LUKASI 11

I Yesu mampaguru pekakai

11:1-13

(Mat. 6:9-13, 7:7-11)

1Ri anu sandeme i Yesu mekakai ri kareʼe anu ntepatani. Roo mekakai Sira mompau sambaʼa anaguru-A ndatoʼo, “Pue, koisa ndipaguru kami da mekakai ewa i Yohane mampaguru waʼa anagurunya mekakai.”

2Ndatoʼo i Yesu ri tau seʼe, “Ane mekakai komi, da nditoʼomo ewaseʼi,

‘Papa,

Komimo Pue Ala anu sambaʼa-mbaʼa.

Mbolimo Komi ndapanyomba pai ndatubunaka,

3Ndiwaimo sandeme-sandeme

pangkoni anu da kakoni.

4Neʼemo Ndikitanaka waʼa ncalaa mami,

maka kami woʼu bareʼemo kakitanaka waʼa ntau

anu masala ri kami.

Pai neʼe ndipapaliuka kami da paya peaya ndaya mami sindara kami ndapebutuka.’ ”

5Ndatoʼo i Yesu ri anaguru-A, “Ane reʼe ri oyomi anu njoʼu ri banua balenya ri ntongo wengi, pai natoʼo, ‘Bale, waikaku rotimu togo ngkomba, 6maka reʼe baleku anu ntongo ri pelinjanya meʼonto ri banuaku pai bereʼe roti da kupolinggonaka siʼa!’ 7Ane rapanya mesono balenya setu, ungka ri raya banuanya, ‘Neʼe nurendosi yaku! Roomo kurancongi wombo banuaku yaku pai waʼa anaku yoremo. Bareʼemo da kuleʼo membangu mawaika siko bara nunjaa-njaa.’ ”

8Ndatoʼo i Yesu, “Mewali ewambeʼimo?” “Kutoʼoka komi, io! Mau siko balenya, bareʼe da napokono membangu mawaika siko bara nunjaa-njaa. Paikanya ua siko bareʼe maeamu merapi mpaliu ri siʼa, sangaya-ngaya da membangu yau da mawaika siko anu nuperapi. 9Mewali, Kutoʼoka komi: Ndiperapimo da ndawaika komi, ndipepalimo, sangaya-ngaya da ndirata; nditadengkosimo dampo mbombo, da ndalokaka komi. 10Maka tau anu mamperapi da ndawaika; tau anu mampepali da mangarata pai tau anu mantadengkosi, dampo da ndalokaka. 11Ara reʼemo ri oyomi sambaʼa papa anu mawaika ananya ule ane naperapi wayawo? 12Bara mamperapi toyu manu janawaika taʼa nganga? 13Ane sako komi tau majaʼa ndiincani mawaika anami anu madago pagonya Papami ri suruga! Anu meruu woʼu da ndapawai anu madago ri tau anu mamperapi!”

I Yesu pai i Belesebu

11:14-23

(Mat. 12:22-30, Mrk. 3:20-27)

14Ri anu sandeme i Yesu mangarumba imajaʼa ungka ri tau anu bobo. Butu mesuwu inosa majaʼa setu, tau setu mompaumo. Maria tau mampojingki, 15#Mat. 9:34, 10:25 paikanya reʼe anu mangantoʼo, “Pai Napangkoto marumba inosa majaʼa setu, podo ua mancabo kuasa i Belesebu, tadulako inosa majaʼa setu.”

16 # Mat. 12:38, 16:1, Mrk. 8:11 Reʼe woʼu waʼa ntau ntaninya anu mantinako ndaya mampepali kasala i Yesu, mewali naperapi ntau seʼe da naka ndatujuka tanda ngkuasa da mewali tanda ka Siranya ungka ri Pue Ala. 17Paikanya ndaincani i Yesu tinako ndaya ntau seʼe pai ndapantoʼoka tau seʼe, “Ane sambaʼa negara taunya mampoʼiwalika kasiyununya manoto negara setu da magero; pai ane reʼe sombori taunya bareʼe simadago manoto sombori setu da tebureka. 18Ewanceʼe seʼe ri raya mpoparenta i majaʼa; ane santibura mombeluku pai anu santiburanya, poparenta setu da magero. Nditoʼo Yaku marumba inosa majaʼa ua kuasa i Belesebu. 19Ane ewanceʼe, ua kuasa incema waʼa anagurumi marumba waʼa inosa majaʼa setu? Waʼa anagurumi setu ngkalionya anu mampatongawa kakominya sala! 20Paikanya Yaku marumba inosa majaʼa ua kuasa i mPue Ala, inceʼe posokinya i Pue Ala montepuʼumo moparenta riʼoyomi.

21Ane reʼe sambaʼa tau anu maroso, pai toka parewanya, majagai banuanya, bareʼe da tetaji aga-aganya. 22Paikanya ane reʼe tau anu meruu ngkaroso mancuaki pai manangi siʼa, da narampa pura-pura parewa mpoiwalinya anu nasarumaka setu pai waʼa aga-aganya pura-pura da napotilaka.

23 # Mrk. 9:40 Tau anu bareʼe sambira pai Yaku, kamonconya maewa Yaku, pai tau anu bareʼe mangkadudungi Yaku kamonconya majaʼati tetala-Ku!”

Pewalili inosa majaʼa

11:24-26

(Mat. 12:43-45)

24“Ane inosa majaʼa mesuwu ungka ri tau sambaʼa, inosa setu da molayo-layo ri waʼa ngkareʼe anu mangau da mampepali kareʼe mpeosa, paikanya bereʼe narata. Inceʼe pai napantoʼo, ‘Moruana da kumewalili ri banua anu roo kupalaika!’ 25Kajelanya njairia, narata banua setu roo ndasaewe pai timama. 26Roo setu malai siʼa nepa napoyunu papitu inosa majaʼa anu meruu kajaʼanya painaka siʼa. Ungka lairia mesua tau seʼe ri raya ntau setu pai maroo-roo njairia. Pai kapusanya katedikanaka ntau setu meruumo kajaʼanya painaka iʼowi.”

Karodo ndaya anu monco

11:27-28

27Karoo i Yesu mompau ewanceʼe, reʼe sambaʼa weʼa ungka ri oyo ntau sondo mantoʼoka Sira: “Yontomo kalindo ndaya mbeʼa anu mampoana pai mampasusumo Komi!”

28Paikanya ndatoʼo i Yesu, “Maʼai ngkalindo ndaya ntau anu mampedongeka nuntu i mPue Ala pai nawianaka!”

Waʼa ntau anu mamperapi i Yesu da mantuju tanda ngkuasa

11:29-32

(Mat. 12:38-42)

29 # Mat. 16:4, Mrk. 8:12 Sindara waʼa ntau sondo maowuni i Yesu, ndapaliu pompau-A ndatoʼo, “Ara maʼaisa kajaʼanya tau tuwu salapi seʼi, mamperapi tanda ngkuasa, paikanya bareʼe da ndatujuka tanda ngkuasa, waʼanya anu da ndatujuka inceʼemo tanda ngkuasa i Nabi Yona. 30#Yon. 3:4 Ewambeʼi pewali i Nabi Yona ewa sambaʼa tanda ngkuasa ri to Niniwe, ewanceʼe woʼu i Ana Manusia da mewali tanda ngkuasa ri tau tuwu salapi seʼi. 31#1 Raj. 10:1-10, 2 Taw. 9:1-12 Ri eo kiama da mekakore datu weʼa ungka ri Selata sangkani-ngkani pai tau tuwu salapi seʼi da mampetisala tau seʼe. Maka ua da mampedongeka pompaguru i Mokole Salomo anu loʼe, lawa kojo pelinjanya ungka ri tando lino. Paikanya ireʼi reʼe anu meruu kabangkenya ungka ri Mokole Salomo. 32#Yon. 3:5 Ri eo kiama da meoko to Niniwe sangkani-ngkani pai tau tuwu salapi seʼi da mampetisala tau seʼe, maka to Niniwe majeamo ungka ri waʼa ncalaanya, ua napedongeka nuntu anu napetumbu i Nabi Yona ri tau seʼe. Paikanya ireʼi seʼi-seʼi reʼe anu meruu ungka ri Nabi Yona.”

Mareme pai wani

11:33-36

(Mat. 5:15, 6:22-23)

33 # Mat. 5:15, Mrk. 4:21, Luk. 8:16 “Bereʼe tau anu mantutuni silo nepa nasambunika bara nasangoka gumba, paikanya sangaya-ngaya da ndadika ri potunda ncilo da naka merara pai da napangkita ntau mesua ri raya banua. 34#Mat. 6:22-23 Mata inceʼemo silo gala ngkoro. Ane malino matamu, yosa pai mareme sangkoromu. Paikanya ane bularu matamu, mawengi pai wani sangkoromu. 35Inceʼe puʼunya pai naka ndipakadago da naka neʼe reme anu reʼe ri komi da mewali mawengi. 36Ane juku-juku koromu mareme, bereʼe anu mawengi, sangkoromo seʼe ewa narara ncilo.”

I Yesu mampetisala waʼa nto Parisi pai waʼa guru agama

11:37-54

(Mat. 23:1-36, Mrk. 12:38-40)

37Karoonya mompau i Yesu, nasalemo nto Parisi sambaʼa Sira da mangkoni ri banuanya. Njoʼumo kojo Sira da mangkoni njairia. 38Jingki raya nto Parisi setu mangkita i Yesu mangkonimo seʼi bareʼepa ndawusoʼi pale-A malulu songka agama. 39Inceʼe puʼunya pai ndapantoʼo i Yesu, “Lawi komi to Parisi biasanya mawusoʼi tabomi pai galasimi podo wawonya, paikanya rayanya buke-buke jaʼa pai sinandaya. 40Ee komi tau tengo! Ara banya i Pue Ala anu mampowia wawonya inceʼe seʼe anu mampowia rayanya? 41Ara banya bangani ntabo pai galasi setu anu da ndiwaika tau kaasi-asi. Ewanceʼemo da naka pura-pura mewali magali ri komi.

42 # Tad. 27:30 Marugimo komi waʼa to Parisi! Ndipepombaikamo sampotila sampuyu ungka ri solasi pai inggu pai waʼa rampa anu ntaninya ndipanyombaka ri Pue Ala, paikanya kamonco pai towe ri Pue Ala inceʼe bareʼe ndiwianaka. Ntanoka inceʼe anu sangaya-ngaya da ndiwianaka, pai anu ntaninya woʼu bareʼe ndikalingani.

43Marugimo komi waʼa nto Parisi! Maka komi ndipokono kojo da motunda ri kareʼe anu tetubunaka ri raya banua mpekakai, pai ndipokono kojo da natabe ntau ri pasari. 44Marugimo komi! Jamo ewa dayo anu bereʼe paʼesanya painaka nayojo-yojomo ntau bareʼe naincani.”

45Sambaʼa ri oyo guru agama mantoʼoka Sira, “Guru! Pau-Mi setu manoro mampetikodimo kami!”

46Mesono i Yesu ndatoʼo, “Marugimo woʼu komi waʼa guru agama! Komi masongkaka tau tetala anu mapari pai mampapakoyoka tau kinoyo anu manee paikanya komi ngkaliomi bareʼe liu-liu nditulungi mau sakodi tau anu mawianaka. 47Marugimo komi, komi mampowia dayo waʼa nabi anu roomo napepate waʼa ntau tuʼami ngkaliomi. 48Mewali, kamonconya komi woʼu masintuwunaka powia waʼa ntau tuʼami anu roomo mampepate waʼa nabi, nepa komi da mampowia dayonya. 49Inceʼe puʼunya ua kaloʼe mPue Ala pai ndapantoʼo, ‘Da Kupokau ri tau seʼe waʼa nabi pai waʼa ncuro-Ku saʼe da napepate, saʼe da najeani!’ 50Ndapowia mPue Ala ewanceʼe da naka tau tuwu salapi seʼi ndahuku ua powia ntau seʼe mampepate waʼa nabi, montepuʼu ungka ri pampapewali lino seʼi. 51#Pal. 4:8, 2 Taw. 24:20-21 Montepuʼu ungka ri pampepate i Habeli rata ri pampepate i Sakaria anu ndapepate ri oyo lampaʼani pai Banua i mPue. Monco Kutoʼoka komi: Waʼa ntau tuwu salapi seʼi da ndahuku ua pampowianya pura-pura setu.

52Marugimo komi, waʼa guru agama! Pogili dampo pangaloka pangaincani ndadika ri komi, paikanya komi ngkaliomi bareʼe ndipokono mesua mampepali pangaincani setu. Sawanya da mesua, ndiyawati waʼa ntau anu mompari-mpari mesua ri rayanya!”

53Palai i Yesu ungka njairia, natepuʼumo guru agama pai to Parisi mantusaki ri kajaʼanya Yesu. Nakelo-kelo ntau seʼe Sira da ndapampokono mompau kono anu maria ngaya. 54Pai sindara setu natunda-tundani ntau seʼe boi reʼe anu sala toʼo, da napampetisala Sira.

Currently Selected:

LUKASI 11: LAIPMF

Highlight

Copy