Lukas 13
13
Sapa yang seng kasi tinggal dia pung dosa-dosa nanti binasa
13:1-5
1Waktu Yesus ada kasi balajar orang banya tu, ada babarapa orang yang kasi tau Antua kata Gubernur Pilatus bunu babarapa orang Galilea waktu dong ada kasi korbang binatang par Allah.
2La Yesus tanya dong kata, “Kamong sangka kata dong dapa bunu macang bagitu tagal dong pung dosa labe banya dari samua orang Galilea yang laeng? 3Bukang bagitu! Mar dengar Beta bilang par kamong: Kalo kamong seng kasi tinggal kamong pung dosa-dosa, kamong samua nanti binasa lai!
4Kamong masi inga deng sapulu dalapang orang yang mati dapa tindis dari manara yang rubu dekat kolang aer Siloam tu to? Kamong sangka kata dong pung dosa labe basar dari samua orang Yerusalem yang laeng? 5Bukang bagitu! Mar dengar Beta bilang par kamong: Kalo kamong seng kasi tinggal kamong pung dosa-dosa, kamong samua nanti binasa lai!”
Orang yang seng hidop iko Allah pung mau tu macang deng pohong yang seng babua yang nanti dapa rubu
13:6-9
6La Yesus carita ande-ande satu par orang banya tu kata, “Satu kali bagini, ada satu orang tanang pohong ara di dia pung kabong anggor. Satu hari bagini, dia pi cari pohong ara tu pung bua. Mar, dia seng dapa sabua lai. 7La dia bilang par tukang kabong tu kata, ‘Lia do! Su tiga taong beta datang cari bua ara di akang pohong ni, mar sampe oras ni beta seng dapa sabua lai. Jadi, pi rubu pohong tu tagal akang cuma makang tampa sa!’
8Mar tukang kabong tu bilang, ‘Bapa e, kasi tinggal pohong tu hidop barang sataong lai jua. Beta nanti cangkol tana koliling akang deng kasi pupuk par akang, 9sapa tau taong muka akang babua. Mar kalo akang seng babua lai, rubu akang sa.’ ”
Yesus kasi bae orang waktu hari Barenti Karja
13:10-17
10Satu kali bagini, pas orang Yahudi pung hari Barenti Karja, Yesus kasi balajar orang di orang Yahudi pung tampa sombayang satu. 11Di situ ada parampuang satu yang su saki sapulu dalapang taong. Setang biking dia saki sampe dia bongko la seng bisa badiri lurus-lurus lai.
12Pas Yesus lia parampuang tu, Antua panggel dia la bilang par dia kata, “Mama e, sakarang mama su bae!” 13Tarus, Yesus taru Antua pung tangang di atas parampuang tu. Oras itu jua, parampuang tu badiri lurus-lurus la puji-puji Allah.
14Mar kapala tampa sombayang tu mara tagal Yesus kasi bae orang di hari Barenti Karja. Jadi, dia bilang par orang banya kata, “Satu minggu ada anam hari par karja. Jadi kalo kamong mau dapa kasi bae, datang sa dalang anam hari tu. Jang datang pas hari Barenti Karja ni!”#Kaluar dari Mesir 20:9-10; Carita Ulang 5:13-14
15Tarus Tuhan Yesus jawab, “Hoe, orang-orang munafik! Waktu hari Barenti Karja, kamong jua kasi lapas kamong pung sapi deng keledai dari kandang par pi kasi minong akang to? 16Mama ni Abraham pung turunang, baru Setang pung Raja jua su ika dia sapulu dalapang taong. Jadi seng sala to kalo dia dapa kasi lapas pas hari Barenti Karja ni?”
17Waktu dengar Yesus bilang bagitu, orang-orang yang malawang Antua tu jadi malu paskali, mar orang banya tu sanang paskali tagal dong su lia samua hal yang luar biasa yang Antua biking tu.
Allah pung orang-orang nanti tamba banya
13:18-21
(Matius 13:31-33; Markus 4:30-32)
18Abis itu Yesus bilang lai kata, “Beta mau pake conto apa biar kamong bisa mangarti kira-kira waktu Allah pegang parenta jadi Raja tu macang apa e? Beta musti pake ande-ande apa par kasi jelas akang par kamong e? 19Akang macang deng biji yang kacil paskali#13:19 Biji yang kacil paskali: Yang Yesus maksud tu biji dari satu tanamang yang batumbu di daera Palestina, yang bisa batumbu sampe 3 meter. Akang pung biji tu kacil paskali macang deng biji bayam. yang orang tanang di kabong. Akang batumbu sampe jadi pohong la burung-burung datang biking sarang di akang pung jaga-jaga.”
20Tarus Yesus bilang lai kata, “Kira-kira waktu Allah pegang parenta jadi Raja, akang macang deng apa e? 21Akang macang deng ragi yang parampuang satu ambe la antong akang deng tarigu banya paskali#13:21 Tarigu banya paskali: Akang pung banya mangkali barang 30 kilo. sampe akang nai.”
Seng samua orang yang nanti dapa kasi salamat
13:22-30
(Matius 7:21-23)
22Abis itu, waktu Yesus dong bajalang ka kota Yerusalem, Antua kasi balajar orang-orang di kota-kota deng kampong-kampong yang Antua lewat. 23Waktu itu, ada satu orang dari dong tanya Antua kata, “Tuang Guru e! Orang yang nanti dapa kasi salamat tu cuma sadiki ka?”
24Yesus bilang kata, “Usaha sunggu-sunggu par maso lewat pintu yang kacil. Barang, dengar Beta bilang par kamong: Banya orang nanti coba par maso lewat akang, mar dong seng bisa maso.#Matius 7:13-14 25Barang, kalo tuang ruma su badiri la konci pintu tu, dong nanti badiri di luar toki-toki pintu deng bilang kata, ‘Tuang e! Tolong buka pintu par katong jua!’
Mar tuang ruma tu nanti manyao kata, ‘Beta seng kanal kamong. Beta jua seng tau kamong datang dari mana.’
26La dong nanti bilang kata, ‘Masa Tuang seng kanal katong lai? Katong biasa dudu makang-minong deng Tuang la Tuang jua kasi balajar katong di jalang-jalang di katong pung kota.’
27Mar tuang ruma tu nanti bilang lai kata, ‘Beta seng kanal kamong. Beta jua seng tau kamong datang dari mana. Kamorang samua tu tukang biking kajahatang! Pi dari Beta pung dalang muka!’
28Jadi dalang Allah pung Karajaang tu, kamong nanti lia Abraham, Isak, Yakub, deng Allah pung juru-juru bicara samua ada sama-sama deng Allah. Mar kamong nanti sangsara paskali deng marata tagal kamong nanti dapa lempar kaluar. 29La orang-orang yang bukang Yahudi nanti datang dari antero dunya, dari timur sampe barat, utara sampe salatang, la dudu makang sama-sama deng Allah dalang Antua pung Karajaang. 30Jadi dengar bae-bae! Orang-orang kacil nanti jadi orang basar la orang-orang basar nanti jadi orang kacil.”
Yesus pung hati susa par kota Yerusalem
13:31-35
(Matius 23:37-39)
31Waktu Yesus masi bicara, ada babarapa orang dari kalompok Farisi datang par Antua la bilang, “Bapa e, pi dari sini jua tagal Herodes mau bunu Bapa!”
32La Yesus bilang par dong kata, “Pi bilang par laki-laki tukang parlente tu: Hari ini deng eso, Beta user setang deng kasi bae orang saki. Nanti hari yang katiga baru Beta pung karja ni abis. 33Mar hari ini, eso, deng lusa, Beta musti bajalang tarus sampe ka kota Yerusalem, tagal Allah pung juru-juru bicara biasa dapa bunu di sana, bukang di tampa laeng. Bagitu lai deng Beta.
34Sio orang-orang Yerusalem e! Kamong yang bunu Allah pung juru-juru bicara deng lempar orang-orang yang Allah utus par kamong deng batu sampe mati. Su ulang kali Beta rindu par kumpul kamong macang deng ayang mai kumpul akang pung anana di akang pung bawa sayap, mar kamong seng mau. 35Dengar bae-bae! Allah su lapas tangang dari kamong deng kamong pung kota#13:35 Kota: Teks bahasa Yunani pake kata oikos, yang pung arti ‘ruma’. Di kalimat ni, kata tu bisa pung arti ‘kota Yerusalem’ ka ‘orang Yahudi pung Tampa Sombayang Pusat’. tu. Dengar Beta bilang par kamong! Mulai dari oras ni jua, kamong nanti seng lia Beta lai sampe kamong bilang, ‘Mari puji Antua yang datang deng Tuhan pung Kuasa!’ ”#Lagu-Lagu 118:26; Matius 21:9; Markus 11:9
Currently Selected:
Lukas 13: ABMA
Highlight
Share
Copy
Want to have your highlights saved across all your devices? Sign up or sign in
© 2022, Sinode Gereja Protestan Maluku
