Lukas 11

Yesus kasi balajar Antua pung murid-murid soal sombayang

11:1-13

(Matius 6:9-13, 7:7-11)

1Satu kali bagini, Yesus ada sombayang di tampa satu. Abis sombayang, Antua pung murid satu bilang par Antua kata, “Tuhan e, ajar katong par sombayang do, sama deng Yohanis Tukang Baptis ajar dia pung murid-murid par sombayang.”

2La Yesus bilang par dong kata, “Kalo kamong sombayang, sombayang bagini:

‘Sio Bapa! Katong minta biar samua orang taru hormat par Bapa.

Katong minta biar Bapa pegang parenta jadi Raja par samua orang.

3Katong minta biar Bapa kasi makanang yang katong parlu sabang hari.

4Sio Bapa e! Tolong kasi ampong katong pung dosa-dosa jua,

sama deng katong jua kasi ampong sapa sa yang biking sala par katong.

La jang kasi tinggal katong dapa coba par biking dosa.’ ”

5Abis itu, Yesus carita ande-ande satu par kasi conto par dong. Antua bilang, “Ada satu orang dari kamong pi tenga-tenga malang ka dia pung tamang pung ruma la bilang kata, ‘Tamang e, pinjang roti tiga bua do. 6Barang, beta pung tamang satu baru sampe dari jau ka beta pung ruma, mar beta seng ada pung apapa par kasi makang dia.’

7Mar, tamang yang ada dalang ruma tu bilang, ‘Jang biking pusing beta. Beta su konci pintu baru beta deng beta pung anana jua su tidor, jadi beta seng bisa bangong par kasi akang par ale. Nanti laeng kali jua.’

8Dengar Beta bilang par kamong! Biar kata dia tu ale pung tamang dekat lai, mar dia seng bangong par kasi roti tu par ale. Mar, tagal ale seng malu hati kong tinggal toki-toki pintu tarus, dia pasti bangong la kasi apa yang ale parlu.

9Jadi dengar Beta bilang par kamong: Minta, la kamong nanti dapa kasi. Cari, la kamong nanti dapa. Toki pintu, la akang nanti dapa buka par kamong. 10Barang, sapa sa yang minta nanti dapa kasi. Sapa sa yang cari nanti dapa. La sapa sa yang toki pintu, nanti akang dapa buka par dia.

11Coba pikir bae-bae! Bapa mana dari kamong yang kasi ular par dia pung ana kalo dia minta ikang? 12Ka kasi kalajengking kalo dia minta talor? Seng ada to? 13Jadi, kalo kamong manusia yang jahat sa tau kasi apa yang bae par kamong pung anana, apalai kamong pung Bapa di sorga! Antua nanti kasi Antua pung Roh par orang-orang yang minta dari Antua.”

Yesus pung kuasa labe basar dari Setang pung Raja pung kuasa

11:14-23

(Matius 12:22-30; Markus 3:20-27)

14Satu kali bagini, Yesus user setang dari satu orang. Orang ini ni bisu, tagal setang tu biking dia bagitu. Pas setang tu kaluar, orang bisu tu bisa bicara. Lia bagitu, orang banya yang ada di situ taherang-herang paskali. 15Mar ada babarapa orang yang bilang kata, “Dia pake Beelsebul, Setang pung Raja tu pung kuasa par user setang-setang.”#Matius 9:34, 10:25

16Mar ada jua yang coba Antua. Dong minta Antua biking tanda herang satu par jadi bukti kalo memang Antua pung kuasa tu dari Allah.#Matius 12:38, 16:1; Markus 8:11

17Mar Yesus tau dong pung pikirang la Antua bilang par dong kata, “Kalo rayat dalang satu karajaang tinggal kong baku prang, karajaang tu pasti ancor. Bagitu lai deng satu ruma tangga. Kalo orang-orang dalang ruma tangga tu tinggal kong baku bakalai, ruma tangga tu pasti ancor. 18Bagitu lai deng Setang pung Raja pung karajaang. Kalo setang-setang tapica-pica dalang kalompok-kalompok yang baku musu, karajaang tu pasti seng bisa batahang. Beta bilang bagitu tagal kamong bilang kata Beta pake Beelsebul pung kuasa par user setang. 19Jadi, kalo memang Beta pake Beelsebul pung kuasa par user setang-setang, kamong pung murid-murid pake sapa pung kuasa par user setang-setang? Pasti pake Allah pung kuasa to? Jadi, apa yang kamong pung murid-murid biking tu kasi unju kalo apa yang kamong tudu tu sala. 20Mar, Beta user setang-setang deng Allah pung kuasa. Jadi, itu tu tanda kalo Allah su pegang parenta jadi Raja di tenga-tenga kamong.

21Conto bagini: Kalo ada orang yang kuat pake dia pung senjata samua par jaga dia pung ruma, seng ada orang yang bisa rampas dia pung harta. 22Mar, kalo ada satu orang yang labe kuat dari dia pi serang la kasi kala dia, orang yang labe kuat tu nanti rampas dia pung senjata yang dia pake par jaga dia pung harta, rampas dia pung harta samua, la bage-bage akang par orang laeng. Itu jua yang Beta biking par Setang pung Raja.

23Sapa yang seng iko Beta, dia malawang Beta. La sapa yang seng bantu Beta pung karja, dia kasi kaco Beta pung karja.”

Setang bisa bale maso kombali ka orang yang akang parna tinggal

11:24-26

(Matius 12:43-45)

24Yesus bilang lai kata, “Kalo setang kaluar dari satu orang, akang nanti bajalang koliling ewang-ewang par cari tampa tinggal. Mar, tagal seng dapa, akang bilang, ‘E! Labe bae beta bale ka ruma yang dolo tu jua.’ 25Pas akang sampe di ruma tu, akang lia ruma tu barsi deng taator bae-bae. 26Tarus, akang pi undang akang pung tamang tuju yang labe jahat lai dari akang la maso tinggal dalang ruma tu. Akang pung laste, orang itu labe rusak lai dari yang kamuka.”

Orang yang paleng baruntung

11:27-28

27Waktu Yesus ada bicara deng orang banya tu, skrek bagini, parampuang satu bataria kata, “Parampuang sapa yang kasi lahir deng kasi susu Ale, dia tu paleng baruntung.”

28Mar Yesus bilang, “Yang batul, orang yang paleng baruntung tu orang yang su dengar Allah pung kata-kata la biking akang!”

Orang-orang minta Yesus biking tanda herang

11:29-32

(Matius 12:38-42)

29Waktu Yesus ada bicara, orang labe banya datang urung Antua la Antua bilang kata, “Orang-orang jamang sakarang ni jahat. Kamong minta Beta biking tanda herang. Mar kamong seng dapa tanda satu lai, cuma tanda macang apa yang su jadi par Allah pung Juru Bicara Yunus.#Matius 16:4; Markus 8:12 30Barang, apa yang jadi par Yunus tu jadi tanda par orang-orang Niniwe kalo Allah yang utus dia. Bagitu lai deng apa yang nanti jadi par Beta Ana Manusia ni, akang jadi tanda par manusia jamang sakarang ni kalo Allah yang utus Beta.

31Nanti waktu Allah putus manusia pung parkara, Ratu dari Salatang jua nanti badiri sama-sama deng kamong yang hidop sakarang ni la kasi unju kamong pung sala. Barang, dolo-dolo dia datang dari jau paskali par dengar raja Salomo yang pung pikirang tajang tu.#1 Raja-Raja 10:1-10; 2 Orang Israel pung Sejara 9:1-12 Sakarang, di sini ada yang labe basar dari Raja Salomo tu, mar kamong seng mau dengar Dia. 32Nanti waktu Allah putus manusia pung parkara, orang-orang Niniwe jua nanti badiri sama-sama deng kamong yang hidop sakarang ni la kasi unju kamong pung sala. Barang, waktu orang-orang Niniwe dengar Allah pung pasáng dari Yunus, dong kasi tinggal dong pung dosa-dosa.#Yunus 3:5 Sakarang, di sini ada yang labe basar dari Yunus tu, mar kamong seng mau dengar Dia.”

Allah pung ajarang kasi tarang katong pung hidop

11:33-36

33Yesus bilang par orang banya kata, “Seng satu orang lai yang bakar palita la sambunyi ka tutu akang deng sempe to? Dong pasti taru akang di tampa yang tinggi biar samua orang yang maso ka dalang ruma bisa dapa lia akang pung tarang.#Matius 5:15; Markus 4:21; Lukas 8:16 34Kamong pung mata tu yang jadi palita par kamong pung diri. Kalo kamong pung mata tu tarang, kamong pung diri samua tarang lai. Mar kalo kamong pung mata tu galap, kamong pung diri jua galap lai.#Matius 6:22-23 35Tagal itu ati-ati, biar jang sampe kamong pikir kata kamong pung mata tu tarang, sapa tau galap. 36Jadi, kalo kamong pung diri samua tarang deng seng ada satu bagiang lai yang galap, kamong pung diri samua tarang macang deng palita yang kasi tarang kamong pung ruma tu.”

Yesus tagor orang-orang Farisi deng guru-guru Torat

11:37-54

(Matius 23:1-36; Markus 12:38-40; Lukas 20:45-47)

37Abis Yesus kasi balajar orang banya, satu orang dari kalompok Farisi undang Antua par pi makang di dia pung ruma. Jadi, Yesus pi makang di sana. 38Orang Farisi tu taherang-herang lia Yesus seng basu tangang do baru makang iko dong orang Yahudi pung adat.

39Tarus, Tuhan Yesus bilang par dia kata, “Hoe kamong orang-orang Farisi! Dari luar orang lia kamong iko Allah pung atorang, mar dalang hati kamong tu galojo deng kajahatang. Kamong macang deng orang yang cuci galas deng piring pung bagiang luar sa mar kasi tinggal akang pung dalang badaki-badaki. 40Hoe orang Farisi bodo e! Kamong tau ka seng kalo Allah yang biking katong pung badang tu jua biking katong pung hati lai? 41Mar, kalo kamong kasi apa yang ada di kamong deng hati bae par tolong orang-orang kasiang, kamong pung badang deng hati samua jadi barsi.

42Mar cilaka kamong orang-orang Farisi! Kamong rajing kasi parpuluhang, sampe yang paleng kacil dari kamong pung hasil kabong macang selasi deng rampa-rampa laeng jua kamong kasi.#Imam-Imam pung Atorang 27:30 Mar, kamong seng ambe pusing par biking apa yang batul par orang laeng deng jua seng sayang Allah. Kasi parpuluhang tu panting, mar yang labe panting, kamong jua musti biking apa yang batul par orang laeng deng sayang Allah lai.

43Cilaka kamong orang-orang Farisi! Kamong paleng suka dudu di muka dalang tampa-tampa sombayang deng paleng sanang kalo orang-orang taru hormat par kamong di pasar-pasar. 44Cilaka kamong orang-orang Farisi! Kamong macang deng kubur yang seng ada pung tanda. Orang-orang yang bajalang di atas akang seng tau kalo itu kubur.#11:44 Kalo iko orang Farisi dong pung adat, orang yang bajalang di atas kubur tu, dong kotor, jadi dong seng pantas par pi ka tampa-tampa sombayang. Bagitu jua deng orang-orang yang lia kamong, dong seng tau kalo kamong pung dalang hati pono deng hal-hal yang busu.”

45Tarus, satu dari guru-guru Torat bilang par Yesus kata, “Tuang Guru e! Deng Tuang Guru pung kata-kata tu, Tuang Guru ada hina katong lai.”

46Yesus jawab, “Cilaka lai kamong guru-guru Torat! Kamong biking atorang-atorang barát la suru orang par iko akang, mar kamong sandiri seng tolong dong par iko akang.

47Cilaka kamong! Kamong biking bagus Allah pung juru-juru bicara pung kubur-kubur biar orang pikir kalo kamong tu bae, sapa tau kamong seng biking apa yang juru-juru bicara tu bilang. Jadi kamong seng dengar-dengarang, sama deng kamong pung tete-nene moyang yang su bunu Allah pung juru-juru bicara tu. 48Deng biking bagus kubur-kubur tu, kamong su mangaku kalo kamong setuju deng apa yang kamong pung tete-nene moyang biking. Barang, dong su bunu Allah pung juru-juru bicara tu la kamong ambe bagiang par biking juru-juru bicara tu pung kubur-kubur. 49Tagal itu, Allah yang pung pikirang tajang tu bilang, ‘Beta nanti utus Beta pung juru-juru bicara deng utusang-utusang par kamong orang Yahudi sakarang ni. Mar dari dong, ada yang nanti kamong siksa deng ada lai yang kamong bunu.’

50Jadi, kamong yang hidop sakarang ni nanti dapa hukum tagal kamong pung moyang-moyang su bunu Allah pung juru-juru bicara, mulai dari dunya ni jadi sampe sakarang ni. 51Dong su bunu Allah pung juru-juru bicara mulai dari Habel sampe ka Sakaria yang dapa bunu di tenga-tenga tampa bakar korbang deng Ruang Kudus di Tampa Sombayang Pusat.#Carita Mula-Mula 4:8; 2 Orang Israel pung Sejara 24:20-21 Tagal itu, dengar Beta bilang! Kamong yang hidop sakarang ni nanti dapa hukum tagal samua yang dong biking tu.

52Cilaka kamong guru-guru Torat! Kamong tau cara kanal Allah dari hukum Torat mar kamong seng iko akang, mala kamong jua pele-pele orang yang mau kanal Allah. Itu macang kamong ada pegang konci par buka pintu mar seng pake akang, mala kamong sambunyi akang biar orang laeng seng bisa maso.”

53Waktu Yesus pi dari tampa tu, guru-guru Torat deng orang-orang Farisi mulai cari-cari parkara deng Antua. Dong jua tanya-tanya Antua deng sagala macang soal. 54Dong biking bagitu biar kalo Antua jawab sala, dong bisa ika Antua deng Antua pung kata-kata sandiri.

Currently Selected:

Lukas 11: ABMA

Highlight

Copy