YOHANE 10
10
Nuntu mporapa bimba pai topongkambinya
10:1-6
1“Monco Kutoʼoka komi seʼi: Tau anu mesua ri bonco bimba banya mojaya ri boboka, paikanya mepone pai melumbu ri waya; tau setu to pelima pai to perampa. 2Paikanya tau anu mesua ri boboka, inceʼemo topongkambi bimba. 3Topojaga bonco da malokaka siʼa boboka, pai da napedongeka waʼa bimba oni nganganya ane napeboo nteasambaʼa ri toʼonya pai napoyunu mesuwu ungka ri bonco. 4Ane mesuwumo waʼa bimba setu ungka ri raya bonco, da nalulumo topongkambi setu maka naincani mampedongeka oni nganganya. 5Bareʼe da napokono waʼa bimba setu malulu tau ntaninya, paikanya ane tau ntaninya da napalaika maka bareʼe naincani oni nganganya.”
6Anu ndapau i Yesu inceʼe nuntu mporapa, painaka bareʼe narata ndaya ntau seʼe katudu-Nya.
I Yesu topongkambi anu monco
10:7-21
7Ndatoʼo woʼu i Yesu, “Monco Kutoʼoka komi seʼi: Yakumo boboka mpesua bimba. 8Tau anu jela mampesindiuka Yaku inceʼe to pelima pai toperampa, paikanya bareʼe napokono waʼa bimba mampedongeka oni nganga ntau seʼe. 9Yakumo boboka. Isema anu mesua mampoliu Yaku inceʼe da morasi; siʼa da mesua mesuwu pai da marata pangkoni anu gana-gana. 10Topelima podo jela melima, mepepate pai monjaʼati. Paikanya Yaku anu Kukamaʼika da mampatuwu tau pai da naka gana anu naka tuwuka.
11Yakumo topongkambi anu manoto. Topongkambi anu monco bareʼe mampepurungi inosanya da mangkampai waʼa bimbanya. 12Tau anu ndasaro banya topongkambi pai banya inceʼe tumpu waʼa bimba setu, ane nakita jela sarigala da molonco napalaika waʼa bimba setu. Waʼa bimba setu da nasoko ncarigala pai yabinya da tewuragamo. 13Tau ndasaro setu molonco, maka siʼa motetala ua mampepali saronya. Bareʼe da napokapuru waʼa bimba setu. 14-15#Mat. 11:27, Luk. 10:22 Yakumo topongkambi anu monco, ewa pangaincani i mPapa Yaku ewanceʼe woʼu kupangaincani i Papa pai waʼa bimba-Ku woʼu mangaincani Yaku. Bareʼe kupepurungi inosa-Ku ua maendo katuwu waʼa bimba-Ku.
16Ntongo reʼepa waʼa bimba-Ku anu bareʼe sayunu-yunu pai waʼa bimba anu kukambi seʼi tau seʼe woʼu da kukambi pai da napedongeka ntau seʼe oni nganga-Ku. Tau seʼe pura-pura da mewali pai sambaʼaja topongkambinya.
17Yaku ndapotowe i mPapa maka Kupepombaika inosa-Ku, da kupawali ntarima muni. 18Bereʼe tau anu mangkoto da mangarampa ungka ri Yaku. Sangadi Yaku ngkalioku anu mampepombaika. Yaku makuasa mampakanoto, kuwai pai da kutima muni. Inceʼemo tetalaku anu ndapapakoyoka i mPapa ri Yaku.”
19Ua pompau i Yesu ewanceʼe, waʼa nto Yahudi montepuʼumo mopaiso. 20Maria tau mantoʼo, “Siʼa napesuaki inosa nceta! Siʼa wando! Nunjaa yowenya da ndipedongeka pau-Nya?”
21Paikanya reʼe woʼu anu mangantoʼo, “Tau anu napesuaki inosa nceta bareʼe da mompau ewancetu! Ara da nakoto nceta mampakayosa mata ntau buta?”
I Yesu bareʼe natarima nto Yahudi
10:22-42
22Ri tempo waʼa ntau tepasambaka ri Yerusale mamposusaka karoonya ndawali mpakoroka Banua i mPue, tempo setu sindara mpouja. 23Sindara i Yesu melinja-linja ri tambale i Ncalomo ri Banua i mPue, 24setumo waʼa nto Yahudi malimbu Sira natoʼo, “Sangkuja ngkasae woʼu da nupangalinguni kami? Toʼoka kami mpayoa bara monco kojo siko seʼi Mokole Tadungkadago.”
25Mesono i Yesu, “Roomo Kutoʼoka komi paikanya bareʼe ndiaya. Waʼa ntetala anu kuwianaka ri toʼo mPapa-Ku, inceʼe anu mampakanoto kaʼisemanya Yaku. 26Bareʼe ndiaya maka komi bareʼe tesua ri dompu waʼa bimba-Ku. 27Ane waʼa bimba-Ku napokono mampedongeka oni nganga-Ku. Kuincani tau seʼe pai tau seʼe da mangalulu Yaku. 28Tau seʼe kupantaika katuwu anu monco pai bareʼe da reʼe kapusanya, pai tau seʼe bareʼe da magero rantani masae-sae. Bereʼe mau sambaʼa tau anu da mangangkoto marampa ungka ri pale-Ku. 29Tau seʼe ndapepombaika mPapa-Ku ri Yaku, Sira anu ri wawo ngkakuasa-A. Pai bereʼe mau sambaʼa tau anu mangkoto da mangarampa ungka ri pale-A. 30Yaku pai i Papa sambaʼa-mbaʼa.”
31Masengke woʼu raya waʼa nto Yahudi, natima ntau seʼe watu da nawunuka i Yesu. 32Paikanya ndatoʼo i Yesu ri tau seʼe, “Ndikitamo, maria anu madago roo Kupowia anu ndapepokauka i mPapa ri Yaku. Ri pura-pura anu Kupowia setu, anu mbeʼinya anu ndiposengke painaka da ndiwunu mbatu Yaku?”
33 #
Tad. 24:16
Mesono waʼa nto Yahudi setu, “Banya waʼa mpowiamu anu madago setu painaka da kawunu mbatu Siko, paikanya ua Siko mamposari i Pue Ala. Siko tolino, da nupasiwia koro-Mu pai i Pue Ala?”
34 #
Pol. 82:6
Mesono i Yesu, “Ara banya lau ndaʼuki ri Sura mPadikami, ndatoʼo i mPue Ala, ‘Komi inceʼemo lamoa?’ 35Manoto tapaincani pura-pura anu ndatoʼo ri Sura Magali sangaya-ngaya da mewali. Mewali ane i Pue Ala mantoʼo, lamoa waʼa ntau anu mantarima nuntu-A, 36wenu pai ndipantoʼo Yaku mampetikodi Pue Ala, ua Kupangantoʼo Yaku Ana mPue Ala? Ntanoka Yaku ndapilisi mPapa-Ku ndapokau ri lino. 37Ane rapanya bareʼe Kupowia tetala anu ndapepokauka i mPapa ri Yaku, neʼemo ndiaya Yaku. 38Paikanya ua Kuwianaka, da ndiayamo anu roo Kuwianaka setu, mau bareʼe ndipokono maaya Yaku. Ane ewanceʼe da ndiincanimo pai da ndirata ndayamo ka-Yakunya pai i Papa sambaʼa-mbaʼa, pai Yaku todo ri kasambaʼa-mbaʼa pai Papa.”
39Napepali woʼu ntau seʼe jaya da napaleʼo mampepate i Yesu, paikanya bareʼe naleʼo ntau seʼe.
40 #
Yoh. 1:28
Mewalili i Yesu ri sambote ngKoro Yarade, ri kareʼe mpopariu i Yohane owi, maroo-roo njairia. 41Maria tau anu rata madadu Sira. Maka natoʼo ntau seʼe, “I Yohane bereʼe tanda ngkuasa natuju, paikanya nunjaa anu natoʼo kono tau seʼi pura-puranya monco.” 42Maria tau anu njairia mangaaya i Yesu.
Currently Selected:
YOHANE 10: LAIPMF
Highlight
Share
Copy
Want to have your highlights saved across all your devices? Sign up or sign in
