LUKASI 19

I Yesu pai i Sakeu

19:1-10

1Pesua i Yesu ri kota Yeriko moliu ri raya ngkota. 2Ri raya ngkota setu reʼe sambaʼa tadulako ntoponduru asele anu koreʼe mpodago, i Sakeu toʼonya. 3Siʼa da rayanya mangkita i Yesu, paikanya ua sondo gaga tau bareʼe liu-liu nakita i Yesu maka siʼa maʼai kaʼedenya. 4Mewali, molonco siʼa mampesindiuka tau sondo, mepone ri kaju anu malangkati da naka ungka ndatiria da napampetiro i Yesu maka mosu ungka ri puʼu ngkaju setu da poliu-A. 5Kajela i Yesu ri puʼu ngkaju setu, metingara Sira, ndatoʼoka i Sakeu, “Penaʼu maʼi pakaliga! Maka sandeme seʼi Yaku da nupolinggona ri banuamu.”

6Ngkiro menaʼu i Sakeu mawongko rayanya mampolinggona i Yesu. 7Mongkakangurumo pura-pura tau anu mangkita, natoʼo ntau seʼe, “Ara jaʼasa! Ndapokono melinggona ri banua ntau anu majaʼa!”

8Rodomo potunda i Yesu ri banuanya, metimosukimo i Sakeu natoʼo, “Pue, santila radua ungka ri aga-agaku da kutilaka waʼa ntau kaasi-asi pai waʼa ntau anu roo kutima anunya ri jaya mpetengosi da kuwaika muni aopo ngkani kasondonya ri anu roo kutima!”

9Mesono i Yesu, “Sandeme seʼi siko pai bangani ncomborimu ndatarima i mPue Ala, maka siko seʼe muli i Burahima. 10#Mat. 18:11 Maka kajela i Ana Manusia da mampepali pai da mancorepaka tau anu tetaji.”

Nuntu mporapa doi wuyawa

19:11-27

(Mat. 25:14-30)

11 # Mat. 25:14-30 Ntongo napedongeka ntau pompau i Yesu, ndapau woʼu sambaʼa nuntu mporapa. Maka tempo setu Sira motuntu ri lipu anu mosu ri kota Yerusale, pai nasarumaka ntau da ronga ndapatongawamo Poparenta i mPue Ala ri lino seʼi. 12Ndatoʼo i Yesu, “Ri anu sangkani reʼemo sambaʼa kabosenya da malai ri lipu anu lawa maka da ndalanti mewali mokole, ane roomo ndalanti nepa da mewalili. 13Ri kabareʼepanya malai, napasambaka anamayununya sampuyu, natila-tilaka tesasangkomba doi wuyawa. Natoʼoka tau seʼe, ‘Ndipakemo doi seʼi mobalu-balu sangkasae mpalaiku.’ 14Paikanya bareʼe napokono ntau kasalipu-lipunya da mampomokole kabosenya setu; inceʼe painaka napokau ntau seʼe suro mantoʼo, ‘Bareʼe kapokono tau seʼi da mewali Mokole mami.’

15Paikanya kabosenya setu ndalanti mewali mokole. Roo setu mewalili muni ri lipunya. Butu jela napasambakamo waʼa anamayununya da napeoasi bara sangkuja yau rasi mpobalu-balunya sambaʼa-sambaʼa tau. 16Anamayunu anu jela riunya natoʼo, ‘Pue doi wuyawa sangkomba anu ndiwaika yaku; seʼi mewalimo sampuyu ngkomba.’ 17Mesono i mokole setu, ‘Siko tau anu ndasarumaka! Ua siko tau anu manoto, ndasarumaka mangkekeni anu sakodi, mewali seʼi-seʼi kuwaika siko mamparenta sampuyu kota.’ 18Jela woʼu anamayunu anu karadua natoʼo, ‘Pue, doi wuyawa anu sangkomba ndiwaika yaku; seʼi mewalimo alima ngkomba.’ 19Natoʼo i mokole ri anamayunu setu, ‘Siko da moparenta ri alima kota.’ 20Anamayunu anu ntaninya jela natoʼo, ‘Pue seʼi doimi anu ndiwai owi, kutonge mpodago ri ayapa nepa kupakoroka mpodago. 21Maka maeka rayaku ri komi, maka kuincani komi tau masii, da mantima anu banya anumi, pai da mampota wua mpinamuya anu bareʼe ndipomuya.’ 22Mesono i mokole, ‘Sikomo seʼi anamayunu anu majaʼa! Siko da kuhuku silulu pai waʼa mpaumu. Nuincani yaku tau masii, da mantima anu banya yaku tumpunya, pai da mampota anu bareʼe kupomuya. 23Ua kaʼinceʼenya, ara wenu doi setu bareʼe nuwaika tau anu mampapoana doi da naka ane jela yaku kutarima muni doiku sangkani pai ananya?’ 24Roo mompau ewanceʼe i mokole setu, ndatoʼoka tau anu mekakore mosu ri Sira, ‘Tima doi setu waika anamayunu anu mampotumpu sampuyu ngkomba doi wuyawa sinjau.’ 25Mesono tau setu natoʼo, ‘Reʼemo anunya sampuyu.’ 26#Mat. 13:12, Mrk. 4:25, Luk. 8:18 Ndatoʼo i mokole setu, ‘Kutoʼoka komi, tau anu lawi reʼemo anunya da ndaranganipa kamarianya. Pai tau anu bereʼe anunya sako anu reʼe yau ri siʼa da ndawali ntima muni. 27Mewali seʼi-seʼi ndikenimo maʼi waʼa ntau anu bareʼe napokono mampomokole yaku, ndipepatemo pura-pura ri suaraku!’ ”

I Yesu ndabangkei ri pesua-A ri kota Yerusale

19:28-40

(Mat. 21:1-11, Mrk. 11:1-11, Yoh. 12:12-19)

28Ri karoonya ndatoʼo i Yesu pura-puranya setu Sira melinja ri suara ntau seʼe ndeku ri Yerusale. 29Mosumo ri lipu Bepage pai Betania anu ri puʼu buyu ngKaju Lana, ndapokaumo anaguru-A radua da mesindiu. 30Ndatoʼoka, “Ndinjoʼumo ri lipu anu tasuara setu, ane jelamo komi njairia, da ndikita sambaʼa ana ngkalide nataka ntumpunya; kalide setu bareʼepa reʼe ndapampelamba, ndiledemo, ndinoʼo ri maʼi. 31Ane reʼe tau anu maseko komi, ‘Wenu pai ndipalede kalide setu? Da ndisonoka, I Pue da mampake!’ ”

32Ndekumo anaguru-A radua seʼe narata kojo singkono pai anu ndatoʼo i Yesu. 33Sindara mpalede ntau seʼe ana ngkalide setu, naseko ntumpunya natoʼo, “Ara wenu pai ndipalede kalideku?”

34Mesono tau seʼe, “I Pue da mampake!” 35Nanoʼomo ana ngkalide setu rata ri Yesu. Nepa naosu ntau seʼe jubanya nalampika wutongo ngkalide, roo setu melambamo i Yesu. 36Ri jaya da poliu i Yesu mampelamba kalide setu, natale ntau sondo jubanya.

37Mosumo kota Yerusale. mobalungkemo ri buyu ngKaju Lana, mogumoramo waʼa ntau anu sondo malulu Sira, maunde i Pue Ala pai mampokawongko waʼa ntanda ngkuasa anu nakitamo ntau seʼe natoʼo,

38 # Pol. 118:26 “Unde Mokoleta rata,

Sira Suro mPue Ala!

Suruga popuʼu dago,

Meawa Sira ri wawo!”

39Reʼe bara tesangkuja to Parisi ri oyo ntau sondo, mantoʼoka i Yesu, “Guru, toʼoka waʼa anagurumu naponjii.”

40Mesono i Yesu ndatoʼo, “Monco Kutoʼoka komi, ane monjii tau seʼe, waʼa mbatu sinjoʼu da mogumora maunde-unde i Pue.”

I Yesu mantangisi kota Yerusale

19:41-44

41Kako mosu-mosu ndapepetiromo kota Yerusale, ndatangisi kota setu. 42Ndatoʼo, “Pindongo meawa ara lesesa, ane nuincani sandeme seʼi, anu mangkeni kalindo ndaya, pindongosa bareʼe nakita matamu sandeme seʼi. 43Maʼipa rememu da rata, da nalimbu ncape iwalimu siko da naungku pai bareʼe da nuleʼo lapa. 44Nagero siko sangkani pai waʼa ntau banganimu da naropu pai bareʼemo da reʼe sako saogu watu anu mombekekeni pai yununya, ua kabareʼenya meaya siko ri tempo ngkajela ntowe ndaya i mPue Ala da mancorepaka siko!”

I Yesu mesua ri Banua i mPue

19:45-48

(Mat. 21:12-17, Mrk. 11:15-19, Yoh. 2:13-22)

45Mesua i Yesu ri Banua i mPue, montepuʼumo ndairi waʼa nto pobalu-balu njairia. 46#Yes. 56:7, Yer. 7:11 Ndatoʼoka waʼa ntau seʼe, “Lau ndaʼuki ri Sura Magali, ewaseʼi ndatoʼo i mPue Ala, ‘Banua-Ku, da ndatoʼo banua kareʼe mpekakai,’ paikanya ndipapewali kareʼe ntopojampa!”

47 # Luk. 21:37 Saeo-saeo i Yesu motuntu ri Banua i mPue. Da raya kojo waʼa ntadulako ntadu mpanyomba pai waʼa guru agama sangkani pai waʼa ntadulako nto Yahudi da mampepate Sira, 48paikanya bereʼe jaya narata ntau seʼe, maka waʼa ntau sondo bareʼe tepalai ungka ri sori-A mampedongeka potuntu-A.

Currently Selected:

LUKASI 19: LAIPMF

Highlight

Copy