Lukas 3
3
Yohanis Tukang Baptis kasi tau Kabar Bae par orang banya di aer Yordan
3:1-20
(Matius 3:1-12; Markus 1:1-8; Yohanis 1:19-28)
1-2Waktu Sakaria pung ana Yohanis ada di padang gurun, Allah bicara par dia. Waktu itu, Tiberius su jadi Raja Basar Roma sapulu lima taong. Waktu itu jua, Pontius Pilatus ada pegang parenta jadi gubernur di propinsi Yudea, Herodes pegang parenta di propinsi Galilea, Herodes pung sudara Filipus pegang parenta di daera Iturea deng Trakonitis, deng Lisanias pegang parenta di daera Abilene. La waktu itu jua, Hanas deng Kayafas yang jadi orang Yahudi pung Imam Basar.
3Abis Allah bicara par Yohanis, dia pi di samua daera di aer Yordan la tabaos kata, “He orang-orang e! Kasi tinggal kamong pung dosa-dosa la kasi diri par dapa baptis biar Allah kasi ampong kamong pung dosa-dosa!” 4Apa yang Yohanis biking tu sama deng apa yang Allah pung Juru Bicara Yesaya su tulis dalang dia pung kitab kata,
“Nanti ada orang yang tabaos di padang gurun kata,
‘He orang-orang e! Kasi siap jalang par Tuhan!
Kasi barsi jalang#3:4 Kasi barsi jalang: Teks bahasa Yunani bilang, “Kasi lurus jalang”. par Antua langgar!#Yesaya 40:3-5
5Tambong tana la tutu akang pung alor-alor tu.
Kasi rata gunung samua,
kasi lurus jalang yang bengko-bengko,
la kasi licing jalang yang kasar-kasar tu lai.
6La samua orang nanti lia bagemana Allah kasi salamat orang-orang dari dosa.’ ”
7Tarus, orang banya tu datang par Yohanis par dapa baptis. Mar dia bilang par dong kata, “Hoe kamong ular-ular babisa! Sapa yang bilang kata kalo kamong dapa baptis mar seng roba kamong pung pikirang deng kalakuang yang bardosa, kamong bisa lapas dari Allah pung morka deng hukumang yang nanti jadi?#Matius 12:34, 23:33 8Jadi, kalo kamong su bale balakang dari kamong pung dosa-dosa, kamong jua musti biking apa yang bae! Jang kira kamong nanti seng dapa hukumang dari Allah tagal kamong pung moyang par Abraham. Dengar beta bilang par kamong: Allah bisa biking batu-batu ni par jadi Abraham pung anana cucu!#Yohanis 8:33 9Allah su siap hukum sapa sa yang seng mau kasi tinggal dia pung dosa-dosa la biking apa yang bae. Akang macang deng orang su kasi siap mancadu par tabang pohong-pohong yang seng kasi kaluar bua yang bae lapis deng akang pung akar-akar, la buang akang ka dalang api.”#Matius 7:19
10Tarus, orang banya tu tanya par Yohanis kata, “Kalo bagitu katong musti biking apa?”
11Yohanis bilang kata, “Sapa yang pung baju ada dua potong, labe bae dia kasi satu potong par orang yang seng pung. Sapa sa yang pung makanang, labe bae bage akang par orang yang seng pung lai.”
12Mala tukang-tukang tagi pajak jua datang par dapa baptis dari Yohanis lai. Dong bilang, “Tuang guru e, katong musti biking apa la?”#Lukas 7:29
13Yohanis bilang kata, “Jang tagi pajak labe banya dari apa yang pemerinta su ator.”
14Tarus, tantara-tantara jua tanya Yohanis kata, “La katong ni musti biking apa la?”
Yohanis bilang kata, “Jang pata-pata kepeng iko suka deng jang tudu orang sabarang, mar musti rasa cukup deng kamong pung hasil karingat.”
15Mar orang banya ni ada tunggu deng harap Orang yang Allah su Angka par Kasi Salamat Manusia. Jadi, dong samua tanya-tanya dalang dong pung hati kata, “Jang sampe Dia ni Orang yang Allah su Angka par Kasi Salamat Manusia, yang katong ada tunggu-tunggu tu kapa?”
16Mar Yohanis bilang par dong kata, “Beta baptis kamong deng aer. Mar nanti ada Orang yang pung kuasa labe basar dari beta yang nanti datang dari balakang beta. Mau buka Antua pung sandal dari kaki sa beta seng pantas. Antua tu yang nanti baptis kamong deng Allah pung Roh deng api. 17Antua macang kata ada pegang nyiru par kasi pisa gandum dari akang pung kuli. Biji gandum Antua simpang dalang gudang, mar akang pung kuli Antua buang ka dalang api yang seng mati-mati.”
18Tarus, Yohanis kasi inga dong deng macang-macang nasehat yang laeng. Dia jua kasi tau Tuhan pung Kabar Bae par orang banya di situ.
19Mar satu kali, Yohanis tagor gubernur Herodes tagal dia kaweng deng dia pung sudara pung bini nama Herodias.#3:19 Kalo iko orang Yahudi pung adat, laki-laki seng bole kaweng deng dia pung sudara pung bini kalo sudara tu masi hidop, biar kata dong su bacere lai. Dia jua tagor Herodes tagal samua kajahatang laeng yang dia biking. 20Mar Herodes labe tamba biking kajahatang lai. Barang, dia suru tantara kasi maso Yohanis ka dalang bui.
Yohanis baptis Yesus
3:21-22
(Matius 3:13-17; Markus 1:9-11; Yohanis 1:32-34)
21Dolo waktu Yohanis balong maso bui, dia baptis orang banya. Waktu itu, Yesus datang lai la Yohanis baptis Antua. Abis itu, waktu Antua ada sombayang, skrek bagini langit tabuka, 22la Allah pung Roh dalang rupa burung pombo turung di atas Antua. La ada suara dari sorga yang bilang kata, “Ale ni Beta pung Ana yang Beta paleng sayang. Ale biking Beta pung hati paleng sanang.”#Carita Mula-Mula 22:2; Lagu-Lagu 2:7; Matius 3:17; Markus 1:11; Lukas 9:35
Yesus pung silsila
3:23-38
(Matius 1:1-17)
23Waktu Yesus mulai kasi balajar orang-orang, Antua umur kira-kira tiga pulu taong. Orang-orang kanal kalo Yesus tu Yusuf pung ana.
Yusuf pung bapa par Eli.
24Eli pung bapa par Matat.
Matat pung bapa par Lewi.
Lewi pung bapa par Melki.
Melki pung bapa par Yanai.
Yanai pung bapa par Yusuf.
25Yusuf pung bapa par Matica.
Matica pung bapa par Amos.
Amos pung bapa par Nahum.
Nahum pung bapa par Hesli.
Hesli pung bapa par Nagai.
26Nagai pung bapa par Maat.
Maat pung bapa par Matica.
Matica pung bapa par Simei.
Simei pung bapa par Yosek.
Yosek pung bapa par Yoda.
27Yoda pung bapa par Yohanan.
Yohanan pung bapa par Resa.
Resa pung bapa par Serubabel.
Serubabel pung bapa par Sealtiel.
Sealtiel pung bapa par Neri.
28Neri pung bapa par Melki.
Melki pung bapa par Adi.
Adi pung bapa par Kosam.
Kosam pung bapa par Elmadam.
Elmadam pung bapa par Er.
29Er pung bapa par Yosua.
Yosua pung bapa par Elieser.
Elieser pung bapa par Yorim.
Yorim pung bapa par Matat.
Matat pung bapa par Lewi.
30Lewi pung bapa par Simeon.
Simeon pung bapa par Yehuda.
Yehuda pung bapa par Yusuf.
Yusuf pung bapa par Yonam.
Yonam pung bapa par Elyakim.
31Elyakim pung bapa par Melea.
Melea pung bapa par Mina.
Mina pung bapa par Matata.
Matata pung bapa par Natan.
Natan pung bapa par Daud.
32Daud pung bapa par Isai.
Isai pung bapa par Obed.
Obed pung bapa par Boas.
Boas pung bapa par Salmon.
Salmon pung bapa par Nahason.
33Nahason pung bapa par Aminadab.
Aminadab pung bapa par Admin.
Admin pung bapa par Arni.
Arni pung bapa par Hesron.
Hesron pung bapa par Peres.
Peres pung bapa par Yehuda.
34Yehuda pung bapa par Yakub.
Yakub pung bapa par Isak.
Isak pung bapa par Abraham.
Abraham pung bapa par Tera.
Tera pung bapa par Nahor.
35Nahor pung bapa par Seruk.
Seruk pung bapa par Rehu.
Rehu pung bapa par Pelek.
Pelek pung bapa par Eber.
Eber pung bapa par Salmon.
36Salmon pung bapa par Kenan.
Kenan pung bapa par Arpaksad.
Arpaksad pung bapa par Sem.
Sem pung bapa par Nuh.
Nuh pung bapa par Lamek.
37Lamek pung bapa par Metusala.
Metusala pung bapa par Henok.
Henok pung bapa par Yared.
Yared pung bapa par Mahalalel.
Mahalalel pung bapa par Kenan.
38Kenan pung bapa par Enos.
Enos pung bapa par Set.
Set pung bapa par Adam.
Adam pung bapa par Allah.
Currently Selected:
Lukas 3: ABMA
Highlight
Share
Copy
Want to have your highlights saved across all your devices? Sign up or sign in
© 2022, Sinode Gereja Protestan Maluku
