Yôan 17
17
1Yesu kamba p’agamba miṉo, arômbiṉi yè antyo mè g’ôrôṽa, awulya inè:
Rera, igwèra ny’abyeṉi! Vendiz’ômwaṉi wo, k’ômwaṉi wo pendizo kè, 2ga nt’aveṉi wè yè inyanga g’ôzôṉe wôdu, inè, e ga v’em̃èṉo za koṉako gôre waôdu w’aveṉi wè yè. 3N’em̃èṉo za koṉako ze ziṉo inè, wi ga mye wè, awè Anyambyè mô ya rèti, n’ayè y’arôm̃yô wè, inè, Yesu‐Krist. 4My’are wè pendiza pa gô ntye yiṉo, my’are maza p’eṽilô z’aveṉi wè myè gô denda. 5Na vèṉo, Rera, vendiza myè gôre wèmè n’ivenda ny’avegagi na myè gôre wè ntye yiṉo lôṽyôgô ro.
6My’amyez’ini nyo gôr’aṉaga w’aveṉi wè myè avila gô ntye yiṉo. W’avegag’iwo, ko wè pa myè waô; na waô wi re penjavenja p’igambi nyo. 7Vèṉo wi re mya pa inè, isam̃u yôdu yi re wè pa pa myè yi pila gôre wè. 8Konde my’are pa pa waô agamba m’aveṉi wè myè; n’awongi waô mô, amya rèti inè, my’avili gôre wè; wi re bekelya pa kè inè, aw’arôm̃i myè. 9Mi kambiṉa g’ômwanji waô. Mi pa kambiṉa g’ômwanja wi ntye, ndô g’ômwanji waô w’awaṉi wè myè, konde waô iwo; 10yom̃i yam̃ yôdu iyo; n’iyo kè iyam̃; na my’are pendizô pa gôre waô. 11Mi zele nyèṉè gô ntye yiṉo, ndô waô wi re gô ntye, na mi bya gôre wè. Rera yi nkèrè, venjavenja waô w’aveṉi wè myè gw’ini nyo, ko waô dwaṉ’ôm’ômô ga nt’are zwè. 12Gw’avegagi myè na waô gô ntye yiṉo, my’avenjavenji waô gw’ini nyo. My’avenjavenji waô wi re wè pa pa myè, e zele pera p’ôma gôre waô, kaô ômwaṉa w’ôyilizô, ko Irèndo twa rèti. 13Ndô vèṉo mi bya gôre wè, n’abulya myè isam̃u yiṉo gô ntye yiṉo, ko igeṽi nyam̃ dwaṉizô gôre waô. 14My’are pa pa waô igambi nyo; n’aṽikyô waô ne ntye yiṉo, konde waô aranga mongi wi ntye yiṉo, ga nt’are myè arang’ôma wi ntye yiṉo. 15Mi pa kwen’inkolo inè, rômba waô avila gô ntye yiṉo, ndô inè, venjavenja waô avila gôr’ôm’ombe. 16Waô aranga mongi wi ntye yiṉo, ga nt’are myè arang’ôma wi ntye yiṉo. 17Mèpiza waô n’ôrèti wo: igambi nyo nyô n’ôrèti. 18Ga nt’arôm̃i wè myè gô ntye yiṉo, yeṉo arôm̃i myè waô kè gô ntye yiṉo. 19Mi mèpiz’ôkuṽi wam̃imè g’ômwanji waô, ko waô mèpizô kè n’ôrèti.
20Mi pa kwen’inkolo g’ômwanja w’aṉaga wiṉo dadyè, ndô g’ômwanja wa waô kè wi be bekelya myè v’igambi nyaô, 21inè, waôdu wi ga lwaṉ’ôm’ôm̃ô, ga nt’are wè, Rera, gôre myè, na myè gôre wè, ko waô dwaṉa kè ôm’ôm̃ô gôre zwè, ko ntye yiṉo bekelya inè, aw’arôm̃i myè. 22My’are pa pa waô ivenda ny’aveṉi wè myè, inè, wi ga lwaṉ’ôm’ôm̃ô ga nt’are zwè ôm’ôm̃ô, 23myè gôre waô, n’awè gôre myè, ko waô dwaṉizô ôm’ôm̃ô, ko ntye mya inè, aw’arôm̃i myè, na inè, ô re tonda pa waô ga nt’arondi wè myè. 24Rera, mi bela nè, waô wi re wè pa pa myè wi ga lwaṉe na myè gô mbôra yi re myè, ko waô jeṉ’ivendi nyam̃, ivenda nyi re wè pa pa myè, konde w’arondi myè ntye yiṉo lôṽyôgô ro. 25Rera y’ôgôre, ntye yi pa mya wè; ndô my’amyeṉi wè, na mongi siṉo kè w’amyeṉi nè, aw’arôm̃i myè. 26My’amyezi waô ini nyo, mi be myeza waô nyô, ko itonda s’arondi wè myè dwaṉa gôre waô, ko mi dwaṉa kè gôre waô.
Currently Selected:
Yôan 17: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
