Yôan 18

1Yesu bulya p’isam̃u yiṉo, agèndi yè n’iṉèngi yè gô ntye mori ya mw’ôloṽi wi fweyô inè, Kedron, mbôra mè y’avegagi ntyaga, n’ayingiṉi yè n’iṉèngi yè gô yô.

2Yudas, y’agôtizi yè, amyeṉi mbôra mèyoṉo kè, konde Yesu n’iṉèngi yè w’agèndagi gôgô inyongo sinyenge. 3Yeṉo Yudas, bonga pe nkondo y’isozè, n’aṉaga w’avenyô inyanga, n’imiṉisè impôlô, n’ifarisi gô kôte Yesu, w’aṽyeṉi vovo n’ilatoni, n’ijô n’imyanga y’igoṽi.

4Yesu amyeṉ’isam̃u y’arweṉi gô bya gôre yè; yeṉo agogwi yè, awulinya waô inè: Aṉwè buta mande? 5Awiṉizi waô yè inè: Yesu yi Nazarèt. Awulinyô waô ne Yesu inè: Myè ne yè. Ni Yudas, y’agôtizi yè, avegagi kè na waô. 6Gw’awulinyô waô ne Yesu inè: Myè ne yè, w’awinyi ni nyum̃a avôswa gô ntye.

7N’arô bambyi yè waô inè: Aṉwè buta mande? N’awulyi waô inè: Yesu yi Nazarèt. 8Awiṉizi Yesu inè: My’abulinya ṉwè inè, myè ne yè. Sambô j’aṉw’abuta myè, rigaṉi mongi siṉo kèndaga. 9Awulyi yeṉo, ko igamba ny’awulyô yè twa rèti inè: Gôre waô wi re wè pa pa myè, mi zele periza p’ôma vangaṉ’ôm̃ori.

10Simôn Pyère avegagi n’ôkwara w’iwora, agogunyi yè wô, agwère nyôngô yi miṉisè mpôlô, azèr’ôrôy wè ôṉôm̃yè nkwe. Ina nyi nyôngô mè ne Malkus. 11N’awulinyi Yesu Pyère inè: Wiz’ôkwari wo gw’egôrô. Imogi nyi re Rerè pa pa myè gô jonga my’ayonga nyô?

12Yeṉo nkondo y’isozè, n’egogi zaô, n’aṉaga w’arôm̃yô n’Iju, w’agôti Yesu aragè. 13N’alônge kèndizi waô yè gôr’Ana; avegagi ôgoy wi Kayita, avegagi miṉisè mpôlô ômpum̃a mèwoṉo. 14Kayifa wiṉo ne yè y’awulinyi Iju inè: Are mbya inè, ôm’ôm̃ori dadyè e ga yuwe g’ômwanja w’aṉaga.

15Simôn Pyère n’ôṉèngi ôm̃ori w’azôngi Yesu. N’ôṉèngi ôm̃ori mè amyenyô ne miṉisè mpôlô, n’ayingiṉi yè mpo mô ni Yesu gw’evungu zi miṉisè mpôlô; 16ndô Pyère arigaṉi gôre gw’igala pyèrè n’iguge. Ôṉèngi ôm̃ori mè amyenyô ne miṉisè mpôlô, agogwi, agamba n’ômwantô w’avenjavenj’ômpômbala inè, e ga yinginye Pyère. 17Vovo nyôngô nyantô y’avenjavenj’ômpômbala, awulinyi Pyère inè: Awè kè, arang’ôm̃ori w’iṉèngi y’ôma wiṉo? Awulyi yè inè: E zele, myè arang’ôṉèngi wè. 18Inyôngô n’aṉaga w’agôti Yesu w’avegagi vovo, w’aṽaki ebeke z’ôgôṉi, ayogo wô. Pyère agum̃aṉi kè na waô, ayogw’ôgôṉi.

19Miṉisè mpôlô agotagi Yesu g’ômwanja w’iṉèngi yè na g’ômwanja w’inènji sè. 20Awiṉizyô yè ne Yesu inè: My’are kamba pa n’aṉaga buku; my’aṉènjagi egômbe zôdu gô nagô yi soṉo na gô nagô y’Anyambyè, gw’aṽengaṉag’Iju waôdu, ndô mi pa kamb’ezom̃a ntyorya. 21Ô kota myè ntiṉa nde? Ṽambya waô wi re jogo pa myè nt’agambi myè na waô; vôna, aṉaga wiṉo w’avôrô isam̃u y’awulyô myè. 22Gw’awulyi Yesu agamba miṉo, ôm̃ori gôre mongi w’agôti yè avegagi vovo, awôli yè isapôga, awulya inè: Ô fwiṉize miṉisè mpôlô yeṉo? 23Awulinyô yè ne Yesu inè: Twa pa my’are kamba pe mbe, rakilye mbe mè yi re myè kamba pa, ndô ja my’are kamba pa mbyambye, ntiṉa nde yi bôlo myè?

24Vovo Ana arôm̃i yè tagô pa gôre Kayifa, yi miṉisè mpôlô.

25Ndô Simôn Pyère avegagi vovo, njogog’ôgôṉi. N’awulinyi waô yè inè: Awè kè, arang’ôm̃ori w’iṉèngi yè? Alandi yè, awulya inè: E zele, myè arang’ôṉèngi wè. 26Mori gôr’inyôngô si miṉisè mpôlô, avegag’ijaṉô n’ôma w’azèryô ne Pyère ôrôy, awulyi nè: Mi pa jeṉa wè na yè gô ntyaga? 27N’arô dandi Pyère. N’agôgi njogoṉi pelè.

28N’arômbi waô Yesu avila gô nagô yi Kayifa agèndizè gô nagô yi Pilatu: avegag’ibanga sôdu. Ndô waômè wi pa jingiṉa gô nagô yi guvèrnèr, waô vende fweva, ko w’ayolya gô nye Paki. 29Yeṉo agogwi Pilatu agènda gôre waô, awulyi yè inè: Ôzozo nde wi bagô ṉwè gôr’ôma wiṉo? 30Awiṉizi waô yè inè: Arwe nè, wiṉo arang’ôyanjisi w’ibe, gavoṉo azwè pa tô bagè gôre wè. 31Yeṉo awulinyô waô ne Pilatu inè: Wongaṉi yè aṉwèmè, ko jèkèlyaṉi yè ga nt’ar’ivangi nyaṉi. Awulinyô yè n’Iju inè: Ivanga nyi pa pa zwè inyanga nyi jôṉ’ôma. 32Arweṉi yeṉo ko igamba ny’awulyô Yesu twa rèti, ny’agambyô yè gô teve njuwiṉi yi be juwô yè.

33Yeṉo arô jingiṉi Pilatu gô nagô, aweyi yè Yesu, awulinyè inè: Awè n’ôga w’Iju? 34Awiṉizi Yesu inè: Ô kamb’igamba nyiṉo awèmè, mbè ô re bulinyô pa nyô n’aṉag’awèṉè g’ômwanji wam̃? 35Awiṉizi Pilatu inè: Myè mw’Iju? Iṉongo nyomè n’imiṉisè impôlô s’aveṉi wè gôre myè: ô re denda p’ande? 36Awiṉizi Yesu inè: Ipangiṉi sam̃ aranga si ntye yiṉo. Arwe nè ipangiṉi sam̃ si re si ntye yiṉo, gavoṉo aṉagi wam̃ w’arô nweṉi gô nkôṽi yam̃ ko my’agôtizô gôr’Iju; ndô vèṉo ipangiṉi sam̃ si pa pila na guṉu gô ntye yiṉo. 37Yeṉo awulinyô yè ne Pilatu inè: Sambô awè n’ôga? Awiṉizi Yesu inè: Nte bulyo, myè ôga. Ayanyô myè n’aṽyeṉi myè gô ntye yiṉo gô takily’ôrèti. Ôm’edu are g’ôzamba w’ôrèti e jogw’inyôy nyam̃. 38Awulinyô yè ne Pilatu inè: Ôrèti, ezom̃a nde?

Ayè bulya pa yeṉo, arô kogwi yè agènda gôr’Iju, awulinya waô inè: Mi pa dènge ndaga mbè gôre yè. 39Ndô aṉw’are ni ntyale inè, gô fèty’edu yi Paki mi ga lèkize ṉwè ôkôte ôm̃ori dyè, sambô aṉwè bela nè, mi ga lèkize ṉwè ôga w’Iju dyè? 40Yeṉo arô tôngi waôdu inè: Arang’ayè, ndô Barabas. Barabas avegag’ekuya.

Currently Selected:

Yôan 18: MYE

Highlight

Copy