POTETALA WA'A NCURO 2
2
Karata Inosa mPue Ala
2:1-13
1 #
Tad. 23:15-21, Paw. 16:9-11 Jelamo ri eo Pentakosita mompasambakamo pura-pura waʼa ntau meaya. 2Tingkarasaka nadonge ntau seʼe ewa oni ngoyu marimbo anu mewui ungka ri yangi. Oninya anu mewakuu setu sandaya banua anu kareʼe mpompasambaka ntau seʼe. 3Nepa nakita ntau seʼe waʼa jila ewa reka apu anu melele nepa mouru-uru ri wawo ntanoana ntau seʼe sambaʼa pai sambaʼa. 4Tau seʼe pura-pura nakuasaimo Inosa mPue Ala, painaka natepuʼumo ntau seʼe mompau-mpau ri basa mpengaya-ngaya. Tau seʼe mompau malulu pombai Inosa ri tau seʼe kono pau anu da natoʼo.
5Ri tempo setu maria to Yahudi anu rata ungka ri mpengaya-ngaya lemba ri sambawo lino, njau ri Yerusale. Tau seʼe inceʼemo waʼa ntau anu mepoʼinaya ri Pue Ala. 6Madonge oni anu mewakuu setu mompasambakamo waʼa ntau sondo seʼe. Jingki kojo raya ntau seʼe pura-pura maka nadonge waʼa ntau meaya setu mompau-mpau ri basa ntau seʼe. 7Maʼai kojo kajingki ndaya pai benge ntau seʼe natoʼo, “Peole, ara banya paka waʼa nto Galilea anu mompau-mpau sinjoʼu? 8Ara wenu pai tapadonge tau setu mampobasakamo basata ngkaliota anu ri kareʼe pampoana kita? 9Kita seʼi to Paratia, to Media, to Elami; ungka ri Mesopotami, Yudea pai Kapadokia; ungka ri Pontu pai Asia, 10ungka ri Perigia pai Pampilia, ungka ri Masiri pai lemba ntana Libia mosu ri Kirene, pai reʼe ri oyota anu rata ungka ri Roma, 11reʼe waʼa nto Yahudi pai reʼe woʼu tau anu ungka ri banca ntaninya anu mesuamo ri agama nto Yahudi, reʼe woʼu to Kareta, pai to Ara. Pura-pura kita mangadonge waʼa ntau setu mompau ri basata sambaʼa pai sambaʼa, mampetumbu waʼa mpowia anu ndapojingki anu ndapowiamo i mPue Ala!” 12Maʼai kojo kajingki ndaya ntau seʼe, pai puli rayanya manawa-nawa painaka napombepeoasika natoʼo, “Nunjaa posokinya seʼi?”
13Paikanya reʼe woʼu tau anu mompasinggiri. Natoʼo ntau seʼe, “Aa, waʼa ntau setu podo mayangu!”
Tuntu i mPeturu
2:14-42
14Nepa mekakore i Peturu sangkani-ngkani pai waʼa ncuro anu sampuyu pai sambaʼa, mompau i Peturu marimbo oni nganganya natoʼoka waʼa ntau sondo, “Ee waʼa ngkasangkompo, waʼa nto Yahudi pai waʼa ngkomi anu maroo-roo ri Yerusale! Ndipedongeka mpodago da kupantotoraka komi. 15Waʼa ntau seʼi bareʼe mayangu ewa anu ndisawanga ndaya, maka seʼi nepa tinti sasio mowuro. 16Paikanya inceʼi roomo ndapapaincani i mPue Ala mampoliu i Nabi Yoeli,
17 #
Yo. 2:28-32
Ndatoʼo i mPue Ala, ‘Ri tempo da kapusa lino,
Yaku da mawai Inosa-Ku ri pura-pura tau.
Waʼa anami anu tuama pai waʼa anami anu weʼa da mampetumbuka komi nuntu anu Kuparataka tau seʼe.
Waʼa ngalitaumi da mangangkita waʼa anu da Kutujuka tau seʼe.
Waʼa ntau tuʼami da mangipi da mampangipika anu da Kutoʼoka tau seʼe.
18Ri waʼa anamayunu-Ku – anu tuama pai anu weʼa –
da Kuwaika Inosa-Ku ri tempo setu.
Tau seʼe da mampetumbu pura-pura anu Kupapaincanika tau seʼe.
19Yaku da mampowia tanda ngkuasa anu ndapojingki ri wawo yangi sindate,
pai ri lino seʼi,
da reʼe daa, apu, gawu pai rangasu.
20Reme bareʼemo da merara,
ogu mbuya da mewali mawaa ewa daa,
ri kabareʼepanya rata Eo i mPue, inceʼemo Eo anu bangke pai meawa setu.
21Ri tempo setu, waʼa ntau anu mekangkabe ri Pue inceʼe anu da ndasorepaka.’
22Ee waʼa ngkasangkompoku waʼa nto Isaraeli! Da nndipedongeka anu da kutoʼo seʼi: I Yesu to Nasare, Sira anu ndapokau i mPue Ala rata ri komi. Inceʼe tongawa ri tanda ngkuasa anu ndapowia i mPue Ala ri oyomi mampoliu i Yesu. Pura-pura setu paka ndiincanimo. 23#Mat. 27:35, Mrk. 15:24, Luk. 23:33, Yoh. 19:18 Silulu pai pepokono-A, i Pue Ala mampakanoto mampepombaika Sira ri komi. Pai ri ndapampembaika seʼe, komi mampepate Sira, ndipapaliuka waʼa ntau majaʼa mampaku Sira ri kaju ndapanggo. 24#Mat. 28:5-6, Mrk. 16:6, Luk. 24:5 Paikanya i Pue Ala mampatuwu muni Sira ungka ri oyo waʼa ntau mate. Sira naomo ngkapate paikanya i Pue Ala malapasaka Sira, maka lawi bareʼe da nakoto ngkuasa ngkapate da mangkuasai mpaliu Sira. 25#Pol. 16:8-11 Kono ka i Yesunya natoʼomo i Daudi,
‘Bareʼe bali-bali kupangkita i Pue ri suaraku;
Sira maaweri yaku da naka neʼe telengko rayaku mau nunjaa ntano anu da mewali.
26Inceʼe puʼunya painaka mawongko kojo rayaku,
ngujuku mampasowa unde pai pebangkei;
suma ngkoroku seʼi mopea
ri kalindo ndaya ri raya dayo.
27Maka bareʼe da ndapapaliu tanoanaku da maroo-roo mpaliu ri kareʼe ntau mate.
Komi bareʼe ndipapaliuka anamayunu-Mi anu mepoʼinaya da magero paya ngkabongo.
28Komi anu roo mantujuka yaku jaya anu da njoʼu ri katuwu anu monco.
Maʼai kojo kawongko ndayaku ua komi lau sangkani-ngkani pai yaku.’
29Ee waʼa ngkasangkompo, ndipedongeka da kupantoʼoka komi ri kayonto-yontonya kono ngkaita i Daudi. Sira matemo pai roomo ndapari dayo; dayoa reʼe ri oyota rantani wawaseʼi. 30#Pol. 132:11, 2 Sem. 7:12-13 Roomo ndapapaincanika i mPue Ala ri Daudi, mojanji pai mosumpa Sira, ndatoʼo ewaseʼi, da reʼe sambaʼa ri oyo mulimu anu da ndapatongko i mPue Ala mewali mokole. Ua i Daudi seʼe sambaʼa nabi naincani janji setu, 31naincani woʼu nunjaa anu da ndapowia i mPue Ala. Mewali siʼa roo mowati kono i Mokole Tadungkadago anu ndajanjimo i mPue Ala, da tuwu muni ungka ri kapate. Natoʼo i Daudi,
‘Sira bareʼe da ndapapaliuka i mPue Ala da rodo ri kareʼe ntau mate;
wata ngkoro-A bareʼe da magero!’
32I Yesu seʼimo anu ndapatuwu muni i mPue Ala ungka ri kapate. Kami pura-pura seʼi mangkitamo ngkalio mami anu mewali setu. 33Sira ndalanti ri potunda anu ndateka pai ndawai i mPue Ala kuasa, nepa mantarima Inosa mPue Ala anu roo ndajanji i mPapa. Pai anu seʼi-seʼi ndidonge pai ndikita inceʼemo Inosa setu, anu ndawaika kami. 34#Pol. 110:1 I Daudi ngkalionya bareʼe mepone ndeki suruga, paikanya natoʼo i Daudi,
‘I Pue mantoʼoka Pueku:
Potundamo ri tondo mokana-Ku,
35rantani Kupapeʼuru pura-pura waʼa iwali-Mu ri Siko!’
36Inceʼe puʼunya painaka pura-pura to Isaraeli da maincani kojo i Yesu anu ndipaku ri kaju ndapanggo setu, i Yesu setumo woʼu anu roomo ndapapewali i mPue Ala, mewali Pue pai Mokole Tadungkadago!”
37Padonge ntau setu totoraka seʼe, mengai-ngai raya ntau seʼe. Meoasi tau seʼe ri Peturu pai ri waʼa ncuro anu ntaninya natoʼo, “Mewali waʼa ngkasangkompo nunjaamo anu da kapowia?”
38Mesono i Peturu natoʼoka tau seʼe, “Ndikajeamo ungka ri waʼa ncalaami. Pai komi da ndariu ri raya Ntoʼo i Yesu Kerisitu da naka neʼe ndakitanaka salaami. Pai komi waʼa ngkasangkompo da mangarata pombai Inosa mPue Ala ungka ri Pue Ala. 39Maka janji i mPue Ala da tilami pai waʼa mulimi pai tila waʼa ntau anu lawa – inceʼemo pura-pura tau anu ndapeboo mPue Ala pueta da maʼi ri Sira.”
40Ewanceʼe pontotoraka i mPeturu ri tau seʼe. Pai maria ngayapa totorakanya anu maʼiowaka tau seʼe da naka melapasaka ungka banca anu majaʼa seʼi anu da ndahuku i mPue Ala. 41Maria tau anu meaya ua potuntu i mPeturu setu, tau seʼe merapi da ndariu. Imba ntau anu meaya ri sandeme setu terangani woʼu tatogo ncowu tau kasondonya. 42Mompari-mpari kojo waʼa ntau seʼe meguru ri waʼa ncuro pai bareʼe bali-bali pompasambaka ntau seʼe. Tau seʼe mangkoni sangkani-ngkani pai mekakai sangkani-ngkani.
Katuwu dompu anu uyu-uyunya ri Yerusale
2:43-47
43Jingki pai maeka raya ntau pura-pura mangkita karia ntanda ngkuasa anu napowia waʼa ncuro setu. 44#Pwn. 4:32-35 Waʼa ntau meaya setu pura-puranya sintuwu kojo, pai nunjaa anu naporeʼe ncambaʼa tau, napoyoweka ntau seʼe sangkani-ngkani. 45Waʼa aga-aga ntau seʼe napobalu, pai olinya natilaka waʼa yununya da napake ri katuwunya, gori anu da napoyoweka ncambaʼa seʼe. 46Bareʼe bali-bali pompasambaka ntau seʼe sandeme-sandeme ri Banua i mPue; pai mangkoni sangkani-ngkani ri kawongko ndaya pai ri kalauka ndaya ri waʼa banua ntau seʼe, 47tau seʼe maunde-unde i Pue Ala pai napokono ntau pura-pura. Sandeme-sandeme imba ntau seʼe kako teranga-rangani maka i Pue Ala mampepombaika ri tau seʼe waʼa ntau anu ntongo ndasorepaka.
Currently Selected:
POTETALA WA'A NCURO 2: LAIPMF
Highlight
Share
Copy
Want to have your highlights saved across all your devices? Sign up or sign in
