Lukas 12

Yesus kasi inga Antua pung murid-murid par ati-ati deng orang Farisi deng guru-guru Torat

12:1-12

(Matius 16:26-28)

1Waktu itu jua, orang paleng banya datang baku soso urung Yesus, sampe laeng inja laeng pung kaki. La Yesus bicara kamuka par Antua pung murid-murid kata, “Ingatang! Kamong musti ati-ati deng orang Farisi, tagal dong suka ajar yang bae mar biking yang tarbae. Dong suka pangaru orang, sama deng ragi yang biking adonan nai.#Matius 16:6; Markus 8:15 2Seng ada apapa satu lai yang tatutu mati yang nanti seng bisa dapa lia, deng seng ada apapa satu lai yang tasambunyi yang nanti seng bisa dapa tau.#Markus 4:22; Lukas 8:17 3Apa yang kamong bilang sambunyi-sambunyi, orang nanti dengar akang tarang-tarang. La apa yang kamong bisi-bisi dalang kamar, orang laeng nanti tabaos akang biar samua orang dengar.

4Dengar Beta bilang par kamong tamang-tamang e! Jang taku deng orang-orang yang bisa bunu kamong. Dong cuma bisa bunu kamong pung badang sa, mar abis itu seng bisa biking apapa lai. 5Mar Beta mau kasi tau sapa yang kamong musti taku. Kamong musti taku Antua yang ada pung kuasa par bunu kamong pung badang deng jua ada pung kuasa par lempar kamong dalang naraka. Jadi dengar Beta bilang, kamong musti taku Allah.

6Kamong tau kalo burung cui pung harga mura paskali to? Lima ekor cuma dua kepeng gobang sa. Mar biar kata bagitu, Allah seng lupa satu ekor lai. 7Bagitu lai deng kamong. Antua tau kamong luar-dalang. Kamong pung rambu di kapala jua Antua tau akang ada barapa banya. Jadi jang taku, tagal par Antua, kamong tu labe panting dari burung cui banya tu.

8Dengar Beta bilang par kamong! Sapa yang mangaku di muka manusia kalo dia parcaya Beta, Beta Ana Manusia ni jua nanti mangaku di muka Allah pung malekat-malekat kalo dia tu Beta pung orang. 9Mar sapa yang manyangkal di muka manusia kalo dia seng parcaya Beta, Beta jua nanti manyangkal di muka Allah pung malekat-malekat kalo dia tu bukang Beta pung orang.

10Sapa bilang apapa satu malawang Beta Ana Manusia ni, dia bisa dapa kasi ampong. Mar sapa hojat Allah pung Roh, dia seng bisa dapa kasi ampong.#Matius 12:32; Markus 3:29

11Waktu orang-orang bawa kamong par dapa sidang di tampa-tampa sombayang, ka di muka orang-orang yang pegang parenta deng orang-orang yang pegang kuasa tagal kamong parcaya Beta, jang balisa soal apa yang kamong mau bilang ka bagemana kamong mau bela diri.#Matius 10:19-20; Markus 13:11; Lukas 21:14-15 12Barang oras itu jua, Allah pung Roh nanti kasi tau apa yang kamong musti bilang.”

Orang kaya yang seng ambe pusing deng Allah pung mau

12:13-21

13Waktu itu, satu dari orang banya bilang par Antua kata, “Tuang Guru e, tolong bilang par beta pung sudara par bage harta yang katong pung orang tatua su kasi tinggal tu ka!”

14Mar Yesus bilang par dia, “Sudara e, sapa yang su angka Beta jadi hakim par ator kamong dua pung parkara?” 15La Antua bilang par dong samua kata, “Kamong musti ati-ati deng jaga diri, jang sampe kamong galajo harta. Barang, harta seng bisa biking katong hidop, biar kata harta tu banya lai.”

16Abis itu, Yesus carita ande-ande satu par kasi jelas akang par dong. Antua bilang, “Satu kali bagini, ada satu orang yang kaya. Dia pung isi kabong paleng banya. 17Tarus, dia tanya dalang hati kata, ‘Su seng ada tampa par simpang beta pung isi kabong lai, jadi sakarang beta musti biking apa?’ 18La dia bilang, ‘O iyo, beta ada akal. Beta nanti bongkar beta pung gudang-gudang la biking yang labe basar lai, biar beta bisa simpang beta pung isi kabong samua deng harta-harta laeng lai. 19Abis itu, beta nanti bilang par beta pung diri kata: Ah, beta pung gudang pono deng harta deng makanang banya. Beta bisa makang bataong-taong. Jadi, sakarang beta tinggal dudu pangku kaki la makang-minong sanang-sanang sa.’

20Mar Allah bilang par dia kata, ‘Hoe, orang bodo e! Malang ini jua ose nanti putus napas, jadi harta banya yang ose simpang tu par sapa?’

21Itu jua yang nanti jadi deng orang yang suka kumpul harta par biking kaya diri sandiri di dunya ni, mar seng ambe pusing deng Allah pung mau. Dia nanti seng pung apapa!”

Jang balisa soal eso lusa

12:22-34

(Matius 6:25-34)

22La Yesus bilang par Antua pung murid-murid kata, “Tagal itu, dengar Beta bilang par kamong! Jang balisa soal kamong pung hidop, soal apa yang nanti kamong makang. Ka, jang balisa soal kamong pung badang, soal apa yang nanti kamong pake. 23Barang, hidop tu labe panting dari makanang deng badang tu labe panting dari pakiang. 24Coba lia burung-burung gagak. Akang seng bakabong, seng ambe hasil, deng seng ada pung gudang ka tampa simpang makanang, mar Allah kasi makang akang. Masa kamong seng tau kalo par Antua kamong jau labe panting dari burung-burung tu? 25Sapa dari kamong yang tagal dia pung hati balisa bisa kasi panjang dia pung umur biar cuma satu jam sa? 26Jadi, kalo kamong seng bisa biking hal-hal kacil, macang tamba kamong pung umur satu jam sa, mangapa kong kamong balisa soal hal-hal laeng, macang makanang deng pakiang?

27Coba lia bunga-bunga yang batumbu liar tu. Akang seng karja deng seng biking banang par pakiang. Mar dengar Beta bilang par kamong: Mala Raja Salomo yang paleng kaya tu jua seng bapake bagus macang deng satu dari bunga-bunga tu. 28Jadi, kalo rumpu liar yang hari ini ada mar eso su dapa bakar tu sa Allah kalesang akang, apalai kamong? Antua pasti kalesang kamong labe dari rumpu liar tu, hoe orang-orang yang kurang parcaya e!

29Jadi, jang tinggal kong pikir susa soal apa yang nanti kamong makang deng minong. Jang balisa soal itu! 30Barang, orang-orang yang seng kanal Allah di dunya cari-cari samua tu, mar kamong pung Bapa di sorga tau kalo kamong parlu samua tu. 31Mar, usaha biar Allah pegang parenta jadi Raja dalang kamong pung hidop, la Antua nanti kasi samua yang kamong parlu tu jua par kamong.

32Kamong memang sadiki sa, sama deng domba satu kalompok kacil. Mar jang taku, tagal kamong pung Bapa sanang kalo kamong pegang parenta sama-sama deng Antua. 33Jadi, pi jual kamong pung barang la kasi akang pung kepeng par orang-orang kasiang. Kalo kamong biking bagitu, kamong su simpang harta yang seng bisa abis di sorga, di tampa yang aman. Di sana, pancuri seng bisa ambe akang la mai-mai seng bisa biking rusak akang. 34Barang, kalo kamong pung harta ada di mana, kamong pung hati ada di situ lai.”

Jongos yang siap karja siang-malang

12:35-40

(Matius 24:43-51)

35-36Yesus bilang par Antua pung murid-murid kata, “Siang-malang kamong musti siap tunggu Beta bale, macang deng jongos-jongos yang tunggu dong pung bos pulang dari pesta kaweng. Dong jaga biar dong pung lampu seng mati deng salalu siap par karja. Deng bagitu, kalo dong pung bos pulang la toki pintu, dong bisa langsung buka pintu par dia.#Matius 25:1-13; Markus 13:34-36 37Jongos-jongos tu baruntung kalo pas dong pung bos datang, dong ada dudu tunggu dia di muka pintu. Dengar bae-bae tagal apa yang Beta bilang ni batul! Bos tu nanti sanang paskali, sampe dia kasi siap dia pung diri par karja, la suru jongos-jongos tu dudu di meja makang, la dia sandiri yang kasi makang dong. 38Jongos-jongos tu baruntung kalo waktu dong pung bos datang, dia dapa dong ada dudu tunggu dia di muka pintu, biar kata dia datang tenga malang ka amper siang.

39Dengar ande-ande satu ni lai bae-bae! Kalo tuang ruma tau pancuri nanti datang jam barapa, dia pasti seng kasi biar pancuri maso dalang dia pung ruma. 40Jadi kamong jua musti salalu siap, tagal Beta Ana Manusia ni nanti bale kombali di waktu yang kamong seng sangka-sangka.”

Ande-ande soal jongos yang dengar-dengarang deng jongos yang seng dengar-dengarang

12:41-48

(Matius 24:45-51)

41La Petrus bilang par Antua kata, “Tuhan e! Tuhan pung ande-ande tadi tu cuma par katong sa, ka par samua orang?”

42Tuhan Yesus jawab, “Jongos yang salalu iko dia pung bos pung mau deng jua pung pikirang tajang, dia nanti dapa angka dari dia pung bos par jadi kapala par bos tu pung jongos-jongos yang laeng, par kasi makang dong pas akang pung waktu. 43Dia paleng baruntung waktu dia pung bos bale kong dapa dia ada biking dia pung karja. 44Dengar bae-bae tagal apa yang Beta bilang ni batul! Dia pung bos tu nanti angka dia par urus dia pung bos pung harta samua. 45Mar kalo jongos tu jahat, dia nanti bilang dalang hati kata, ‘Beta pung bos tu masi lama lai baru bale.’ Tarus, dia mulai pukul jongos-jongos laki-laki deng parampuang la makang-minong deng mabo-mabo. 46Skrek bagini, dia pung bos bale di waktu yang dia seng sangka-sangka la hukum dia paleng barát. Dia pung bos nanti buang dia ka orang-orang yang seng parcaya pung tampa.

47Jadi, jongos yang tau dia pung bos pung mau mar seng kasi siap dia pung diri ka seng biking apa yang dia pung bos mau, dia nanti dapa pukul banya. 48Mar, jongos yang seng tau dia pung bos pung mau la biking sala, dia nanti dapa pukul, mar sadiki sa. Barang, sapa yang dapa banya dari Allah, dia pung tanggong jawab par Allah tu jua labe banya. La sapa yang dapa parcaya dari Allah par biking tugas basar, Antua nanti tuntut labe banya dari dia.”

Yesus pung ajarang biking orang baku malawang

12:49-53

(Matius 10:34-36)

49Yesus bilang lai par Antua pung murid-murid kata, “Beta datang par bawa api#12:49 Ada yang bilang kalo kata api ni pung arti Allah mau hukum dunya. Ada lai yang bilang kalo api ni pung arti orang nanti baku malawang tagal Kabar Bae. Ada jua yang bilang kalo api ni pung arti Allah nanti kasi barsi orang parcaya dari dosa ka simbol dari orang pung parcaya yang kuat. Mar, ada jua yang pikir kalo api ni simbol dari Allah pung Roh yang turung par orang-orang parcaya. di dunya ni. Beta mau paskali kalo api tu su manyala. 50Mar, Beta musti pikol sangsara barát do,#12:50 Musti pikol sangsara barát: Teks bahasa Yunani bilang, “musti dapa baptis do”. Kata “baptis” di sini pung arti sangsara sampe mati. Lia Markus 10:38, 14:36. jadi Beta pung hati paleng susa kalo sangsara tu balong abis. 51Jang sangka kata Beta datang par bawa dame di dunya ni. Bukang. Dengar Beta bilang par kamong: Beta datang bukang par bawa dame, mar par biking orang baku malawang. 52Jadi mulai dari oras ni, orang-orang dalang satu ruma nanti baku malawang. Kalo ada lima orang dalang satu ruma, nanti tiga lawang dua, ka dua lawang tiga.

53Bapa malawang ana laki-laki,

la ana laki-laki malawang dia pung bapa.#Mika 7:6

Mama malawang ana parampuang,

la ana parampuang malawang dia pung mama.

Mama mantu malawang ana mantu,

la ana mantu malawang dia pung mama mantu.”

Yesus tagor orang banya yang seng mau mangarti apa yang batul la baku bae deng Allah

12:54-59

54Yesus bilang par orang banya kata, “Kalo kamong lia awang itang su nai dari sabala matahari maso, kamong biasa bilang, ‘O su mau ujang.’ La batul, akang memang jadi. 55Kalo kamong rasa anging su batiop dari sabala salatang, kamong biasa bilang, ‘O hari ni mau panas paskali.’ La batul, akang memang jadi.#Matius 16:2-3 56Hoe orang-orang munafik! Kamong mangarti langit deng dunya pung rupa, mar kamong seng mangarti apa yang Beta jaga biking deng ajar tu pung arti apa?

57Mangapa kong kamong seng mau pikir sandiri soal apa yang batul deng apa yang sala? 58Conto bagini: Kalo kamong deng orang yang tuntut kamong ada di tenga jalang par urus parkara di hakim, labe bae kamong usaha baku bae deng dia. Kalo seng, dia nanti bawa kamong ka hakim par dapa sidang, la hakim tu nanti kasi kamong par orang yang pung tugas di bui, la dia nanti lempar kamong dalang bui. 59Dengar Beta bilang par kamong: Kamong seng bisa kaluar dari bui sampe kamong bayar kamong pung utang sampe abis do.”

Currently Selected:

Lukas 12: ABMA

Highlight

Copy