Mataio 13
13
10 PAKANA MA 3.
1U ra bug kuma Iesu i pari ko ra ruma ma i ki nokono. 2Ma ra kum tara‐na‐kaiya pi diat tolug ugai korom i; ma i ka u ra tampag, ma i ki uni, ma diat rap a kum tara‐na‐kaiya diat turu nokono. 3Ma mogoro na lig i wapua diat uni u ra kum pirapira welwelara, lenkumi;
Boboi, a tenalamirai i wan ma i lamirai: 4ma ba i lamirai, rā kum uaina i puka u ra papara akapi, ma ra kum pika diat wan pat ma diat anpai; 5rā kum uaina bulug i puka tau u ra wanua na watwat, ba kinalik na pia i tana uni: ma i kuburu kaka pat, kuma pa i but a pia uni: 6ma ba a make i irok pat, i marag rap; ma i pakilakila, kuma pa ta akarina. 7Rā kum uaina kai i puka na liwan ta ra kum diwai taraloklokono; ma ra diwai taraloklokono i tauabatpai: 8ma rā kum uaina bulug i puka tau u ra bala ra piana, ma i ua buraburei, ra magan a marina, ra bulug nom na noina, ra kai tul a noina. 9Ia ba i tara‐teligana awakak ba in walogoro.
10A tara na wawera diat wan korom i, ma diat tiri uni lena, Lelawai kuma u wera diat u ra kum pirapira welwelara? 11I piri ta diat, Di tari ta muat lena muat nunura a kum lig i tana ino i ra matanitu ko ra maua, ma pa di tari korom diat. 12Kuma ba te i paki ta utna kura din tari balet tana, ma in paki ta mogoro: ia kai ba pa i paki a nuna ta utna, kura din rakanuai koni a lig kuma i paki. 13Ia kuma iau wapua diat uni u ra kum pirapira welwelara; kuma diat bobo ma pa diat bobo lelei, diat walogoro ma pa diat walogoro lelei, ma pa diat manana kai uni. 14Kuma i wewaot tau u diat a parofisai a nun Isaia ba i piri lenkumi, Muat walogoro liklikinai ma pa muat manana uni; muat bobo liklikinai ma pa muat a bobo lelei: 15kuma i bira tau a baladiat a tara kumi, i bauret kai a teligadiat, ma diat pulubatpa a matadiat, kaduk diat a bobo ma ra matadiat, ma diat a walogoro ma ra teligadiat, ma diat a manana kai u ra baladiat, ma diat a turu tapuku balet, ba ag walaun diat uni. 16I dan a matamuat kuma muat bobo, i dan kai a teligamuat, kuma muat walogoroi. 17A ligtatuna iau wapua muat uni lena, Mogoro na parofita ma ra kum tenapetoduru diat ligna boboi a kum lig muat boboi, ma pa diat boboi ma, diat ligna walogoroi kai a kum lig muat walogoroi, ma pa diat walogoroi ma.
18Muat walogoro a pirapira welwelara u ra tenalamirai. 19Ba te i walogoropa a pirapira i ra matanitu ma pa i manana uni, rā‐akaina i wan pat ma i rapai ma ut a lig kuma di lamirai u ra balana. Ia kuma di lamirai u ra papara akapi. 20Ma ia ba di lamirai u ra wanua na watwat, ia kuma i walogoropa a pirapira, ma i taram ma ut uni, ma i kaia uni; 21ma pa i tara akarina u ra balana ma i tana kinalik pamun: ma ba i wan pat a tapunuk, ba a pet‐na‐bilbil u ra pirapira, i tutukā ma ut. 22Ia kumi di lamirai u ra diwai taraloklokono, ia ba i walogoropa a pirapira, ma ra nunukdokodoko u ra lalaun kumin, ma ra waruwaruka i ra utna, i taua‐batpa a pirapira, ma pa i ua uni. 23Ia bulug kumi di lamirai u ra piana, ia ba i walogoro a pirapira, ma i manana uni; ma i ua buraburei, ta magan a marina, ta magan bulug nom na noina, ta magan kai tul a noina.
24Rā bulug a pirapira welwelara i wapua diat uni, lena, A matanitu ko ra maua diara welara ma ta muana ba i lamira a kokoina padi u ra nuna pinapam: 25ba diat inep a kum tara, a nuna iabara i wan pat ma i lamira a taratara padi na liwan ta ra kokoina padi, ma i wan talili. 26Ba i kuburu pat a padi, ma i ua, a taratara padi kai i puā marakam. 27A kum wetula a nu ra petpalig diat wan korom i ma diat piri tana, Tadaru, pa u lamirai duk a kokoina padi u ra num pinapam? Taka wai duk a taratara padi? 28I piri ta diat, A iabara i a peta a lig kuma. A kum wetula diat tiri lena, U nemi duk ba miat a wan, miat a kat‐a‐rapuai, ba pate? 29I akanaubat diat lena, Koniku mun; kaduk ba muat katua a kum taratara padi, muat a kat ugai mai a kum kokoina padi. 30Madekua diara ba diara taua ugai in tuk u ra kalag na rotkutu! kura u ra pupukai na rotkutu ag piri ta diat a kum tenarotkutu lena, Muat a rakan ugai mun a taratara padi, muat dopakutai, muat tun a rapuai: muat rakan ugai bulug a kum kokoina padi, u ra nug ruma na utna.
31Te bulug a pirapira welwelara i wapua diat uni, lena, A matanitu ko ra maua diara welara ma ra patik na musita, ba a muana i marutai u ra nuna pinapam: 32kuma a kinalik akit ia u ra kum patik na diwai; ma ba i taua i gala u ra kum diwai liklik, ma ba a diwai mulu ia a kum pika diat rowo pat, ma diat rakantau u ra kum kakakana.
33Te bulug a pirapira welwelara i wapua diat uni lena, A matanitu ko ra maua diara welara ma ra leven ba a tebuan i rakani ma i wawinoi na liwan ta ra tul a pupua na falaua, ma kalikmaku i taraleven rap uni.
34A lig rap kumi Iesu i wapua diat uni a tara‐na‐kaiya u ra kum pirapira welwelara; ma ba pa ta pirapira welwelara pa i wapua diat un ta lig: 35ba in wewaot uni a pirapira a nu ra parofita lena, Ag wapuatau u ra kum pirapira welwelara; ag pirapuanata a kum lig di wawinoi tak u ra pupukai di pam kabinpa a vuravura uni.
36Ma i wan talura diat a tara‐na‐kaiya, ma i ruk u ra ruma: ma diat a nuna tara na wawera diat wan korom i ma diat arig i, lena, Un piraweatai ta miat a pirapira welwelara u ra taratara padi u ra pinapam. 37I piri ta diat, Ia ba i lamira a kokoina padi, na Tu‐ra‐muana ia; 38A pinapam, a vuravura ia; a kum kokoina uaina, a kum na tu ra matanitu diat; a kum taratara padi, a kum na tun Ra‐akaina diat; 39ma ra iabara kuma ba i lamirai, a tebaran ku ia: a pupukai na rotkutu, a tintinip na bug ia; a kum tena‐rotkutu, a kum agelo diat. 40Lenkuma di rakan ugai a kum tara tara padi ma di tunuai; len kai kuma din peti u ra tintinip na bug. 41Na Tu ra muana in tulua diat a nuna kum agelo, ma kura diat a rakan igenuai a lig rap i pet a raradi, ma diat ba diat petakakai, 42ma din og diat u ra raran na ugan: diat tagtagi ma wakirit a lokodi iai. 43Kura kai a kum tenapetoduru diat a milamila le ra make u ra matanitu a nu ra Tamadiat. Ia ba i tara‐teligana, awakak ba in walogoro.
44A matanitu ko ra maua diara welara ma ra utna ba i gala na matana di paki inoi u ra pinapam; ma ra muana ba i auarepai, i wawinoi balet; ma u ra nuna kaia i wan ma i kul‐na‐ga ma ra nuna utna rap, ba in kipi mai a pinapam kuma.
45Kumi kai, a matanitu ko ra maua diara welara ma ra tenakunukul, ba i batbat kup a kum kokoina kalakalag‐nakodo: 46ma ba i auarepai mun ra kalakalag‐nakodo ba i gala na matana, i wan ma i kul‐na‐ga ma ra nuna utna rap, ma i kulpai mai.
47Kumi kai, a matanitu ko ra maua diara welara ma ra bene na biaui, ba di nai u ra tai, ma di rakani uni tiba na ugan a ien: 48Ma ba i teg a bala ra bene diat al a maramaratai nokono; ma diat ki na pia, ma diat wagan a kum kokoina u ra ka, a kum akakaina bulug diat oguai. 49Din pet lenkuma u ra tintinip na bug: kura a kum agelo diat a wan pat, ma diat a pam a weranata diat a kum tenapetakakai ko diat a kum tenapetoduru, 50ma diat a ogua diat u ra raran na ugan: kura diat a tagtagi ma wakirit a lokodi iai.
51Muat manana u ra pipilai ra lig rap kumi ba pate? Diat uruniauot tana, Iu. 52Ma i piri ta diat, Ia kuma, a tenawawera ba di weratai u ra lig a nu ra matanitu ko ra maua, diara welara ma ra petpalig i uarerei ko ra nuna ka na utna a kum matakina lig ma ra kum turaina lig.
53Ba Iesu i pira raptai mun a kum pirapira welwelara kumi, i wan taka iai. 54Ma ba i wan pat u ra nuna wanua, i wera diat u ra nudiat ruma na lotu, ma diat kakaian uni, ma diat lena, A muana bi i rakanpai taka wai duk a manana kumi, ma ra kum pinapam na kakaian kumi? 55Pate duk na tu ra kapinta ia? nana kai di patap a iana Maria, ni? diat kai a kum tetenaliklik Iakob, ma Iosefa, ma Simon, ma Iuda, ni? 56Ma ra kum tetenaliklik a tebuan diat tana ugai ma dat, ni? A muana bi i rakanpai taka wai a kum lig rap kumi? Ma diat tutukā uni. 57Ma Iesu i piri ta diat, Di ururu u ra parofita u ra kum bual igen, diat ku u ra nuna bual, ma ra nuna taman, pa diat ururu un i. 58Ma pa i pam a mogoro na pinapam na kakaian iai, kuma pa diat nurutau un i.
Currently Selected:
Mataio 13: RAI
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1896.
