Yôan 21
21
1Isam̃u yiṉo vya, Yesu arô tum̃inyi ôkuṽi wè gôr’iṉèngi, g’ôsaṽa w’eliṽa zi Tiberyade. N’awôm̃unyi yè yeṉo inè:
2Simôn Pyère, ni Tôma, aweyôgô inè, Didime, ni Natanaèl, y’avili gô Kana yi Galile, n’awaṉa wi Zebeday, n’iṉèng’im̃ori mbaṉi yi Yesu, w’avegagi mbôra mô. 3N’awulinyô waô ne Pyère inè: Mi ke jôṉ’intyuè. Awulinyi waô yè inè: Azwè kè azwè be kènda na wè. N’agogwi waô agweṉa gw’elende, ndô ôgwèra mèwoṉo wi pa jôṉ’ezom̃a. 4Ayenjiṉa, Yesu agum̃aṉi g’ôzègè, ndô iṉèngi yi pa mya inè, ayè ne Yesu. 5Awulinyô waô ne Yesu inè: Awaṉa, aṉw’are n’ezom̃a zi nya? Awiṉizi waô yè inè: E zele. 6N’awulinyi yè waô inè: Vungaṉ’elôṽa g’ôzir’ôṉôm̃yè w’elende, gambèṉè aṉwè be jôṉa. Yeṉo avungi waô zô, gambèṉè wi pa jolya gô tô dura zô g’ômwanja w’ibuṉa s’intyuè. 7Vovo ôṉèngi mè w’arondyô ne Yesu, awulinyi Pyère inè: Woṉo ne Rerè! Na gw’ayogyô Pyère inè, woṉo ne Rerè, awori ngoy yè mpôlô, aliry’ôtumbi wè, konde avegagi tele, n’avôswi yè gô mbeṉe. 8Ndô iṉèng’im̃ori y’aṽyeṉi n’elende, ndurag’elôṽa ralye n’intyuè, konde wi re pegege bô ni ntye, w’avegagi ntyanjô pyèrè n’agôm̃i m’iguṽa ataṉè.
9Na gw’ayèzi waô gô ntye, w’ayeṉi vovo ebeke z’ôgôṉi ni ntyuè dimbiṉô pa gô zô ni mpèmba. 10N’awulinyô waô ne Yesu inè: Ṽagaṉ’intyuè si re ṉwè jôṉa pa. 11Yeṉo agweṉi Simôn gw’elende, alur’elôṽa gô ntye ralye n’intyuè impôlô, nkam̃a n’agôm̃i m’intyuè ataṉè ni ntyuè ntyarô; ndô vangaṉe s’alwaṉ’inyenge yeṉo, elôṽa zi pa jarwa. 12Awulinyô waô ne Yesu inè: Yôgôṉi, ko nyaṉi. Na gôr’iṉèngi e re pegeg’ôma w’aṽambyi yè inè: Awè mande? Konde w’amyeṉi nè, ayè ne Rerè. 13N’aṽyeṉi Yesu awonge mpèmba, ava waô yô, ni ntyuè kè mbela mô.
14Yiṉo ne nyongo yi ntyarô y’arum̃inyi Yesu ôkuṽi wè gôr’iṉèngi yè, ayè tôngwa pa avila gw’ijuwa.
15Waô nya pa, Yesu awulinyi Simôn inè: Simôn, y’ômwaṉa wi Yôna, ô tonda myè vyagaṉô na mongi siṉo? Awiṉizyè yè inè: Èñ, Rera, w’avôrô inè, mi tondo. Yesu awulinyi yè inè: Nyez’aw’adombè mam̃. 16N’arô bulinyè yè nyongo yi mbaṉi inè: Simôn, y’ômwaṉa wi Yôna, ô tonda myè? Awiṉizyô yè ne Pyère inè: Èñ, Rera, w’avôrô inè, mi tondo. Yesu awulinyi yè inè: Nyez’adombè mam̃. 17N’awulinyè yè nyongo yi ntyarô inè: Simôn, y’ômwaṉa wi Yôna, ô tonda myè? Pyère ayeṉ’ekèṽa konde Yesu awulinyi yè nyongo yi ntyarô inè, ô tonda myè? N’awiṉizyè yè inè: Rera, w’avôrô isam̃u yôdu, w’avôrô inè, mi tondo. Yesu awulinyi yè inè: Nyez’adombè mam̃. 18Giligili mi bulinyo inè, gw’avegagi wè erumbe, w’alirag’ôtumbi wo, agangaṉe mbôry’edu y’arondyô wè; ndô gô be dômbiṉo, ô be nyonyuṉ’ago mo, ko ôm̃ori diryo ôtumba, arwaṉo gô mbôra yi re wè pa bele kènda. 19Awulyi yeṉo gô tev’ôṉongo w’ijuwa wi be pendize Pyère Anyambyè. Ayè kamba pa yeṉo, awulinyè yè inè: Zônga myè.
20Pyère agegwi, ayeṉ’ôṉèngi mèwoṉo w’arondyô ne Yesu e sônga waô, ayè y’ayèzi gô ntôṉô yi Yesu gw’avegagi waô gô tavulu, awulya inè: Rera, mande be kôtizo? 21Yeṉo gw’ayenyô yè ne Pyère, awulinyi yè Yesu inè: Ndô wiṉo, Rera, e be twa sèṉi gôre yè? 22Awulinyô yè ne Yesu inè: Ja my’abela nè, e ga lwaṉe kwanga gw’ibyi sam̃, ande gôre wè? Zônga wè myè. 23Yeṉo agènd’igamba gôr’awarerè inè, ôṉèngi mèwoṉo e ze juwe. Ndô Yesu e pa bulinye Pyère inè, e ze juwe, ndô inè: Ja my’abela nè, e ga lwaṉe kwanga gw’ibyi sam̃, ande gôre wè?
24Wiṉo n’ôṉèngi mèwoṉo wi takilya g’ômwanja w’isam̃u yiṉo, na wi re yô tènda pa kè. N’azw’avôrô inè, agambi mè mi re rèti.
25Yesu arô dend’isam̃u imyèṉè imyenge; yi re ôma tô tènda yô yôdudu, mi pa tanga nè, ntye yô ko jolye keka ni yangô y’arô tèndyô.
Currently Selected:
Yôan 21: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
