Yôan 19

1Yeṉo Pilatu awongi Yesu, aziṽè.

2Isozè s’aṉôgi kôrôṽa y’arèndè, awela yô gw’ewônjô zè, n’aworizi waô yè ngoy ya gelô. 3N’aṽyeṉi waô gôre yè, awulya inè: Mbôlô, ôga w’Iju! N’awôli waô yè asapôga.

4N’arô kogwi Pilatu, awulinye Iju inè: Vônaṉi, mi kogunyè gw’igala gôre ṉwè, ko ṉwè mya inè, mi pa dènge mbe gôre yè. 5Yeṉo agogwi Yesu, bora pe kôrôṽa y’arèndè ni ngoy ya gelô, n’awulinyô waô ne Pilatu inè: Vônaṉi ôma mè.

6Gw’ayenyô yè n’imiṉisè impôlô n’aṉaga w’anyanga w’arôngi nè: Ṽanyè gô krosi! Ṽanyè gô krosi! Awulinyô waô ne Pilatu inè: Wongaṉi yè aṉwèmè, ko banyaṉi yè gô krosi, konde mi pa dènge mbe gôre yè. 7N’awiṉizyô yè n’Iju inè: Azw’are n’ivanga, ni nt’ar’ivangi nyazô, e ga yuwe, konde avangi ôkuṽi wè Ômwaṉa w’Anyambyè.

8Gw’ayogyô Pilatu igamba nyiṉo, aryeṉi pôlô. 9Arô jingiṉi yè gô nagô, awulinye Yesu inè: W’avili na gweṉi? Ndô Yesu e pa fwize yè igamba. 10Yeṉo awulinyô yè ne Pilatu inè: Ô pa kamba na myè? Ô pa mya inè, my’are ni ngulu yi banyo gô krosi, na my’are kè ni ngulu yi dèkizo dyè? 11Awiṉizi Yesu inè: Ô pa tô dwaṉa ni ngulu gôre myè, arwe nè yi pa pô wè avila g’ôrôṽa. Yeṉo ayè y’aveṉi myè gôre wè e janj’ib’ipôlô vyagaṉô.

12Avila gw’egômbe ziṉo Pilatu awutagi gô dèkizè dyè. Ndô Iju w’arôngi nè: J’aw’adèkiz’ôma wiṉo dyè, gambèṉè awè arange ndegô yi Sezar. Ôm’edu e pang’ôkuṽi wè ôga, e sire Sezar. 13Gw’ayogyô Pilatu agamba miṉo, agogunyi Yesu gw’igala, n’alwaṉi baru gw’eka z’ijèkèlya, gô mbôra yi fweyô inè, Ndèkè y’adô, ndô gô nkambiṉi y’Ebèr inè, Gabata. 14Z’avegag’egômbe z’ikekiza si Paki, pyèrè n’agwèr’ôrôṽa. Awulinyi Pilatu Iju inè: Vônaṉi ôgi waṉi. 15Ndô w’arôngi nè: Rômbè, rômbè, ṽanyè gô krosi! Awulinyô waô ne Pilatu inè: Mi ga ṽany’ôgi waṉi gô krosi? Awiṉiz’imiṉisè impôlô inè: Azw’azele n’ôga kaô Sezar. 16Vovo aṉozè yè gôre waô gô banyô gô krosi. Yeṉo awongi waô Yesu, agogunyè.

17N’agumbi Yesu krosi yè ayèmè, agènda gô mbôra yi fweyô inè, mbôra yi nkèli, ndô gô nkambiṉi y’Ebèr inè, Golgôta. 18W’aṽanyi yè gô krosi vovo, n’aṉag’awèṉè aṽaṉi na yè, ôm̃ori g’ôgo ôṉôm̃yè, n’ôm̃ori g’ôgo ônyantwè Yesu gô garegare.

19N’arèndi Pilatu irèndo kè, aṽatya yô gô krosi, y’avegagi tèndô pa inè: Yesu yi Nazarèt, ôga w’Iju. 20N’awenge gôr’Iju w’aranguṉ’irèndo yiṉo, konde mbôra y’aṽanyô Yesu gô krosi y’avegagi pyèrè ni nkala: irèndo y’avegagi tèndô pa kè n’Ebèr, ni Grèk, ni Latin. 21Yeṉo imiṉisè impôlô s’Iju s’awulinyi Pilatu inè: Arènda inè: Ôga w’Iju. Ndô rènda nè, awulyi nè: Myè n’ôga w’Iju. 22Awiṉizi Pilatu inè: Nt’are myè tènda pa, my’atèndi.

23Isozè sô banya pe Yesu gô krosi, s’awong’ingoy sè, agera sô akind’anay, sozy’edu ikinda. W’awongi kè kôtô, ndô kôtô yi re pegege ni nyôngô, ndô y’avegagi tum̃ô pa nyôngô fo avila gw’igôṉô kwanga gô ntye. 24Yeṉo awulyaṉi waô inè: Azwè ga rig’ayôkuṉa yô, ndô azwè ga vung’ezôga gô my’ôma wi be niva yô. Arweṉi yeṉo ko igamba ny’Irèndo twa rèti nyi bulya inè: W’ager’ingoy sam̃, avung’ezôga g’ômwanja wi kôtô yam̃. Yeṉo isozè s’alend’isam̃u yiṉo.

25Ndô ngwè yi Yesu na mwô’ngwè ômwantô wi ngi yè, ni Marya, y’ômwantô wi Kilôpas, ni Marya yi Magdala, w’avegagi kum̃aṉa pa pyèrè ni krosi yi Yesu. 26Gw’ayeṉi Yesu ngi yè n’ôṉèngi mè w’arondyô yè kum̃aṉa pa pyèrè na yè, awulinyi ngi yè inè: Ômwantô, vôn’ômwaṉi wo. 27Vovo awulinyi yè ôṉèngi mè inè: Vône ngi yo. N’avila gw’egômbe mèzoṉo ôṉèngi mè awongi yè gô nagô yè.

28Avila vovo, Yesu mya pa inè, isam̃u yôdu y’amaṉi awulyi nè: Mi jeṉ’esôve, ko Irèndo twa rèti. 29Avegagi vovo dôlô imogi ralye ni vinègre. Yeṉo ayôny’isozè eponzi ralye ni vinègre, awela yô gô mpari yi yisop, arutya yô g’ôgwaṉi wè. 30Gw’aliwô Yesu abongi vinègre, awulyi nè: Isam̃u yôdu y’amaṉi. N’alèmbizi yè ewônjô zè mbè, azul’ômwèy.

31Bende yaô yi vende dwaṉa bata gô krosi gô ntyugu yi soṉo, — konde avegagi ntyugu y’ikekiza, ni ntyugu mèyoṉo yi soṉo y’avegagi ntyugu mpôlô, — yeṉo Iju w’aṽambyi Pilatu inè, agôlô ma mongi wi re banyô pa gô krosi mi ga m̃oguṉô, ko waô tômbô. 32Yeṉo aṽyeṉ’isozè, n’amoguṉi waô agôlô m’ôlônga, avila vovo agôlô m’ôm̃ori w’aṽanyô na yè gô krosi. 33Ndô gw’aṽyeṉi waô gôre Yesu, ayena nè, ajuwi, wi re moguṉe yè agôlô; 34ndô ôm̃ori gôr’isozè arum̃’igonga g’ôṽanji wè, n’agogwi ntyiṉa n’aṉingô pelè. 35Ayè yi re yè jeṉa pa are takilya pa, n’agambi mè mi re rèti; avôrô kè inè, e buly’ôrèti, ko ṉwè bekelya kè. 36Isam̃u yiṉo y’arweṉi ko Irèndo twa rèti inè: Vangaṉ’em̃ori gô pi yè z’amoguṉô. 37N’Irèndo imyèṉè kè yi tô bulya inè: Ayè y’arum̃yô waô igonga wi be jeṉè.

38Isam̃u yiṉo vya, Yôsèf y’avili gw’Arimate avegagi kè ôṉèngi wi Yesu, ndô gô ntyorya g’ômwanja w’itya s’Iju, aṽambyi Pilatu inyanga gô bong’ôkuṽa wi Yesu. N’ayiviri Pilatu. Yeṉo aṽyeṉi yè awong’ebende zi Yesu. 39N’aṽyeṉi Nikôdèmô, ayè y’aṽyeṉi gw’alônga ôgwèra gôre Yesu, aṽagi mira n’alôsi bindô pa, y’avisi pyèrè ni nkam̃a y’agwèra. 40Yeṉo awongi waô ebende zi Yesu, avinga zô n’ampèla, ni yom̃a yi nkangô ga nt’avegagi ntyale y’Iju gô bèṉe bende. 41Gô mbôra y’aṽanyô Yesu gô krosi y’avegagi ntyaga; na gô ntyaga mè avegag’ôrôngiṉô ômwoṉa, tôkô pa gw’idô, wi re wi pa bèṉ’ôma ni mori. 42Alimbiṉi waô Yesu gôgô, g’ômwanja w’ikekiza s’Iju, konde ôrôngiṉô mè w’avegagi pyèrè.

Currently Selected:

Yôan 19: MYE

Highlight

Copy