LUKASI 5

I Yesu mampeboo anaguru-A anu kaʼisa

5:1-11

(Mat. 4:18-22, Mrk. 1:16-20)

1 # Mat. 13:1-2, Mrk. 3:9-10, 4:1 Ri anu sangkani i Yesu mekakore ri wiwi nDano Genesare. Maria tau anu mambembejujuli da rayanya mampedongeka nuntu i mPue Ala. 2Ndakita i Yesu njau radua duanga mesonda; menaʼumo waʼa ntopebau ungka ri duanganya mawusoʼi jalanya. 3Mepone i Yesu ri duanga sambaʼa, inceʼemo duanga i Ncimo, nepa ndapokau i Simo da mantuko duanganya lawa sakodi ungka ri wingke. Motunda i Yesu ri raya duanga setu nepa mampaguru tau sondo.

4Roo mompaguru Sira, ndatoʼoka i Simo, “Wosemo tondo kayombunya, tendemo jalamu da nakareʼe bau.”

5 # Yoh. 21:3 Natoʼo i Ncimo, “Guru, kawengika majala bau sambengi ngena pai sako sambaʼa bereʼe anu kaleʼo! Paikanya ua Komi mampokau, io da kutende woʼu jalaku.” 6#Yoh. 21:6 Pantendenya jala maria kojo bau anu kono jalanya, nakeni ngkasondonya montepuʼumo masia jala ntau seʼe. 7Painaka napeboo waʼa yununya anu ri duanga ntaninya, da mampelae tau seʼe. Maʼimo waʼa yununya mauati bau ungka ri jala setu, buke radua duanga bau, sakodi lolobi duanga radua setu. 8Pangkita i Ncimo anu mewali setu, mombukotu siʼa manyomba ri suara i Yesu, natoʼo, “Ndipalaikamo yaku, Pue! Maka yaku seʼi tau anu masalaa!”

9I Simo sangkani pai pura-pura tau anu sangkani-ngkani pai siʼa, jingki rayanya mangkita kasondo bau anu kono jala. 10Ewanceʼe seʼe waʼa yunu i Ncimo, inceʼemo i Yakobu pai i Yohane waʼa ana i Ncebedeu. Ndatoʼo i Yesu ri Simo, “Neʼe maeka! Montepuʼu seʼi-seʼi siko da mewali topojala tau.”

11Naore i Ncimo pai waʼa yununya waʼa duanga setu ndeki lore nepa napalaika pura-puranya nalulumo i Yesu.

I Yesu mampakaʼosa tau ketangga

5:12-16

(Mat. 8:1-4, Mrk. 1:40-45)

12Ri anu sandeme i Yesu njau ri kota sambaʼa. Njairia reʼe sambaʼa tuama anu ketangga suma ngkoronya, maʼaimo kojo juʼanya setu. Jabutu nakita i Yesu, maʼimo siʼa mombukotu metutu ri suara i Yesu, merapi puru siʼa natoʼo, “Pue ane ndipokono, Ndikoto mampakaʼosa yaku.”

13Ndajama i Yesu tau setu ndatoʼo, “Kupokono, kaʼosamo!” Liu-liu osa juʼanya. 14#Tad. 14:1-32 Ndatoʼoka tau setu, “Neʼe boi nutoʼo-toʼoka tau anu mewali seʼi, paikanya palaimo tujuka tadu mpanyomba kaʼosamo ngkoromu setu, pai da nukenimo panyombamu malulu anu roo napatada i Musa, da mewali sambaʼa petondoni ri waʼa ntau kaʼosamo njuʼamu.”

15Paikanya bambari kono i Yesu jamaʼaimo katebambarinya ri mbeʼi-mbeʼi, painaka kakomaria-ria tau anu maʼi da mampedongeka pai mampekipakaʼosa juʼanya. 16Roo setu malaimo i Yesu njoʼu mekakai ri kabareʼenya reʼe tau.

I Yesu mampakaʼosa tau pungku

5:17-26

(Mat. 9:1-8, Mrk. 2:1-12)

17Ri anu sandeme ntongo mompaguru i Yesu, njau woʼu bara tesangkuja to Parisi pai waʼa guru agama motunda-tunda njairia. Waʼa ntau anu tepasambaka setu reʼe anu rata ungka ri Yerusale, ungka ri kota-kota ri Galilea pai Yudea. Tongawa kojo kareʼe ngkuasa i mPue ri Yesu pai ndapangkoto mampakaʼosa waʼa ntau majuʼa. 18Tempo setu ratamo bara tesangkuja tau anu mangkeni tau pungku anu moturu-turu ri alinya. Napari-pari ntau seʼe da mangkeni mpesua ri raya banua tau pungku setu da naka nadika ri suara i Yesu. 19Paikanya ua nakeni ngkasondo ntau bareʼe naleʼo ntau seʼe mesua ri raya banua. Inceʼe puʼunya painaka nakeni mpepone ntau seʼe tau pungku setu ri wawo ata banua setu. Nasungke ntau seʼe ata banua setu nepa nauyu ntau seʼe tau pungku setu sangkani pai alinya tudu ri suara i Yesu ri tongo ntau sondo. 20Pangkita i Yesu kabangke mpeaya ndaya ntau setu, ndatoʼoka tau setu, “Kasangkompo, salaamu bareʼemo ndakitanaka!”

21Waʼa guru agama pai waʼa nto Parisi, montepuʼu mapombetoʼoka, “Ara isema tau seʼi makoje mampetikodi Pue Ala? Isema anu da mangkoto bareʼe mangkitanaka salaa ane banya i Pue Ala ngkalio-A?”

22Ndaincani i Yesu pompeoasi ntau seʼe, pai ndapantoʼo, “Wenu painaka mompau-mpau ri rayami ewanceʼe? 23Mbeʼi anu meruu ngkasarunya: mangantoʼo, ‘Salaamu bareʼemo ndakitanaka,’ bara mangantoʼo, ‘Pembangumo pai pelinjamo?’ 24Paikanya seʼi-seʼi da kutujuka komi kamonconya ri wawo lino seʼi i Ana Manusia makuasa bareʼe mangkitanaka salaa.” Nepa ndatoʼo i Yesu ri tau pungku setu, “Pembangumo, pasaʼa alimu pai pewalilimo!”

25Liu-liu membangu tau pungku setu ri suara ntau seʼe pura-pura napasaʼa alinya, mewalili seʼi naunde i Pue Ala.

26Benge raya ntau seʼe mangkita; naunde ntau seʼe i Pue Ala. Maeka raya ntau seʼe pai napantoʼo, “Ndapojingki kojo pewalinya anu takita ri sandeme seʼi!”

I Yesu mampeboo i Lewi

5:27-32

(Mat. 9:9-13, Mrk. 2:13-17)

27Roo setu malaimo i Yesu, ndakita toponduru asele i Lewi toʼonya njau motunda-tunda ri kantoronya. Ndatoʼo i Yesu ri siʼa, “Lulumo yaku!” 28Meoko i Lewi napalaika kantoronya nalulumo i Yesu.

29Napareʼe i Lewi polimbu mangkoni ri banuanya, mampolimbuka i Yesu. Maria toponduru asele anu rata, pai tau anu ntaninya mangkoni sangkani-ngkani pai tau seʼe. 30#Luk. 15:1-2 Reʼe bara tesangkuja to Parisi pai waʼa guru agama, malente raya ntau seʼe mangkita pai napantoʼoka waʼa anaguru i Yesu, “Wenu painaka komi pura-pura molimbu mangkoni pai manginu pai toponduru asele pai waʼa ntau anu bareʼe madago?”

31Mesono i Yesu ndatoʼo, “Tau anu madonde bareʼe napapali sando, paikanya podo tau anu majuʼa. 32Kamaʼiku banya da mampeboo tau anu maepe koronya madagomo, paikanya waʼa ntau anu masalaa da naka naponcosoi waʼa ncalaa ntau seʼe.”

Kono popuasa

5:33-39

(Mat. 9:14-17, Mrk. 2:18-22)

33Natoʼo waʼa ntau ri Yesu, “Anaguru i Yohane pai anaguru nto Parisi maria ngkani tau seʼe mopuasa, paikanya waʼa anaguru-Mi mangkoni pai manginu.”

34Mesono i Yesu ndatoʼo, “Ara da ndikoto mampakapuasa waʼa nto popawawa ri sindara tau seʼe ntongo sangkani-ngkani pai tumpungkoro anu da ndawawa? Manoto bareʼe! 35Paikanya maʼipa temponya tumpu ngkoro tuama setu ndatima ungka ri oyo ntau seʼe. Ri tempo setu nepa da mopuasa tau seʼe.”

36Nepa ndapau i Yesu nuntu mporapa seʼi ri tau seʼe ndatoʼo, “Bereʼe tau anu mantamba baju anu masae pai santai ayapa ungka ri baju anu dawoʼu. Maka siʼa mampakasiamo baju anu dawoʼu setu. Pai lawi ayapa mpontamba anu dawoʼu setu bareʼe singkono pai baju anu matuʼamo. 37Ewanceʼe seʼe bereʼe tau anu mangantawa anggoro dawoʼu ri watutu pela anu matuʼa, maka anggoro anu dawoʼu setu da mampapebote watutu setu. Painaka anggoronya tebubu pai watutunya majaʼa. 38Anggoro anu dawoʼu sangaya-ngaya da ndatawa ri watutu anu dawoʼu woʼu. 39Ewanceʼe seʼe bereʼe tau anu mampokono mainu anggoro dawoʼu ri karoonya mainu anggoro anu masae. Natoʼo, ‘Anggoro masae setu meruu ponyaminya.’ ”

Currently Selected:

LUKASI 5: LAIPMF

Highlight

Copy