambe Ana tu, gendong Dia, la puji Allah kata,

29“Sio Tuhan Allah e! Tuhan pung janji par beta, Tuhan pung jongos ni, akang su jadi.

Jadi, sakarang Tuhan su bisa panggel beta pulang, tagal beta pung hati su tenang.

30Barang, beta su lia deng mata kapala sandiri

Orang yang Allah su angka par datang Kasi Salamat Manusia ni!

31Tuhan sandiri yang su kasi Dia

par samua bangsa di dunya ni.

32Dia macang deng lampu yang jadi tarang

par orang-orang yang bukang Yahudi biar dong bisa kanal Tuhan.

La deng bagitu, samua orang nanti taru hormat par bangsa Israel,#Yesaya 42:6, 49:6, 52:10 Tuhan pung orang-orang.”

33Yusuf deng Maria herang paskali waktu dengar Simeon bilang bagitu soal Yesus. 34Tarus, Simeon minta Allah kasi berkat par dong tiga. La dia bilang par Maria kata, “Dengar bae-bae! Ana ni, Tuhan su pili Dia par nanti kasi jatu deng angka banya orang Israel. Apa yang Dia biking deng bilang kasi unju Tuhan pung pikirang, mar ada orang yang malawang Dia lai. 35Kalo orang malawang Dia, samua orang bisa tau sapa pung pikirang bae deng sapa pung pikirang seng bae. La ale pung hati nanti susa paskali, macang kata tacucu deng tombak.”

36Di situ ada parampuang satu yang su baumur nama Hana. Dia tu Allah pung juru bicara. Dia pung bapa par Fanuel dari suku Asyer. Dia su kaweng, mar baru hidop deng dia pung laki tuju taong sa, 37dia pung laki mati. Dia janda sampe sakarang la su umur 84 taong. Dia salalu ada di Tampa Sombayang Pusat pung kintal. Siang-malang dia ada di sana par sombayang deng puasa par somba Allah. 38Waktu Simeon ada bacarita deng Yusuf deng Maria, Hana pi ka situ lai la minta dangke banya dari Allah. Tarus, dia carita soal Ana tu par samua orang di situ yang ada tunggu-tunggu apa tempo Tuhan mau kasi bebas orang Israel.

Maria deng Yusuf bawa Yesus ka Nasaret

2:39-40

39Waktu Maria deng Yusuf su abis biking samua yang dong musti biking iko atorang dalang Tuhan pung Kitab Torat, dong pulang ka kampong Nasaret di propinsi Galilea.#Matius 2:23 40Ana tu labe hari labe tamba basar deng kuat. Dia jua mangarti banya hal deng Allah pung berkat basar ada deng Dia.

Yesus di dalang orang Yahudi pung Tampa Sombayang Pusat

2:41-52

41Sabang taong, Yesus pung orang tatua pi ka Yerusalem par iko orang Yahudi pung hari basar Paska.#2:41 Orang Yahudi pung hari basar Paska tu hari yang dong biking par inga dong pung tete-nene moyang kaluar dari Mesir. 42Waktu Yesus umur sapulu dua taong, Dia pi ka Yerusalem deng Dia pung orang tatua par iko hari basar Paska macang biasa. 43Abis hari basar tu dong pulang. Waktu dong bajalang pulang, dong seng tau kalo Yesus masi ada di Yerusalem, 44tagal dong sangka kata Dia ada bajalang deng orang banya lai. Dong bajalang sampe sore, baru pi cari Dia di tenga-tenga dong pung sudara deng tamang-tamang, 45mar seng dapa Dia. Jadi, dong bale kombali ka Yerusalem par cari Dia.

46Dong cari Dia sampe hari katiga dari waktu dong kaluar dari Yerusalem, baru dong dapa Dia di kintal Tampa Sombayang Pusat. Dia ada dudu di tenga-tenga guru-guru Torat la dengar dong bicara deng baku soal jawab deng dong. 47Samua orang yang dengar apa yang Dia bilang tu, dong herang paskali. Barang, Dia ni paleng pintar deng Dia jawab dong pung soal-soal deng bae. 48Pas Dia pung orang tatua lia Dia, dong taherang-herang. Tarus, Dia pung mama bilang kata, “Nyong e, mangapa Nyong biking katong macang bagini? Beta deng Nyong pung papa pung hati susa cari-cari Nyong.”

49Dia bilang kata, “Mangapa kong mama deng papa cari Beta? Masa mama deng papa seng tau kalo Beta musti ada di Beta pung Bapa pung ruma?” 50Mar Dia pung orang tatua seng mangarti apa yang Dia bilang tu.

51Tarus, Dia bale kombali deng dong ka Nasaret. Dia paleng dengar-dengarang Dia pung orang tatua. Mar Dia pung mama simpang samua hal yang su jadi tu dalang hati. 52Yesus tamba basar deng tamba mangarti banya hal. Allah deng manusia jua tamba sanang deng Dia.#1 Samuel 2:26; Nasehat-Nasehat 3:4

Currently Selected:

Lukas 2: ABMA

Highlight

Copy