Lukas 14
14
Yesus kasi bae orang waktu hari Barenti Karja lai
14:1-6
1Satu kali bagini, pas orang Yahudi pung hari Barenti Karja, Yesus pi makang di satu orang pung ruma. Dia tu orang Farisi pung pamimping satu. Samua orang yang ada di situ nganga Yesus la taru kira Antua bae-bae. 2Waktu itu, ada laki-laki satu dudu di muka Antua. Dia pung tangang deng kaki bangka tagal panyaki bere-bere. 3La Yesus tanya guru-guru Torat deng orang-orang Farisi yang ada di situ kata, “Kalo iko katong pung atorang agama, bisa ka seng kasi bae orang pas hari Barenti Karja?”
4Dong samua tado mati. La Antua pegang orang saki tu pung tangang la kasi bae dia la suru dia pulang. 5Abis itu Antua tanya dong kata, “Sapa di sini yang kalo dia pung ana ka dia pung sapi jatu ka dalang parigi pas hari Barenti Karja, dia seng langsung pi kasi kaluar dia pung ana ka dia pung sapi tu?”#Matius 12:11
6Seng satu orang lai yang bisa jawab Antua.
Jang suka cari hormat
14:7-14
7Waktu Yesus ada makang di orang Farisi tu pung ruma, Antua lia bagini, tamu-tamu yang datang par makang tu pili tampa dudu di muka. Jadi, Antua carita ande-ande satu par dong kata, 8“Kalo orang undang kamong par pi di dong pung pesta kaweng, jang dudu di muka tagal mangkali tuang ruma su kasi siap akang par orang basar satu.#Nasehat-Nasehat 25:6-7 9Jang sampe tuang ruma yang su undang kamong deng dia tu datang par kamong la bilang, ‘Jang mara! Beta su kasi siap tampa ni par orang laeng.’ Tarus, ale musti pinda dari tampa tu deng malu paskali la pi dudu di tampa yang paleng balakang.
10Tagal itu, kalo kamong dapa undang dari satu orang, pi dudu di balakang sa. Sapa tau, kalo tuang ruma lia kamong, dia nanti bilang par kamong, ‘Tamang e, mari dudu di muka jua!’ Deng bagitu, ale su dapa hormat di muka samua tamu yang laeng. 11Barang, sapa yang angka diri, Allah nanti kasi jatu dia. Mar sapa yang anggap diri seng pung arti apapa, Allah nanti angka dia.”#Matius 23:12; Lukas 18:14
12La Yesus bilang par tuang ruma tu kata, “Laeng kali kalo bapa undang orang par datang makang siang ka makang malang, jang undang bapa pung tamang-tamang, basudara, ka orang-orang pinggir ruma yang kaya-kaya. Barang, dong nanti undang bapa par makang di dong pung ruma lai la deng bagitu, dong su balas bapa kombali. 13Mar kalo bapa biking acara makang-makang, labe bae bapa undang orang-orang kasiang, orang-orang cacat, orang-orang lumpu, deng orang-orang buta, 14tagal dong seng bisa balas undang bapa kombali. Mar, Allah nanti balas bapa waktu Antua kasi hidop bapa sama-sama deng orang-orang yang iko Antua pung mau. Jadi, bapa nanti paleng baruntung.”
Allah undang banya orang par jadi Antua pung orang-orang mar dong seng mau
14:15-24
(Matius 22:1-10)
15Pas dengar Yesus pung bicara tu, satu dari orang-orang yang dudu makang di situ bilang par Antua kata, “Orang-orang yang dudu makang sama-sama deng Allah dalang Antua pung Karajaang tu paleng baruntung.”
16Mar Yesus carita ande-ande satu ni par jawab dia kata, “Satu kali bagini, ada satu orang yang biking acara makang basar. Dia undang orang paleng banya. 17Pas acara tu su mau mulai, dia suru dia pung jongos panggel orang-orang yang su dapa undang tu kata, ‘Mari jua, samua su siap!’
18Mar satu-satu mulai biking alasang par seng datang. Yang partama bilang, ‘Jang mara, beta baru bali tana sapanggal, jadi beta musti pi lia akang do.’
19Yang laeng bilang, ‘Jang mara, beta baru bali sapi lima pasang, jadi beta mau pi coba akang par karja di kabong do.’
20La yang laeng lai bilang, ‘Jang mara, beta seng bisa datang tagal beta baru kaweng.’
21Jongos tu bale kombali ka ruma la kasi tau samua tu par dia pung tuang. Pas dengar bagitu, dia paleng mara. Tarus, dia parenta jongos tu lai kata, ‘Pi capat ka jalang-jalang deng lorong-lorong di kota ni, la bawa orang-orang kasiang, orang-orang cacat, orang-orang buta, deng orang-orang lumpu kamari!’
22Abis biking dia pung tuang pung parenta, jongos tu pulang la bilang, ‘Bapa e, beta su biking bapa pung parenta. Mar, tampa ni masi kosong banya!’
23La tuang tu bilang kata, ‘Kalo bagitu, pi ka jalang-jalang basar sampe ka lorong-lorong kacil di luar kota la buju sapa sa par datang kasi pono tampa ni. 24Dengar Beta bilang par se! Sapa yang beta su undang mar seng datang, dia nanti seng bisa makang di beta pung acara ni sadiki lai.’ ”
Sapa yang bisa jadi Yesus pung murid
14:25-35
25Satu kali bagini, orang banya kawang-kawang bajalang iko Yesus. Tarus, Antua bale muka par dong la bilang kata, 26“Sapa yang batul-batul mau iko Beta, dia musti sayang Beta labe dari dia pung mama ka papa, dia pung laki ka bini, dia pung anana, dia pung sudara laki-laki ka parampuang, mala labe dari dia pung diri sandiri. Sapa yang seng biking bagitu, dia seng bisa jadi Beta pung murid.#Matius 10:37-38 27Sapa yang seng mau tanggong susa deng sangsara, mala seng siap mati tagal iko Beta, dia seng bisa jadi Beta pung murid. Itu sama deng dia seng mau pikol dia pung salib.#Matius 16:24; Markus 8:34; Lukas 9:23
28Jadi kalo kamong mau iko Beta, kamong musti pikir bae-bae do. Conto sa orang yang mau biking ruma. Dia musti rekeng akang pung ongkos samua bae-bae do, baru dia bisa tau kalo dia pung kepeng sampe ka seng. 29Jang sampe bagini, waktu baru taru pandasi sa dia pung kepeng su abis, la dia seng bisa kasi abis dia pung ruma tu. Akang pung laste, samua orang yang lia dia pung karja tu tatawa dia. 30Dong nanti bilang, ‘Coba lia itu do! Ada baru taru pandasi sa, kepeng su abis.’
31Conto laeng lai, kalo raja satu pung tantara cuma sapulu ribu orang la mau baku prang deng raja laeng yang pung tantara dua pulu ribu orang, dia musti pikir bae-bae do, kira-kira dia bisa kasi kala dia pung musu tu ka seng. 32Kalo seng kuat, waktu dia pung musu tu masi jau lai, dia su suru dia pung anana bua par pi urus dame. 33Bagitu lai deng kamong. Sapa sa dari kamong yang mau iko Beta, dia musti pikir bae-bae do. Barang, kalo dia seng bisa kasi tinggal dia pung samua-samua, dia seng bisa jadi Beta pung murid.
34Garang tu memang bagus, mar kalo akang su tawar, mau kasi asing akang deng apa lai? 35Akang su seng ada pung guna par kasi sadap makanang lai. Par jadi pupuk jua seng bisa. Cuma par dapa buang sa. Sapa ada pung talingang, dengar apa yang Beta bilang tu bae-bae!”#Matius 5:13; Markus 9:50
Currently Selected:
Lukas 14: ABMA
Highlight
Share
Copy
Want to have your highlights saved across all your devices? Sign up or sign in
© 2022, Sinode Gereja Protestan Maluku
