YOHANE 11
11
Kapate i Lasaru
11:1-16
1 #
Luk. 10:38-39
Sambaʼa tau anu mampatoʼo i Lasaru, siʼa maroo-roo sangkani-ngkani pai kasangkomponya i Maria pai i Marita ri lipu Betania. 2#Yoh. 12:3 I Maria, siʼamo weʼa anu mabubu lana wongi ri witi i Yesu nepa napalisika wuyuanya. Mewali ri anu sandeme majuʼamo kasangkomponya i Lasaru. 3Mangkita kajuʼanya, mepatuumo tau seʼe radua ri Yesu natoʼo, “Pue kasangkompo mami anu ndipomawo seʼi-seʼi majuʼanya.”
4Butu ndadonge i Yesu patuu setu, ndatoʼo, “Oo juʼanya setu bareʼepa da napopate.” Inceʼe podo da naka bangke ngkatetoʼo mPue Ala pai da bangke woʼu ngkatetoʼo i Ana Ala.
5Lawi ndapomawo kojo i Yesu, i Marita, i Maria pai i Lasaru. 6Paikanya ri padonge i Yesu kajuʼa i Lasaru, lawi ndaoakamo maroo-roopa radua ndeme. 7Pusamo radua ndeme nepa ndatoʼoka waʼa anaguru-A, “Maʼimo takanjoʼu ri Yudea.”
8Mesono tau seʼe, “Aa Guru, nepa roo mpinca komi da nataso mbatu nto Yahudi njairia, seʼi da njoʼu woʼu?”
9Ndatoʼo i Yesu, “Ara bareʼe ndiincani reme merara sandeme-sandeme sampuyu pai radua jaa? Tau anu melinja ri ndeme bareʼe da tosube, maka nakita reme lino seʼi. 10Paikanya tau anu melinja ri wengi lawi da tosube maka bereʼe reme ri siʼa.” 11Ewancetumo pantoʼo i Yesu. Nepa Ndatoʼo woʼu, “Baleta i Lasaru tekayoremo, paikanya Yaku da njoʼu malike siʼa.”
12Natoʼo waʼa anaguru-A, “Pue, ane podo tekayore i Lasaru sangaya-ngaya daʼosa muni.”
13Ntanoka tinako ndaya i Yesu, i Lasaru matemo! Nasarumaka anaguru-A bara podo yore kojo i Lasaru. 14Inceʼe pai ndapantoʼo mpayoa i Yesu ri tau seʼe, “I Lasaru matemo! 15Paikanya sakodi ngkadago yau, ua Yaku bareʼe njau njairia, inceʼe anu madago mpodago ri komi, da naka ndiaya kojo Yaku seʼi, ndikaligamo tapadadu i Lasaru.”
16I Toma anu karua ntoʼonya “I Morapi”, mompau ri waʼa yununya waʼa anaguru i Yesu natoʼo, “Ndikamaʼimo takanjoʼu naka mate kita sangkani-ngkani pai Sira!”
Anu mampatuwu muni pai anu mawai katuwu
11:17-27
17Kajela i Yesu njairia, i Lasaru aopo mbengimo ri raya dayo. 18Lipu Betania mombemosu pai kota Yerusale, tempo-temponya tatogo kilo meteri kalawanya. 19Mariamo to Yahudi anu maĘĽi madadu i Marita pai i Maria da mampalindo raya ntau seĘĽe ua kamate ngkasangkomponya.
20Butu nadonge i Marita kajelamo i Yesu, mesuwumo siʼa njoʼu mantomu Sira, ja i Maria njau ri banua. 21Natoʼo i Marita ri Yesu, “Pue, ane da reʼi komi sindara ngkanjuʼa ngkasangkompoku, manoto bareʼe da mate siʼa. 22Mau ewanceʼemo, paikanya seʼi kuaya kojo bara nunjaa ntano anu ndiperapi ri Pue Ala, sangaya-ngaya da ndabangani.”
23Ndatoʼo i Yesu ri Marita, “Marita, kasangkompomu da membangu muni!”
24Mesono i Marita natoʼo, “Kuincani i Lasaru da tuwu muni ane ndapapembangumo tau mate ri Eo Kiama.”
25Ndatoʼo i Yesu ri Marita, “Yakumo seʼi puʼu ngkatuwu anu mampapembangu tau anu matemo. Pai tau anu maaya Yaku mau matemo siʼa da tuwu. 26Pai tau anu tuwupa pai meaya ri Yaku, siʼa bareʼemo da mate. Marita! Nuaya anu Kutoʼo seʼi?”
27Mesono i Marita, “Pue, kuaya ka-Kominya Pue Ana i mPue Ala, Mokole Tadungkadago anu tudumo ri lino seʼi.”
Potumangi i Yesu
11:28-37
28Roo mompau ewanceʼe njoʼumo i Marita mampeboo kasangkomponya i Maria, najawaka mantoʼo, “I Guru jelamo, siko ndapeoasi.” 29Padongenya inceʼe, meoko i Maria njoʼu nadadu i Yesu. 30Sindara setu i Yesu bareʼepa mesua ri raya lipu, Sira ntongo njaupa ri kareʼe mpompasimbaju-A pai i Marita. 31Pangkita waʼa nto Yahudi anu mampalindo raya i Maria peokonya ncoroba pai mesuwu ungka ri banua; naluluwaka ntau seʼe, nasarumaka ntau seʼe, i Maria da njoʼu motumangi ri dayo.
32Ratamo i Maria ri kareʼe i Yesu, ri pangkitanya Sira, mombukotu siʼa ri suara-A natoʼo, “Ane da reʼi komi Pue ri sindara ngkajuʼa ngkasangkompoku, manoto bareʼe da mate siʼa.”
33Pangkita i Yesu potumangi i Maria, pai waʼa ntau anu sangkani-ngkani pai siʼa seʼe motumangi, mapari raya i Yesu pai merata puru ndaya-A. 34Ndapeoasi i Yesu ri tau seʼe, “Ri mbeʼi ndipadayo siʼa?”
Mesono tau seʼe, “Ndikamaʼimo ndipeole, Pue.”
35“Motumangimo i Yesu.” 36Natoʼo nto Yahudi anu njau njairia, “Peole, maʼai kojo pampomawonya i Lasaru!”
37Paikanya reʼe ri oyo ntau seʼe anu mantoʼo, “Sira seʼi anu mampakayosa mata ntau buta, wenu painaka bareʼe nakoto mampetangani naka neʼe mate i Lasaru?”
I Yesu mampatuwu muni i Lasaru
11:38-44
38MaĘĽai kapari ndaya i Yesu, njoĘĽumo Sira ri dayo. Dayo setu inceĘĽemo sambaĘĽa wayau anu ndapaloka watu bangke.
39Ndatoʼo i Yesu, “Ndienggonaka watu setu.” Mesono i Marita, “Paikanya Pue, aopo ndememo padayo i Lasaru, majaʼamo da kawaunya!”
40Ndatoʼo i Yesu, “Marita, ara banya roo Kutoʼoka siko: Ane nuaya Yaku, da nukita ewambeʼi kabangke ngkuasa i mPue Ala!” 41Karoonya ndawaenggo watu palo dayo setu, metingara ri yangi i Yesu ndatoʼo, “Tarima kase Papa maka ndipedongeka perapi-Ku. 42Lawi Kuincani da ndipampedongeka Yaku, paikanya inceʼi Kuperapi ri komi tila waʼa ntau seʼi: da napaaya waʼa ntau seʼe ka-Kominya anu mampokau Yaku.” 43Roo mompau ewanceʼe, meboo i Yesu marimbo oni nganga-A, “Lasaru, pesuwu!” 44Mesuwumo i Lasaru anu matemo setu, palenya pai witinya ntongo tewewesi pai ayapa, pai lionya ntongo ndatalambiajeni, ndatoʼo woʼu i Yesu ri waʼa ntau anu njau njairia, “Ndiledesi sompunya naka dago pelinjanya.”
Pogombo da mampepate i Yesu
11:45-57
(Mat. 26:1-5, Mrk. 14:1-2, Luk. 22:1-2)
45Maria ri oyo waʼa nto Yahudi anu madadu i Marita, mangkitamo anu ndapowia i Yesu setu meayamo ri Sira. 46Paikanya reʼe bara tesangkuja ri oyo ntau seʼe anu njoʼu mampetumbuka to Parisi nunjaa anu roo ndapowia i Yesu. 47Inceʼe painaka waʼa nto Parisi pai waʼa ntadulako ntadu mpanyomba mampareʼe pogombo pai Majalisi Agama. Natoʼo ntau seʼe, “Nunjaa anu sangaya-ngaya da tapowia? Maria tanda ngkuasa anu napowia ntau seʼi! 48Ane tapapaliuka siʼa ewanceʼi mpaliu pura-pura tau da mangaaya siʼa. Pai ripurinya da maʼi topoparenta nto Roma da nagero Banua i mPue pai samalele bancata!”
49Sambaʼa ri oyo ntau seʼe anu mampotoʼo i Kayapa, anu mewali Tadu mPanyomba Bangke ri tempo setu, mompau ri tau seʼe natoʼo, “Komi seʼi bareʼe ndiincani raoa! 50Komi seʼi bareʼe rata ponawa-nawami njairia, ara bareʼe ndirata ndaya da naka neʼe marugi waʼa ntau sondo, moruana sambaʼa tau mate pai neʼe tau salemba anu maropu!” 51Kamonconya pompau i ngKayapa ewanceʼe banya ua ponawa-nawanya ngkalionya. Paikanya ua kasiʼanya Tadu mPanyomba Bangke, mowatimo siʼa kono da kapate i Yesu tila lemba nto Yahudi. 52Pai banya podo tila nto Yahudi paikanya da mampasambaka pai da mampasambaʼa-mbaʼa ana i mPue Ala anu ri mbeʼi-mbeʼi kareʼenya.
53MontepuĘĽu ungka lairia sintuwumo raya waĘĽa ntadulako nto Yahudi da mampepate i Yesu. 54InceĘĽe painaka i Yesu bareĘĽemo motuntu ri suara ntau sondo ri oyo nto Yahudi, Malai Sira ungka ri tana Yudea njoĘĽu ri kota, toĘĽonya Eparai anu mosu ri pada bone maroo-roo sangkani-ngkani pai waĘĽa anaguru-A njairia.
55Tempo setu mosumo da Posusa Pasa nto Yahudi. Maria tau anu ungka ri lipu-lipu njoʼu ri Yerusale da mampakagali koronya ri kabareʼepanya rata ri eo mposusa. 56Napepali ntau seʼe i Yesu ri oyo ntau anu mompasambaka ri Banua i mPue, napombewenu-wenuka ntau seʼe, natoʼo ewambeʼi parata ndayamu? Bara bareʼe da maʼi siʼa ri posusa seʼi? 57Pantoʼo ntau seʼe ewanceʼe, maka reʼe songka ungka ri waʼa ntadulako ntadu mpanyomba pai to Parisi anu mantoʼo, “Isema anu maincani ri mbeʼi kareʼe i Yesu da napetumbuka kami da naka ndasoko!”
Currently Selected:
YOHANE 11: LAIPMF
Highlight
Share
Copy
Want to have your highlights saved across all your devices? Sign up or sign in
