Lukas 15
15
Ande-ande soal domba yang ilang
15:1-7
(Matius 18:12-14)
1Satu kali bagini, tukang-tukang tagi pajak deng orang-orang yang orang Yahudi anggap bardosa, dong datang par Yesus par dengar Antua pung ajarang. 2Mar, orang-orang Farisi deng guru-guru Torat dong barsungut. Dong bilang, “Ih, masa Dia tarima orang-orang bardosa la dudu makang sama-sama deng dong tu?”#Lukas 5:29-30
3Jadi, Yesus carita ande-ande satu par dong kata, 4“Kalo satu dari kamong ada pung domba saratus ekor la satu ekor ilang, kira-kira dia nanti biking apa? Dia pasti kasi tinggal yang sambilang pulu sambilang tu di tana lapang yang barumpu la pi cari satu yang ilang tu sampe dapa to? 5La kalo dia su dapa akang, dia pikol akang deng hati sanang. 6Sampe di ruma, dia panggel dia pung tamang-tamang deng orang pinggir-pinggir ruma la bilang, ‘He, mari barsuka sama-sama deng beta tagal beta su dapa beta pung domba yang ilang tu!’
7Dengar Beta bilang par kamong! Bagitu lai, samua yang ada di sorga jua nanti barsuka kalo ada satu orang bardosa kasi tinggal dia pung dosa-dosa. Dong pung sanang par satu orang tu labe dari dong pung sanang par sambilang pulu sambilang orang yang seng parlu kasi tinggal dong pung dosa-dosa tagal su iko Allah pung mau.”#15:7 Ada orang jua yang pikir kalimat ni bisa pung arti, “Dong pung sanang par satu orang tu labe dari dong pung sanang par sambilang pulu sambilang orang yang rasa diri jaga iko Tuhan pung mau, jadi seng parlu kasi tinggal dong pung dosa-dosa”.
Ande-ande soal kepeng perak satu yang ilang
15:8-10
8Abis itu, Yesus bilang par dong lai kata, “Ada carita satu lai. Satu kali bagini, ada parampuang satu. Dia ada pung kepeng perak#15:8 Kepeng perak: Bahasa Yunani pake kata drahma. Satu drahma tu sama deng ongkos karja satu hari. sapulu bua. Kalo dia pung kepeng sabua ilang, kira-kira dia nanti biking apa? Dia pasti bakar palita la manyapu dalang ruma par cari kepeng tu sampe di jiku-jiku samua, sampe dapa akang sakali to? 9Kalo dia su dapa akang, dia panggel dia pung tamang-tamang deng orang pinggir-pinggir ruma la bilang, ‘He, mari barsuka sama-sama deng beta tagal beta su dapa beta pung kepeng yang ilang tu!’
10Dengar beta bilang par kamong! Bagitu lai, Allah pung malekat-malekat di sorga jua nanti barsuka kalo ada satu orang bardosa kasi tinggal dia pung dosa-dosa.”
Ande-ande soal ana yang ilang
15:11-32
11Abis itu, Yesus bilang par dong lai kata, “Dengar ini lai. Ada bapa satu. Antua pung ana laki-laki ada dua orang. 12Satu kali bagini, ana yang bongso bilang par dia pung bapa kata, ‘Papa e, bage katong pung harta tu la kasi beta pung bagiang jua!’ Jadi antua bage antua pung harta par dong dua.
13Seng lama bagini, ana bongso tu pi jual dia pung bagiang samua la pi ka negri yang jau. Di sana, dia pake dia pung kepeng-kepeng samua par baroyal deng hidop sabarang. 14Waktu dia pung kepeng su abis, skrek bagini ada susa makanang yang hebat paskali di negri tu, sampe dia pung hidop paleng susa. 15La dia pi cari karja di satu orang di negri tu. Orang itu suru dia pi kasi makang babi-babi di dia pung kabong. 16Ana bongso tu paleng lapar sampe rasa-rasa mau makang babi-babi tu pung makanang sa. Mar biar kata dia lapar macang bagitu, seng ada satu orang lai yang kasi makanang par dia.
17Akang pung laste, dia sadar la bilang, ‘Orang-orang yang karja par beta pung bapa, dong tu seng parna susa makanang, mala sampe tabuang-buang. Mar, beta di sini mati lapar. 18Jadi beta mau pulang jua par beta pung papa la bilang par antua kata, “Papa e! Beta su biking dosa par Allah di sorga deng par papa. 19Beta seng pantas jadi papa pung ana lai. Kalo bisa, tarima beta jadi papa pung orang karja sa jua!” ’ 20Jadi, dia badiri la bajalang pulang par dia pung bapa.
Waktu dia masi jau lai, dia pung bapa su dapa lia dia la rasa kasiang paskali par dia. La antua lari par dia la polo deng ciong dia. 21La ana tu bilang par dia pung bapa kata, ‘Papa e, beta su biking dosa par Allah di sorga deng par papa, jadi beta seng pantas jadi papa pung ana lai.’
22Mar dia pung bapa mala panggel antua pung jongos-jongos la bilang kata, ‘Capat ambe beta pung baju panjang luar yang paleng bagus tu la kasi pake akang di beta pung ana ni! Kasi pake cincing di dia pung jari deng sandal lai di dia pung kaki. 23Abis itu, ambe ana sapi yang paleng gamu la bunu akang, biar katong bisa makang basar deng barsuka rame-rame. 24Barang beta pung ana ni, dolo dia mati, mar sakarang dia su hidop kombali. Dolo dia ilang, mar sakarang beta su dapa dia kombali.’ La dong mulai biking pesta.
25Mar waktu itu, antua pung ana yang tua ada di kabong. Waktu dia pulang la su dekat ruma, dia dengar musik babunyi deng orang-orang yang badendang pung suara. 26Jadi dia panggel jongos satu la tanya kata, ‘Eh, ada rame-rame apa di ruma tu?’ 27Jongos tu jawab, ‘Bos pung ade su pulang la bos pung bapa suru katong par bunu ana sapi yang paleng gamu. Barang, antua pung ana yang dolo ilang tu su pulang deng salamat.’
28Waktu ana yang tua tu dengar bagitu, dia paleng mara sampe seng mau maso ka dalang ruma lai. La dia pung bapa kaluar la buju dia kata, ‘Ana e, mari maso jua!’
29Mar dia bilang, ‘Papa e, coba papa pikir bae-bae! Beta su karja macang deng jongos bataong-taong par papa. Beta seng parna malawang papa pung parenta. Mar papa balong parna biking macang bagitu par beta. Kasi ana kambing saekor par beta, biar beta bisa barsuka sama-sama deng beta pung tamang-tamang jua seng! 30Mar coba lia! Pas papa pung ana yang su kasi abis papa pung harta deng parampuang-parampuang tarbae tu pulang ka ruma ni, papa bunu ana sapi yang paleng gamu par dia!’
31La dia pung bapa bilang, ‘Nyong e, dengar bae-bae! Sampe oras tadi ni ose ada tinggal deng beta. Apa yang beta pung, itu jua ose pung lai. 32Sakarang ni katong musti barsuka deng hati sanang, tagal ose pung ade tu, dolo dia mati, mar sakarang dia su hidop kombali. Dolo dia ilang, mar sakarang katong su dapa dia kombali.’ ”
Currently Selected:
Lukas 15: ABMA
Highlight
Share
Copy
Want to have your highlights saved across all your devices? Sign up or sign in
© 2022, Sinode Gereja Protestan Maluku
