Yôan 7
7
1Isam̃u yiṉo vya, Yesu agangaṉagi gô Galile, konde e pa jivira gô dwaṉa gô Yuda, konde Iju w’awutagi gô jôṉè.
2Ni fèti y’Iju, fèti yi nôge saka, y’arweṉi pyèrè. 3N’awareri yè w’awulinyè inè: Lubwa avila vèṉo, ko kènda gô Yuda, ko iṉèngi yo kè jeṉe ṽilô yi dendô wè. 4E zel’ôma wi janj’ezom̃a gô ntyorya, ko ayèmè bele myô gô bwè: j’aw’adend’isam̃u yiṉo, gambèṉè rum̃iny’ôkuṽi wo gôr’aṉaga. 5Konde vangaṉe awareri yè wi pa bekelye yè. 6Yeṉo awulinyô waô ne Yesu inè: Egômbe zam̃ zi pa twa, ndô egômbe zaṉi zi re keka pa egômbe zôdu. 7Ntye y’ayolye bike ṉwè, ndô yi bika myè, konde mi takilya g’ômwanja wa yô inè, ijanja sa yô si re sibe. 8Vandaṉi, aṉwè, gô fèti yiṉo; mi pa twa gô panda gô fèti yiṉo, konde egômbe zam̃ zi pa keka. 9Ayè bulinya pa waô agamba miṉo, alwaṉi gô Galile.
10Gw’avandi awareri yè gô fèti, avandi yè kè gô fèti, aranga zange ndô ntyora.
11N’awutôgô yè n’Iju gw’egômbe zi fèti, awulya inè: Are na gweṉi? 12N’arweṉi ôlagalag’ômpôlô gôr’aṉaga g’ômwanji wè. Awèwo w’awulyi nè: Wiṉo ôm’ombya. Am̃ori w’awulyi nè: Aranga yeṉo, ndô e fwem̃iz’aṉaga. 13Ndô e pa kamb’ôma zange g’ômwanji wè, g’ômwanja w’itya s’Iju.
14Ndô gw’arweṉi fèti garegare, Yesu avandi gô nagô y’Anyambyè. N’aṉènji yè. 15N’am̃am’Iju, awulya inè: Ôma wiṉo e mya Irèndo sèṉi ayè pa nènga ni mori? 16Awiṉizô waô ne Yesu inè: Inènji sam̃, arang’isam̃imè ndô s’ôma w’arôm̃i myè. 17Jog’ôma abela gô dende ntondiṉi yè, gambèṉè e be mya g’ômwanja w’inènja twa pa si pila gôr’Anyambyè, ntyo mi kamba myèmè. 18Ayè yi kamba ayèmè, e but’ivendi nyèmè; ndô ayè yi but’ivenda ny’ôma w’arôm̃i yè, ôma mèwoṉo are giligili, na gôre yè e zele mbe du. 19Môsès e pa pa ṉwè ivanga? Ndô e zel’ôma gôre ṉwè e penjavenj’ivanga. Ntiṉa nde yi buta ṉwè gô jôṉa myè? 20N’awiṉizi aṉaga inè: Ô re n’iṉiṉ’iṽe. Mande buta gô jôṉo? 21Awiṉizô waô ne Yesu inè: My’alendi elemb’em̃ori, n’am̃ami ṉwèdu. 22Môsès are pa pa ṉwè ikèra, (aranga inè, s’avili gôre Môsès, ndô s’avili gôr’irerè,) n’aṉwè kèr’ôma gô ntyugu yi soṉo. 23Jog’ôma akèrô gô ntyugu yi soṉo, ko ivanga nyi Môsès nyi pa pavô, gambèṉè ntiṉa nde yi bendiṉa ṉwè myè, konde my’are tôliza p’ôma g’ôwenja wi soṉo? 24Ayèkèlyaṉi ga nte jeṉô, ndô yèkèlyaṉi ijèkèlya sa rèti.
25Vovo awulyi awèwo wa mongi Yerusalèm inè: Wiṉo arang’ayè yi butô waô gô jôṉè? 26Na vôna, e kamba zange, ko w’awulinyè ezom̃a! Ko dwaṉa rèti nè, ivangiṉi y’amyeṉi nè, wiṉo ne Krist? 27Ndô ôma wiṉo, azw’avôrô mbôra y’apilô yè; ndô gô be bye Krist, e zel’ôma wi be mya nkôṽa y’apilô yè. 28Na gw’aṉènjagi Yesu gô nagô y’Anyambyè, arôngi nè: Aṉw’avôrô myè, aṉw’avôrô kè mbôra y’avilyô myè: Mi pa bya kè myèmè, ndô ayè y’arôm̃i myè are giligili, n’aṉwè pa myè. 29My’avôrô yè; konde my’avili gôre yè, ayè kè ay’arôm̃i myè. 30Yeṉo awuti waô gô kôtè, ndô e pa taly’ôma ôgo gôre yè, konde igwèri nyè nyi pa diwô ny’atweṉi.
31Awenge gôr’aṉaga w’avegagi vovo w’aṽekelyi yè, n’awulyi waô inè: Gô be bye Krist, e be dende lemba vyagaṉô ni nt’ar’ôma wiṉo denda pa? 32Ifarisi s’ayogyô aṉaga wi dagalag’isam̃u yiṉo g’ômwanji wè. Vovo imiṉisè impôlô n’ifarisi w’arôm̃’aṉaga gô kôtè.
33Awulyi Yesu inè: Mi p’are na ṉwè vo mw’ôlingô, gambèṉè my’akènda gôr’ôma w’arôm̃i myè. 34Aṉwè be buta myè ko ṉwè alènga myè, n’aṉwè ayolye bye gô mbôra yi re myè. 35Vovo awulyaṉ’Iju inè: Ôma wiṉo e be kènda na gweṉi, ko zwè alèngè? E be kènda gôre mongi wi re pazangaṉa pa gôre Grèk, aṉènje Grèk? 36Igamba nyiṉo nyi pivya sèṉi nyi bulyô yè inè: Aṉwè be buta myè ko ṉwè alènga myè, n’aṉwè ayolye bye gô mbôra yi re myè?
37Gô ntyugu num̃uṉa, ntyugu mpôlô yi fèti, Yesu agum̃aṉi gôre, arônga inè: Jog’ôma ajeṉ’esôve, e ga ṽye gôre myè, ko yè jonga. 38Ayè yi bekelya myè, e be pôv’iloṽi y’aṉingô ma bo avila gw’iwum̃u nyè ga nte buly’Irèndo. 39Awuly’igamba nyiṉo g’ômwanja w’Iṉiṉ’Iṽya ny’avegagi gô pô gôre waô w’aṽekelyi yè, konde Iṉiṉ’Iṽya nyi pa diwô ny’apenyô, konde Yesu e pa diwô apendizyô.
40Awenge gôr’aṉaga, gw’ayogyô waô agamba miṉo, w’awulyi nè: Giligili wiṉo n’ôvogisi mèwoṉo. 41Am̃ori w’awulyi nè: Wiṉo ne Krist. Ndô am̃ori w’awulyi nè: Sambô Krist e be bya avila gô Galile? 42Irèndo yi pa bulya inè, Krist e bya avila gô mbuṽe yi David, n’avila gô nkala yi Betelèm y’alwaṉôgô David? 43Yeṉo arweṉi mpaga gôr’aṉaga g’ômwanji wè. 44Awèwo gôre waô w’aṽeli gô kôtè, ndô e pa taly’ôma ôgo gôre yè.
45Vovo awinyi aṉaga mè w’arôm̃yô gô kôtè awinya gôr’imiṉisè impôlô n’Ifarisi. Na w’awulinyi waô mongi w’arôm̃i waô inè: Ntiṉa nde yi re ṉwè e pa bage yè? 46N’awiṉizi aṉaga w’arôm̃yô inè: Pa kamb’ôma yeṉo ni mori, ga nte kamb’ôma mèwoṉo. 47Ifarisi s’awiṉizi waô inè: Aṉwè kè aṉw’afwem̃izyô? 48Ar’ôma gôre mongi pangiṉa ge gôr’ifarisi are yè bekelya pa? 49Ndô aṉaga wiṉo wi re w’amye ivanga, wi re savô pa! 50Nikôdèmô, ayè y’aṽyeṉi gôre Yesu ôgwèra, avegagi kè ôm̃ori gôre waô, awulinyi waô inè: 51Ivangi nyazô nyi keṽiz’ôma ny’alônge jogw’agambi mè amya nt’are yè denda pa? 52Awiṉizi waô yè inè: Awè kè mwô’Galile? Gèlagèla, gambèṉè ô be jeṉa nè, agogwe ôvogisi avila gô Galile.
53N’agèndi waô ôm’edu gô nagô yèmè.
Currently Selected:
Yôan 7: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
