LUKASI 16
16
Nuntu mporapa bendahara anu loʼe pai bareʼe mayoa
16:1-13
1Ndatoʼo woʼu i Yesu ri waʼa anaguru-A, “Reʼe sambaʼa tau koreʼe pai reʼe sambaʼa bendaharanya anu majagai pai mampopagampika aga-aganya pai doinya. Bendahara setu napogiluka ntau ri puenya natoʼo, ‘Aga-agami pai doimi puramo nabolontanaka i bendaharami.’ 2Madonge pompetumbu waʼa ntau, napekitima bendahara setu natoʼoka, ‘Reʼe kudonge powiamu anu bareʼe mayoa nupampopagampika doiku? Mewali seʼi-seʼi da nupatoka sura anu kateʼuki pesua pai pesuwu doiku sangkani pai sura katedikanaka waʼa mpaporewumu aga-agaku. Ane roomo da kupapeʼontomo siko ungka ri tetalamu!’ 3Monawa-nawamo bendahara setu, natoʼo ri rayanya, ‘Nunjaamo anu da powia? Yaku da ndapapeʼontomo mpueku. Da mojamaa bareʼe kukoto; da merapi-rapi maea mataku. 4Reʼe jaya kurata, ane napapeʼontomo mpueku yaku, paikanya da mariamo baleku anu da mampokapuru yaku, da napokono yau da mancale yaku da napolinggona ri banuanya!’ 5Mewali napeboo i bendahara setu waʼa ntau anu moinda ri puenya. Napeoasi ri anu jela riunya, ‘Sangkuja indamu ri pueku?’ 6Mesono tau setu, ‘Saatu gumba lana.’ Natoʼo bendahara setu, ‘Seʼi sura indamu. Potundamo uki pakaliga: alima mpuyu.’ 7Roo setu natoʼoka woʼu tau anu karadua, ‘Sangkuja indamu bale?’ Mesono tau setu, ‘Sancowu karu gandu.’ Natoʼo bendahara setu, ‘Seʼi sura indamu, potundamo uki uayu atu.’
8Naunde tumpu doi setu kaloʼe i bendahara anu bareʼe mayoa setu, maka waʼa ntau anu loʼe ri lino seʼi naincani mpodago mampepali raya ntau, panangi tau anu mayoa rayanya ri Pue Ala!”
9Nepa ndatoʼo woʼu i Yesu, “Pedongeka! Ndipakemo kakoreʼe lino seʼi da ndiparata balemi, da naka ane bareʼemo reʼe olinya kakoreʼe lino seʼi, komi da ndatarima ri kareʼe anu bareʼe da reʼe kapusanya. 10Tau anu ndasarumaka ri anu kodi-kodi, da ndasarumaka woʼu ri ngaya-ngaya anu bangke. Paikanya tau anu bareʼe ndasarumaka ri ngaya-ngaya anu kodi-kodi, bareʼe woʼu da ndasarumaka ri ngaya-ngaya anu bangke. 11Mewali, ane kono kakoreʼe lino seʼi komi bareʼe ndasarumaka, isema anu da mampesarumakaka ri komi anu ncuruga? 12Pai ane kakononya aga-aga anu napotumpu ntau ntaninya komi bareʼe ndasarumaka, isema anu mampokono da mangawaika komi nunjaa anu da ndipotumpu?
13 #
Mat. 6:24
Bereʼe mau sambaʼa tau mangkoto motetala ri radua tau mancongka; maka da meruu napampotowe anu sambaʼa painaka anu ntaninya, bara napaperuu pedongenya ri anu sambaʼa painaka anu ntaninya. Ewanceʼemo woʼu komi. Bareʼe da ndikoto motetala tila i mPue Ala pai tila aga-aga woʼu.”
I Pue Ala ndakita raya ntau
16:14-18
(Mat. 11:12-13, 5:31-32, Mrk. 10:11-12)
14Ri padonge waʼa nto Parisi pura-pura anu ndapau i Yesu, napogeleka ntau seʼe; maka maʼai kojo napampodaraya ntau seʼe doi. 15Paikanya ndatoʼoka i Yesu tau seʼe, “Komimo waʼa ntau anu magasi mampetuju-tujuka kayoa ndayami ri tau, paikanya ndakita i mPue Ala rayami. Maka anu natoʼo ntolino ndateka, lauka ri suara i mPue Ala.
16 #
Mat. 11:12-13
Waʼa ncongka agama anu nadika i Musa pai patada ri sura waʼa nabi, pura-pura ndaaya nakarataka ri tempo i Yohane Topopariu. Montepuʼu ungka ri tempo setu Nuntu ngKatuwu anu mantoʼo Poparenta i mPue Ala ndapobambarika rantani wawaseʼi. Pai napopagoi ntau da mewali palili ri raya mPoparenta i mPue Ala setu. 17#Mat. 5:18 Paikanya lino pai yangi saru-saru da kapayanya painaka sambaʼa hurupu ungka ri waʼa ncongka i mPue Ala da tepalisi.
18 #
Mat. 5:32, 1 Kor. 7:10-11 Bara isema anu mampogaʼaka rongonya pai naporongo woʼu weʼa sambaʼanya, tau setu mosalara. Pai tau anu mamporongo weʼa anu napogaʼa setu, inceʼe seʼe mosalara.”
Nuntu mporapa tau koreʼe pai i Lasaru
16:19-31
19“Reʼemo sambaʼa tau koreʼe. Porengkonya paka ayapa masuli, meawa kojo katuwunya sandeme-sandeme. 20Ri suara banuanya ndadika sambaʼa tau kaasi-asi i Lasaru toʼonya. Juku-juku koronya kebisu. 21Da rayanya kojo mangkoni wurere ngkinaʼa anu manawu ungka ri meja mpangkoni ntau koreʼe. Maʼimo woʼu asu majilati welanya.
22Masae matemo tau kaasi-asi setu, liu-liu nakeni malaʼeka ri kareʼe anu meawa ri sori i Burahima. Mate woʼu tau koreʼe setu nepa ndatana. 23Mapari kojo naepe ri kareʼe ntau mate. Sindara pantodosakanya kapari seʼe, metingara siʼa; ungka ri kalawanya nakita i Burahima pai i Lasaru njau motunda ri soria. 24Meboo i koreʼe natoʼo, ‘Boo ngkai Burahima! Ndipokapuru yaku, ndipokauka yaku i Lasaru setu mau podo karamanya naome ri ue nepa natedesika jilaku, mapari kojo kuepe ri apu seʼi!’
25Mesono i Burahima, ‘Endomo anaku, waʼa anu madago puramo nuepe sangkasae ngkatuwumo ri wawo lino, paikanya i Lasaru podo pepa ngkatuwu anu narata. Seʼi-seʼi madagomo naepe ireʼi, jasiko maparimo. 26Sangaya woʼu, lau ngoyo anu lauka, maoyoti siko pai kami painaka bareʼe da nakoto ntau ireʼi da njoʼu iretu pai tau iretu bareʼe nakoto da maʼi ireʼi!’ 27Mesono i koreʼe, ‘Ane ewanceʼe ngkai, kuperapi ri komi ndipokauka yaku i Lasaru setu da naka loʼu ri banua mpapaku. 28Maka lau alima kasangkompoku, da napampatujuki i Lasaru tau seʼe, boi da jela woʼu ri kareʼe anu mapari seʼi.’
29Mesono i Burahima, ‘Laumo waʼa ncura Musa pai sura waʼa nabi ntaninya ri tau seʼe! Mbolimo waʼa anu ndaʼuki ri sura setu da nalulu ntau seʼe!’ 30Paikanya mesono i koreʼe setu, ‘Ane podo i nceʼe ngkai Burahima bareʼe da gana. Jaʼane reʼe tau mate tuwu muni rata ri tau seʼe nepa da naponcosoi ndaya ntau seʼe waʼa ncalaanya.’ 31Paikanya ndatoʼo i Burahima, ‘Ane bareʼe naaya ntau seʼe songka i Nabi Musa pai waʼa nabi, manoto sako tau mate wali ngkatuwu muni bareʼe da naaya ntau seʼe!’ ”
Currently Selected:
LUKASI 16: LAIPMF
Highlight
Share
Copy
Want to have your highlights saved across all your devices? Sign up or sign in
