POTETALA WA'A NCURO 3
3
Tau pungku ndapakaʼosa
3:1-10
1Ri anu sandeme ndekumo i Peturu pai Yohane ri Banua i mPue, ri tinti tatogo tepile reme ri tempo mpekakai. 2Njairia, ri baa-baa anu ndapapotoʼo “Baa-baa Madolidi” reʼe sambaʼa tuama anu pungku ungka ri pampoana. Sandeme-sandeme tau setu ndakeni njairia da merapi-rapi ri waʼa ntau anu da mesua ri Banua i mPue. 3Pangkita ntau setu i Peturu pai Yohane da mesua ri Banua i mPue, merapimo siʼa da naka nawai ntau seʼe bara nunjaamo seʼe ri siʼa. 4Nakomatasi ntau seʼe tau pungku setu natoʼo i mPeturu, “Patomatamo kami seʼi!” 5Metingara tau pungku setu napatomata tau seʼe napomata-mata da marata bara nunjaa ungka ri tau seʼe. 6Paikanya mompau i Peturu ri siʼa natoʼo, “Yaku beliu-liu reʼe doiku. Paikanya nunjaa anu reʼe ri yaku, inceʼe anu da kuwaika siko: Pai kuasa i Yesu Kerisitu to Nasare setu, pelinjamo!” 7Nepa nakekeni i mPeturu pale mokana ntau pungku setu, napapeoko. Liu-liu naepe marosomo witinya pai wuku yalinya. 8Mesombulaka siʼa toamo mekakore, melinjamo wainjoʼu waimaʼi. Nepa mesua siʼa ri Banua i mPue sangkani-ngkani pai i Peturu pai i Yohane. Seʼi melinja seʼi mesombu-sombulaka naunde i Pue Ala. 9Pura-pura tau mangkita pelinjanya pai paunde-undenya i Pue Ala. 10Nepa naendo ntau seʼe kasiʼanyamo tau anu biasa merapi-rapi motunda-tunda ri “Boboka Madolidi” ri Banua i mPue. Jingki pai benge raya ntau seʼe mangkita nunjaa anu mewali ri siʼa.
Tuntu i mPeturu ri raya Banua i mPue
3:11-26
11Nalulu mpaliu ntau setu i Peturu pai i Yohane. Pai kajela ntau tatogo setu ri tambale anu ndatoʼo “Tambale i Salomo”, pura-pura tau rata maowuni tau seʼe ua kabenge ndaya ntau seʼe. 12Pangkita i mPeturu tau sondo setu, mompau siʼa ri tau seʼe natoʼo, “Ee komi waʼa nto Isaraeli, wenu painaka ndipojingki anu mewali seʼi? Wenu painaka ndiloto-lotosi kami? Ara ndisarumaka reʼe kuasa mami painaka melinja tau seʼi bara ua pepoʼinaya mami ri Pue Ala? 13#Pa. 3:15 I Pue Ala anu ndapanyomba i Burahima, i Saki, i Yako, Pue Ala ntau tuʼata, Pue Ala setu anu roo mampapeawa Ana-A inceʼemo i Yesu anu roomo ndipepombaika ri pale ntau anu makuasa, pai anu ndipombeewaka ri suara i mPilatu, ri napampepalika i mPilatu jaya da napalapa Sira. 14#Mat. 27:15-23, Mrk. 15:6-14, Luk. 23:13-23, Yoh. 19:12-15 Sira magali pai mayoa paikanya ndiewa Sira pai ndiriso i Pilatu da napalapaka komi sambaʼa topopepate. 15Komi anu mampepate Sira, ntanoka Siramo puʼu ngkatuwu ntau pura-pura. Pai i Pue Ala anu mampatuwu muni Sira ungka ri kapate. Kami ngkalio mami mancabi pewalinya setu. 16Ee waʼa ngkasangkompo ndikitamo pai ndisabimo nunjaa anu mewali ri tau pungku seʼi. Siʼa marosomo pai osamo ua siʼa meaya ri Yesu pai kuasa-A. Ua peaya ri Yesu painaka osamo ri suara waʼa ngkasangkompo pura-pura.
17Waʼa ngkasangkompo pura-pura! Seʼi-seʼi kuincanimo, nunjaa anu ndipowia pai anu napowia waʼa ntadulakomi ri Yesu, inceʼe mopuʼu ungka ri kabareʼenya ndiincani nunjaa anu ndipowiamo setu. 18Ua kaewanceʼenya, kobanganimo songka i mPue Ala piamo mampoliu waʼa nabi, kono i Mokole Tadungkadago anu ndajanji setu, Sira sangaya-ngaya da maepe kapari. 19Inceʼe puʼunya waʼa ngkasangkompo ndikajeamo ungka ri waʼa ncalaami, pai ndipewalilimo ri Pue Ala, da naka bareʼemo ndakitanaka salaami. 20I Pue da rata ri komi pai komi da marata kalindo ndaya anu monco. Pai i Pue da mampokau i Yesu ri komi, maka Sira anu roo ndapakanoto i mPue Ala mewali Mokole Tadungkadago tilami. 21Sira ndate ri suruga rantani pura-puranya ndapaka dawoʼu i mPue Ala, ewa pantoʼo i mPue Ala anu naparata waʼa nabia ungka ipiamo. 22#Paw. 18:15, 18 Reʼe napantoʼo i Musa, ‘I Pue Ala puemu, da mampokau ri komi sambaʼa nabi ungka ri bancamu ngkaliomu, ewa pampokau-A yaku. Sangaya-ngaya da dipedongeka pura-pura nunjaa anu natoʼo nabi setu ri komi. 23#Paw. 18:19 Tau anu bareʼe mampedongeka nunjaa anu natoʼo nabi setu, tau setu da ndairi ungka ri oyo ntau i mPue Ala pai da ndagero.’ 24Waʼa nabi anu roomo mamparata bambari ungka ri Pue Ala, montepuʼu ungka ri Nabi Semueli pai waʼa nabi ntaninya anu mantonda siʼa, pura-pura mampobambarika kono tempo wawaseʼi. 25#Pal. 22:18 Waʼa janji ungka ri Pue Ala anu naparata waʼa nabi inceʼe tilami ee waʼa ngkasangkompo. Ri janji anu ndapareʼe i mPue Ala pai tau piamomi, ndatoʼo i mPue Ala ri Burahima ewaseʼi, ‘Ungka ri mulimu Yaku da mangadonco mpengaya-ngaya banca ri lino.’ Janji setu da tilami woʼu. 26Inceʼe puʼunya i Pue Ala mampilisi Ana-A, nepa ndapokau maʼi ri komi riunya, da naka Sira madonco komi. Popadonco inceʼemo da mampapewali komi da majea pai da ndipampalaika engko anu majaʼa ri raya ngkatuwumi.”
Currently Selected:
POTETALA WA'A NCURO 3: LAIPMF
Highlight
Share
Copy
Want to have your highlights saved across all your devices? Sign up or sign in
