Mareko 12
12
12 A PAKANA.
1Ma i pira‐kabin ta diat u ra pirapira welwelara, lenkumi, Ra muana i maruti a nuna pinapam na vaine, ma i liblib bati, ma kilpai uni a tug na waine, ma i pamtai a ruma na pakpakila, ma ba i tuturata diat uni a kum tena pinapam, i wan igen u ra ugana bual. 2Ma ba ta un vaine i mauru i tulai a nuna wetula korom diat a kum tenapinapam, in rakanpai kon diat a kum tenapinapam a tiniba na utna ko ra pinapam na vaine. 3Ma diat pam‐koto i, ma diat ulat i ma tula‐ua i ma pa diat tari ta lig tana. 4Ma i tulai balet ta diat te bulug a nuna wetula; ma diat ak‐a‐koptai a lorina, ma diat pet akakai korom i. 5Ma i tulai te bulug korom diat; ma ia kuma diat um dokoi: ma magoro a tara bulug diat patap: ta magan diat rapui, ta magan diat um dokoi. 6Ra bulug i tana ut, na tunalik walwaliana: ma ia kuma i tulai na muru korom diat, ma i piri, lena, diat a ururuni na tuglik. 7Ma diat a kum tenapinapam diat pirapiri ugai, lenkumi, a kale na tamana kumi; in, dat a um dokoi, ma ra nu dat ku a pinapam kumi. 8Ma diat rakanpa i ma um doko i, ma diat og‐ua i na maru na pinapam na vaine. 9Awa duk ta lig a Tadaru a nuna na pinapam na vaine in peti korom diat? In wan pat ma umdoko‐ruai a kum tenapinapam kuma ma in tari a pinapam‐na‐vaine korom ra igen a kum tenapinapam. 10Pa muat luki utbai duk a pakana pirapira kumi u ra Buk‐Tabu; “A wat kuma diat a kum tena ugwedaun‐wat diat og uai, ia kuma di pakitai ma ra wat na inuk u na te: 11A lig kumi kon Ieova, ma ra lig na kakaian ia na ra matadat.”? 12Ma diat ligna rakan i; ma diat buruta diat a kum tara‐na‐kaia; kuma diat nunurai i pira‐na‐du u diat u ra pirapira welwelara: ma diat turu kon i, ma wan igen.
13Ma diat tulai korom i ta magan ko diat a kum te Faresaio ma ra kum te Erodiana, diat a pam na pinalai kupi u ra nuna pirapira. 14Ma ba diat wan korom i, diat piri tana, lenkumi, Tenawawera miat nunura ui a muana ligtatuna ui, ma pa u burut un te: kuma pa u ururu biaku diat a kum tara, ma u wawera a ligtatuna ku u ra kum kokoina lig na ra matan Nara: I wakak duk ba dat tari a drawe korom Kaisara, ba pate duk? Miat a tara duk, ba konima miat tari? 15Ma Iesu i nunurai a nudiat waruwaruka, ma i piri ta diat, Lelawai kuma muat ligna walam iau? kipi korom iau ta denarion, iau boboi. 16Ma diat kipi. Ma i piri ta diat, A nun oi a nion kumi ma ra timtimu kai? Ma diat piri tana, a nun Kaisara. 17Ma Iesu i piri ta diat, Muat tari tan Kaisara a kum lig a nun Kaisara, ma tari bulug tan Nara a kum lig a nun Nara. Ma diat kakaian akit uni.
18Ma ra kum te Sadukaio kai diat ba diat piri, lena, Pa ta lalaun balet na muru, diat wan korom i; ma diat tiri tana, lenkumi. 19Tenawawera, Mosese i timui len bi ta miat, Ba te a tenalik ia mat, ma nuna tebuan i lalaun kubai, ma pa ta na tunalik, i ka ba tenalik in taula ma ra tebuan a nuna tenalik, ma in wakuburi ta bulumuru un tenalik ia mat. 20Narap diat ki na miat a limadi ma ruadi na diwaina in muana: ma ra mukana i taula ma ra tebuan, ma i wirua pa nuna ta tunalik; 21Ma tenalik ba i patap uni i taula ma i, ma i wirua kai, pa nuna bulug ta tunalik; ma tenalik i patap u diara i pet lenkuma kai: 22Ma diat rap bulug a limadi ma ruadi, pa ta bulumuridiat. A tebuan kuma i mat na murumuru diat rap. 23Ka ba diat lalaun balet na muru a tebuan a nun oi ia? kuma diat a limadi ma ruadi diat taula pa ma i. 24Iesu i piri ta diat, Pate duk a kabina kumi a numuat nuk‐a‐rarauai, kuma pa muat manana u ra Buk Tabu, ma ra dekdekin Nara? 25Kuma ba diat turu balet ko ra mat, pa diat taula, ma pa diat petwebat u ra tinaula diat len diat ba a kum agelo u ra maua. 26Ma kumi, u ra nudiat lalaun balet ko ra mat a kum tara irua; pa muat luki utbai u ra buk Mosese i ā timui, u ra pakana kuma i wapuai u ra Diwai, ba Nara i piri korom i lenkumi, Iau ku, a Kalou a nun Abaramo, ma ra Kalou a nun Isako, ma ra Kalou a nun Iakobo? 27Nara, pa ta Kalou a nudiat a kum minat, a nudiat ku diat lalaun; Muat rara akit.
28Ma ra pa diat a kum tenatimtimu i wan pat, ma i walagoro diat ba diat wetiritiri ugai, ma ba i nunurai Iesu i balu na kurai a nudiat pirapira, i tiri tana, lenkumi, Awa a wewadu i muka u ra kum wewadu rap? 29Iesu i piri tana, A wewadu i muka kumi, Muat a tara Isaraelu, Muat ora walogoroi; Ieova a nudat Kalou, Ieova takai ku ia; 30Ma kumi, Un mari Ieova a num Kalou ma ra balam rap, ma ra niom rap, ma ra nuknukim rap, ma ra num dekdek rap. 31Ma kumi i patap uni, Un mari a tara muru ki ebeben lenkuma u mari ui. Pa ta wewadu i gala u ra ru wewadu kumi. 32Ma ra tenatimtimu i piri tana, A ligtatuna ui, Tenawawera, i auakak akit a num pirapira, lena, I takai ku; ma pa te ra bulug, Ia ma ku. 33Ma ba te i mari ma ra balana rap, ma ra nuknukin rap, ma nuna dekdek rap, ma ba i mari a tara diara ki ebeben welara i mari ia, i ka akit kuma, ma i ka kinalik ma ku a kum wekul‐natutun, ma ra kum wekul rap. 34Ma ba Iesu i nunurai i pira mananai, i piri tana, Pa u welwelik ko ra matanitu a nun Nara. Ma diat rap diat burut din tiri tana balet un ta lig.
35Ma ba Iesu i wawera diat u ra ruma na lotu, i piri lenkumi, Lelawai kuma diat a kum tenatimtimu diat piri, lena, A Karisito na tun Davida ia? 36Kuma Davida i piri ba Niono Tabu i wawera koromi, Ieova i piri ta ra nug Tadaru, Un ki ui u ra woat na limag, ma kaliktau ma ku ag pam diat a num kum iabara welara lig ui papinamai uni. 37Boboi, Davida i tara Tadaru korom i; ba lenkumi, na tunalik lelawai ia? Ma diat a tara‐na‐kaia diat kaia akit ba diat walogoroi a nuna pirapira.
38Ma ba i wera diat i lena, Muat katom u diat a kum tenatimtimu, kuma diat nemi diat a wan wetulut ma ra nudiat malu iokana, ma din wewatai u diat a kum tara u ra kum matana bug, 39Diat nemi kai a kum kinkini na tadaru u ra kum ruma‐na‐lotu ma ra kum kinkini na tadaru u ra kum witamai. 40Diat rapai a utna rap ko diat a kum uala na tebuan, ma diat waruwaruka u ra nudiat pinapet iokana; din balui korom diat bi ma ra dekdek na nakokon.
41I ki na ra matana bok di pakitai uni a măni, ma i bobo diat a kum tara ba diat paki a nudiat mani bala ra bok na mani: ma magoro diat a kum tena magoro diat paki uni ta magoro a măni. 42Ma ra tebuan i uala ma kanau kai, i wan pat, ma paki uni ta ruwin a mani kinalik akit, i welara ma ra kodane ku. 43Ma Iesu i watai korom i diat a nuna kum tara wawera, ma piri ta diat, A ligtatuna iau pira ta muat, A tebuan a uala ma kanau kumi i paki gala akit un diat rap diat pakitai a măni u ra bok na mani: 44kuma diat rap diat paki a pakana ku ko ra nudiat utna galapi; ma ra tebuan kuma i taratai a lig rap i tana koromi, a lig rap i lalaun uni.
Currently Selected:
Mareko 12: RAI
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1896.
