Lukas 16
16
Orang yang pung akal panjang
16:1-13
1Abis itu, Yesus carita ande-ande satu par Antua pung murid-murid kata, “Satu kali bagini, ada orang kaya satu. Dia kasi karja satu orang par jadi dia pung kapala kas kepeng deng urus dia pung harta. Mar ada orang yang lapor kata dia pung kapala kas kepeng tu suka ambor dia pung harta. 2Jadi, dia panggel kapala kas kepeng tu la tanya kata, ‘Batul ka seng ose suka ambor beta pung harta? Beta su seng mau ose jadi beta pung kapala kas kepeng lai, jadi ose biking laporan soal ose pung tugas tu la kasi akang kamari par beta. Abis itu, ose barenti jua!’
3Dengar bagitu, kapala kas kepeng tu bilang dalang hati kata, ‘Cilaka, beta pung bos kasi barenti beta! Beta musti biking apa? Kalo bakabong, beta seng kuat. Kalo minta-minta kepeng, beta malu. 4O, beta ada akal biar kalo beta su seng karja di sini lai, ada orang yang mau tarima beta par tinggal di dong pung ruma.’
5Jadi, kapala kas kepeng tu panggel samua orang yang ada pung utang di dia pung bos la tanya dong satu abis satu. Dia bilang par orang yang partama kata, ‘Ale pung utang ada barapa di beta pung bos?’
6Orang itu bilang, ‘Beta ada utang minya ampa ribu liter.’
Kapala kas kepeng tu bilang kata, ‘Ini ale pung kartas utang, dudu la capat ganti akang. Tulis sa kata ale pung utang tu cuma dua ribu liter!’
7Abis itu, dia bilang par satu orang lai kata, ‘La ale, ale pung utang ada barapa lai?’
Orang itu bilang, ‘Beta ada utang gandum saribu karong.’
La kapala kas kepeng tu bilang, ‘Ini ale pung kartas utang. Tulis sa di kartas tu kata ale pung utang cuma dalapang ratus!’
8Dia biking bagitu tarus par orang laeng lai sampe dia pung bos dapa tau akang. Biar kata kapala kas kepeng tu seng jujur, mar dia pung bos puji dia tagal dia pung akal panjang paskali.”
Yesus bilang lai, “Orang yang hidop sanang-sanang di dunya ni, dong pung akal panjang par dapa untung dari orang laeng. Dong pung akal labe panjang dari orang yang hidop dalang Allah pung tarang.
9Dengar Beta bilang par kamong! Kamong musti pake kamong pung harta dunya ni bae-bae par bantu orang laeng la deng bagitu kamong nanti dapa tamang banya. Tarus, kalo harta dunya ni su seng ada lai, Allah nanti tarima kamong par tinggal deng Antua di sorga.
10Sapa yang bisa dapa parcaya par biking hal-hal yang kacil, dia jua nanti bisa dapa parcaya par biking hal-hal yang basar. Mar sapa yang seng bisa dapa parcaya par biking hal-hal yang kacil, dia jua nanti seng bisa dapa parcaya par biking hal-hal yang basar. 11Jadi, kalo kamong seng bisa dapa parcaya par urus harta dunya, kamong jua seng bisa dapa parcaya par urus harta yang batul dari sorga. 12La kalo kamong seng bisa jaga orang pung harta yang dia su kasi parcaya par kamong, seng ada yang barani kasi apapa par kamong par jadi kamong pung harta sandiri.
13Satu orang jongos seng bisa karja par dua bos, tagal dia nanti binci satu la sayang yang laeng ka dengar-dengarang satu la seng dengar-dengarang yang laeng. Bagitu lai deng kamong. Kamong seng bisa hidop par Allah deng jua hidop par harta dunya!”
Sapa yang batul di muka Allah
16:14-18
14Waktu orang-orang dari kalompok Farisi dengar samua yang Yesus bilang tu, dong seng suka akang la tatawa Antua, tagal dong tu jua mata kepeng. 15La Yesus bilang par dong kata, “Hoe, biar kata kamong biking diri batul di muka orang laeng, mar Allah tau kamong pung isi hati samua. Barang, apa yang manusia anggap paleng bagus, itu yang Allah paleng binci.
16Dari dolo, katong orang Yahudi iko Kitab Torat deng Allah pung juru-juru bicara pung tulisang. Akang jadi bagitu tarus sampe Yohanis Tukang Baptis datang kasi balajar orang deng baptis dong. Mulai dari oras itu, Kabar Bae soal bagemana Allah pegang parenta jadi Raja dapa kasi tau la orang banya usaha sunggu-sunggu par jadi Antua pung orang-orang.#Matius 11:12-13 17Mar, apa yang tatulis dalang Kitab Torat deng Allah pung juru-juru bicara pung tulisang tu tetap ada tarus-tarus. Labe gampang langit deng dunya ni ilang dari satu titik dalang Kitab Torat tu ilang.”#Matius 5:18
18Yesus bilang lai kata, “Sapa sa yang cere dia pung bini la kaweng deng parampuang laeng, itu dia su maeng serong. La sapa sa yang kaweng deng parampuang yang su dapa cere tu, itu dia jua su maeng serong.”#Matius 5:32; 1 Korintus 7:10-11
Orang kaya deng Lasarus yang kasiang
16:19-31
19La Yesus carita ande-ande satu par dong kata, “Satu kali bagini, ada orang kaya satu. Dia salalu pake baju panjang luar yang bagus-bagus deng pakiang dari kaeng lenan yang mahal. Sabang hari dia hidop paleng sanang tagal samua-samua ada. 20Di dia pung muka pintu ruma, ada orang kasiang satu. Dia nama Lasarus. Dia pung badang pono deng boba yang banana. Orang-orang jaga taru dia di situ. 21Dia paleng lapar sampe mau makang makanang sisa yang jatu dari orang kaya tu pung meja makang, mar seng dapa. Mala anjing-anjing datang la jilat-jilat dia pung boba tu.
22Satu kali bagini, Lasarus mati. Tarus, malekat-malekat bawa dia la kasi dudu dia di sabala Abraham, tampa yang paleng bagus. Orang kaya tu jua mati lai la dapa kubur. 23Dia maso naraka, la di situ dia paleng sangsara paskali. Pas dia angka muka ka atas bagini, dia lia Abraham dari jau, la Lasarus ada dudu di sabala antua. 24La dia bataria, ‘Sio bapa Abraham e, kasi unju bapa pung hati bae par beta jua! Tolong suru Lasarus colo dia pung ujung jari dalang aer la datang kasi babasa beta pung lida ni jua, tagal beta paleng sangsara dalang api ni!’
25Mar Abraham bilang kata, ‘Ana e, coba inga bae-bae! Dolo waktu ose masi hidop, ose su dapa samua yang bagus-bagus. Mar Lasarus ni, sio, dia cuma dapa yang tarbae-tarbae sa. Jadi sakarang, dia sanang di sini mar ose sangsara paskali di sana. 26Apalai, Allah su biking jurang paleng basar paskali di tenga-tenga katong deng kamong. Jadi, kamong yang ada di sana seng bisa datang kamari par katong, la katong yang ada di sini seng bisa pi ka sana par kamong.’
27La orang kaya tu bilang, ‘Kalo bagitu sio bapa e, beta minta bapa suru Lasarus pi ka beta pung bapa pung ruma jua, 28tagal di sana ada beta pung sudara lima orang lai. Tolong suru Lasarus kasi inga dong deng sunggu-sunggu par barenti biking dosa biar dong jang maso naraka la sangsara macang beta bagini.’
29Mar Abraham bale bilang kata, ‘Ada Kitab Torat yang Musa su tulis deng Allah pung juru-juru bicara laeng pung tulisang di dong, jadi kasi tinggal dong iko apa yang su tatulis tu sa!’
30Mar orang kaya tu bilang, ‘Sio bapa Abraham e, itu sa seng sampe! Kalo ada orang mati yang hidop kombali la pi bilang akang par dong, baru dong kasi tinggal dong pung dosa-dosa!’
31Mar Abraham bilang kata, ‘Kalo dong seng dengar Musa deng Allah pung juru-juru bicara pung pasáng, biar kata ada orang mati yang hidop kombali la bicara par dong lai, dong pasti seng dengar akang!’ ”
Currently Selected:
Lukas 16: ABMA
Highlight
Share
Copy
Want to have your highlights saved across all your devices? Sign up or sign in
© 2022, Sinode Gereja Protestan Maluku
