Yôan 9
9
1Gw’avyagaṉi Yesu, ayeṉi ôma w’avegag’ipoku avila gw’ayanyô yè. 2N’aṽambyô yè n’iṉèngi yè kotè yiṉo inè: Ôṉènji, mande ayanj’ibe, ôma wiṉo mbè izombi yè, gw’ayanyô yè ipoku? 3Awiṉizi Yesu inè: Arang’ayè ge izombi yè, waô ayanj’ibe, ndô arweṉi yeṉo inè, ijanja s’Anyambyè si ga rum̃inyô gôre yè. 4Mi ga yanje ṽilô y’ôma w’arôm̃i myè gô p’ar’ôm̃anda; ôgwèra wi bya, vovo e zel’ôma re ko jolye janja. 5Ôlingô wi re myè gô ntye yiṉo, myè n’ôzange wi ntye yiṉo.
6Ayè kamba pa yeṉo, arôny’igwaṉa gô ntye, avange ntyèngè ndèli n’igwaṉa. N’agili yè ntyèngè mè gw’antyo m’ipoku, awulinyè inè: 7Gènda, ayôvuṉa gw’everô zi Silôa (ina mènyoṉo nyi pivya inè, itôm̃ô). N’agèndi yè, ayôvuṉa, aṽya kè njeṉaga. 8Irangaṉô yè na waô w’ayeṉi yè gw’alônga inè, aṉègiragi, w’awulyi nè: Wiṉo arang’ayè y’alwaṉagi baru aṉègiraga? 9Am̃ori w’awulyi nè: Ayè ne yè. Am̃ori nè: Nyawè, ndô ar’egolaṉi ga yè. Ayèmè awulyi nè: Myè ne yè. 10Yeṉo awulinyi waô yè inè: Antyo mo m’aṉunguṉô sèṉi? 11Awiṉizi yè inè: Ôma wi fweyô inè, Yesu, apangi ntyèngè ndèli, agila yô gw’antyo mam̃, awulinya myè inè: Gènda gw’everô zi Silôa, ko jôvuṉa. Akènda myè gôgô, ayôvuṉa, ajeṉa myè. 12Awulinyi waô yè inè: Ôma mèwoṉo are na gweṉi? Awiṉizi yè inè: My’amye.
13N’aṽagi waô gôr’ifarisi ayè y’avegag’ipoku. 14Ndô ntyugu mè y’avangi Yesu ntyèngè ndèli aṉunguṉ’ antyo m’ôma mè y’avegagi soṉo. 15Yeṉo arô bambyô kè ne ifarisi nt’alèngi yè ngulu yi jeṉa. N’awulinyi yè waô inè: Agili ntyèngè ndèli gw’ antyo mam̃, ayôvuṉi myè, ayeṉa. 16Yeṉo awèwo gôr’ifarisi w’awulyi nè: Ôma wiṉo e pa pila gôr’Anyambyè, konde e pa penjavenje ntyugu yi soṉo. Ndô am̃ori w’awulyi nè: Ôm’ombe ko jolye dende lemba ôṉongo wiṉo sèṉi? N’arweṉi mpaga gôre waô. 17N’arô bulinyi waô ipoku inè: Ô bulya sèṉi g’ômwanji wè, gô re nè aṉunguṉi antyo mo? Awiṉizi yè inè: Ayè ôvogisi.
18Ndô Iju wi pa bekelya g’ômwanji wè inè, avegag’ipoku, na inè, antyo mè m’aṉungunyô, kaô gw’aweyi waô izombi y’ôma w’avenyô ngulu gô jeṉa. 19W’aṽambyi waô inè: Wiṉo n’ômwaṉi waṉi wi bulyô ṉwè inè, ayanyô ipoku? Sambô vèṉo e jeṉa sèṉi? 20Awiṉiz’izombi yè inè: Azw’avôrô inè, wiṉo n’ômwaṉi wazô, na inè, ayanyô ipoku; 21ndô nte jeṉè vèṉo, ge ôma w’aṉunguṉ’antyo mè, azw’amye yè. Atweṉi ôṉèro, ṽambyaṉi ayèmè, e be kamba g’ômwanja w’ôkuṽi wèmè. 22Izombi yè y’agambi yeṉo konde y’aryeṉ’Iju; konde Iju w’aliwô w’akenji nè, jog’ôma amèma nè, Yesu ne Krist, gambèṉè e be tômbô avila gô nagô yi soṉo. 23Yeṉo awuly’izombi yè inè: Atweṉi ôma, ṽambyaṉi yèmè.
24Yeṉo arô fweyi ifarisi nyongo yi mbaṉi ôma w’ayanyô ipoku, awulinyè inè: Zum̃iny’Anyambyè; azw’avôrô inè, ôma wiṉo ôm’ombe. 25Awiṉizi yè inè: Jog’ayè ôm’ombe, mi pa mya; my’avôrô ôsam̃u ôm̃ori inè, my’avegag’ipoku, ndô vèṉo mi jeṉa. 26Awulinyi waô yè inè: Alendi ande gôre wè? Aṉunguṉi antyo mo sèṉi? 27Awiṉizi yè waô inè: My’are ṉwè bulinya pa, ndô aṉwè pa jogo; aṉwè bela tô jogo sèṉi? Aṉwè bela kè gô dwaṉ’iṉèngi yè? 28N’aroṽi waô yè awulya inè: Awè n’ôṉèngi wè; ndô azwè, azwè iṉèngi yi Môsès. 29Azw’avôrô inè, Anyambyè agambi ni Môsès; ndô ôma wiṉo azw’amye nkôṽa y’avili yè. 30Ôma mè awiṉizi waô inè: Ar’igamba nyi mamô inè, aṉwè pa mye nkôṽa y’avili yè, ndô aṉunguṉi antyo mam̃. 31Azw’avôrô inè, Anyambyè e pa pôganyô aṉag’aṽe; ndô jog’ôma adubè alende ntondiṉi yè, gambèṉè Anyambyè apôganyô yè. 32Ntye yiṉo ga pakilye pa jogaṉô inè, ar’ôma re nunguṉa p’antyo m’ôma w’ayanyô ipoku. 33Arwe nè ôma wiṉo e pa pila gôr’Anyambyè, gavoṉo ayolye dend’ezom̃a. 34Awiṉizi waô yè inè: W’ayanyô gw’ibe sitevô, ndô ô tô nènja zwè! N’azugi waô yè gw’igala.
35Ayogyô Yesu inè, w’asugi yè; n’alataṉi yè na yè, awulinyè yè inè: Ô bekely’Ômwaṉa w’Anyambyè? 36Awiṉizi yè inè: Ayè mande, Rera, ko mi bekelyè? 37Awulinyô yè ne Yesu inè: Ô re yè jeṉa pa, ne yè yi kamba na wè. 38N’awulyi yè inè: Rera, mi bekelya. N’azavinyè yè.
39Avila vovo Yesu awulyi nè: My’are bya pa gô ntye yiṉo gw’ijèkèlya, inè, waô wi re wi pa jeṉa wi ga yeṉe, na waô wi jeṉa, wi ga galw’apoku. 40Ifarisi sinyèwo s’avegagi na yè, gw’ayogyô waô agamba miṉo, w’awulinyi yè inè: Azwè kè azw’are apoku? 41Awiṉizyô ne Yesu inè: Arwe nè aṉw’are apoku, gavoṉo aṉwè pa tô dwaṉa n’ibe. Ndô vèṉo aṉwè bulya inè: Azwè jeṉa. Yeṉo ibe saṉi si dwaṉa.
Currently Selected:
Yôan 9: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
