POTETALA WA'A NCURO 1
1
Tepuʼu ncura
1:1-5
1 #
Luk. 1:1-4
Darata ri Teopilu anu pande mporaya,
Ri suraku anu kaʼisa roomo kuʼukika siko pura-pura anu ndapowia pai anu ndapepaguruka i Yesu, montepuʼu ungka ri pontepuʼu-A motetala, 2rata ri eo mpaoretaka Sira ndeki suruga. Ri kabareʼepanya teoretaka Sira ndeki suruga, ua kuasa Inosa mPue Ala, Sira mawai patada ri waʼa ncuro anu ndapilisi. 3Ungka ri pembangu-A ungka ri oyo ntau mate, ri raya anu aopo mpuyu ndeme, sira mariangkani mepapamara ri kayosa-yosanya kojo ri waʼa ncuro setu, mampatongawa sira monco-monco kojo tuwu. Nakita ntau seʼe sira, pai sira mompau pai tau seʼe mangkono ewambeʼi Pue Ala da moparenta ewa Mokole. 4#Luk. 24:49 Sindara pompasambaka sangkani-ngkani Sira pai tau seʼe, ndapatiendo tau seʼe, “Neʼe boi ndipalaika kota Yerusale. Da ndipopea njairia rantani ndawai i mPapa nunjaa anu roomo kujanjika komi inceʼemo anu roo Kutoʼoka komi owi. 5#Mat. 3:11, Mrk. 1:8, Luk. 3:16, Yoh. 1:33 Maka i Yohane mariuka komi ue, paikanya mosumo remenya komi da ndariu pai Inosa mPue Ala.”
I Pue Yesu ndaoretaka ndeki suruga
1:6-11
6Sindara waʼa ncuro mompasambaka sangkani-ngkani pai Pue Yesu, meoasi tau seʼe ri Sira, “Pue, bara wawaseʼi da ndipawangu muni poparenta nto Isaraeli?”
7Mesono i Pue Yesu ndatoʼo, “Papaku ngkalio-A anu mampakanoto eo pai temponya. Incetu bereʼe yowenya ndiincani, maka incetu kuasa i mPapa. 8#Mat. 28:19, Mrk. 16:15, Luk. 24:47-48 Paikanya komi da marata kuasa, ane Inosa mPue Ala rata ri komi. Pai komi da mewali waʼa sabi-Ku ri Yerusale, ri samalele Yudea, ri Samaria, pai rata ri tando lino.” 9#Mrk. 16:19, Luk. 24:50-51 Roo mompau i Pue Yesu ewanceʼe, ndaoretakamo Sira ndeki suruga naole-oleka ntau seʼe, nepa maʼi limu mangkulamuti Sira painaka bareʼemo nakita ntau seʼe.
10Ntongo mpetingara tau seʼe ndeki yangi malulu mata peoretaka i mPue Yesu, tingkarasaka setu tau radua morengko mabuya mekakore ri sori ntau seʼe. 11Mompau tau radua setu natoʼo, “Ee komi waʼa nto Galilea, makuja komi mekakore ireʼi, seʼi metingara ndeki yangi? I Yesu anu ndikita teoretaka ndeki suruga ri suarami seʼi, da mewalili muni ewa pangkitami peoretaka-A roo.”
Pampilisi sawani i Yudasi
1:12-26
12Ungka lairia mewalilimo waʼa ncuro njoʼu ri Yerusale ungka ri Buyu ngKaju Lana. Buyu seʼe ungka ri Yerusale tempo-temponya sambaʼa kilo kalawanya. 13#Mat. 10:2-4, Mrk. 3:16-19, Luk. 6:14-16 Ri Yerusale njoʼumo tau seʼe ri banua ngkalinggona ntau seʼe, mepone ri lincu anu ri wawonya. Waʼa ncuro setu inceʼemo i Peturu, i Yohane, i Yakobu, pai i Andaria; i Pilipu pai i Toma, i Batolomeu pai i Matiu, i Yakobu ana i Alipiu, i Simo Pomakoje pai i Yudasi ana i Yakobu; 14tau seʼe pura-pura mompasambaʼa-mbaʼa raya, sintuwu-ntuwu mekakai. Sangkani-ngkani pai waʼa mbeʼa, pai i Maria ine i mPue Yesu pai waʼa ngkasangkompo-A.
15Ri anu sandeme sindara tau seʼe maria mompasambaka – reʼe bara saatu ruampuyu tau kasondonya. Meokomo i Peturu mompau ri tau seʼe natoʼo, 16“Waʼa ngkasangkompo pura-pura! Nunjaa anu ndaʼukimo ri Sura Magali sangaya-ngaya da kobangani. Iʼowi mampojaya nguju i Daudi ndapakanotomo Inosa mPue Ala kono i Yudasi, tadulako waʼa ntau anu mancokomo i Pue Yesu setu. 17I Yudasi, siʼa sambaʼa ungka ri oyota, pai siʼa woʼu roo ndapilisi motetala sangkani-ngkani pai kita.” (18#Mat. 27:3-8 I Yudasi seʼi maratamo tana da ndapadayo, saro mpowianya anu majaʼa. Siʼa manawu, mate mebote komponya tewuwu wayaa ngkomponya pura-pura. 19Pura-pura tau anu maroo-roo ri Yerusale maincani kono inceʼe. Inceʼe painaka ri basa ntau seʼe napapotoʼo tana setu Akeledama, posokinya ‘Tana Daa’.)
20 #
Pol. 69:26, 109:8 “Maka lau ndaʼuki ri sura ngayu i Daudi,
‘Mbolimo kareʼe mpearinya naka soa-soa;
pai neʼe reʼe anu mampeari.’
Pai lau woʼu ndaʼuki,
‘Mbolimo potundanya da nasawanaka ntau ntaninya.’
21-22 #
Mat. 3:16, Mrk. 1:9, 16:19, Luk. 3:21, 24:51 Inceʼe puʼunya painaka da reʼe ungka ri oyo waʼa ntau anu bareʼe bali-bali sangkani-ngkani pai kita da mewali sabi pembangu muni i mPue Yesu ungka ri kapate-A. Tau setu sambaʼa ri oyo ntau anu moyunu-yunu pai kita malulu i Pue Yesu ri mbeʼi-mbeʼi kanjoʼu-A, montepuʼu ungka ri popariu i Yohane rata ri peoretaka i mPue Yesu ndeki suruga ungka ri oyota.”
23Nasintuwunaka ntau seʼe pura-pura tau radua, inceʼemo i Yusu anu ndapapotoʼoka i Barasaba (siʼa woʼu ndapebooka i Yusitu), pai i Matia. 24-25Nepa mekakai tau seʼe natoʼo, “Boo Pue, komi anu maincani raya ntau pura-pura. I Yudasi manawumo ungka ri tetalanya ewa sambaʼa suro pai siʼa matemo. Mewali nditujukamo kami sambaʼa ri tau radua seʼi anu ndipilisi Pue da mangkekeni tetala setu mancawani i Yudasi.” 26Roo mekakai natende ntau seʼe dadu, konomo toʼo i Matia. Mewali siʼamo anu ndapilisi marangani waʼa ncuro anu sampuyu pai sambaʼa setu.
Currently Selected:
POTETALA WA'A NCURO 1: LAIPMF
Highlight
Share
Copy
Want to have your highlights saved across all your devices? Sign up or sign in
