Gyenesis 25
25
Abraham ne Ketura mma
(1 Berɛsosɛm 1.32-33)
1Na Abraham waree yere bio, a ne din de Ketura. 2#1 Be 1.28-34 Na ɔwoo Simran ne Yoksan ne Medan ne Midian ne Isbak ne Sua maa no. 3Na Yoksan woo Seba ne Dedan. Na Dedan mma ne Asurim ne Letusim ne Leummim. 4Na Midian mma ne Efa ne Efer ne Hanok ne Abida ne Eldaa. Eyinom nyinaa yɛ Ketura mma.
5Na Abraham de nea ɔwɔ nyinaa maa Isak. 6Na mmea a aka no mma a Abraham wɔ no de, bere a Abraham te ase no, ɔkyɛɛ wɔn ade, na ogyaa wɔn kwan fii ne ba Isak ho ma wɔkɔɔ apuei wɔ apuei asase no so.
Abraham wu ne ne sie
7Na Abraham nna a odii si mfe ɔha aduɔsɔn anum. 8#Gye 15.15; Hiob 5.26 Na Abraham gyaa ne honhom mu, na owui dwen pa mu, na wabɔ akwakoraa, na onyaa mfe pii na otiw ne nkurɔfo wɔ asamando.
9Na ne mma Isak ne Ismael siee no Makpela bodan mu, wɔ Hetini Efron, Sohar ba, afuw no mu, wɔ Mamre ntentenso, 10#Gye 23.16-17 afuw a Abraham tɔe wɔ Het mma nsam no. Ɛhɔ na wosiee Abraham ne ne yere Sara. 11#Gye 24.62 Na Abraham wu akyi no, Onyankopɔn hyiraa ne ba Isak. Na Isak tenaa Lahairoi abura ho.
Ismael awo ntoatoaso
(1 Berɛsosɛm 1.28-31)
12 #
Gye 21.13
Na eyi ne Abraham ba Ismael a Misraimni Hagar, Sara afenaa no, wo maa Abraham no awo ntoatoaso: 13Na eyi ne Ismael mma din a wɔde frɛɛ wɔn awo ntoatoaso no: Ismael abakan ne Nebaiot wɔn a wɔka ho ne Kedar, Adbeel, Mibsam, 14Misma, Duma, Masa, 15Hadad, Tema, Yetur, Nafis ne Kedma. 16#Gye 17.20 Eyinom ne Ismael mma, na eyinom ne wɔn din, sɛnea wɔn nkuraa ne wɔn nsraban te, atitiriw dumien ne wɔn aman.
17(Na Ismael nkwa mu mfe a odii ni: Mfirihyia ɔha aduasa asɔn. Na ogyaa mu, na owui, na otiw n'agyanom wɔ asaman). 18#Gye 16.12 Na wɔtenae fi Hawila kosii Sur a ɛwɔ Misraim ntentenso de rekɔ Asiria. Na ɔne ne nuanom antumi antena asomdwoe mu.#25.18 Eyi yɛ nkyerɛase a ebinom de ama. Hebri nkyerɛase no mu nna hɔ papa.
Esau ne Yakob awo
19Na eyinom ne Abraham ba Isak awo ntoatoaso: Abraham woo Isak. 20Na Isak dii mfirihyia aduanan no, ɔwaree Rebeka, Aramni Betuel ba a ofi Mesopotamia ne Aramni Laban ne nua.
21Na Isak srɛɛ AWURADE maa ne yere, efisɛ ɔyɛ obonin, na AWURADE tiee n'adesrɛ no, na ne yere Rebeka nyinsɛnee.
22Na nkokoaa no pempem wɔn ho wɔ ne yam. Na ose: Sɛ ɛte saa a, na mete hɔ yɛ dɛn? Na okobisaa AWURADE. 23#Gye 27.29; Mal 1.2; Rom 9.10-12 Na AWURADE ka kyerɛɛ no sɛ:
Aman abien na ɛwɔ wo yam,
na nnipa baanu a wobɛwo wɔn no,
bɛtetew wɔn ho mu, afi wo yafunu mu.
Na ɔman no biako bedi biako so,
na ɔpanyin no bɛsom akumaa no.
24Na ne nna duu so sɛ ɔbɛwo no, na hwɛ, nta wɔ ne yam. 25Na nea odi kan fi bae no, na ne ho yɛ kɔɔ, ne ho nyinaa wɔ nwi kusuu. Enti wɔtoo no din, Esau.#25.25 ESAU: Asekyerɛ ne: Enwinwi. 26Na ɛno akyi no, ne nua no fi bae, na ne nsa kura Esau nantin, enti wɔtoo no din Yakob.#25.26 YAKOB: Asekyerɛ ne: Nantinkurafo. Na wɔwoo wɔn no, na Isak adi mfe aduosia.
Esau tɔn ne panyin
27Na mmofra no nyinii, Na Esau yɛ onipa a waben yiye wɔ ahayɔ mu ne ɔhamuni, na Yakob de, ɔyɛ onipa a odwo a ɔte ntamadan mu. 28Na Isak dɔ Esau, efisɛ ne hanam yɛ no dɛ; na Rebeka de ɔdɔ Yakob.
29Na Yakob noaa aduan bi, na Esau fi wuram bae no, na wabrɛ. 30Na Esau ka kyerɛɛ Yakob sɛ: Ma me ade kɔkɔɔ yi bi minni ɛ, na mabrɛ. (Enti wɔde too no din Edom#25.30 Asekyerɛ ne: Ade kɔkɔɔ) 31Na Yakob kae sɛ: Tɔn wo panyin ma me nnɛ. 32Na Esau kae sɛ: Hwɛ, owu na merebewu yi, na ɔpanyin yi bɛyɛ me dɛn? 33#Gye 27.36; Heb 12.16 Na Yakob kae sɛ: Ka ntam kyerɛ me nnɛ. Na ɔkaa ntam kyerɛɛ no tɔn ne panyin maa Yakob. 34Ɛnna Yakob maa Esau abodoo ne asɛdua a wɔanoa no bi; na odidi nomee, na ɔsɔre kɔɔ ne kwan. Na sɛnea Esau ammu ne panyin ne no.
Currently Selected:
Gyenesis 25: ATWDB
Highlight
Share
Copy
Want to have your highlights saved across all your devices? Sign up or sign in
Revised Akuapem Twi DC Bible © Bible Society of Ghana, 2017.
