LUKASI 23
23
I Yesu ri suara i mPilatu
23:1-5
(Mat. 27:1-2,11-14, Mrk. 15:1-5, Yoh. 18:28-38)
1Meokomo waʼa ntau mogombo setu pura-pura, nepa nakeni i Yesu ri suara i mPilatu. 2Njairia natepuʼumo ntau seʼe mantuluri Sira. Natoʼo ntau seʼe, “Kami marata tau seʼi malinguni raya ntau sondo. Siʼa mantundeki tau da naka neʼe mabayari asele ri Datu, maka natoʼo siʼa inceʼemo i Kerisitu, sambaʼa mokole.”
3Nepa meoasi i Pilatu ri Yesu natoʼo, “Monco kojo siko mokole nto Yahudi?”
Mesono i Yesu ndatoʼo, “Ewancetu pantoʼomu.”
4Pai napantoʼo i mPilatu ri waʼa ntadulako ntadu mpanyomba sangkani pai waʼa ntau sondo setu, “Bereʼe kurata mau sambaʼa ri tau seʼi anu da ndahukuka siʼa.”
5Paikanya jana pakaroso ntau seʼe mantoʼo, “Pai pompagurunya, siʼa mantundeki tau ri samalele Yudea; riu-riunya siʼa ri Galilea, pai wawaseʼi jelamo woʼu ireʼi.”
I Yesu ri suara i Herode
23:6-12
6Padonge i mPilatu pau ntau setu, meoasi siʼa natoʼo, “Ara tau seʼi to Galilea?” 7Butu naincani kaʼi Yesunya setu ungka daera anu reʼe ri ara mparenta i Herode, napokau i mPilatu i Yesu ndakeni ri Herode, anu sindara setu njau woʼu ri Yerusale. 8Mawongko kojo raya i Herode ri pangkitanya i Yesu, maka lawi masaemo napadonge bambari-A da rayanya mangkita Sira. Napomata-mata da mangkita tanda ngkuasa anu da ndatuju i Yesu. 9Inceʼe puʼunya painaka maria anu napeoasi ri Sira, paikanya bareʼe liu-liu mesono i Yesu. 10Waʼa ntadulako ntadu mpanyomba pai waʼa guru agama njau woʼu njairia maʼai napantuluri i Yesu. 11I Herode pai waʼa ncurodadonya mampasinggiri pai mempetikodi i Yesu, nepa napatakaka Sira rengko ngkamokole, roo setu nepa napapewalili Sira ri Pilatu. 12Ri eo setu seʼe mobalemo i Herode pai Pilatu anu i wungkaeo moʼiwali ri raya.
I Yesu ndabotusi da ndapepate
23:13-25
(Mat. 27:15-26, Mrk. 15:6-15, Yoh. 18:39–19:16)
13Napasambaka i mPilatu waʼa ntadulako ntadu mpanyomba, waʼa ntopombawanaka, pai tau sondo, 14nepa natoʼoka tau seʼe, “Komi mangkeni tau seʼi ri yaku pai nditoʼo siʼa mangalinguni waʼa ntau. Seʼi-seʼi roomo kuparesa siʼa ri suarami, paikanya bareʼe liu-liu kurata mau sangaya jaʼa ewa anu nditulurika siʼa. 15Ewanceʼe seʼe pantoʼo i Herode, maka siʼa woʼu roomo mampapewalili i Yesu setu ri yaku. Tau seʼi, bareʼe mawianaka mau sangaya anu sintinaja siʼa ndahuku pai ndapepate. 16Inceʼe painaka tau seʼi da kutabasi roo setu nepa kulapa.”
[17Sangkani-sangkani posusa eo Pasa, i Pilatu sangaya-ngaya da malapa sambaʼa tau anu ndatarunggu malulu perapi ntau sondo.] 18Pura-pura tau anu njau mompasambaka njairia meboo, “Pepate siʼa! Lapaka kami i Baraba!” (19I Baraba anu ndatarunggu setu, siʼa topojampa pai ua mepepate.)
20Pepokono i mPilatu da mangalapa i Yesu, inceʼe painaka mompau woʼu siʼa sangkani ri tau sondo setu. 21Paikanya maboo-boo tau seʼe natoʼo, “Paku ri kaju ndapanggo siʼa! Paku ri kaju ndapanggo siʼa!”
22Katatogo ngkaninya i Pilatu mompau ri tau seʼe, “Paikanya nunjaa salanya? Yaku bereʼe kurata mau sangaya salanya anu sintinaja siʼa ndahuku pai ndapepate! Yaku da mangantabasi siʼa, nepa kulapa siʼa.”
23Paikanya janaʼaiwaka ntau seʼe maboo-boo gori ngkarimbonya mantoʼo i Yesu sangaya-ngaya da ndapaku ri kaju ndapanggo. Kapusanya menangimo tau seʼe. 24Nabotusi i mPilatu popahuku mate ri Yesu, silulu pai pepokono waʼa ntau setu, 25pai mangalapa sambaʼa tau anu naperapi ntau seʼe, inceʼemo tau anu ndatarunggu ua pojampa pai pepepate. Roo setu napepombaikamo i Yesu ri tau seʼe da napampowia malulu pepokono ndaya ntau seʼe.
I Yesu ndapaku ri kaju ndapanggo
23:26-43
(Mat. 27:32-44, Mrk. 15:21-32, Yoh. 19:17-27)
26Nakenimo ntau seʼe i Yesu. Ri yae njaya, simpadopa tau seʼe pai tau sambaʼa toʼonya i Simo, to Kirene, anu nepa tepesua ri raya ngkota. Nasoko ntau seʼe siʼa, nepa nariso ntau seʼe siʼa mampasaʼa kaju ndapanggo setu mantonda i Yesu.
27Sondo tau anu melinja mantonda i Yesu – ri oyo ntau setu reʼe woʼu bara tesangkuja weʼa. Waʼa mbeʼa setu mantangisi pai mangkukuousi i Yesu. 28Paikanya ndapeeli i Yesu tau seʼe ndatoʼo, “Ee waʼa mbeʼa nto Yerusale! Neʼemo nditangisi Yaku. Nditangisika koromi ngkaliomi sangkani pai waʼa anami. 29Maka maʼi temponya da rata da natoʼo ntau, ‘Ara morasisa waʼa mbeʼa anu bereʼe katiananya, anu bereʼe poananya pai bereʼe napampasusu ongaa!’ 30#Hos. 10:8, Pepat. 6:16 Ri tempo setumo da napantoʼo ntau ri waʼa buyu, ‘Peremo kami!’ Pai ri waʼa mpongku ntana, ‘Ndiiwunimo kami!’ 31Maka ane sako ri kaju anu ntongo tuwupa, napowiamo ntau ewanceʼi nunjaa woʼu anu da napowia ntau seʼe ri kaju anu mangaumo!”
32Reʼe woʼu radua tau ntaninya – tau radua setu tau majaʼa – anu nakeni ntau seʼe da ndahuku mate sangkani-ngkani pai Yesu. 33Kajela ntau seʼe ri pongkuntana anu ndapapotoʼo, “Takumboʼo”, napakumo ntau seʼe ri kaju ndapanggo i Yesu pai tau majaʼa radua setu – sambaʼa tau ri tondo mokana pai anu sambaʼa tau woʼu ri tondo mokaii i Yesu. 34#Pol. 22:19 Nepa mekakai i Yesu ndatoʼo, “Papa, neʼemo ndikitanaka powia ntau seʼe! Maka bareʼe naincani nunjaa anu napowia ntau seʼe.”
35 #
Pol. 22:8
Njairia ndaʼundi pampotila-tila ntau seʼe rengko i Yesu. Waʼa ntau anu mekakore njairia mampepeoleka, sindara waʼa ntadulako nto Yahudi mampasinggiri i Yesu, natoʼo, “Siʼa roo mancorepaka tau ntaninya; koisa seʼi-seʼi siʼa da mancorepaka koronya ngkalionya, ane monco kojo siʼa Mokole Tadungkadago anu ndapilisi i mPue Ala!”
36 #
Pol. 69:22
Waʼa ncurodado woʼu mampasinggiri Sira. Maʼi tau seʼe mawaika Sira anggoro mapodi 37seʼi natoʼo, “Ane monco siko mokole nto Yahudi, sorepakamo koromu!”
38Ri tondo powoʼo ngkaju ndapanggo i Yesu, teʼuki pau anu ewaseʼi: “Seʼimo Mokole nTo Yahudi”.
39Sambaʼa ri tau majaʼa anu ndapaku ri kaju ndapanggo setu mampetikodi i Yesu. Natoʼo, “Siko lawi Mokole Tadungkadago. Mewali, sorepakamo koromu pai kami!”
40Paikanya tau majaʼa anu sambaʼa woʼu manceko yununya setu, natoʼo, “Ara siko bareʼe nupokaeka i Pue Ala? Siko siwia-wia ndahuku mate ewa Sira. 41Podo hukuta kita radua sintinaja woʼu pai powiata. Paikanya Sira bereʼe liu-liu salaa!” 42Nepa natoʼo, “Yesu, ndiendo-endo yaku, ane jela Komi ewa Mokole!”
43Ndatoʼo i Yesu ri siʼa, “Sandeme seʼi siko da sangkani-ngkani pai Yaku ri Paradesi.”
Kapate i Yesu
23:44-49
(Mat. 27:45-56, Mrk. 15:33-41, Yoh. 19:28-30)
44Tempo-temponya tinti sampuyu pai radua ntongo ndeme, reme bareʼe merara, painaka wanimo sambawo ntana rata ri tinti tatogo lauka reme. 45#Pa. 26:31-33 Ayapa oyoti anu teloeka ri raya Banua i mPue, masia tetila radua. 46#Pol. 31:6 Nepa meboo i Yesu marimbo oni nganga-A ndatoʼo, “Papa! Ri dodo mpalemi Kupantambusaka koro-Ku!” Karoonya mompau ewancetu, puramo inosa-A.
47Pangkita ntadulako ncurodado setu nunjaa anu mewalimo, naunde i Pue Ala. Nepa natoʼo, “Monco kojo, Sira bareʼe masala!”
48Tau sondo anu rata njairia da mampeole, mangkita nunjaa anu tepewali setu. Tau seʼe pura-pura mewalili pai maʼai kojo poncosoi ndayanya. 49#Luk. 8:2-3 Pai pura-pura tau sampombeincani i Yesu, tesua waʼa mbeʼa anu malulu Sira ungka ri Galilea, njau mekakore metada-tada lawa mangkita pura-pura setu.
Pangadayo i Yesu
23:50-56
(Mat. 27:57-61, Mrk. 15:42-47, Yoh. 19:38-42)
50-51Reʼe sambaʼa tau toʼonya i Yusu, tau ungka ri kota Arimatea ri tana Yudea. Siʼa sambaʼa tau madago raya pai natubunaka ntau, pai anu ntongo mampopea temponya da pontepuʼu i mPue Ala moparenta ewa Mokole. Mau siʼa sambaʼa anggota Majalisi Agama, paikanya siʼa bareʼe sintuwu pai botusi pai powia majalisi setu. 52I Yusu seʼi njoʼu mancuara i Pilatu, mamperapi da naka ndawaika siʼa watangkoro i Yesu. 53Ungka lairia natudumaka watangkoro i Yesu ungka ri kaju ndapanggo, nepa nasompunika pai ayapa lena. Roo setu nadika ri raya dayo anu ndapaʼati ri roka mbatu – dayo setu bareʼepa reʼe ndapangampake. 54Eo setu eo Alima; pai mosumo da pontepuʼu poʼeo Umapo.
55Waʼa mbeʼa anu rata pai Yesu ungka ri Galilea malulu i Yusu pai napangkita dayo setu. Nakita woʼu ntau seʼe ewambeʼi ndapadika watangkoro i Yesu ri raya dayo setu. 56#Pa. 20:10, Paw. 5:14 Roo setu mewalili tau seʼe, nepa napatoka waʼa rampa pai lana mawongi anu da ndalanaika watangkoro i Yesu.
Ri eo Umapo, meosa tau seʼe malulu padika agama.
Currently Selected:
LUKASI 23: LAIPMF
Highlight
Share
Copy
Want to have your highlights saved across all your devices? Sign up or sign in
