LUKASI 17
17
Waʼa anu mampapopuʼu tau mampowia salaa
17:1-4
(Mat. 18:6-7,21-22, Mrk. 9:42)
1 #
Mat. 18:6-7, Mrk. 9:42 Ndatoʼo i Yesu ri waʼa anaguru-A, “Powia anu majaʼa sangaya-ngaya reʼe puʼunya. Paikanya anu maʼai ngkajaʼa inceʼemo tau anu mampuʼunaka painaka mewali powia anu majaʼa setu! 2Moruana tau setu da ndaloeka watu mpogili ri leʼenya nepa ndanawu ri tongo ntasi, painaka siʼa puʼunya sala sambaʼa ri tau anu kodi katuwunya seʼi mampowia salaa. 3#Mat. 18:15 Inceʼe puʼunya painaka ndiponcoro-ncoro!
Ane masala kasangkompomu, patujukimo siʼa. Ane moncosoimo rayanya pokapurumo. 4#Mat. 18:22 Mau rapanya papitu ngkani ri rayanya sandeme siʼa mowia sala ri siko, pai papitu ngkani woʼu njoʼu merapi puru ri siko, neʼemo nukitanaka salanya.”
Peaya ndaya
17:5-6
5Natoʼo anaguru-A ri Yesu, “Pue Ndipakaroso peaya ndaya mami.” 6Mesono i Yesu, “Ane reʼe yau peaya ndayami mauja ewa wuku nambo saogu, da Ndikoto mantoʼoka kaju bangke seʼi, ‘Kawukamo pai katepomuyamo ri tongo ntasi,’ sangaya-ngaya da nalulu songkami.”
Tetala sambaʼa toporioko
17:7-10
7“Ane rapanya reʼe ri oyomi mampotumpu toporioko ndisongka njoʼu mopajeko bara njoʼu mangkambi pinatuwu; pai ane mewalilimo toporioko setu ungka ri potetalanya bara liu-liu da nditoʼoka, ‘maʼimo da tapangkoni?’ 8Manoto bareʼe da ndipowia ewanceʼe! Sangaya-ngaya da nditoʼoka, ‘Pakaliga patokaka yaku pangkoniku. Pepasabomo nepa nuara-ara yaku mangkoni pai manginu, ane roomo mangkoni yaku, nepa maya mangkoni siko.’ 9Ara bareʼe sintempo toporioko anu todo mawianaka songka mpuenya setu da ndaunde? 10Ewanceʼemo seʼe komi, ane roomo ndiwianaka pura-pura anu ndasongkaka komi mbolimo da nditoʼo, kami podo toporioko anu mawianaka tetala mami.”
Sampuyu tau ketangga ndapakaʼosa i Yesu
17:11-19
11Pelinja i Yesu da njoʼu ri Yerusale, Sira melempo ri tida ntana Samaria pai Galilea. 12Kajelaa ri lipu sambaʼa, setu sampuyu tau ketangga da mampomberataka Sira. Tau seʼe metada-tada lawa, 13nepa meboo-boo natoʼo, “Yesu Pue! Ndipokapuru kami!”
14 #
Tad. 14:1-32
Ri pangkita i Yesu tau seʼe, ndatoʼoka, “Ndipalaimo njoʼu ndipetujuka koromi ri waʼa ntadu mpanyomba.”
Ri yae njaya osamo juʼa ntau seʼe. 15Sambaʼa ri oyo ntau seʼe janaepe osamo koronya, liu-liu mewalili maunde kapuru ndaya i mPue Ala, marimbo oni nganganya. 16Butu rata ri suara i Yesu, mombukotu manyomba naunde kapuru ndaya-A. Tau setu to Samaria. 17Ndatoʼo i Yesu, “Ara banya sampuyu tau anu kupakaʼosa? Mbeʼimo anu sasio? 18Wenu painaka podo to Samaria seʼi anu mewalili maunde kapuru ndaya i mPue Ala?” 19Roo setu ndatoʼo i Yesu ri tau setu, “Peokomo, palaimo, peaya ndayamu anu mampakaʼosa siko.”
Katongawa Poparenta i mPue Ala
17:20-37
(Mat. 24:23-28,37-41)
20Bara tesangkuja to Parisi mompeoasi ri Yesu, “Impia da katongawa mPoparenta i Pue Ala?” Mesono i Yesu, “Poparenta i mPue Ala bareʼe da ndatepuʼu ri anu nakita mata ntau, 21painaka nakoto ntau mantoʼo, ‘Maʼi ndipeole, Sira reʼe ireʼi bara Sira reʼe ri njau! Maka i Pue Ala montepuʼumo moparenta ri oyomi.’ ”
22Roo setu ndatoʼo i Yesu ri anaguru-A, “Reʼe temponya da rayami mangkita waʼa eo i Ana Manusia kambanya saeo apa paikanya bareʼe da ndikita. 23Da reʼe tau mantoʼoka komi, ‘Peole ri njau, peole ireʼi!’ Paikanya neʼe ndipokono malai mampepali. 24Maka ewa da pesindi ngkila, raranya ungka ri puʼu yangi sambali, ewanceʼemo i Ana Manusia ri eo ngkajelanya. 25Paikanya uyu-uyunya maria kapari anu da ndapomberataka pai anu bareʼe natarima ntau tuwu salapi seʼi. 26#Pal. 6:5-8 Ri eo ngkarata i Ana Manusia, katedikanaka ntau daʼewa ri tempo ngkatuwu i Noho pua. 27#Pal. 7:6-24 Tau podo mampariwawo kagana mpangkoni pai panginunya, mombeporongoka gori mpepokononya; ewanceʼemo pewalinya rantani meponemo i Noho pai bangani banuanya ri duanga, pai ri pesambori ue pura-pura waʼa ntau setu maropu. 28#Pal. 18:20–19:25 Ewanceʼe seʼe ri tempo ngkatuwu i Loʼoti. Waʼa ntau podo mampari-mpari nakagana mpangkoni pai panginu, mobalu-balu, mopinamuya pai mawangunaka banua. 29Paikanya ri tempo mpesuwu i Loʼoti ungka ri lipu Sodomo, ri eo setu tudumo apu ungka ri yangi mampepate pura-pura tau seʼe. 30Ewanceʼemo da katedikanakanya ri eo ngkarata i Ana Manusia.
31 #
Mat. 24:17-18, Mrk. 13:15-16 Ri tempo setu tau anu reʼe ri wawo ata banuanya bareʼemo da tepenaʼu mantima parewanya anu ri raya banua. Ewanceʼe seʼe tau anu reʼe ri tongo mpojamaanya bareʼemo da mewalili ri banuanya. 32#Pal. 19:26 Endomo anu mewali ri rongo i Loʼoti! 33#Mat. 10:39, 16:25, Mrk. 8:35, Luk. 9:24, Yoh. 12:25 Tau anu mampari-mpari mampepurungi inosanya inceʼemo anu da tetaji ngkabongo inosanya. Paikanya tau anu tetaji inosanya inceʼe anu da ndasorepaka. 34Monco Kutoʼoka komi ri wengi setu: Ane reʼe tau radua anu yore merou ri langka sambaʼa da ndakeni pai sambaʼa da ndapalaika. 35Weʼa radua anu montiwani mombaju, sambaʼa da ndakeni pai sambaʼa da ndapalaika. [36Radua tau anu motetala sangkani-ngkani ri pojamaa sambaʼa da ndakeni pai sambaʼa da ndapalaika.]”
37Mompeoasi waʼa anaguru i Yesu, “Pura-pura anu nditoʼo setu Pue ri mbeʼi da pewalinya?”
Mesono i Yesu, “Ri mbeʼi kanjau wata ngkoro anu mate, njairia da pompasambaka waʼa ntonci anu manyanya mangkoni anu oso.”
Currently Selected:
LUKASI 17: LAIPMF
Highlight
Share
Copy
Want to have your highlights saved across all your devices? Sign up or sign in
