Mateus 18
18
Nongen Jesu le ndro su lao aden.
1Boen su lao aden su la ndro Jesu, su ndemani i: Sie i hom labenen ber gor lundielang? 2Jesu i loh hom mbunana, i lugi le molengasu. 3I vong le ndro su, i bai: Ndangen io boi le ndro mu, ar mu belueni bern ademu bui, bern ademu i dege bern asu mbunana, danmu le lundielang bui. 4Be homo i da hanguruen dege mbunana ogo, i de danen hanguruen bui, sie i labenen ber gor lundielang, i ogo i manden ge, hanu le asu masi ber gor lundielang. 5Be homo i sobani mbunana homo le ngoro, i sobani io.
6Be homo i da seslaini su ndramed ogo molhege le longu momen, i monen ge, be su hosi i, su daui bad manden le vas, su gbieni i le ndas manden. 7Su gina momen ge, su gor masi, su da seslaini su. Longu momen i da le gor boan ndangen, aga logna le longu momen, ndramed homo, i da seslaini su leri i gina momen gane. 8Be nemem de ndegem beg seslaini uo le longu momen, e sindrdi giao, e bieni i gle manan, i hian hanu, mandrm i momen ge, ma meluam i mamaren sidesi, de nemem e ndegem marge, uo al moan manden, moan de somad bui. 9Be begmarm i seslaini uo le longu momen, ede i, gbieni giao. I hian begmarm si ge, uo la gor lundielang, de begmarm maruo, uo al moan manden.
10Gobgulue meluamu, debosan mu hanguruen momen le su mbunana ogo. Io vong le ndro mu, su Angelo asu, su da lundielang, su ilndri sidesi bormarn ad Bo Domo le lang. 11Ndurndramed i gin meher, beg gahi su, su da gina malold. 12Mu hanguruen sa? Hom ndramed, meh aden masanged, homo i gin bieni i, i gina momen, i gina malold, ndramed ogo i bieni su meh manondrsungul e nondrsi, i la bahali, i gahi meh aden, i da gin bieni i. 13Be i gin danoni i, i da mugmug manden ge, le meh da gin danoni i, hanu le su meh manondrsungul e nondrsi, su da horuan ge. 14Damu ber lang i mburen homo asu mbunana ogo na glos.
15Be nderm gin bo momen le ndro uo, al ndro i, vong le ndro i gleri, uo ma i ge. Be i delengan le nongen adem aga i hian. 16I de delengan le nongen adem bui, hedi homo, de sor marmou, ma hinen gord le ndro i, le bormar so marmou. 17Be i de delengan le nongen asor marmou bui, bosoui longu ogo le ndro su lao masi ber lodu. Be i da delengan le nongen asu ndern masi bui, hanguruen i, i homo asu Haiden, i hom ndramed gina momen gane. 18Ndangen io boi le ndro mu: Longu masi mu da hosi i le boan, i gina hosi le lang lie. Longu masi, mu rumburdi i le boan, i gina horuan le lang lie. 19Heb nongen le ndro mu lie: Be sor marmou ber gor boan beg soling le longu hendre, Bo Domo ber lang i hengen asor. 20Be sor marmou, de su madilmou su me goure le ngoro, io da le dogrosu.
Heb nongen le suria.
21Boen Petrus i la ndro Jesu, i ndemani, i bai: Ndorlaben mabersehe golo i ndud longu momen ad ndere i da gin bo longu momen me ndro io ie? I vonei maberndrdolo, de bui? 22Jesu i bode: Io vong le ndro uo: Maberndrdolo, aga i de vonei bui, manondrdilingul maberndrdolo, aga i vonei. 23Gor lundielang i dege King homo, i da gin loh su lao aden le um peper aden. 24I beg hanguruen memrad, i da gin hengen le ndro su. Homo gin meher, moni mabosungul ad King i da ndro i. 25I de danen surien moni mabosanged dagara bui, ndorlaben aden i beg semani nambuln, ma ndurn, ma memrad aden masi sumburdi, aga heb surian le memrad aden. 26Lao aden ogo i da godurhu ngondrnegen, i soling le ndro ndorlaben, i bai: Ndorlaben ir belengeni io, io beg surien moni adem masigane. 27Ndorlaben i ibdi gahaloseli le ndro lao aden, hengen le ndro i moni aden masigane sumburdi. 28Ndramed ogo, be i gin bieni um ad ndorlaben, hom lao ad ndorlaben lie i sohal sal aden, moni masanged ad ndramed ogo i da ndro i, de gin surieni masou. Ndramed ogo, i hosi i, i bo iil le ndro i, i bordaui bergoln, i vong le ndro i, i bai: E surien moni ordo malabo. 29Lao ogo i los le boan, i soling, i bai: Ir belengen io, io beg surieni sumburdi. 30Ndramed ogo i mburen belengeni, i gina, i bo gord le ndro i, i daui i le kalabus na gsurien moni aden. 31Be su lao masi ad King su gin ilndri longu ogo, bergolsu i irgu. Su gina, su bosoui longu ogo masi le ndro ndorlaben asu. 32King i gin loh ndramed ogo i vong le ndro i, i bai: Uo ndramed momen ge, io gin hengen le ndro uo moni ordo masi sumburdi, uo da gin soling me ndro io. 33Desa uo da gin ibdi heb gahaloseli de la ndro nderm bugane, dege io da gin ibdi i le ndro uo? 34Gus ad ndorlaben manden ge, i daui ndramed ogo le nemesu polisboi, su daui i le kalabus, le surien moni ad ndorlaben masigane sumburdi, 35dagara Bo Domo ber lang i ghinen i le ndro mu, be golmu de ndud longu ad nderm bugane, i da gin hinen le ndro homo ma homo.
Currently Selected:
Mateus 18: LLENT
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1956
