LUKASI 6
6
Pompeoasi kono eo Umapo
6:1-5
(Mat. 12:1-8, Mrk. 2:23-28)
1 #
Paw. 23:25
Sangkani ri eo Umapo sindara i Yesu melempo ri tongo bonde gandu, waʼa anaguru-A mampurusi wua gandu. Nawalijojo ri palenya nepa nakoni. 2Bara tesangkuja to Parisi manceko tau seʼe natoʼo, “Makuja komi mancapu waʼa ncongka agamata, mampowia anu kapali ri eo Umapo?”
3 #
1 Sem. 21:1-6
Mesono i Yesu ndatoʼo, “Ara bareʼepa ndibasa anu napowia i Daudi ri tempo siʼa pai waʼa ntaunya da yogamo? 4#Tad. 24:9 Siʼa mesua ri Banua i mPue mantima roti anu roo ndapanyombaka ri Pue Ala, nakoni nepa natilaka woʼu waʼa yununya. Ntanoka roti setu malulu songka agamata podo waʼa tadu mpanyomba anu maya da mangkoni.”
5Nepa ndatoʼoka tau seʼe, “I Ana Manusia makuasa ri eo Umapo!”
Tau anu kape palenya sambali
6:6-11
(Mat. 12:9-14, Mrk. 3:1-6)
6Ri anu sandeme kono eo Umapo anu ntaninya, i Yesu njoʼu mompaguru ri banua mpekakai. Njairia njau tau anu kape palenya sambali. 7Bara tesangkuja guru agama pai to Parisi anu da mampepali kasala i Yesu da naka naleʼo ntau seʼe mampogiluka Sira. Mewali naole-oleka ntau seʼe bara da ndapakaʼosa tau setu ri eo Umapo. 8Paikanya ndaincani i Yesu nawa-nawa ntau seʼe setu. Inceʼe painaka ndatoʼoka tau anu kape palenya setu, “Maʼi pekakore ireʼi ri suara!” Membangu tau setu nepa mekakore njairia. 9Roo setu meoasi i Yesu ri waʼa ntau anu njau njairia ndatoʼo, “Malulu agama, nunjaa anu maya tapowia ri eo Umapo? Mampowia anu madago bara mampowia anu majaʼa? Mancorepaka tau bara mampakarugi?” 10Ndapapowawo i Yesu tau seʼe pura-pura, nepa ndatoʼoka tau setu, “Laenakamo palemu.” Nalaenaka ntau setu palenya, osamo kojo palenya.
11Paikanya waʼa guru agama pai waʼa nto Parisi setu maʼai kajaʼa ndayanya, natepuʼumo ntau seʼe magombo kono nunjaa anu naleʼo ntau seʼe mampowia ri Yesu.
I Yesu mampilisi anaguru-A sampuyu pai radua
6:12-16
(Mat. 10:1-4, Mrk. 3:13-19)
12Ri tempo setu mandake i Yesu ri sambaʼa pongkuntana, njairia pekakaia ri Pue Ala rantani mareme. 13Mesindimo reme, ndapeboo waʼa ntau anu malulu Sira, nepa ndapilisi sampuyu pai radua tau mewali anaguru-A anu ndapapotoʼo waʼa Ncuro. Seʼimo toʼo ntau seʼe, 14I Simo (anu ndapapotoʼo woʼu i Peturu), pai i Andaria kasangkomponya, i Yakobu, i Yohane, i Pilipu, i Batolomeu, 15i Matiu, i Toma, i Yakobu ana i Alipiu, i Simo (anu ndatoʼo Pomakoje). 16I Yudasi ana i Yakobu pai i Yudasi to Karioti anu ripurinya mampobalu i Yesu.
I Yesu mompaguru pai mampakaʼosa tau majuʼa
6:17-19
(Mat. 4:23-25)
17Mobalungkemo Sira sangkani-ngkani pai waʼa ncuro setu; nepa meʼonto mekakore ri kalenenya. Njairia tepasambakamo waʼa anaguru-A anu sondo, narangani woʼu waʼa ntau anu ungka ri Yudea, pai ungka ri Yerusale, ungka ri Tiru pai Sidoni anu ri wiwi ntasi. 18Waʼa ntau setu rata da mampedongeka pompaguru i Yesu, pai mampekipakaʼosa waʼa njuʼa ntau seʼe. Ewanceʼe seʼe waʼa ntau anu napesuaki inosa majaʼa ndapakaʼosa. 19Waʼa ntau setu mampari-mpari da mantimosuki i Yesu, da napaleʼo majama Sira, maka reʼe kuasa anu mesuwu ungka ri Sira anu da mampakaʼosa tau seʼe pura-pura.
Wongko ndaya pai pari ndaya
6:20-26
(Mat. 5:1-12)
20Ndapatomata i Yesu waʼa anaguru-A nepa ndatoʼo,
“Yontomo kalindo ndayami waʼa ntau anu kaasi-asi,
maka komimo waʼa ntau i mPue Ala!
21Yontomo kalindo ndayami komi anu maoro wawaseʼi;
maka komi da ndapakabosu!
Yontomo kalindo ndayami komi anu motumangi wawaseʼi;
komi da mogele!
22 #
1 Ptr. 4:14
Yontomo kalindo ndayami komi ane napobanciika ntau komi, nairi, napasinggiri, pai napetikodi ua mamponcuruka i Ana Manusia! 23#2 Taw. 36:16, Pwn. 7:52 Maka waʼa nabi ipiamo woʼu napowia ewanceʼe woʼu. Ane tepewali anu ewanceʼe da ndipokawongko ndaya pai ndipoende ri wongko ndaya, maka bangkemo rasi anu ndapatokaka komi ri suruga.
24Paikanya, marugimo komi anu koreʼe wawaseʼi;
maka komi roomo ndiepe kadago ngkatuwu!
25Marugimo komi anu mabosu wawaseʼi;
maka komi da yoga!
Marugimo komi anu mogele-gele wawaseʼi;
maka komi da mapari rayami pai motumangi!
26Marugimo komi, ane pura-pura tau maundemo komi; maka ewanceʼe seʼe waʼa ntau piamomi owi maunde-unde waʼa nabi anu kambamba-mbamba.”
Towe ri iwali
6:27-36
(Mat. 5:38-48, 7:12a)
27“Paikanya ri waʼa ngkomi anu madonge pauku seʼi, kutoʼka komi: Pokapurumo waʼa iwalimi pai powiamo dago ri waʼa ntau anu mampobanciika komi. 28Ndidoncomo tau anu mantadeasi komi, pai ndipekakaika tau anu mampowia jaʼa ri komi. 29Ane natoposaka ntau pidimu sambali, papaliuka napantoposaka woʼu pidimu anu sambali. Ane narampa ntau jubamu waika woʼu bajumu. 30Ane naperapi ntau bara nunjaa-njaa ri komi, waika, pai ane anumi narampa, neʼe ndiwalintima. 31#Mat. 7:12 Ndipowiamo ri tau ntaninya ewambeʼi anu ndipodaraya da napowiaka ntau seʼe komi.
32Ane komi podo mampotowe tau anu mampotowe komi, nunjaamo poyowenya? Maka tau anu masala seʼe napotowe waʼa ntau anu mampotowe tau seʼe! 33Pai ane komi podo mampowia anu madago ri waʼa ntau anu mampowia dago nunjaamo peruunya? Maka tau masala seʼe mowia ewanceʼe woʼu. 34Pai ane komi podo mampapasaboka doi ri waʼa ntau anu mangkoto da mampapewalili, nunjaamo yowenya? Maka tau masalaa seʼe mampapasaboka doi ri tau masala, nepa naperapi muni! 35Kamonconya banya ewanceʼe! Komi da kadagonya sangaya-ngaya da mampotowe iwalimi pai da mampowia anu madago ri tau seʼe. Da ndiwaika tau moncabo pai bareʼe mampomata-mata da napampapewalili muni. Ane ewanceʼe da bangke saromi pai komi da mewali Ana i mPue Ala Anu Ndate ri Peawanya. Maka i Pue Ala madago raya ri tau anu bareʼe maincani montarima kase, pai ri tau anu majaʼa woʼu. 36Mbolimo komi da tuwu ri kapande mporaya ewa Papami woʼu kapande ndaya-A!”
Mangabotusi tau
6:37-42
(Mat. 7:1-5)
37“Neʼemo mangabotusi tau ntaninya, da naka komi woʼu bareʼe ndabotusi i mPue Ala. Neʼe kojo mangahuku tau ntaninya, da naka komi bareʼe ndahuku i mPue Ala. Neʼemo ndikitanaka tau ntaninya, da naka i Pue Ala woʼu bareʼe mangkitanaka komi.
38Pombaimo ri tau ntaninya, da naka i Pue Ala woʼu mombai ri komi; komi da mantarima pombai anu gana-gana anu roo ndabanga mariso-riso tilami. Maka pobanga anu ndipake ri tau ntaninya, inceʼe seʼe da ndapake i mPue Ala ri komi.”
39 #
Mat. 15:14
Roo setu ndapau woʼu i Yesu sambaʼa porapa ri tau seʼe ndatoʼo, “Ane rapanya tau buta da manini tau buta, manoto radua-duamo seʼe da manawu ri jaya ue. 40#Mat. 10:24-25, Yoh. 13:16, 15:20 Bereʼe anaguru anu da meruu ungka ri gurunya. Paikanya ane matamamo pegurunya podo da mewali siwia pai gurunya.
41Ara wenu yosa pangkitami sanceso kodi kaju ri mata ngkasangkompomi, paikanya saowo sobo ri matamu ngkaliomu bareʼe yosa pangkitamu? 42Ewambeʼi da ndipangkoto mantoʼoka kasangkompomi, ‘Maʼi da kupayalika siko ampuli ri matamu setu,’ ntanoka ri matamu ngkaliomu njau sobo anu bareʼe nukita? Ee waʼa ntau toponggoli-nggoli! Yali riunya sobo saowo ri matamu. Nepa da yosa pangkitami da mayali ampuli ri mata ngkasangkompomu.”
Puʼu ngkaju pai wuanya
6:43-45
(Mat. 7:16-20, 12:33-35)
43“Puʼu ngkaju anu malimbokori katuwunya bareʼe da mampowuaka wuanya anu majaʼa. Ewanceʼe seʼe puʼu ngkaju anu bareʼe madago katuwunya, bareʼe da mampowuaka wuanya anu madago. 44#Mat. 12:33 Sampuʼu-sampuʼu kaju da ndaincani ri potaʼa mbuanya. Maka taramanu bareʼe da mampowuaka jambu, pai lokaya bareʼe da mampowuaka anggoro. 45#Mat. 12:34 Ewanceʼe seʼe tau anu madago da tongawa ri waʼa mpowianya anu madago, maka ri rayanya buke pai dago. Tau anu majaʼa da tongawa ri powianya anu majaʼa, maka lawi ri rayanya buke-buke pai jaʼa. Maka nunjaa anu napasowa ri ngujunya inceʼemo anu mesampo ungka ri rayanya.”
Topombangunaka banua anu loʼe pai topombangunaka banua anu tengo
6:46-49
(Mat. 7:24-27)
46“I wenu painaka komi mampeboo Yaku, ‘Pue, Pue,’ paikanya bareʼe ndiwianaka nunjaa anu Kutoʼoka komi? 47Ewa isema anu da tapasiwiaka waʼa ntau anu maʼi ri Yaku, anu mampedongeka pau-Ku pai nawianaka? – Mbolimo da Kutujuka komi –. 48Siʼa setu ewa tau anu mawangu banua, nakae loʼu-loʼuka, nepa napatunda nono watu. Ri sindara pouja mesampo koro ue, narumpa banua setu paikanya bareʼe molengko maka maroso kojo potunda nononya. 49Paikanya tau anu madonge pau-Ku pai bareʼe nawianaka inceʼemo ewa tau anu mawangu banua paikanya bareʼe napatunda ri watu. Ane narumpa ue mowo liu-liu madungka banua setu; maʼai kojo kajaʼanya.”
Currently Selected:
LUKASI 6: LAIPMF
Highlight
Share
Copy
Want to have your highlights saved across all your devices? Sign up or sign in
