APOSTOLO 11
11
1Achi, apostolo ni mandumbu waze apwile mu Yundeya evwile ngwo, Akwa mavungu nawa hatambula Liji lia Zambi. 2Mba muze te Petulu hakanduka ku Yerusaleme, waze a ku ungalami amuhangulwile. 3Ngwo, Yena waliendelele ni yilima, walile hamwe no. 4Alioze Petulu waputukile kulumbununa chikuma kuli ayo, nikuchilulika ngwenyi, 5Napwile mu limbo lia Yopa, nikulemba: ngwe mu tulo namwene usolwelo, chimwe chikwachilo chahulumukine, ngwe hina linene, kanachisunwisa ku mbango jiwana mwilu; chejile ndo kuli yami. 6Muze te hinahulikilaho meso jami, natalile, namwene tushitu a hashi, ni ngongo, ni tututu, ni tujila a mwilu. 7Nevwile nawa liji, ngwo, Katuka, Petulu: shiha, ulie. 8Alioze nambile ngwami, Ka, hi chocho ko, Mwene; mumu chuma chimwe chipi hanji cha luchisa kuchanjilile mu kanwa liami nilimwe tangwa. 9Alioze liji liangukumbulwile chisuho chamuchiali mwilu ngwo, Chize hanapemesa Zambi, kanda uchivuluka ngwe, Chipi. 10Chino chapwile katatu: ni cheka nawa yeswe yasosewele mwilu; 11kumanyi, haze hene malunga atatu amanyine kulutwe lia zuwo muze twapwile, akutumiwa hali yami ku Sesarea. 12Spiritu wangwambile nguye hamwe no, nikuyambashana nichimwe. Wano mandumbu asambano nawa avile hamwe ni yami, twanjilile mu zuwo lia yono lunga. 13Iye watwambulwilile ngwe amwene mungelo, nikumana mu zuwo lienyi, ngwenyi, Tuma ku Yopa, Ukasake Semone, jina lienyi likwo, Petulu; 14iye kumakakwaha maliji akulilamwina no, yena ni akwa zuwo lie eswe. 15Shimbu naputukile kuhanjika, Spiritu Musandu wejile hali ayo, chizechene ngwe hali yetu ha uputukilo. 16Mba newulukile liji lia Mwene, ngwe ambile ngwenyi, Yoano chamwenemwene wapapachishile mu meya; alioze kumakanupapachisa muli Spiritu Musandu. 17Nyi Zambi waahele chawana chimuwika watuhele yetu nawa, muze twafulielele Mwene Yesu Kristu, mba yami iya munguhasa kukanda Zambi? 18O muze evwile yino yuma, aholele kulungunga, achichimiekene Zambi, ngwo, Kashika Zambi hanahana kuli akwa mavungu nawa kulikonyekena akatambule mwono.
19Achi, waze amwanganyine ha luyinda yoze wapwile mumu hali Eshetevau, apalikile ndusu mu chifuchi ndo ku Fwenishia, ni Saipulu, ni Andiakia, kahanjikile liji kuli hiumwe shina kuli A-Yunda wika. 20Alioze apwile amwe a kuli ayo, malunga a ku Saipuru ni a ku Sairene, muze ahetele ku Andiakia, ahanjikile kuli A-Ngresia nawa, nikwambujola sango lipema lia Mwene Yesu Kristu. 21Kwoko lia Mwene liapwile hamwe no: anji afulielele, atewulukilile kuli Mwehe. 22Ni liji lia kutwala kuli ayo liahetele ku matwi ja chikungulwila chize chapwile ku Yerusaleme; o atumine Mbarnavwe akaye ndo ku Andiakia. 23Iye, muze ahetele, ha kumona vumbi lia Zambi, wawahililile; waashinjile eswe hanga ni mbunge yeswe alalaminye kuli Mwene. 24Mumu wapwile mutu mupema, wazalile tò ni Spiritu Musandu ni Ufulielo, ni mbunga yinene aliwezele kuli Mwene. 25Iye wayile ku Tarsu mukufupa Saulu; 26muze te hamuwana, wamutwalile ku Andiakia. Mba ha mwaka wa muwundu akungulukile hamwe ni akwa chikungulwila, nikulongesa mbunga yinene; ni ku Andiakia hatangu alukile tumbaji ngwo, Akwa Kristu.
27Achi, ha matangwa ano aprofeta akatukile ku Yerusaleme nikupalumuka ku Andiakia. 28Mba umwe wa kuli ayo, jina lienyi Angavu, yakatuka, yalweza ku tachi ja Spiritu ngwenyi, Mukukapwa kapunga munene mu yifuchi yeswe ya hashi; mwenawo wapwile ha matangwa ja Kelautiu Sesare. 29Ni tumbaji aliselele, mutu ni mutu nikulita ni upite wenyi, kutumisa kuli mandumbu waze atwamine mu Yundeya yimwe ya kulikwasa nayo: 30chize nawa achilingile, nikuyitumisa kuli makulwana ku moko ja Mbarnavwe ni Saulu.
Currently Selected:
APOSTOLO 11: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
