YOHANE 14
14
I Yesu inceʼemo jaya da jela ri Papa
14:1-14
1Ndatoʼo i Yesu ri anaguru-A, “Neʼe boi berodo rayami, da ndiayamo i Pue Ala, pai da ndiayamo woʼu Yaku. 2Ri banua mPapa-Ku maria kareʼe mpeari. Yaku mesindiu da mampatokaka komi da kareʼemi. Bareʼe da Kutoʼoka komi ewanceʼe ane bemonco. 3Ane malaimo Yaku mampatokaka komi da kareʼemi, nepa da maʼi muni Yaku mantomu komi, da naka ri mbeʼi kareʼe-Ku njairia seʼe da kareʼemi. 4Pai ri mbeʼi da Kanjoʼu-Ku ndiincanimo jaya.”
5Mompau i Toma natoʼo, “Pue, kami bareʼe kaincani ri mbeʼi da kanjoʼu-Mi, ewambeʼi da kapaincani jayanya?”
6Mesono i Yesu ndatoʼo, “Yakumo seʼi jaya ndipaincani pepokono mPue Ala, pai da ndiparata katuwu. Bedareʼe tau mangkoto jela ri Papa ane bareʼe mampojaya Yaku. 7Ane ndiincanimo Yaku, ndiincani woʼu Papa-Ku. Seʼi-seʼi ndiincanimo Sira, pai ndikitamo Sira.”
8Natoʼo i mPilipu ri Sira, “Pue, nditujuka kami i Papa, inceʼe da gana ri kami.”
9Mesono i Yesu ndatoʼo, “Ara masaesa karoo-roo-Ku ri oyomi pai bareʼe nuincani Yaku, ee Pilipu? Tau anu mangkitamo Yaku, nakitamo i Papa. Wenu pai nupantoʼo da, ‘nditujuka kami i Papa’? 10Pilipu! Ara bareʼe nuaya ka-Yakunya sambaʼa-mbaʼa pai i Papa, pai i Papa sambaʼa-mbaʼa pai Yaku. Nunjaa anu Kutoʼoka siko banya pepokono-Ku ngkalio-Ku. I Papa anu sambaʼa-mbaʼa pai Yaku, Siramo anu mawianaka pura-puranya setu. 11Da nuayamo Yaku. Maka Yaku sambaʼa-mbaʼa pai i Papa pai i Papa sambaʼa-mbaʼa pai Yaku. Ane banya ewanceʼe da ndiayamo Yaku ua waʼa ntetala anu roomo Kuwianaka. 12Monco kojo anu kutoʼo seʼi: Tau anu meaya ri Yaku, da mawianaka tetala anu roo Kuwianaka – pagonya da nakoto mawianaka tetala anu meruu pai inceʼe – maka Yaku da ndeku ri Papa. 13Pai nunjaa ntano anu ndiperapi ri toʼo-Ku, inceʼe da Kupowiaka komi, da naka i Papa ndapapeawa mampoliu i Ana. 14Nunjaa ntano anu ndiperapi ri toʼo-Ku, inceʼe da Kupowia.”
I Yesu majanji da karata Inosa mPue Ala
14:15-31
15“Ane ndipotowe Yaku, da ndipowia waʼa anu Kusongkaka komi. 16Da Kuperapi ri Papa, da naka ndawaika komi Topompelae anu ntaninya, anu da todo maroo-roo mpaliu pai komi. 17Siʼamo Inosa mPue Ala anu da mantotorakaka komi pepokono mPue Ala. Bareʼe da natarima lino seʼi Sira maka bareʼe nakita pai bareʼe naincani Sira, maka Sira da maroo-roo sangkani-ngkani pai komi pai da sambaʼa-mbaʼa pai komi.
18Bareʼe da Kupalaika komi ewa ana ilu, Yaku da mewalili ri komi. 19Bareʼemo masae Yaku bareʼemo da nakita lino seʼi, paikanya komi da ndikita Yaku. Pai ua Yaku tuwu, komi woʼu da tuwu. 20Ane ratamo eo setu, nepa da ndiincani ka-Yakunya sambaʼa-mbaʼa pai i Papa, komi sambaʼa-mbaʼa pai Yaku pai Yaku sambaʼa-mbaʼa pai komi.
21Tau anu mamporewu pai malulu waʼa songka-Ku pai mawianaka, inceʼemo anu mampotowe Yaku. Papa da mampotowe tau anu mampotowe Yaku. Yaku woʼu da mampotowe tau setu. Pai da mampatongawa koro-Ku ri siʼa.”
22I Yudasi (banya i Yudasi to Karioti) meoasi ri Yesu natoʼo, “Pue, wenu painaka Komi da mampatongawa koro-Mi ri kami, banya ndipatongawa ri lino?”
23Mesono i Yesu, “Tau anu mampotowe Yaku, da nalulu totoraka-Ku. Pai siʼa da ndapotowe i mPapa. Yaku pai Papa da maʼi maroo-roo sangkani-ngkani pai siʼa. 24Tau anu bareʼe mampotowe Yaku, bareʼe woʼu da nalulu totoraka-Ku. Waʼa ntotoraka anu ndidongemo, banya ungka ri Yaku paikanya ungka ri Papa anu mampokau Yaku.
25Pura-pura seʼi Kutoʼoka komi ri sindara Yaku sangkani-ngkani pai kami. 26Paikanya Inosa mPue Ala, Topompelae anu da ndapokau i mPapa ri toʼo-Ku, Siramo anu da mantotoraka komi pai mampatikaendo ri pura-pura anu roo Kutoʼoka komi.
27Kalindo ndaya Kudikaka komi, kalindo ndaya-Ku ngkalio-Ku anu Kuwaika komi. Anu da Kuwaika komi banya ewa anu nawai lino seʼi ri komi. Pakaroso rayami neʼe maeka. 28Ndidongemo anu Kutoʼoka komi, ‘Yaku da malai paikanya Yaku da maʼi muni ri komi’. Ane ndipotowe Yaku, da mawongko rayami ane ronga ndeku Yaku ri Papa, maka i Papa anu meruu mpeawa-A painaka Yaku. 29Inceʼi Kutoʼoka komi, ri kabareʼepanya tepewali pura-pura, da naka ane tepewalimo, nepa da ndiaya. 30Bareʼemo da maria pasimbaju-Ku ri komi, maka ratamo temponya da kajela ntadulako lino. Paikanya siʼa bereʼe kuasanya ri koro-Ku. 31Paikanya pura-puranya setu da tepewali da naka naincani lino seʼi ka-Yakunya mampotowe i Papa pai ka-Yakunya anu mawianaka pura-pura anu ndapokauka Yaku.
Ndikaligamo tapalai ungka ireʼi!”
Currently Selected:
YOHANE 14: LAIPMF
Highlight
Share
Copy
Want to have your highlights saved across all your devices? Sign up or sign in
