Yôan 8
8
1N’agèndi Yesu gô nômba yi yôlivi. 2Ndô bunya arô kèndi gô nagô y’Anyambyè, n’aṽyeṉi aṉaga waôdu gôre yè. N’alwaṉi yè baru aṉènja waô.
3Vovo irèndisi n’ifarisi w’aṽagi gôre yè ômwantô w’agôtyô e belaṉa n’ôṉôm̃e; n’alôṽi waô yè gô garegare y’aṉaga; 4awulinyi waô Yesu inè: Ôṉènji, ômwantô wiṉo akôtô e belaṉa n’ôṉôm̃e. 5Môsès azômbyi zwè gw’ivanga inè, antô ôṉongo wiṉo wi ga vungô adô: sambô ô bulya sèṉi g’ômwanji wè? 6W’awulyi yeṉo gô kèṉizè, ko waô dèng’igamba nyi re waô ko sozizè. Ndô Yesu alèmbi mbè, arènda n’ôm̃eṉô wè gô ntye. 7Ndô gw’aṽambagi waô yè, aṉongwi ko, awulya inè: Ayè yi r’ibe fo gôre ṉwè e ga lônge punge yè idô. 8N’arô dèmbi yè mbè, arènda n’ôm̃eṉô wè gô ntye. 9Gw’ayogyô waô igamba mè, w’azuryô gw’irèm̃i yaô; agogwi waô ôm̃ori ôm̃ori, avila gôr’aṉèro kwanga gôr’awangô, n’arigaṉi Yesu ayè dadyè n’ômwantô vovo gô garegare. 10Na gw’aṉongwi Yesu ko, e jeṉ’ôm’ômwèṉè kaô ômwantô, n’awulinyè yè inè: Ômwantô, waô w’asozizo wi re na gweṉi? Ô re p’ôgara n’ôma? 11N’awiṉizi yè inè: E zel’ôma, Rera. N’awulinyô yè ne Yesu inè: Myè kè mi pa po ôgara, gèndaga, ko alend’ibe nyèṉè.
12N’arô kambi Yesu na waô, awulya inè: Myè n’ôzange wi ntye; ayè yi sônga myè e ze kangaṉe gô mpiri, ndô e be dwaṉa n’ôzange w’em̃èṉo.
13Vovo awulinyô yè n’ifarisi inè: Ô takilya g’ômwanja w’ôkuṽi womè; agambi mo mi zele rèti. 14Awiṉizyô waô ne Yesu inè: Vanga my’atakilya g’ômwanja w’ôkuṽi wam̃imè, agambi mam̃ mi re rèti, konde my’avôrô mbôra y’avilyô myè ni mbôra yi kèndô myè; ndô aṉwè, aṉwè pa mye mbôra y’avili myè ge mbôra yi kèndô myè. 15Aṉwè jèkèlya ga nt’ar’ôzôṉe; myè, mi pa jèkèly’ôma. 16Na ja my’ajèkèlya, ijèkèlyi sam̃ si re rèti, konde my’azele myè dadyè, ndô Rerè y’arôm̃i myè are na myè. 17Are tèndô pa gw’ivangi nyaṉi inè, agamba m’aṉag’aṽaṉi mi re giligili; 18mi takilya g’ômwanja w’ôkuṽi wam̃imè, Rerè y’arôm̃i myè e takilya kè g’ômwanji wam̃. 19Yeṉo awulinyi waô yè inè: Reri yo are na gweṉi? Awiṉizi Yesu inè: Aṉwè pa mya myè ge Reri yam̃. Arwe nè aṉwè amyeṉi myè, gavoṉo aṉwè atô mya kè Reri yam̃.
20Yesu agambi agamba miṉo gw’aṉènjagi yè gô nagô y’Anyambyè, gô mbôra y’avegagi egara z’aṉiva, ndô e pa kôtô ôma, konde igwèri nyè nyi pa diwô ny’atweṉi.
21Arô bulinyô waô ne Yesu inè: Vo mi kènda, aṉwè be buta myè, ko ṉwè juwa gw’ibe saṉi, aṉw’ayolye bye gô mbôra yi kèndô myè. 22Vovo awuly’Iju inè: E be jôṉ’ôkuṽi wèmè, gô bulyè inè: aṉw’ayolye bye gô mbôra yi kèndô myè? 23N’awulinyi yè waô inè: Aṉw’avili gô ntye; myè, my’avili gw’igôṉô. Aṉwè aṉaga wi ntye yiṉo; myè, my’arang’ôma wi ntye yiṉo. 24Yeṉo abulinya myè ṉwè inè, aṉwè be juwa gw’ibe saṉi; konde j’aṉwè pa bekelya inè, myè ne yè, gambèṉè aṉwè be juwa gw’ibe saṉi. 25Awulinyi waô yè inè: Awè mande? Awiṉizyô waô ne Yesu inè: Ga nt’are myè bulinya pa ṉwè avila gw’ipakilya. 26My’are n’isam̃u imyenge gô bulinya ṉwè na gô jèkèlya g’ômwanji waṉi; ndô ayè y’arôm̃i myè are giligili, n’isam̃u y’ayogyô myè gôre yè, yô bulyô myè gô ntye. 27Wi pa kôtiza du inè, agambi na waô g’ômwanja wa Rerè. 28Yeṉo Yesu awulinyi waô inè: Gô be diwô ṉwè, aṉwè abanyi Ômwaṉa w’ôma, vovo aṉwè be mya inè, myè ne yè, na inè, mi pa dend’ezom̃a, myèmè, ndô mi kamb’isam̃u y’aṉènjô myè ne Rerè. 29Ayè y’arôm̃i myè are na myè; e zele tiga pa myè anka, konde mi dend’egômbe zôdu isam̃u yi tondô yè.
30Gw’agambagi Yesu isam̃u yiṉo, awenge w’aṽekelyi yè. 31N’awulinyi yè Iju w’aṽekelyi yè inè: J’aṉw’adwaṉa gw’igambi nyam̃, gambèṉè aṉwè be dwaṉa rèti iṉèngi yam̃; 32aṉwè be my’ôrèti, n’ôrèti wi be panga ṉwè yangayanga. 33Awiṉizi waô yè inè: Azwè awaṉa w’Abraam, azwè pa dwaṉ’asaka w’ôma ni mori; ntiṉa nde yi bulyo inè: Aṉwè be kalw’awôntye? 34Yesu awiṉizi waô inè: Giligili mi bulinya ṉwè inè, ôm’ edu e janj’ibe, ayè ôsaka w’ibe. 35N’ôsaka e pa dwaṉa pèkèpèkè gô nagô; ndô ômwaṉa ayè dwaṉa pèkèpèkè gô yô. 36Sambô j’Ômwaṉa apanga ṉwè awôntye, gambèṉè aṉwè be dwaṉa awôntye giligili. 37My’avôrô inè, aṉwè awaṉa w’Abraam; ndô aṉwè buta gô jôṉa myè, konde igambi nyam̃ nyi zele jingiṉa pa boli gw’irèm̃i yaṉi. 38Mi bulya isam̃u y’ayenyô myè gôre Reri yam̃; n’aṉwè kè aṉwè dend’isam̃u y’ayenyô ṉwè gôre reri yaṉi. 39Awiṉizi waô yè inè: Reri yazô n’Abraam. Awulinyô waô ne Yesu inè: Arwe nè aṉwè awaṉa w’Abraam, gavoṉo aṉw’atô janj’ijanja s’Abraam. 40Ndô vèṉo aṉwè buta gô jôṉa myè, ôma wi re bulinya pa ṉwè ôrèti w’ayogyô myè avila gôr’Anyambyè. Abraam e pa denda yeṉo. 41Aṉwè dend’ijanja sa reri yaṉi. Awulinyi waô yè inè: Azw’arang’awaṉa w’aronda, azw’are ni Rerè mori, ayè n’Anyambyè. 42Awulinyô waô ne Yesu inè: Arwe nè Anyambyè ne Reri yaṉi, gavoṉo aṉw’atô tonda myè; konde my’agogwi avila gôr’Anyambyè, mi pa bya myèmè, ndô ayè arôm̃i myè. 43Ntiṉa nde yi re ṉwè pa kôtiza nte kamba myè? Konde aṉwè jolye jogw’igambi nyam̃. 44Aṉw’avili gôre reri yaṉi Satan, n’aṉwè jivira gô dend’itongiṉa sa reri yaṉi. Ay’avegagi ôyôṉisi avila gw’ipakilya, e pa dwaṉa kè g’ôrèti, konde ôrèti wi zele gôre yè. J’akamb’inôka, e kamb’ezom̃’izèmè; konde ay’ônôki ni rerè y’inôka. 45Ndô gô re nè mi kamb’ôrèti, aṉwè pa bekelya myè. 46Mande gôre ṉwè e be surya myè n’ibe? Ja my’akamb’ôrèti, ntiṉa nde yi re ṉwè e pa bekelya myè? 47Ayè yi r’ôma w’Anyambyè e pôganyô agamba m’Anyambyè; gô ntiṉa yiṉo aṉwè pa pôganyô mô, konde aṉwè aranga mongi Anyambyè.
48Awiṉizyô yè n’Iju inè: Azw’azele mbèm̃ gô bulya inè, awè mwô’Samarya, na inè, ô re n’iṉiṉ’iṽe? 49Awiṉizi Yesu inè: My’azele n’iṉiṉ’iṽe; ndô mi dube Reri yam̃, ko ṉwè toṽa myè. 50Ndô mi pa but’ivendi nyam̃imè; ar’ôm̃ori wi buta nyô na wi jèkèlya. 51Giligili mi bulinya ṉwè inè, jog’ôma apenjavenj’igambi nyam̃, ayeṉ’ijuwa. 52Iju w’awulinyi yè inè, vèṉo azwè mya inè, ô re n’iṉiṉ’iṽe. Abraam are juwa pa, n’ivogisi kè, ko wè tô bulya inè: Jog’ôma apenjavenj’igambi nyam̃, alemb’ijuwa. 53Ô r’ômpôlô vyagaṉô ni reri yazô Abraam, yi re juwa pa? N’ivogisi kè yi re juwa pa: Ô pang’ôkuṽi wo ga mande? 54Awiṉizi Yesu inè: Ja my’apendiz’ôkuṽi wam̃imè, gambèṉè ivendi nyam̃ nyi zel’ezom̃a. Reri yam̃ ayè pendiza myè, ayè yi bulyô ṉwè inè, Anyambyè yaṉi, 55aṉwè pa myè. Ndô my’avôrô yè; na ja mi tô bulya inè, my’amye yè, gambèṉè my’adwaṉ’ônôki ga ṉwè. Ndô my’avôrô yè, na mi penjavenj’igambi nyè. 56Abraam, ya reri yaṉi, ayeṉi mbya gô jeṉe ntyugu yam̃: n’ayeṉi yè yô, ayeṉe mbya. 57Awulinyô yè n’Iju inè: Ô pa twa agôm̃i m’impum̃’ataṉè, gambèṉè ô re jeṉa p’Abraam? 58Awulinyô waô ne Yesu inè: Giligili mi bulinya ṉwè inè: Abraam lwaṉaga ro, my’are.
59Yeṉo awongi waô adô gô pungè mô; ndô Yesu azombuṉi, agogwa avila gô nagô y’Anyambyè.
Currently Selected:
Yôan 8: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
