LUKASI 10
10
I Yesu mampokau pitumpuyu anaguru-A
10:1-12
1Roo setu ndapilisi woʼu i Yesu anaguru-A pitumpuyu tau kasondonya. Tau seʼe ndapokau teraradua tau, mamporiuka Sira njoʼu ri waʼa ngkota pai lipu anu da ndakanjoʼu. 2#Mat. 9:37-38 Ndatoʼo i Yesu ri tau seʼe, “Mariapa anu da ndapota paikanya pongoli gaga tau anu momota. Inceʼe puʼunya painaka ndipekakai ri tumpu mpomota da naka ndapokau tau njoʼu ri pomota-Nya. 3#Mat. 10:16 Ndipalaimo, ndiendo-endoka, komi Kupokau ewa bimba njoʼu ri oyo ncerigala. 4#Mat. 10:7-14, Mrk. 6:8-11, Luk. 9:3-5 Neʼe ndikeni dompe bara watutu ntau merapi-rapi, bara talupa, pai neʼe meʼonto komi ri yae njaya metabea ri tau. 5Ane mesua komi ri waʼa banua, riunya da nditoʼo, ‘Pombai pai karodo ndaya ri raya banua seʼi.’ 6Ane ri banua setu lau tau anu mampokono ndadonco i mPue, petabeami setu da rodomo njairia, paikanya ane bereʼe, petabeami seʼe da mewalili ri komi. 7#1 Kor. 9:14, 1 Tim. 5:18 Ndikaroo-roomo ri banua setu. Da nditarima nunjaa anu napakonika komi, maka tau anu motetala sangaya-ngaya da marata saronya. Neʼe melimba-limba kareʼemi, ungka ri banua sambaʼa njoʼu ri banua sambaʼanya. 8Ane jela komi ri lipu anu mancabe mpodago komi, da ndisabemo nunjaa ntano anu napakonika komi. 9Pakaʼosamo waʼa ntau majuʼa ri lipu setu pai pobambarika ri waʼa ntau njairia, ‘Bareʼemo masae i Pue Ala da montepuʼumo moparentaa ewa sambaʼa Mokole ri oyomi.’ 10#Pwn. 13:51 Paikanya ane jela ri sambaʼa lipu anu bareʼe napokono mantarima komi, ndipesuwumo njoʼu ri jaya nepa nditoʼo, 11‘Sako awu ungka ri lipumi anu metaka ri payaʼa mami katanongkosika komi, paikanya da ndipaincani mosumo temponya i Pue Ala da moparenta ewa sambaʼa Mokole ri komi!’ 12#Pal. 19:24-28, Mat. 10:15, 11:24 Kutoʼoka komi, ri eo kiama, mangaʼapa huku Sodomo pai huku lipu setu!”
Waʼa ngkota anu bareʼe meaya
10:13-16
(Mat. 11:20-24)
13 #
Yes. 23:1-18, Yeh. 26:1–28:26, Yo. 3:4-8, Am. 1:9-10, Sak. 9:2-4 “Marugimo siko ee Korasi! Pai marugimo siko ee Besaida! Ane rapanya waʼa ntanda ngkuasa anu roo Kupowia ri siko, da mewalimo owi ri Tiru pai Sidoni, manoto masaemo da kajeanya, da motunda ri awu pai da mamporengko karu. 14Ri eo kiama sarupa kabareʼenya ndakitanaka i mPue Ala waʼa nto Tiru pai Sidoni, painaka komi. 15#Yes. 14:13-15 Pai siko Kapenau! Nusarumaka siko bara da ndatanderaka sawi ri yangi? Bareʼe! Siko da ndatendeka ri naraka!”
16 #
Mat. 10:40, Mrk. 9:37, Luk. 9:48, Yoh. 13:20 Ndatoʼo i Yesu ri anagurua, “Tau anu mampedongeka komi posokinya mampedongeka Yaku. Pai tau anu bareʼe mantarima komi posokinya bareʼe mantarima Yaku. Pai tau anu bareʼe mantarima Yaku posokinya bareʼe mantarima Sira anu mampokau Yaku!”
Pewalili anaguru-A anu pitumpuyu
10:17-20
17Mewalilimo anaguru anu pitumpuyu setu, maʼai kojo kawongko ndayanya, natoʼo, “Pue, sako waʼa i majaʼa meʼuru ri kami ane kasongka tau seʼe ua toʼo-Mi.”
18Mesono i Yesu ndatoʼo, “Kukita i majaʼa manawu ewa kila ungka ri yangi. 19#Pol. 91:13 Da ndipaincani, roo Kuwaika komi kuasa da naka ndikoto maijaki ule pai taʼanganga, pai da manangi kuasa iwali, bedareʼe anu mangkoto majaʼati komi. 20Paikanya neʼe ndipokawongko ua meʼurumo waʼa ngkuasa inosa majaʼa ri komi, paikanya anu da ndipokawongko inceʼemo toʼomi teʼukimo ri suruga.”
Kawongko ndaya i Yesu
10:21-24
(Mat. 11:25-27, 13:16-17)
21Sindara setu seʼe mawongko raya i Yesu ua naponinika Inosa mPue Ala, ndatoʼo i Yesu, “Papa, Pue yangi pai lino! Tarima kase Kuparata ri suara-Mi, maka pura-puranya seʼi ndisambunika ri waʼa ntau loʼe pai moua rayanya, paikanya ndipatongawa ri waʼa ntau anu begana paincaninya. Inceʼemo anu mampakawongko raya-Mi.
22 #
Yoh. 3:35, 10:15 Pura-pura ndapepombaikamo i mPapa ri Yaku. Bereʼe mau sambaʼa tau maincani i Ana, waʼanya i Papa. Bereʼe woʼu anu maincani i Papa, waʼanya i Ana; pai waʼa ntau anu napapaincanika i Ana kakononya i Papa.”
23Nepa meeli Sira ri waʼa anaguru-A ndatoʼo, “Morasimo komi maka ndikitamo nunjaa anu ndikita seʼi. 24Maka ndiendo: Maria tau, waʼa nabi pai datu anu da rayanya mangkita anu ndikita wawaseʼi, paikanya bareʼe nakita ntau seʼe. Da raya ntau seʼe madonge anu ndidonge wawaseʼi, paikanya bareʼe nadonge ntau seʼe.”
Nuntu mporapa to Samaria anu pande mporaya
10:25-37
25 #
Mat. 22:35-40, Mrk. 12:28-34 Ungka lairia jelamo sambaʼa guru agama, da mampebutuka i Yesu natoʼo, “Guru, nunjaa anu da kupowia da naka kurata katuwu anu bareʼe pusa?”
26Mesono i Yesu ndatoʼo, “Nunjaa anu ndaʼuki ri Sura Magali? Pai ewambeʼi parata ndayamu kono inceʼe?”
27 #
Tad. 19:18, Paw. 6:5 Mesono tau setu natoʼo, “Potowemo i Pue Ala puemu ri kaliogu ndayamu, gori mpangkoto ntanoanamu, gori ngkarosomu pai gori mponawa-nawamu pai, ‘Potowemo kasitaumu ewa pampotowemu koromu ngkaliomu!’ ”
28 #
Tad. 18:5
Ndatoʼo i Yesu, “Monco kojo pesonomu, powiamo ewanceʼe sangaya-ngaya da nurata katuwu.”
29Paikanya guru agama setu da rayanya mantuju kayoanya. Mompeoasi siʼa natoʼo, “Isema kojo kasitauku seʼe?”
30Mesono i Yesu ndatoʼo, “Reʼe tau sambaʼa mobalungke ungka ri Yerusale da njoʼu ri Yeriko. Ri yae njaya siʼa nawombo parampo, narampa pura-pura rengkonya pai aga-aganya, anu nakeni, sakodi mate siʼa nepa napalaika mombole-mbole ri tongo njaya.” 31Bareʼe masae liumo ri jaya setu sambaʼa tadu mpanyomba, pangkitanya tau marugi setu, natilawangi nepa melinja mpaliu siʼa. 32Ewanceʼe seʼe moliu woʼu ri jaya setu sambaʼa to Lewi, butu nakita tau marugi setu, natilawangi nepa melinja mpaliu siʼa. 33#2 Taw. 28:15 Bareʼe masae liumo ri jaya setu sambaʼa to Samaria, siʼa da malai ri sambakanya. Pangkitanya tau marugi setu merata puru ndayanya. 34Natimosuki tau marugi setu, nawusoʼika lana pai anggoro welanya nepa nawewesi. Roo setu nasawinaka ri kalidenya nepa nakeni ri banua mpelinggona naporewu njairia.
35Bangke reme nayali doi salaka radua ngkomba nawaika tumpu banua setu natoʼo, “Ndiporewu tau seʼi, sangkuja-sangkuja ntano peruu ongkosomi, nepa kubayari ane mewalilimo yaku i reʼi.”
36Ndapapusa i Yesu popatuntu-A, Ndapeoasi ri guru agama setu, “Ri tau tatogo setu, malulu parata ndayami anu mbeʼi mewali kasitau ntau anu marugi setu?”
37Mesono guru agama setu natoʼo, “Tau anu mampokapuru siʼa.”
Ndatoʼo i Yesu ri siʼa, “Palaimo, powia woʼu ewanceʼe!”
I Yesu njoʼu ri banua i Marita pai i Maria
10:38-42
38 #
Yoh. 11:1
Malaimo i Yesu pai waʼa anaguru-A mampaliu pelinja-A, jelamo tau seʼe ri lipu sambaʼa. Njairia reʼe weʼa sambaʼa toʼonya i Marita mancale Sira da napolinggona ri banuanya. 39Reʼe sambaʼa kasangkomponya anu weʼa i Maria toʼonya, siʼa motunda mosu ri witi i Yesu mampedongeka waʼa pompaguru-A. 40Paikanya i Marita mampasilolongani pampolinggona i Yesu. Natimosuki i Yesu natoʼo, “Pue, neʼe ndipapaliuka i Maria setu podo motunda-tunda ngkabongo bareʼe natulungi yaku da mampolinggona Komi, ndipokaumo napantulungi yaku!”
41Mesono i Yesu ndatoʼo, “Marita, Marita! Siko maria ngaya gaga anu nupasilolongani; 42ntanoka podo sangaya anu moyowe. Pai inceʼe anu napilisi i Maria, anu bareʼe da ndatima ungka ri siʼa.”
Currently Selected:
LUKASI 10: LAIPMF
Highlight
Share
Copy
Want to have your highlights saved across all your devices? Sign up or sign in
