Mateus 19
19
Heb nongen le bieni nambulen.
1Nongen ogo boen, Jesu i bieni Galilea, i dogi le gor asu Judea, i da le horo le ndran Jordan. 2Su ndramed mabosanged su la born ndro i, i rugurdueni su. 3Su Pharisi su la ndro i, beg seslaini i. Su ndemani i, su boi: Hom gamel i danen bieni nambulen, be i lengi, de bui? 4I bode: Mu de gin ilndri Buk Helian bui, Jehova i da gin mengseni sor marmou ge, hom gamel, hom bihin. 5Boen i gin bai: Hom gamel i bieni damen sor nanen, ir ndrobon nambulen, sor marmou mandrsor bersi. 6Malabo sor marmou bui, sor homo ge. Ar Jehova gin daui sor marmou, mbue bieni nambulen. 7Su vong le ndro i, su bode: Desa Mose gin bai, hom gamel hengen peper le robulda le ndro bihin, boen i gbieni i. 8Jesu i bode: Mose i danen bergolmu ndoun ndoun ge, le longu ogo i gin bai dagara, nandugian dagara bui. 9Io vong le ndro mu: Be homo i bieni nambulen, be i de gin bo longu sungsou bui, muren i ibdi homo le nambulen lie, i ogo i bo longu sungsou. Be homo i ibdi hom bihin le nambulen, goru i gin bieni gamel aden, i hinen longu sungsou lie. 10Boen su lao aden su vong le ndro i, su bai: Be nongen adem uo da gin bai le ndro su i monen, i hian ge, be homo de ibdi bihin homo le nambulen bugane. Jesu i bode. 11Su masi de dansu nongen ogo bui, su holel ge su dansu leri. 12Su holel dansu ibdi bihin le nambulen bugane, mandrsu momen gle mamamei, su holel de dansu ibdi bihin le nambulen bui, su ndramed gin sindrdi mandrsu gina momen. Su holel de dansu ibdi bihin le nambulen bui, su mburesu ibdi bihin homo le nambulen, su beg hanguruen longu ber lang ge. Ar homo i danen boro nongen ogo, i gboro i.
Jesu hengen su mbunana.
13Boen su la bah, su mbunana asu le ndro i, ar i gi selbe su. Su lao ad Jesu, su bangondrngondr le asu. 14Jesu i vong le ndro su: Hian su mbunana su gam ndro io, mbue mu ga sendraini su, gor lundielang i asu. 15Boen i daui nemen le borbalsu, i bieni gor asu i gina.
Nongen Jesu le ndro hom ulhou.
16Homo i la ndro i, i ndemani i: Ndorlaben, sehe longu hian io ghinen i, io la lundielang gleri? 17Jesu i bode: Desa uo ndemani io le longu hian? Homo ge i hian. Be uo leng dogi le gor lundielang, ghinen nongen ad Jehova. 18I bode: Sehe nongen? Jesu i boi: Nongen ogoro: Mbue rii homo, mbue sungsou, mbue behena, mbue ar gogobaini homo. 19Or gulue dam, or gulue nanem, golmisden ndramed i da baghege ndro uo, dege uo voamiso mandrm. 20Ulhou ogo i bode: Nongen ogo io gin hinen i masi sumburdi. Sehe longu masou? 21Jesu i bode: Be uo leng dogi le gor lundielang, al le gor adem, semani memrad adem masigane, ghengen moni le ndro su ndramed, heb memrad asu bui, muren memrad adem i da le gor lundielang. Boen uo gmul, uo ndrobo. 22Ar ulhou gin hirong nongen ogo, ndrnen i gosusngo, i bieni Jesu, memrad aden mabosanged. 23Boen Jesu i vong le ndro su lao aden: Ndangen io boi le ndro mu, i beruan manden ge, ar labenen homo, memrad aden dsoln, la gor lundielang. 24Io boi le ndro mu bersilie: Hom ndramed la ngai nduboi hanu, le ndramed, memrad aden dsoln le gor lundielang. 25Su lao aden, be su gin hirong nongen ad Jesu, meluasu i ieb. Su vong, su bai: Sie i la lundielang ar i dagara? 26Jesu i lele su, i vong le ndro su: Su ndramed de dansu i bui, Jehova ge, i ndoa le longu masigane.
Heb nongen le surian le gor lundielang.
27Boen Petrus i vong le ndro Jesu, i bai: E. lele, iou gin bieni longu adu masigane iou ndrobom, sehe surian ir belengen du? 28Jesu i bode: Ndangen io boi le ndro mu: Mu da ndrobo, mu lugdo im logna masongul e ruo, logna asu ndurhian ber Israel, mu gob gord le ndro su gor Israel masi, le rang, be ndurndramed i lugdo im logna le engerang aden, le gor lundielang. 29Ar homo ir ndrbo, i gbieni ndern e bison; damen, e nanen, de ndurn, beleng e um aden, io surien i mabersanged, io hengen le ndro i gor lundielang lie. 30Su mabosanged su hanu, su la muren. Su da muren su me hanu.
Currently Selected:
Mateus 19: LLENT
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1956
