LUKASI 7
7
I Yesu mampakaʼosa anamayunu i ntadulako ncurodado nto Roma
7:1-10
(Mat. 8:5-13)
1Butu roomo ndatotoraka pura-pura setu ri waʼa ntau sondo, malaimo i Yesu njoʼu ri Kapenau. 2Njairia njau tadulako ncurodado nto Roma anu mampotumpu anamayunu anu maʼai napampotowe. Anamayunu setu majuʼa maʼai da matemo. 3Ri padonge ntadulako ncurodado setu kono i Yesu, napokaumo bara tesangkuja tau tadulako nto Yahudi njoʼu ri Sira da mamperapi naka maʼi Sira mampakaʼosa anamayununya. 4Karata ntau seʼe ri Yesu, merapi puru tau seʼe da naka Sira mantulungi tadulako ncurodado setu. Natoʼo ntau seʼe ri Yesu, “Tadulako ncurodado seʼi sintinaja da Nditulungi, 5maka siʼa mampokapuru bancata, siʼa mangawangukamo kami banua mpekakai.”
6Njoʼumo kojo i Yesu sangkani-ngkani pai tau seʼe. Butu mosumo i Yesu ri banuanya, napokau ntadulako ncurodado waʼa yununya madadu Sira da mangantoʼo, “Neʼemo ndipari-pari da maʼi ri banuaku. Maka yaku bareʼe sintinaja da mantarima Komi ri banuaku. 7Inceʼe puʼunya painaka yaku ngkalioku bareʼe kutaha da madadu komi. Mewali mauja nditoʼo songka da naka osa anamayunuku. 8Maka yaku woʼu medonge ri songka ntau anu kuporiwawo pai reʼe waʼa ncurodado anu kuporiara sangaya-ngaya da medonge ri songkaku. Ane kupokau sambaʼa surodado, ‘Palai!’ da malai siʼa; pai ane kutoʼoka anu ntaninya, ‘Maʼi ireʼi!’ da maʼi siʼa. Pai ane kusongka anamayunu, ‘Powia inceʼi!’ da napowia.”
9Jingki raya i Yesu madonge pau setu. Meeli Sira ndatoʼoka waʼa ntau anu sondo melulu ri Sira, “Kupojingki kojo tau seʼi. Ri oyo nto Isaraeli bareʼepa reʼe Kupampomberataka peaya ndaya anu ewanceʼi kabangkenya!”
10Tempo mpewalili waʼa ntau anu napokau setu ri banua ntadulako ncurodado setu, anamayunu setu osamo.
I Yesu mampatuwu muni ngalitau anu mate ri lipu Nai
7:11-17
11Bareʼe masae ungka lairia malaimo i Yesu njoʼu ri lipu Nai. Njoʼu woʼu anaguru-A pai waʼa ntau sondo melinja sangkani-ngkani pai Sira. 12Mosumo i Yesu ri baa-baa ngkota setu, simpadopamo pai waʼa ntau anu mampoaju tau mate mesuwu ungka ri kota. Anu mate setu sambaʼa ngalitau, siʼa ana sambaʼa-mbaʼa, inenya bembamo. Maria tau anu mangkeni tau mate setu, simpoyunu pai inenya. 13Pangkita i Yesu weʼa bemba setu, merata puru ndaya-A, ndaseko i Yesu ndatoʼo, “Neʼe motumangi ee inenya!” 14Ndatimosuki i Yesu kati ntau mate setu, ndajama, meʼontomo waʼa ntau anu mopakati. Nepa mompau i Yesu ndatoʼo, “Ee ngalitau, Kutoʼoka siko pembangu!” 15Membangu tau mate setu motunda, natepuʼumo mompau-mpau. Nepa ndapepombaika i Yesu ngalitau setu ri inenya. 16Meratamo eka ndaya ntau setu pura-pura naunde ntau seʼe i Pue Ala, natoʼo, “Jelamo ri oyota sambaʼa nabi anu bangke! I Pue Ala rata mancorepaka tau-A!”
17Tolelemo bambari kono i Yesu ri sambawo ntana Yudea pai ri waʼa lipu-lipu anu sampotenginya.
Pomokau i Yohane Topopariu
7:18-35
(Mat. 11:2-19)
18Napetumbumo waʼa anaguru i Yohane ri siʼa pura-pura anu mewali setu. Napeboo i Yohane anagurunya radua, 19napokau anagurunya radua setu njoʼu ri Yesu, da mampeoasi ri Sira, “Bara Komimo anu da rata setu malulu janji i mPue Ala, bara ntongo da kapopeapa tau ntaninya?”
20Njoʼumo kojo anaguru radua setu ri Yesu natoʼo, “I Yohane Topopariu mampokau kami da mampeoasi ri Komi, bara Komimo anu da jela seʼe malulu janji i mPue Ala, bara ntongo da kapopeapa anu ntaninya?”
21Sindara setu i Yesu ntongo mampakaʼosa tau majuʼa sondo mpodago, pai mairi waʼa inosa majaʼa, pai maria tau buta anu ndapakaʼosa. 22#Yes. 35:5-6, 61:1 Mesono i Yesu ndatoʼo, “Ndipewalilimo, ndipetumbuka i Yohane ungkanya anu ndikita pai anu ndidonge, tau buta yosamo matanya, tau pungku melinjamo, tau ketangga osamo, tau bongo nadongemo raoa, tau mate ndapatuwu muni pai tau kaasi-asi ndapetumbuka Nuntu ngKatuwu ungka ri Pue Ala. 23Morasimo tau anu bareʼe bata-bata rayanya ri Yaku.”
24Butu tepalaimo waʼa mpomokau i Yohane setu, ndatepuʼumo i Yesu mantotorakaka tau sondo kaʼisemanya i Yohane, ndatoʼo, “Komi njoʼu ri pada bone mampeole nunjaa? Bara podo morompa anu nawui-wui ngoyu? 25Komi njoʼu mampeole nunjaa? Sambaʼa tau anu morengko madolidi? Waʼa ntau anu morengko ewanceʼe pai anu gana-gana katuwunya maroo-roo ri langkanae! 26Mewali, nunjaa anu mesuwu ndipeole? Bara da mampeole sambaʼa nabi? Monco, siʼa meruu ungka ri sambaʼa nabi. 27#Mal. 3:1 Maka i Yohane seʼimo anu ndatangara ndaya ri raya Ncura Magali seʼi,
‘Inceʼimo pomokau-Ku,’ ndatoʼo i mPue Ala,
‘Da Kupokau siʼa mamporiuka siko,
da naka napatokaka siko jaya-Mu!’ ”
28Ndatoʼo woʼu i Yesu, “Da ndipaincani, ri lino seʼi bareʼepa reʼe tau anu meruu kabangkenya ungka ri Yohane Topopariu. Paikanya tau anu maʼai ngkakodinya ri oyo ntau i mPue Ala, meruu kabangkenya ungka ri Yohane Topopariu.”
29 #
Mat. 21:32, Luk. 3:12 Pura-pura tau-tesua pai waʼa ntoponduru asele anu njau madonge pompau i Yesu ewanceʼe, waʼa ntau seʼemo anu mawianaka pepokono mPue Ala pai roomo nariu i Yohane. 30Paikanya waʼa nto Parisi pai waʼa guru agama bareʼe malulu songka i mPue Ala anu da tila ntau seʼe. Tau seʼe bareʼe napokono nariu i Yohane.
31Nepa mompau woʼu i Yesu ndatoʼo, “Daʼewa nunjaa ndapaporapaka tau tuwu salapi seʼi? Daʼewa nunjaa tau seʼe? 32Tau seʼe ewa waʼa ananggodi anu motunda-tunda ri pasari; satobu meboo ri anu satobunya, ‘Kami seʼi mangayuka komi ngayu ngkawongko ndaya, paikanya bareʼe ndipokono motaro! Kapongayuka ngayu mpotau mate pai bareʼe ndipokono motumangi!’ 33I Yohane Topopariu rata – siʼa mopuasa pai bareʼe nainu anggoro – pai nditoʼo, ‘Siʼa napesuaki i majaʼa!’ 34Rata i Ana Manusia – siʼa mangkoni pai manginu, nepa nditoʼo, ‘Peole, tau setu! Manyanya, topoyangu-yangu, yunu ntoponduru asele pai waʼa ntau masalaa.’ 35Paikanya mau ewanceʼe; kaloʼe mPue Ala tongawa ri waʼa ntau anu mantarima Sira.”
I Yesu ri banua i Ncimo
7:36-50
36Reʼe sambaʼa to Parisi i Simo toʼonya mampeboo i Yesu da mangkoni ri banuanya. Jelamo kojo i Yesu ri banuanya, motundamo da mangkoni Sira. 37#Mat. 26:7, Mrk. 14:3, Yoh. 12:3 Ri kota setu reʼe sambaʼa weʼa anu bareʼe tumoro katuwunya. Padongenya i Yesu njau mangkoni ri banua nto Parisi setu, njoʼumo siʼa nakeni sambaʼa butolo watu lana wongi. 38Siʼa mekakore ri taliku mosu ri powiti i Yesu, seʼi motumangi siʼa ue matanya nayoʼosika witi i Yesu nepa napalisika wuyuanya, naeki witi i Yesu nepa nabubuka lana wongi. 39Pangkita nto Parisi anu mampeboo i Yesu anu mewali setu, natoʼo ri rayanya, “Ane monco tau seʼi sambaʼa nabi, sangaya-ngaya da naincani isema weʼa maisu koronya, weʼa sinjau tau anu tuwu ri raya ngkasalaa.”
40Mompau i Yesu ri Simo ndatoʼo, “Simo reʼe sangaya anu da kutoʼoka siko!”
Mesono i Simo natoʼo, “Nditoʼomo Guru!”
41Mesono i Yesu ndatoʼo, “Reʼe radua tau anu moinda ri topompapoana doi, anu sambaʼa moinda lima atu doi salaka, anu sambaʼa woʼu moinda lima mpuyu doi salaka. 42Tau radua setu bareʼemo nakoto da mabayari indanya, painaka napalisimo ntopompapoana doi indanya. Mewali isema ri oyo ntau radua setu anu maʼai da pampomawonya tau anu mampapoana doi setu?”
43Mesono i Simo natoʼo, “Malulu parata ndayaku manoto tau anu maʼai ngkasondo indanya anu ndapalisi.” Mesono i Yesu, “Monco parata ndayamu.” 44Nepa meole i Yesu ri weʼa anu bareʼe tumoro katuwunya setu, ndatoʼoka i Simo, “Nukitamo weʼa seʼi? Yaku nupeboo maʼi ri banuamu paikanya bereʼe ue nupatoka da Kumosoʼika witi-Ku; paikanya weʼa seʼi, ue matanya nawusoʼika witi-Ku nepa napalisika wuyuanya. 45Yaku rata bareʼe nueki, paikanya weʼa seʼi montepuʼu ungka ri karata-Ku bereʼe peʼontonya maeki witi-Ku. 46Siko bareʼe nububuka lana wongi woʼo-Ku, paikanya weʼa seʼi nabubuka lana wongi witi-Ku. 47Monco Kutoʼoka siko weʼa seʼi bareʼemo ndakitanaka salaanya mau bangke pai maria kojo, maka natujumo kabangke kojo ntowe ndayanya! Tau anu naepe sakodija salaanya, sakodija woʼu towe ndayanya.”
48Mompau i Yesu ri weʼa setu ndatoʼo, “Waʼa ncalaamu bareʼemo ndakitanaka!”
49Waʼa ntau anu njau motunda mangkoni sangkani-ngkani pai Yesu mombepeoasi natoʼo, “Ara isema tau seʼi anu mangkoto bareʼe da mangkitanaka salaa?”
50Paikanya mompau i Yesu ri weʼa setu ndatoʼo, “Peaya ndayamu ri Yaku mancorepakamo siko, pewalilimo ri karodo ndayamu!”
Currently Selected:
LUKASI 7: LAIPMF
Highlight
Share
Copy
Want to have your highlights saved across all your devices? Sign up or sign in
