Mataio 6
6
6. NA PAKANA.
1Muat katom, ma koniku muat pet a puana a numuat petoduru na ra matadiat a tara ba diat a bobo muat uni: ba lenkuma pa numuat ta wedok ma ko ra Tamamuat i ki u ra maua. 2Ba u pet a num maramari, koniku ip a tauru na muka tam, lenkuma diat a kum tenawaruwaruka diat peti u ra kum ruma na lotu ma u ra kum akapi kai, ba a tara diat a pira walaua diat uni. Iau piri ligtatuna ta muat, Diat a rakanpa a nudiat wedok. 3Ui kai, ba u pet a num maramari, koniku a maira na limam in nunura a lig ba a waot na limam i peti: 4ba di pet‐inoi ku a num maramari: ma ra Tamam, ia ba i bobo a lig i tana ino, in balui tam.
5Ba muat arig koniku muat pet len diat a kum tenawaruwaruka: kuma diat nem akiti lena diat turu ma diat arig u ra kum ruma na lotu ma u ra kum inuk na akapi, ba a tara din bobo diat. Iau piri ligtatuna ta muat, Diat a rakanpa a nudiat wedok. 6Ui kai, ba u arig, ruk u ra num ruma, ma ba u bălbălat mun a num bonanaka, un arig korom a Tamam i tana ino; ma ra Tamam, ia ba i boboi a lig i tana ino, kura in balui tam.
7Ba muat arig koniku mogoro na pirapira bia ku uni, len diat a Tara‐igen diat piri: kuma diat kanapi lena din walogoro diat ba mogoro a nudiat pirapira. 8Koniku muat welara ma diat: kuma a Tamamuat i nunura a kum lig i ka korom muat, ba pa muat arig i utbai.
9Kuma muat a arig lenkumi: Tamamiat u ra maua auakak din ururu u ra yam. In wan urin a num nakokon. 10Awakak ba din taram korom ui u ra rakrakan wanua rap, lenkuma diat taram korom ui u ra maua. 11U ra bug kumi un tari ta miat a miat utna. 12Koniku mag miat u ra numiat petakakai, lenkuma pa miat mag diat diat petakakai korom miat. 13Koniku ben miat u ra walwalam; un walaun miat ko ra akaina lig: kuma a num ku a Nakokon, ma ra Dekdek, ma ra Ururu, pa in rap. 14Ba pa muat mag diat a tara u ra nudiat petakakai korom muat, a Tamamuat i ki u ra maua pa in mag muat kai. 15Ba muat mag diat a tara u ra nudiat petakakai, a Tamamuat kai in mag muat u ra numuat petakakai.
16Kumi kai, ba muat wawel, koniku in tumtumel a matamuat len diat a kum tenawaruwaruka; kuma diat wagilagila a matadiat ba in pua uni korom diat a tara lena diat wawel. Iau piri ligtatuna ta muat, Diat a rakanpa a nudiat wedok. 17Ui kai, ba u wawel, un ku a lorim, un ki a matam; 18ma koniku a num wawel in pua korom diat a tara, korom a Tamam ia i tana ino: ma ra Tamam, ia ba i bobo a lig i tana ino, kura in balui tam.
19Koniku muat barata ugai korom muat a utna u vuravura; kuma a poropo ma ra karakara i anakaruai, ma ra tara tatok diat reguai ma diat ualogi: 20Muat a barata ugai a utna u ra maua ku; kuma a poropo ma ra karakara pa in anakaruai iai, a tara tatok kai pa diat a reguai iai ma ualogi: 21kuma a balam in tana u ra bual kuma a num utna i tana uni.
22A matadi a lamp i ra panidi: ba i wakak a matam in teg a panpanim rap ma ra kapakapa. 23Ba pikoina a matam in teg a panpanim rap ma ra boboto. Ba i boboto ku a kapakapa kuma i tana u ra balam, a galapi ma a boboto kuma!
24Pa ta muana in taram larapai korom ru tadaru; kuma in tebua ra pa diara, ma ra kai in mari; in taram korom ra ma ra kai in wabulbul i. Muat kana taram larapai korom Nara ma ra utna kai. 25Ia kuma iau piri ta muat uni lena, Koniku muat nunukdokodoko muat u ra numuat lalaun, lena, awa muat an ani, ba awa muat inimi, ma u ra panimuat kai ba awa muat a papai uni. Pa i gala duk a lalaun u ra utna na anian? I gala bulug a panidi u ra malu, ni? 26Muat a bobo diat a kum pika na lagit, kuma pa diat lămlămirai, pa diat rotkutu, ma pa diat walaig a utna u ra ruma‐na‐utna; ma ra Tamamuat i ki u ra maua, i tabara diat. Ma pa muat ka akit duk u diat? 27O oi na pa muat, ba i nunukdokopa i, in pam a wiyok larapai pulik a nuna lalaun? 28Ma lelawai muat garā kup a malu? Muat a nuk diat a kum pupu na diwai, diat taua lelawai; pa diat papam, ma pa diat piri malu: 29ma iau piri ta muat lena, Solomon u ra mărina rap, pa i kop ta win a malu i welara ta pa diat kumi. 30Ba Nara i wakopta a kum uali na bual lenkumi, ia ba i tana kumari, ma na buru kai din oguai u ra raran, pa in wakopta muat duk, a kum tenanuru kinalik ku muat? 31Kăbi, koniku muat nunukdokodoko muat uni, lena, awa muat an ani? ba awa muat a papai un muat? 32Kuma a kum Tara‐igen diat auarekup a kum lig lenkumi; ma ra Tamamuat i ki u ra maua i nunurai lena i ka korom muat a kum lig rap kumi. 33Muat an auare‐mukakup a nuna matanitu ma ra nuna petoduru; ma din tari waraut ta muat a kum lig rap kumi. 34Koniku muat nunukdokodoko muat u na buru: kuma na buru in nunukdokopai u ra nuna kum lig. I wewaot a bug a nuna akaina lig.
Currently Selected:
Mataio 6: RAI
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1896.
