LUKASI 18
18
Nuntu mporapa weʼa bemba pai topobotusi anu bareʼe mayoa
18:1-8
1Roo setu ndapau woʼu i Yesu ri waʼa anaguru-A sambaʼa nuntu mporapa, tinako ndaya-A da naka neʼe naowe-owe ntau seʼe mekakai pai neʼe malelu rayanya. 2Ndatoʼo, “Ri sambaʼa kota reʼemo topobotusi anu bareʼe mampokaeka i Pue Ala pai bareʼe napedongeka tau. 3Ri kota setu seʼe reʼe woʼu sambaʼa bemba. Bemba setu bareʼe naowe-owe njoʼu merapi tulungi ri topobotusi setu da naka siʼa ndapapenangi ri sampokara-karanya. Natoʼo nditulungi yaku da naka menangi yaku ri sampokara-karaku seʼi. 4Masae sakodi bareʼe nalinga ntopobotusi setu, maka bareʼe napokono da mantulungi weʼa bemba setu. Paikanya kapusanya monawa-nawa topobotusi setu, ‘Mau bareʼe kupokaeka i Pue Ala pai bereʼe tau anu da kupedongeka, 5paikanya weʼa bemba setu bareʼe naowe-owe moajo-ajo mampasalero yaku, moruana naka ronga naowe maʼi-maʼi da kupapenangimo siʼa ri pokara-karanya seʼi. Maka ane bareʼe kupowia ewanceʼe, bareʼe da naowe-owe madadu yaku rantani jamampakaparimo yaku.’ ”
6Nepa ndatoʼo woʼu i Yesu, “Ndiparindayamo pau anu natoʼo i ntopobotusi anu bareʼe mayoa setu! 7Ara bareʼe da ndapedongeka i mPue Ala pekakai waʼa ntau-A sandeme-sandeme pai sambengi-sambengi? Ara da ndapoiya-iyaka i mPue mantulungi waʼa ntau seʼe. 8Ndiayamo! Sira bareʼe da ndalantu-lantu mampelae kara-kara ntau seʼe! Paikanya ane jelamo i Ana Manusia, bara da reʼeja yau ndarata tau anu meaya ri lino seʼi?”
Nuntu mporapa to Parisi pai to ponduru asele
18:9-14
9Ndapau woʼu nuntu mporapa seʼi tila ntau anu mampetoʼo-toʼoka kadagonya pai mampetikodi tau ntaninya. 10Ndatoʼo i Yesu, “Reʼe radua tau njoʼu mekakai ri banua mpanyomba sambaʼa to Parisi pai sambaʼa woʼu to ponduru asele. 11To Parisi setu mekakore ntepatani nepa mekakai natoʼo, ‘Boo Pue Ala, kuunde Komi ri kawongko ndayaku, maka yaku banya ewa tau ntaninya, mojampa pai modenggo rayanya pai mosalara. Kuunde Komi maka yaku banya ewa to ponduru asele sinjau. 12Yaku mopuasa radua ngkani ri rayanya saminggu, sampotila sampuyu ungka waʼa mpandataku kupanyombaka ri Komi.’ 13Paikanya to ponduru asele setu mekakore lawa-lawa sako metingara ndeki yangi bareʼe nataha. Naonjuri dadanya natoʼo, ‘Boo Pue Ala, ndipokapurumo yaku tau anu masalaa seʼi!’ ”
14 #
Mat. 23:12, Luk. 14:11 Pewalili-A ri banua, ndatoʼo i Yesu, “Ndipoaya moncomo, to ponduru asele setumo anu ndatarima i mPue Ala pai banya to Parisi setu. Maka tau anu mobangke-bangke da ndakodisi; pai bara isema anu mampakawailau koronya siʼa da ndatanderaka.”
I Yesu madonco waʼa ananggodi
18:15-17
(Mat. 19:13-15, Mrk. 10:13-16)
15Reʼe bara tesangkuja tau mangkeni ananggodi anu kodi-kodipa ri Yesu, da naka ndajama pai ndadonco tau seʼe. Butu nakita waʼa anaguru-A inceʼe, napokarau ntau seʼe waʼa ntau setu. 16Paikanya ndapeboo i Yesu waʼa ananggodi setu, nepa ndatoʼoka waʼa anaguru-A, “Ndipapaliuka waʼa ananggodi setu maʼi ri Yaku! Neʼe ndipetangani tau seʼe, maka waʼa ntau ewanceʼemo anu da mewali tau i mPue Ala. 17Neʼe ndikalingani! Tau anu bareʼe mancuara i Pue Ala ewa sambaʼa ananggodi, bareʼe da mewali tau i mPue Ala.”
Tau koreʼe
18:18-30
(Mat. 19:16-30, Mrk. 10:17-31)
18Reʼe sambaʼa tadulako nto Yahudi meoasi ri Yesu, “Guru anu madago, nunjaa da kupowia da kuparata katuwu anu bareʼe da reʼe kapusanya?”
19Meoasi i Yesu ndatoʼo, “Ara wenu pai nupantoʼo, Yaku madago? Bereʼe anu madago waʼanyamo i Pue Ala ngkalio-A. 20#Pa. 20:12-16, Paw. 5:16-20 Nuincanimo waʼa ncongka i mPue Ala, ‘Neʼe mosalara, neʼe mepepate, neʼe melima, neʼe nusabi mbamba, tubunaka papamu pai inemu.’ ”
21Mesono tau setu, “Pura-pura songka setu kululumo ungka ri kaʼananggodiku.”
22Madonge pesononya setu, pai ndapantoʼo i Yesu, “Reʼepa sangaya anu da nuwianaka: Palaimo pobalu aga-agamu pura-pura. Olinya tilakamo waʼa ntau kaasi-asi, nepa da nurata aga-aga ri suruga. Roo setu, maʼimo malulu Yaku.” 23Butu nadonge ntau setu pau i Yesu maʼai kojo kapari ndayanya maka maʼai kakoreʼenya.
24Ndaincani i Yesu kapari ndaya ntau setu, nceʼe pai ndapantoʼo, “Mapari kojo tau koreʼe da mewali tau i mPue Ala! 25Saru sarupa sambaʼa onta mesua ri talinga njaru, painaka sambaʼa tau koreʼe mesua ri lino Dawoʼu i mPue Ala.”
26Padonge waʼa ntau pantoʼo i Yesu ewanceʼe napeoasi ntau seʼe, “Ane ewanceʼe isema ntano anu da tesorepaka?”
27Mesono i Yesu, “Anu bareʼe nakoto ntolino, i Pue Ala ndakoto!”
28Nepa natoʼo i mPeturu, “Ndipeolemo kapalaikamo sombori mami ua da malulu Komi.”
29Ndatoʼo i Yesu, “Ndiayamo anu Kutoʼoka komi, tau anu mampalaikamo banuanya, bara rongonya pai waʼa ananya bara kasangkomponya sangkani ine pai papanya ua Nuntu i mPue Ala, 30tau setu da ndawaika gana-gana sili mpowianya ri tempo wawaseʼi, pai tau setu da mampopanta katuwu anu bareʼe da reʼe kapusanya.”
Katatogo ngkaninya i Yesu mampau kono kapate-A
18:31-34
(Mat. 20:17-19, Mrk. 10:32-34)
31Ndapasambaka tepatani waʼa anaguru-A anu sampuyu pai radua nepa ndatoʼoka, “Ndipedongeka! Seʼi kita da ndeku ri Yerusale, ndatiria da pewalinya pura-pura anu naʼuki waʼa nabi kono i Ana Manusia. 32Siʼa da ndapepombaika ri tau anu banya to Yahudi, da napasinggiri da napetikodi pai da ndatupesi. 33Da najeani ntau seʼe nepa da napepate, paikanya ri eo anu katatogo da membangu muni.”
34Pura-pura setu bareʼe mesua ri nawa-nawa anaguru-A, tesambuni posoki mpau seʼe. Bareʼe naincani ntau seʼe nunjaa anu ndapau.
I Yesu mampakaʼosa tau buta mosu ri kota Yeriko
18:35-43
(Mat. 20:29-34, Mrk. 10:46-52)
35Mosumo i Yesu ri kota Yeriko, ndakita sambaʼa tau buta motunda ri wiwi njaya merapi-rapi. 36Butu nadonge reʼe tau sondo moliu, napeoasi, “Nunjaa anu mewali?”
37Natoʼo ntau sondo, “I Yesu to Nasare setu moliu.”
38Meboo tau buta setu natoʼo, “Yesu, makumpu i Daudi! Ndipokapuru yaku!”
39Tau anu mamporiuka i Yesu, mampokarau i buta natoʼo, “Ponjii, neʼe mekaliwongo!” Paikanya janaʼaiwakamo mampakarimbo peboo-boonya, natoʼo, “Makumpu i Daudi! Ndipokapuru yaku!”
40Meʼonto i Yesu nepa ndapokau tau manini i buta momberata pai Sira. Butu rata, ndapeoasi i Yesu, 41“Nunjaa anu da rayamu kupowiaka siko?”
Mesono tau buta setu, “Da rayaku menaa mataku.”
42Ndatoʼo i Yesu, “Ane ewanceʼe, peolemo! Peaya ndayamu mampakaʼosamo siko.”
43Liu-liu yosamo matanya, nakitamo raoa, nalulumo i Yesu naunde-unde kapuru ndaya i mPue Ala. Butu nakita ntau sondo anu mewali setu naunde ntau seʼe pura-pura i Pue Ala.
Currently Selected:
LUKASI 18: LAIPMF
Highlight
Share
Copy
Want to have your highlights saved across all your devices? Sign up or sign in
