LUKASI 20

Pompeoasi kakononya kuasa i Yesu

20:1-8

(Mat. 21:23-27, Mrk. 11:27-33)

1Ri anu sandeme, sindara i Yesu mampaguru kono Nuntu ngKatuwu ungka ri Pue Ala ri waʼa ntau sondo ri Banua i mPue. Waʼa ntadulako ntadu mpanyomba, waʼa guru agama, sangkani-ngkani pai waʼa ntadulako nto Yahudi, 2mompeoasi tau seʼe ri Yesu, “Koisa toʼoka kami, nunjaa Nuporoso pai Nupangkoto mampowia pura-puranya seʼi? Isema mawaika Siko kuasa setu?”

3Mesono i Yesu, “Da rayaku mampeoasi ri komi, koisa nditoʼoka Yaku. 4I Yohane mopariu pai kuasa incema? Kuasa i mPue Ala bara kuasa ntolino?”

5Montepuʼu napombetoʼoka ntau seʼe, “Ane tatoʼo, ‘Pai kuasa mPue Ala,’ da natoʼoka kita, ‘Ane ewanceʼe wenu painaka bareʼe ndiaya siʼa?’ 6Paikanya ane tatoʼo, ‘Pai kuasa ntolino,’ manoto da nawunu mbatu ntau sondo kita, maka tau seʼe naaya i Yohane sambaʼa nabi.” 7Mewali mesono tau seʼe natoʼo, “Bareʼe kaincani!”

8Ndatoʼo i Yesu ri tau seʼe, “Ane ewanceʼe Yaku woʼu bareʼe da Kutoʼoka komi pai kuasa incema Kupawianaka pura-puranya seʼi.”

Nuntu mporapa waʼa ntopotetala ri bonde anggoro

20:9-18

(Mat. 21:33-46, Mrk. 12:1-12)

9 # Yes. 5:1 Ndapau woʼu i Yesu nuntu mporapa seʼi ri waʼa ntau sondo, “Reʼe sambaʼa tau mampotumpu bonde anggoro. Bonde anggoro setu napekikariani ri bara tesangkuja tau nasaro, nepa malai siʼa maroo-roo ri salipunya. 10Butu jelamo ri tempo mpapupu wua anggoro, napokaumo ntumpu bonde setu toporiokonya mampomberataka waʼa ntopotetala ri bonde setu da mamperapi tilanya. Paikanya waʼa ntopotetala ri bonde setu mabobaki toporioko setu nepa napokau mewalili soe-soe pale. 11Napokau woʼu ntumpu bonde setu toporiokonya anu ntaninya; paikanya toporioko setu nabobaki woʼu ntopotetala ri bonde, najeani nepa napokau mewalili soe-soe pale. 12Ungka lairia napokau woʼu ntumpu bonde setu toporiokonya anu katatogo ncuncunya. Paikanya toporioko setu seʼe nabobaki ntopotetala ri bonde setu, napungu nepa natendeka ri sambaliku bonde setu. 13Monawa-nawa tumpu bonde anggoro setu, natoʼo ri rayanya, ‘Moruana da kupokaumo anaku anu kupotowe? Ane nakita ntau seʼe anaku, manoto da natubunaka.’ 14Paikanya butu nakita waʼa ntopotetala bonde setu ana ntumpu bonde setu, napombetoʼoka ntau seʼe, ‘Siʼamo seʼi tumpu mpanta. Iomo tapampepate, da naka kitamo mampotumpu pantanya.’ 15Ana ntumpu bonde setu nanoʼo ntau seʼe ri sumbi bonde nepa napepate njairia.”

Roo setu ndapeoasi i Yesu, “Mewali ane mewalili tumpu bonde setu, ewambeʼimo da napampowia waʼa ntopotetala bonde setu? 16Manoto da rata siʼa mampepate waʼa ntopotetala setu, nepa da napepombaika bonde setu ri waʼa ntopotetala anu ntaninya.”

Padonge ntau seʼe pompau i Yesu ewanceʼe natoʼo, “Neʼe kojo ewanceʼe!”

17 # Pol. 118:22 Ndapatomata i Yesu tau seʼe nepa ndatoʼoka, “Ane ewanceʼe nunjaa posokinya anu ndaʼuki ri Sura Magali anu mantoʼo,

‘Watu anu bareʼe napake waʼa mpande, mewalimo watu nono ntongonya.’

18Pura-pura tau anu manawu mampere watu setu da malesa; pai bara isema anu napere mbatu setu da masana mewali awu.”

Kono pabayari asele

20:19-26

(Mat. 22:15-22, Mrk. 12:13-17)

19Naepe ndayamo waʼa guru agama pai waʼa ntadulako ntadu mpanyomba nuntu mporapa anu ndapau i Yesu setu katauseʼenya katudunya. Da rayamo kojo ntau seʼe da mancoko Sira ri tempo setu, paikanya maeka raya ntau seʼe ri tau sondo. 20Napepali ntau seʼe tempo anu madago. Nasaro ntau seʼe tau da malulu i Yesu, da mokira-kira ewa tau madago, natotorakaka tau seʼe pau anu da napeoasi ri Yesu, da nakareʼe kasala mpesonoa; pai da napampogiluka Sira ri to Poparenta. 21Mompeoasimo waʼa ntau ndasaro setu ri Yesu, natoʼo, “Guru, kaincani pura-pura anu Ndipau pai anu Ndipaguruka tau paka anu monco. Kaincani woʼu Komi bareʼe mampilisi lio ntau, paikanya nditujuka tau ri gori ngkamonconya pepokono i mPue Ala. 22Mewali, koisa da Nditoʼoka kami, malulu songka agamata, bara maya tau da mabayari asele ri Datu bara bareʼe?”

23Ndaincani i Yesu pokira-kira ntau seʼe, pai ndapantoʼo, 24“Nditujuka Yaku doi salaka sangkomba. Teke pai toʼo incema inceʼi?”

Mesono tau seʼe, “Teke pai toʼo i Datu!”

25Ndatoʼo i Yesu ri tau seʼe, “Ane ewanceʼe, waika i Datu anu i Datu; pai waika i Pue Ala anu i mPue Ala.”

26Tongawa bareʼe nakoto ntau seʼe manawusaka i Yesu ri suara ntau sondo, ja sanjii tau seʼe pura-pura jingkimo rayanya madonge waʼa mpesono i Yesu.

Kono pembangu ungka ri kapate

20:27-40

(Mat. 22:23-33, Mrk. 12:18-27)

27 # Pwn. 23:8 Reʼe bara tesangkuja to Saduki (tau seʼe bareʼe naaya katuwu muni ntau mate) mompeoasi ri Yesu, 28#Paw. 25:5 “Guru, reʼe ndaʼuki ri songka i Nabi Musa: Ane reʼe sambaʼa tuama anu morongo mate pai bereʼe ananya, tuaʼinya da mamporongo bemba ntukakanya da naka reʼe ananya gala ntukakanya anu matemo. 29Reʼe papitu tau sangkompo. Anu tukaka morongo, mate bereʼe ananya. 30Ungka lairia anu karadua mamporongo bemba ntukakanya, paikanya sia seʼe mate bereʼe ananya. 31Ewanceʼe seʼe anu katatogo nakarataka ri anu kapapitu. 32Kapusanya mate woʼu weʼa setu. 33Ri tempo mpembangu muni ntau mate, isemamo da mamporongo weʼa setu? Maka mamporongo siʼa.”

34Mesono i Yesu, “Waʼa ntau anu tuwu wawaseʼi morongo, 35paikanya, waʼa ntau anu mate pai sintinaja ndapatuwu muni ungka ri kapate, pai datuwu ri tempo anu darata, tau seʼe morongo. 36Tau seʼe da tuwu ewa malaʼeka, pai bareʼemo da mate. Tau seʼe da mewali waʼa ana i mPue Ala, maka roomo ndawali mpatuwu muni ungka ri kapatenya. 37#Pa. 3:6 Sako i Nabi Musa yonto napangantoʼo tau mate da ndawali mpatuwu muni. Ri pangaʼukinya apu anu melangga ri yopo ngura natoʼo, ‘I Pue Ala, Pue i Burahima, Pue i Saki pai i Yako.’ 38Pue Ala, Sira banya Pue ntau mate! Paikanya Sira Pue ntau anu tuwu! Maka pura-pura tau tuwu anu i mPue Ala.”

39Natoʼo waʼa guru agama, “Guru mayoa mpodago pesonomi.” 40Nceʼe puʼunya painaka bareʼemo nataha ntau seʼe mampeoasi bara nunjaa-njaa ri Yesu.

Kono Mokole Tadungkadago

20:41-44

(Mat. 22:41-46, Mrk. 12:35-37)

41Ndapeoasi i Yesu ri tau seʼe, “Ara ewambeʼi pai ndapantoʼo Mokole Tadungkadago makumpu i Daudi? 42#Pol. 110:1 Ntanoka sako i Daudi naʼuki ri suranya,

‘I Pue mantoʼoka Pueku,

Potundamo ri tondo mokana-Ku,

43rantani kupapeʼuru waʼa

iwali-Mu ri Siko.’

44Mewali ane sako i Daudi mantoʼo Mokole Tadungkadago setu, ‘Pue’, ewambeʼi da pewalinya Sira muli i Daudi?”

Patiendo da naka mainga-inga mancuaraki waʼa guru agama

20:45-47

(Mat. 23:1-36, Mrk. 12:38-40)

45Sindara tau sondo mampedongeka potuntu i Yesu, ndatoʼoka waʼa anaguru-A, 46#Luk. 11:43 “Da mainga-ingamo mancuaraki waʼa guru agama. Napokono ntau seʼe melinja-linja mampake juba marate pai napokono ndatubunaka ri pasari. Ri banua mpekakai pai ri posusa napokono ntau seʼe motunda ri waʼa mpotunda anu meawa. 47Tau seʼe mantengosi waʼa mbeʼa bemba nepa narampa banuanya. Pai da mangkaʼuwi kajaʼa mpowia ntau seʼe setu, napakaʼai karate mpekakai ntau seʼe! Da manee huku ntau seʼe!”

Currently Selected:

LUKASI 20: LAIPMF

Highlight

Copy